San Marcos 10 - Zapoteco de Aloápam

Bittu dica udhequi ttu unbiyuu nuila gueni

¹ Jesús udáttebe lheꞌe yiesi Capernaum die daca lo yu nu te láni Judea, lo yu nu te attu ladu gue yoo Jordán. Ca benni nna bedesinttebacana atta du Benniha. Lee nna bededulottebe bodileꞌenie ca nua attiba labibe runie.

² Ttulhe ca fariseo ubigattebacana atta du Jesús, qui cuꞌubiacana Benniha nna unnaba tisattebacane gue gansi gua dica udhequi ttu unbiyuu nuila gueniha.

³ Lee nna becabittebe guecani re cana: —¿Bila rá lo ley bocaꞌana Moisés?

⁴ Ca fariseo nna becabicana rácana: —Lo ca ley bocaꞌana Moisés rinne rá, dequi guadicaba elaꞌa ttu unbiyuu leni nuila gueniha leni ttu sitsi ilhidhana utena len nua atta rixxiꞌa bixa lo niꞌa gue elaꞌacana.

⁵ Laniala nna rá Jesús cana: —Moisés aníaba bocaꞌanabi lo sitsi unle, cumu de yatterba de ditile.

⁶ Ttiaca atti chi ureba yies lo yu-ni, Tata Do Iyyabaaha benie ttu unbiyuu nna ttu nuila nna.

⁷ Denuala nna ocaꞌana unbiyuu-na tata nan gueni qui utsá náni leni nuila aca latselani.

⁸ Lania nna irpabacana eyacacana attiba ttuba benni. Larcala nna lärga anca ca nua chupa benni, sinuqui ttuba benni chi beaca ca nua.

⁹ Nuarcala nna läga dica elhaꞌa ttu benni lheꞌe loesi ca benni chi bequeti Tata Do Iyyabaaha.

¹⁰ Atti chi besini Jesús lenie ca benni rudheti ca tisa ruleꞌe lheꞌe yoꞌoha nna unnaba tisa dacabacabi Benniha gue bixa diani nu chi re.

¹¹ Jesús ráttebe cabi: —Unbiyuu nu udhequini nuila gueniha qui otsá náni len attu nuila subi nna nu te tulha guebani aca nua.

¹² Gansi nuilaha udhequini unbiyuu gueniha, nianna otsá náni len attu unbiyuu subi, nu te tulha gueguabani aca nua.

Jesús rinnabe elha nabani gue ca unto

¹³ Ca benni nna uchecana ca unto guecaniha lo Jesús qui uxxúa nee iquicani innábe elha nabani guecani lo Tata Do Iyyabaaha, ttiaca ca benni rudheti ca tisa ruleꞌe nna bedhaca disattebacabi ca benni che ca untoha.

¹⁴ Atti biláni Jesús nu run ca biꞌiniha nna guanni dittebanie. Nianna ráttebe ca biꞌiniha: —Gualgüelha ca unto-na itacana len neti, bittu usunale, cumu ca benni anca attiba ca unní liba ancacana benni rinnabia Tata Do Iyyabaaha.

¹⁵ Neti nna gualíbatia rpea le, gansi bittuba dhielhale innabia Tata Do Iyyabaaha le attiba ttu unto, läga aca iselale ca benni rinnabia Tata Do Iyyabaaha.

¹⁶ Nianna bedotteba lo nee ca untoha, atti bexxúatteba nee iqui ca nua qui unnabe elha nabani gue ca nua lo Tata Do Iyyabaaha.

Ttu unbiyuu texxatta gueni rinne lena Jesús

¹⁷ Atti chi dia Jesús edeguꞌe neda tsie, ruxunnini ttu unbiyuu bisía bedú xibini loe, atti unnaba tisattebana Benniha ráne: —Maestro, lu ancalu benni tsee. ¿Bi unia qui gatta elha nabani quia ttu tsaba?

¹⁸ Jesús ráttebe na: —¿Biaca neti rálu benni tsee? Cumu tsa läganu te ancana benni tsee, sunruba Tata Do Iyyabaaha anque benni tsee.

¹⁹ Lu nna chiba yulu nu rá lo ca ley bocaꞌana Tata Do Iyyabaaha len Moisés: Bittu utsá roꞌolu nu bittu anca latselalu, bittu lhanalu lhe bittu un lelu cuentaba unlu xiyya gue benni subi lhe bittu dhi yielu lhe gapalu respeto tata nan guelu lhe.

²⁰ Unbiyuuha nna becabina rána: —Maestro, iyába unní, atti ancalia güexxaha uduloa runia.

²¹ Laniala nna begüia Jesús loni, nianna ucanie gueni, atti re na: —Attuba ttu nu reasa unlu. Beyya guattoꞌo iyárecha nu te guelu. Belhi gue nua nna begüee ca benni bittu te gueni. Anía liba nna gatta elha tsee guelu iyyabaaha. Lania nna utátte betteno neti.

²² Ttiaca unbiyuuha nna paba beꞌanna atti bieninna rá Benniha na anía. Siꞌirurba runna deyyana, cumu de ancana nu texxatta gueni.

²³ Laniala nna begüia Jesús sabiꞌaba atta due, atti ráttebe ca benni rudheti ca tisa ruleꞌe: —Cattipa tsitsi anca eꞌeyu ca benni te guequinna acacana benni rinnabia Tata Do Iyyabaaha.

²⁴ Ca benni rudheti ca tisa ruleꞌe nna rebanbaquinbi gue nu rá Benniha. Lee nna bequittebe re cabi: —¡Ca xiꞌinto quia, neti rpea le, ca benni xen lecani gue nu te guecani, cattipa tsitsi anca eꞌeyucana acacana benni rinnabia Tata Do Iyyabaaha!

²⁵ Gaxa guaterla ttu camello lheꞌe belea do xan ttu tsioxa atti ttu benni te gueni eꞌeyuna acana benni rinnabia Tata Do Iyyabaaha.

²⁶ Ca benni rudheti ca tisa ruleꞌe adílaba bebanquinbi, nianna rá loescabi: —Gansi anía anca, ¿núla guadána lhána qui bittu tsia nittina ganna?

²⁷ Begüiatteba Jesús locabi, nianna re: —Ca benni seꞌe yies lo yu-niba bittu dhacana uncana unní, ttiaca Tata Do Iyyabaaha nna gunbe unná, cumu benna iyába raca guee runie.

²⁸ Pedro nna bequittebabi rábi: —Riꞌitu nna iyába nu te guetu bocaꞌantu atti dattebatu len cuinalu.

²⁹ Jesús ráttebe: —Neti nna gualíbatia rpea le, nuxaba benni gansi de lo niꞌa quia o lo niꞌa gue ca tisa gue Tata Do Iyyabaaha, chi bedhá iquini yoꞌo gueni lhe betsini lhe danni lhe tata gueni lhe nan gueni lhe xiꞌinni lhe lo yu gueni lhe

³⁰ dhibana ttu gayua (100) libe yies lo yu-ni, yoꞌo lhe betsini lhe danni lhe tata gueni lhe nan gueni lhe nuila gueni lhe xiꞌinni lhe lo yu lhe masquiba un ca benni uyúna elha disa. Tiempu chi dabaha nna dhína elha nabani gatta ttu tsaba gueni.

³¹ Ttiaca ixe ca nu runi ancacana nu ra xxeni leni nnanna eyacacana nu bittu ra xxeni leni, ixeguaba ca nu bittu ra xxeni leni nnanna eyacacana nu ra xxeni leni.

Ni reyonna libe rixxiꞌa Jesús gaxasná gattie

³² Jesús denerube lo ca benni rudheti ca tisa ruleꞌe, deyuꞌucabi neda diacabi lheꞌe yiesi Jerusalén. Ca benni rudheti ca tisa ruleꞌe nna rebanbaquinbi, adí ca benni denoha nna rasilhabaquinna. Laniala nna bedeaxie ca benni tsiꞌinu rudheti ca tisa ruleꞌe, atti udulottebe utixxiꞌanie ca biꞌiniha gue iyába nu sate.

³³ Lee na re cabi: ―Niba diari lheꞌe yiesi Jerusalén atta udaxxucana neti, Benni unbiyuu daa iyyabaaha, qui utecana neti las ná ca bixxudi anca nu lo-na leni ca nu ruleꞌe nu rá lo ca ley bocaꞌana Moisés. Ca unná nna oquinna iquicani gattia, lacana nna utecan neti las ná ca benni dittu.

³⁴ Ca unnuha nna udhaca güecana neti, quincana neti lhe uttu ttu xxencani loa lhe utticana neti lhe ttiaca eyonna ubisa nna eyacattebatia.

Jacobo lenbi Juan rinnabacabi lo Jesús ttu nu bittu dhacabi uncabi

³⁵ Jacobo lenbi Juan ca xiꞌini Zebedeo ubigattebacabi atta du Jesús, nianna rácabi Benniha: —Maestro, riꞌitu nna raca letu unlu nu innábatu lo cuinalu.

³⁶ Lee nna ráttebe cabi: —¿Bi raca lele unia?

³⁷ Lacabi nna ráttebacabi: —Gansi chi rinnabialu iyyabaaha ugüelhalu dho ttuttu daca derechu guelu, a ttuttu nna dho daca rabesa guelu.

³⁸ Jesús ráttebe cabi: —Lebiꞌi nna läga yule bixunna rinnabale. ¿Si guarudhaca lele guadále satele loesi nu satea? ¿Si guadále uchíale uyúle elha disa loesi elha disa uyúa?

³⁹ Lacabi nna becabicabi rácabi: —Guadábatu. Jesús becabie re ca biꞌiniha: —Gualíba lebiꞌi nna guadábale uyúle loesi elha disa uyúa, guadábale satele loesi nu satea lhe

⁴⁰ ttiaca läga neti ralha unia qui dho ttule daca derechu quia, a ttule nna daca rabesa quia. Tata quia do iyyabaaha liba innee nupaxa chi gaꞌananie ralha cuia lhuitta.

⁴¹ Atti bienini a tsii ca biꞌini rudheti ca tisa ruleꞌe Jesús, nu rinnaba Jacobo lenbi Juan, bisaꞌattebaquinbi len ca biꞌiniha.

⁴² Jesús uxttebe iyábacabi attu atta subi, nianna re ca biꞌiniha: —La gua yuxeabale dequi ca nu rinnabia gue ca yiesi dittu-na, ritee lo bedábacana rinnabiacana ca benni banquinna. Unnuhaguaba run ca nu lo ra xxeni lequinna lhe rite lo bedábacana nu runcana.

⁴³ Ttiaca lebiꞌi nna läga dica udhaca loesle aná. Cumu nu rdacana acana nu ra xxeni leni guele nna unnuha udá náni lole.

⁴⁴ Larcala nna nuxale rdacale acale nu lo, unnuha nna acana attiba ttu nu ttoꞌo lo sina lole.

⁴⁵ Cumu ni neti Benni unbiyuu daa iyyabaaha läga delha yies lo yu-ni qui udá ná ca benni loa, sinuqui delhaba qui udá náya lo ca benni, gattia utea elha nabani quia qui lhá ixeru ca benni qui bittu tsia nitticana lhe.

Jesús benie beali lo nu xua loni te láni Bartimeo

⁴⁶ Dequilaha nna bisína Jesús lheꞌe yiesi Jericó lenie ca biꞌini rudheti ca tisa ruleꞌe. Atti chi die eríe lheꞌe yiesiha lanie ca biꞌiniha, denoguaba ixeru ca benni lhe nía roꞌo nedaha do ttu unbiyuu xua loni benni lá Bartimeo xiꞌini benni lá Timeo rinnabana belhi.

⁴⁷ Atti bieninna Jesús benni beaca lasie Nazaretba Benniha die ritee nía, udulottebana uresiꞌana rána: —¡Jesús, benni datía David, guatúachi lelu neti!

⁴⁸ Ixe ca benni rudhaca disacana nu xua loniha qui eyaca sina, ttiaca adíla idisa uresiꞌa nua rána: —¡Benni datía David, guatúachi lelu neti!

⁴⁹ Laniala nna uleda Jesús, nianna udhelhattebe ca nu güia gualisacana nu xua loniha. Atti güiacana gualisacana nua nna ráttebacan na: —Bettipa lelu lhe udulí tte lhe qui chi raxie lu.

⁵⁰ Nu xua loniha nna uruꞌuna bixxina lari nucunaha, atti tturba udhina udú lína diana ubigana atta du Jesús.

⁵¹ Jesús unnaba tisattebe na re na: —¿Bi raca lelu unia guelu? Nu xua loniha nna becabina rána Benniha: —Maestro, raca lasia eyali ca iyya loa-ni.

⁵² Jesús ráttebe na: —Chinca beyya. Cumu de güia lelu güeyacabalu nuarca beacalu. Snaba lania beali lo nua, atti diattebana denona Jesús.