San Lucas 3 - Zapoteco de Aloápam

Ca tisa unne Juan biꞌini rugadi indaha

¹ Atti uca tsinu (15) ida anca Tiberio César, nu rinnabia gue ca lo yu baba Roma, lania anca Poncio Pilato nu rinnabia gue lo yu gue Judea. Herodes nna ancana nu rinnabia gue lo yu gue Galilea, betsini Felipe nna ancana nu rinnabia gue ca lo yu te lácani Iturea lhe Traconite lhe. Nu lá Lisanias nna ancana nu rinnabia gue lo yu te láni Abilinia;

² Anás lenna Caifás nna ancacana bixxudi xeni rinnabia. Lania nua unne Tata Do Iyyabaaha belise Juan xiꞌini Zacarías atti dobi lo yu bisiha.

³ Juan güiattebabi itúba ca lo yu seꞌe biꞌa dhacaba yoo Jordán rixxiꞌenbi ca benni odú xiyyancana gue nu lä anca tsee runcana qui eyadicana inda, anía nna dhi Tata Do Iyyabaaha elha xen lasi gue ca tulha guecani.

⁴ Ucaba attiba ancaba lo ca sitsi beni profeta Isaías, atta rábi: Ttu benni cuesiꞌa lo yu bisiha innábi: “Gualeseꞌe tsee attiba ttu neda reaca tsee qui isía Benni bananie ri-na. Gualeseꞌe lhixxa attiba ttu neda relixxana.

⁵ Iyába ca atta re lhietti-na esácana iyába ca iꞌiya-na lhe ca atta xua loma-na lhe eyaca lapacana. Ca neda yuꞌu xicuacana elixxacana, ca neda anca xxayya loquinna eyacacana sibi.

⁶ Iyába ca benni seꞌe yies lo yu-ni iláquinna Benni odile cana idhelha Tata Do Iyyabaaha.”

⁷ Ixeru ca benni risina atta do Juan qui ugadibi cana inda. Labi nna rábi cana: —¡Lebiꞌi, nu datía belha! ¿Nú utixxiꞌenna le dequi gualábale lo elha disa nu chi dala uyúle?

⁸ Gualuni nu anca lhatsiru qui uleꞌe lo gualí chi bodú xiyyanle bodaxxule neda gue Tata Do Iyyabaaha. Bittu aquinle ulaba lele innále: “Gualába riꞌitu de ancatu benni datía Abraham.” Cumu neti nna gualíbatia ria, axta ca iyya seꞌe-ni guacaba eyon Tata Do Iyyabaaha cana benni datía Abraham.

⁹ Anáguaba chiguaba du tsee ttu iyya ttee qui ichúna axta lhu ca yaga-na. Larcala iyába ca yaga bittu ribía nu anca tsee gueni nna irúbacana qui tsiacana lo gui.

¹⁰ Denua nna iyába ca benni seꞌe nía rinnaba tisacana rácana Juan: —¿Bila anca nu untu?

¹¹ Juan becabibi guecani rábi cana: —Nu seꞌe chupa cue xoni nna utena ttu cue nua leni nu bittu te gueni, nu te nu rona utena nu go nu bittu te gona.

¹² Bisíngua ttulhe ca güequixa seꞌe ridí belhi deyya Roma qui gadicana inda. Lacana nna unnaba tisacana Juan rácan bi: —Maestro, ¿bila anca nu untu?

¹³ Juan becabibi rábi cana: —Bittu uquixale xxenru dequide nu anca dhíle.

¹⁴ Anáguaba ttulhe ca soldado unnaba tisacana rácana: —Riꞌitu nna ¿bila anca nu untu? Juan becabibi rábi cana: —Bittu xalhaba unniasinle benni sunruba qui aca utecana belhi len lebiꞌi, lä uteguale parti guecani gue nu bittu gualí bencana lhe. Gualaca xen lele len nu naxale.

¹⁵ Ca benni seꞌe nía nna tsitsiba cuidadu rudocana, cumu chi seꞌecana ribedacana isía Cristu. Denua nna rulaba lecani racaquinna gaxa Juanba biꞌiniha ancabi Cristu.

¹⁶ Ttiaca Juan ráttebabi iyábacana: —Gualíba neti rugadia benni inda, ttiaca chi dala Benni ugadie le inda leni Espíritu gue Tata Do Iyyabaaha, len gui lhe. Benniha nua raru xxeni lee atti neti. Neti nna niba läbi elha ralha idhasia lo guaracha guee.

¹⁷ Benniha nna chi den tsee barquilu qui un tsee xua xuxtila, lee nna cuequiesie xuaha lheꞌe te. Xuaha nna eguꞌu tsee benniha atta ttuatsee, ttiaca teha nna uttebe nua lo gui nu tsa bittu reolana.

¹⁸ Aníba lhe leni adírba ca tisa lhe belisa Juan ca benni, utixxiꞌenbi cana ca tisa tsee rixxiꞌa gue Tata Do Iyyabaaha.

¹⁹ Utisaguabi Herodes nu anca nu rinnabiaha rábi na: —Bittu anca tsee edo lenna Herodías nuila gue betsiniha, anáguaba gue iyába ca nu lä anca tsee chi benna lhe.

²⁰ Delo iyá ca nu lä anca tsee chi ben Herodes nna bedienrulana iqui nua de utixxana Juan lisiyya.

Jesús udie inda

²¹ Ttu sá atti rugadi Juan inda iyába ca benni anáguaba Jesús udiguabe inda. Laca rinne lenie Tata Do Iyyabaaha nna bealtteba iyyabaaha.

²² Atti guaditteba Espíritu gue Tata Do Iyyabaaha dee anque attiba ttu becha, udoe iqui Jesús. Iyyabaahali nna bieni tsiꞌi Benni do nía re: —Lu ancalu xiꞌinia Benni racatia gueni, neti doa redaca lasia len luu.

Aní lá ca benni datía Jesús

²³ Attiba tu rerua (30) ida chi ancani Jesús atti uduloe benie sina chi gaꞌanani Tata Do Iyyabaaha unie. Ca benni nna racaquinna anque xiꞌini José. José ancabi xiꞌini Elí;

²⁴ Elí ancabi xiꞌini Matat; Matat ancabi xiꞌini Leví; Leví ancabi xiꞌini Melqui; Melqui ancabi xiꞌini Jana; Jana ancabi xiꞌini José;

²⁵ José ancabi xiꞌini Matatías; Matatías ancabi xiꞌini Amós; Amós ancabi xiꞌin Nahum; Nahum ancabi xiꞌini Esli; Esli ancabi xiꞌini Nagai;

²⁶ Nagai ancabi xiꞌini Maat; Maat ancabi xiꞌini Matatías; Matatías ancabi xiꞌini Semei; Semei ancabi xiꞌini José; José ancabi xiꞌini Judá;

²⁷ Judá ancabi xiꞌini Joana; Joana ancabi xiꞌini Resa; Resa ancabi xiꞌini Zorobabel; Zorobabel ancabi xiꞌini Salatiel; Salatiel ancabi xiꞌini Neri;

²⁸ Neri ancabi xiꞌini Melqui; Melqui ancabi xiꞌini Adi; Adi ancabi xiꞌini Cosam; Cosam ancabi xiꞌini Elmodam; Elmodam ancabi xiꞌini Er;

²⁹ Er ancabi xiꞌini Josué; Josué ancabi xiꞌini Eliezer; Eliezer ancabi xiꞌini Jorim; Jorim ancabi xiꞌini Matat;

³⁰ Matat ancabi xiꞌini Leví; Leví ancabi xiꞌini Simeón; Simeón ancabi xiꞌini Judá; Judá ancabi xiꞌini José; José ancabi xiꞌini Jonán; Jonán ancabi xiꞌini Eliaquim;

³¹ Eliaquim ancabi xiꞌini Melea; Melea ancabi xiꞌini Mainán; Mainán ancabi xiꞌini Matata; Matata ancabi xiꞌini Natán;

³² Natán ancabi xiꞌini David; David ancabi xiꞌini Isaí; Isaí ancabi xiꞌini Obed; Obed ancabi xiꞌini Booz; Booz ancabi xiꞌini Salmón; Salmón ancabi xiꞌini Naasón;

³³ Naasón ancabi xiꞌini Aminadab; Aminadab ancabi xiꞌini Aram; Aram ancabi xiꞌini Esrom; Esrom ancabi xiꞌini Fares; Fares ancabi xiꞌini Judá;

³⁴ Judá ancabi xiꞌini Jacob; Jacob ancabi xiꞌini Isaac; Isaac ancabi xiꞌini Abraham; Abraham ancabi xiꞌini Taré; Taré ancabi xiꞌini Nacor;

³⁵ Nacor ancabi xiꞌini Serug; Serug ancabi xiꞌini Ragau; Ragau ancabi xiꞌini Peleg; Peleg ancabi xiꞌini Heber; Heber ancabi xiꞌini Sala;

³⁶ Sala ancabi xiꞌini Cainán; Cainán ancabi xiꞌini Arfaxad; Arfaxad ancabi xiꞌini Sem; Sem ancabi xiꞌini Noé; Noé ancabi xiꞌini Lamec;

³⁷ Lamec ancabi xiꞌini Matusalén; Matusalén ancabi xiꞌini Enoc; Enoc ancabi xiꞌini Jared; Jared ancabi xiꞌini Mahalaleel; Mahalaleel ancabi xiꞌini Cainán;

³⁸ Cainán ancabi xiꞌini Enós; Enós ancabi xiꞌini Set; Set ancabi xiꞌini Adán; Adán ancabi xiꞌini Tata Do Iyyabaaha.