San Lucas 4 - Zapoteco de Aloápam

Nu xxegüiha uxacana dhi yiena Jesús

¹ Jesús chi yuꞌu Espíritu gue Tata Do Iyyabaaha lheꞌe cuerpu guee atti bedee roꞌo yoo Jordán. Espírituha nna uchee Benniha lo ttu yu bisi.

² Níaba udoe chua (40) sá. Nía nua uxaca nu xxegüiha dhi yiene. Lee nna tsa bittu utoe itú ttuba udoe nía. Atti uca chua (40) sá nna bisía utunie.

³ Nu xxegüiha nna rán Benniha: —Gansi gualínlu ancalu xiꞌini Tata Do Iyyabaaha, gusi ca iyya-ni eyacacana ttaxtila.

⁴ Jesús becabie gueni re na: —Lo ca sitsi gue Tata Do Iyyabaaha rá: “Läga sunru len ttaxtila aca ban ca benni, [sinuqui lacana aca bancana leni iyába ca tisa rinne Tata Do Iyyabaaha.]”

⁵ Nu xxegüiha nna uchettebana Benniha axta iqui ttu iꞌiya yadharu. Nía beleꞌenna Benniha ttu nnelaru iyába ca yiesi xeni seꞌe yies lo yu-ni.

⁶ Nianna, atti rá nu xxegüiha Benniha: —Neti utea len lu itúrecha elha rinnabia gue ca yies-na qui innabialu cana, iyáxea nu tsee te guecani lhe, cumu las nába yuꞌucana. Denua nna uteba cana leni nuxaba raca lasia.

⁷ Larcala nna gansi lu udú xibilu loa, cuequi xenlu neti lhe iyábacana unna guelu.

⁸ Jesús becabie re na: —[Nu rea güia, nu xxegüi,] cumu lo ca sitsi gue Tata Do Iyyabaaha rá: “Suntteba Tata Do Iyyabaaha Benni bananie lu cuequixxenlu, suntteba Ben-na ixuuri lo sina guee lhe.”

⁹ Laniala nna bedechee nu xxegüiha Jesús lheꞌe yiesi Jerusalén. Nía belhopina Benniha axta atta yadharu gue iqui yotuha. Nianna rána Benniha: —Gansi gualí ancalu xiꞌini Tata Do Iyyabaaha, binna sanga de udiqui-ni leni axta lireeha.

¹⁰ Cumu lo ca sitsi gue Tata Do Iyyabaaha gaꞌana rá: Tata Do Iyyabaaha idhelhe ca ingeli guee qui uyúcabi lu.

¹¹ Ca ingeliha nna güilhenbacabi lu qui bittu icheculu len ca iyya-na.

¹² Jesús becabie re na: —Gaꞌanaguaba lo ca sitsi gue Tata Do Iyyabaaha: “Bittu cuꞌubialu Tata Do Iyyabaaha Benni bananie lu.”

¹³ Atti bitturba beselani nu xxegüiha bixa leni cuꞌubiana Jesús, bocaꞌanttebana Benniha qui lenla nna edeaca xxena.

Ca benni gue Nazaret riguꞌu niꞌacani Jesús

¹⁴ Jesús bequie deyye lo yu gue Galilea. Chi yuꞌu lheꞌe cuerpu guee Espíritu Benni ra xxeni lee gue Tata Do Iyyabaaha. Nianna, itúba nía rinnecana gue nu runi Jesús.

¹⁵ Lee nna ruleꞌenie ca benni guee anca benni Israel coa atta siaba ca yoꞌo atta ritupacana rudheticana ca tisa gue Tata Do Iyyabaaha. Iyábacana ribequi xencana Benniha.

Jesús besine lheꞌesi Nazaret

¹⁶ Laniala nna beyye lheꞌesi Nazaret atta bixenie. Lee nna attiba chi labie runie sá redí le ca benni guee anca benni Israel, utaꞌattebe lheꞌe yoꞌo atta rudheti ca nua ca tisa gue Tata Do Iyyabaaha. Lee nna udulíttebe qui ulabe lo ca sitsi gue Tata Do Iyyabaaha.

¹⁷ Laniala nna begüeecana Benniha ca sitsi dia loque ca tisa unne profeta Isaías. Atti udhalie lo sitsiha nna guattiꞌe atta rinne rá:

¹⁸ Espíritu gue Tata Do Iyyabaaha yuꞌe lheꞌe cuerpu quia. Benna chi ulequiesie neti qui tsiaya quixxiꞌaya ca tisa tsee gue gaxasná rinnabia Tata Do Iyyabaaha len ca benni bittu te gueni. Udhelhaguabe neti qui quixxiꞌaya gaxasná lhá ca nu te lisiyya-na lhe qui unia iláni ca nu xua loquinna lhe qui odiláya ca nu seꞌe siꞌi-na lhe

¹⁹ quixxiꞌaya gue sá atti uni Tata Do Iyyabaaha ttu nu tsee len ca benni.

²⁰ Laniala nna bottubi Jesús sitsiha, bote Benniha len nu run yuda lheꞌe yoꞌo atta rudetti ca benni Israel ca tisa gue Tata Do Iyyabaaha, atti bedottebe. Iyába ca nu seꞌe lheꞌe yoꞌoha nna tsaba do locani lo Benniha.

²¹ Lee nna udulottebe re: —Nasá guaxxína uca aní lole nu rá lo ca sitsi bieninle belaba-ni.

²² Iyába ca benni tseeba rinnecana gue Jesús, rebanbaquinna gue ca tisa gaꞌana tsee rinne Benniha. Nianna, rá loescani: —¿Si läba xiꞌin José bunni?

²³ Jesús re cana: —Neti yua nna lebiꞌi rulaba lele gále neti ca tisa te rinne ca benni rácana: “Nu reoni ca benni rani, luba ben sanga ramedi la luba.” Racaguabinle innále: “Delo iyá nu chi binatu benlu lheꞌesi Capernaum, bengua loes nua-ni lheꞌesi guelhi.”

²⁴ Lee nna ráguabe cana: —Neti nna gualíbatia rpea le, ni ttu benni anca profeta gue Tata Do Iyyabaaha bittu raca uyúcan na lheꞌesi gueni.

²⁵ Gualíba ixeru nuila bidabi seꞌe len ca benni Israel atti udo profeta Elías, lania nua bitturu uca iyya delo tsunna ida yuꞌu xxupa beo. Denua nna uca ubina itúba nía.

²⁶ Ttiaca läga udhelha Tata Do Iyyabaaha Elías tsiabi atta do ni ttu ca nuila bidabi gue Israel-ni. Atta do nuila bidabi do lheꞌesi lá Sarepta, nu re lo yu gue yiesi lá Sidón liba udhelha Benniha biꞌiniha.

²⁷ Anáguaba useꞌe ixe ca nu uyuꞌu isagüe uca ttu nu anca attiba yiesusu te láni lepra len ca benni Israel atti udo profeta Eliseo. Ttiaca ni ttu ca nua bittu beacacana, sunruba benni dittu lá Naamán nu beaca lasni lo yu te láni Siria beaca.

²⁸ Atti bienini iyába ca nu seꞌe lheꞌe yoꞌoha nu rá Jesús, bisaꞌalhabaquinna.

²⁹ Lacana nna udulíttebacana bebequicana Jesús lheꞌe yiesiha. Atti uchecane axtaba iqui iꞌiya gue atta re yiesiha qui udelhacane roꞌo belhaꞌa.

³⁰ Ttiaca lee nna rulha guebacani betee deyye.

Jesús beonie unbiyuu yuꞌu be xxegüi lheꞌe cuerpu gueniha

³¹ Jesús diattebe lheꞌesi Capernaum nu re lo yu gue Galilea. Ca sá atti redí le ca benni Israel nna beleꞌettebanie cana.

³² Ca benni seꞌe nía nna bebanbaquinna gue nu ruleꞌenie cana, cumu rinnee ca tisa ruleꞌe lo anque Benni ra xxeni lee.

³³ Lheꞌe yoꞌo atta rudheti ca benni Israel ca tisa gue Tata Do Iyyabaaha du ttu unbiyuu yuꞌu be xxegüi lheꞌe cuerpu gueni. Unnuha nna uresiꞌana itú iqui itú leni rána:

³⁴ —¡Begüelha riꞌitu! ¿Biaca dalu rugaꞌa guelu len riꞌitu, Jesús gue Nazaret? ¿Si dalu qui ulhuxalu riꞌitu? Neti gua yuba nuxa ancalu. Lu ancalu Benni do riesi anca gue Tata Do Iyyabaaha.

³⁵ Jesús bedhaca dise be xxegüiha re na: —¡Bedhea roꞌolu! ¡Bería lheꞌe cuerpu gue unbiyuu-na! Lania nna uruꞌunatteba be xxegüiha unbiyuuha lo yu lagüi iyába ca benni seꞌe nía, atti beríattebana lheꞌe cuerpu gue unnuha, tsa lärgabi bedhaquinna unbiyuuha.

³⁶ Iyábacana usquinna, nianna rinnaba tisa loescani rácana: —¿Gaca gasnonni anca ca tisa rinne Ben-ni? Leni elha ra xxeni lee lhe leni elha rinnabia lhe runie mandadu ca be xxegüi-na qui eríacana, ca be xxegüi-na nna rudobacana tisa reríacana.

³⁷ Lheꞌe iyába ca lheꞌesi seꞌe nía rinnecana gue nu runi Jesús.

Jesús beonie ixe ca benni rani

³⁸ Beríaba Jesús lheꞌe yoꞌo atta rudheti ca benni Israel ca tisa gue Tata Do Iyyabaaha, utaꞌattebe lheꞌe yoꞌo gue Simón. Nan gue nuila gue Simón nna tebabi ranbi yuꞌuxxattabi xilhá. Ca benni seꞌe nía nna unnabacabi lo Jesús qui eyonie biꞌiniha.

³⁹ Jesús bedeatta iquie atta te nuilaha, atti bedhaca dise xilháha. Unnuha nna beríattebana lati biꞌiniha. Nuila nna snaba lania guadhattebabi benbi nu go ca benni seꞌe nía.

⁴⁰ Atti chi dia ubisa-na chadina, iyába ca benni seꞌe benni rani guecani gue bixaba isagüe, uchettebacana ca unnuha lo Jesús. Benniha nna bexxúa nee iqui ttu ttu ca nua qui beonie cana.

⁴¹ Ixeguaba ca benni raniha bería ca be xxegüi lheꞌe cuerpu guecani. Ca be xxegüiha nna ribesiꞌacana rácana: —¡Lu ancalu Xiꞌini Tata Do Iyyabaaha! Ttiaca lee nna rudhaca dise cana, bittu rugüelhe cana innecana, cumu ca unnuha nna yubacana Benniha anque Cristu benni chi gaꞌanani Tata Do Iyyabaaha odile ca benni.

⁴² Betteyú dila nna biría Jesús güie ttu atta nuttu benni seꞌe. Ca benni nna güequittebacana beguilacane atti chi bisíncana atta du Benniha nna uxacattebacana ucuedacane qui bitturu gaxa tsie.

⁴³ Ttiaca lee nna re cana: —Raca duelha tsiaya lheꞌe adí ca yiesi qui quixxiꞌaya ca tisa tsee gue gaxasná rinnabia Tata Do Iyyabaaha, cumu denuala udhelhe neti daya.

⁴⁴ Lee nna diabe lheꞌe ca yiesi seꞌe lo yu gue Galilea riguixxiꞌe ca tisa gue Tata Do Iyyabaaha lheꞌe ca yoꞌo atta rudheti ca benni Israel ca tisa gue Benniha.