San Lucas 24 - Zapoteco de Aloápam

Atti beacani Jesús

¹ Dumincu primerba sá redú lo xumanu, diltochiga udá ca nuilaha diacabi lo baa gue Jesús, nujacabi ca seti rure xixxi. [Diarguaba adí ca nuila len lacabi lhe.]

² Atti bisíncabi roꞌo belea atta te baaha nna biláquinbi lärga re iyya nu yaya roꞌo beleaha atta rena.

³ Utaꞌabacabi lhiꞌu nna lärga nu cuerpu gue Jesús Benni bananie ri biláquinbi nía.

⁴ Níaba seꞌecabi raca guatequinbi, bittu rería niꞌelhaquinbi bixa uncabi, attirba elha ucaxxela chupa ca unbiyuu nucu xo racalaa guecabi useꞌecabi lhuittacabi.

⁵ De usbaquinbi nna bodeattatteba locabi lo yu. Ca unbiyuuha nna unnettebacabi rácabi: —¿Biaca reguilale Benni anca bani-na atta yuꞌu ca nu yatti-ni?

⁶ Lärga nu Benniha te-ni. Chiba beaquin Benniha. Gualorexxa lele nu unne Benniha atti sna requibe Galilea.

⁷ Lee nna re: “Neti Benni unbiyuu daa iyyabaaha, labíaba utecana neti las ná ca benni te tulha guecani lo Tata Do Iyyabaaha, lacana nna utácana neti lo ya crusi, ttiaca eyonna ubisa nna eyacatia.”

⁸ Lania liba bexxa lecabi ca tisa unne Jesús.

⁹ Dequide besincabi güiacabi lo baaha nna utixxiꞌattebaquinbi a sinía (11) ca biꞌini bedheti ca tisa beleꞌe Benniha gue iyába nu biláquinbi, iyáguaba adí ca benni seꞌe nía lhe.

¹⁰ María Magdalena lenbi Juana lhe María nan gue Jacobo lhe adírba ca nuila lhe, lacabi nua utixxiꞌaquinbi ca biꞌini bedheti nu beleꞌe Jesús gue nu biláquinbiha.

¹¹ Ca biꞌini bedheti nu beleꞌe Benniha nna tsa läga güia lecabi gue nu rá ca nuilaha, cumu ucaquinbi dequi läganu dica ixuu nua rá ca biꞌiniha.

¹² Ttiaca Pedro nna bigaattebabi diabi roꞌo baaha. Atti begüiabi lheꞌe baaha, a sunruba ca lari bitesi Benniha re nía. Lania nna güequittebabi deyyabi lheꞌe yoꞌoha, rebanbinbi gue nu ucaha.

Nu guate ca benni yuꞌu neda dia daca lheꞌe yiesi Emaús

¹³ Snaba la sáha nna, chupa ca biꞌini bedheti nu beleꞌe Jesús diacabi daca lheꞌe yiesi Emaús. Unnuha rena attiba sinía (11) kilómetro leni Jerusalén.

¹⁴ Lacabi nna diacabi rinnecabi gue iyába nu ucaha.

¹⁵ Laca rinne len loescabi lhe rinnaba tisa loescabi lhe cuinaba Jesús ubigue uyuꞌe neda lencabi.

¹⁶ Ttiaca masquiba biláquinbi Benniha nianna läga uca eyon biacabi Benniha.

¹⁷ Jesús unnaba tise re: —¿Biunna rinne len loesle laca diale yuꞌule neda-ni? Lacabi nna siꞌirurba runcabi beseꞌe sicabi.

¹⁸ Ttucabi, biꞌini lá Cleofas, becabibi rábi: —¿Si sun luba unní nu dittu dolu Jerusalén-ni bittu yulu gue nu yaꞌa sutsutteba chi ucaba?

¹⁹ Laniala unnaba tisa Jesús re: —¿Bi uca? Lacabi nna rácabi Benniha: —Nu guate Jesús gue Nazaret. Benniha uque ttu profeta, lee nna xxeniba anca ca milagru benie lhe anáguaba nu unnee lhe benie nua lo Tata Do Iyyabaaha lhe lo iyába ca benni lhe.

²⁰ Ttiaca ca nu lo gue ca bixxudi-na lencana ca uxtisi guetu-na betecana Benniha las ná ca nu boquinna iquicani gattie. Ca unnuha nna betácane lo ya crusi.

²¹ Riꞌitu nna xen letu Benniha anque Benni odile riꞌitu ca nu Israel-ni, ttiaca nasá chinca tsunna ubisa uca iyába nu rátu-ni.

²² Masquiba ttu chupa ca nuila sela len riꞌitu-na chi bencabi bebanintu. Lacabi nna baniha sna ancarla chulha güiacabi atta te baaha.

²³ De nuttu cuerpu gue Benniha guattiꞌacabi, nuarca bequicabi besíacabi lheꞌe yoꞌo atta seꞌetuha. Nianna, rácabi dequi beleꞌequinbi ca ingeli. Ca ingeliha nna rácabi dequi Jesús do banbe.

²⁴ Laniala güia ttu chupa ca benni guetu guagüiacabi roꞌo baaha. Lacabi nna guattiꞌabacabi anca attiba rába ca nuilaha, ttiaca Jesús nuttue biláquinbi.

²⁵ Laniala nna rá Jesús ca biꞌiniha: —¡Lebiꞌi, cattipa ditile! ¿Núcalunni tsia lele ca tisa unne ca benni uca profeta?

²⁶ ¿Si läba anába chi gaꞌana sate Cristuha antisla eyopie iyyabaaha qui uni Tata Do Iyyabaaha aca Benniha Benni ra xxeni lee?

²⁷ Laniala nna uduloe utixxiꞌanie ca biꞌiniha iyába nu rá lo ca yitsi gue Tata Do Iyyabaaha atta rinne guee uduloe len nu rá lo ca sitsi beni Moisés, besiguibe unnee nu rá lo iyába ca sitsi beni ca profetaha.

²⁸ Atti chi bisíncabi roꞌo lheꞌesi atta diacabiha nna Jesús benie dequi ttebe die.

²⁹ Ttiaca lacabi nna duelhaba bencabi gue Benniha qui eyaꞌane, nianna rácabi Benniha: —Ni tte beꞌana len riꞌitu. Chiba guadi ubisa, ela bunni chi aca. Laniala utaꞌa Jesús qui eyaꞌane len ca biꞌiniha.

³⁰ Atti chi doe roꞌo mexa len ca biꞌiniha nna bedaxxuttebe ttaxtila. Dequide betee xquixaru len Tata Do Iyyabaaha ulhaꞌattebe ttaxtilaha begüee ca biꞌiniha.

³¹ Snaba lania nna bisía uca beon biacabi Jesús, ttiaca Benniha nna bennitti lottebe.

³² Nianna, rá loescabi: —Anla nuarca la de ya de nu racani lastoori atti dedee rixxiꞌanie ri ca tisa dia lo ca sitsi gue Tata Do Iyyabaaha laca dedee deyuꞌe neda len riꞌi.

³³ Snaba lania nna beguꞌuttebacabi neda bequicabi dedaacabi Jerusalén. Níaba bettettiꞌacabi iyába sinía (11) ca biꞌini bedheti ca tisa beleꞌe Jesús, seꞌecabi ttu reba leni adí ca benni.

³⁴ Ca benni seꞌe nía nna rácabi a chupa ca biꞌiniha: —Gualíba, beacabani Jesús. Simón chi bilenbi Benniha.

³⁵ Laniala nna utixxiꞌa ca benni besinaha iyába nu guatecabi atti diacabi yuꞌucabi neda, gue gaxasná uca beon biacabi Jesús atti ulheꞌe ttaxtilaha lhe.

Jesús ucaxxe atta seꞌe ca benni bedheti nu beleꞌe

³⁶ Sna seꞌeba ca biꞌiniha rixxiꞌacabi nu guatecabi, atti chi ucaxxe Jesús udúe lagüi guecabi, nianna re ca biꞌiniha: —Xen su lee gualtseꞌe.

³⁷ Lacabi nna usitsitsiabaquinbi cumu ucaquinbi ga ttu espírituba nua biláquinbi.

³⁸ Laniala unne Jesús re ca biꞌiniha: —¿Biaca seꞌele rasinle? ¿Biaca rudú chupana lele lhe?

³⁹ Gualgüiarga ca náya-ni lhe ca niꞌaya-ni lhe. Cuinaba neti unní. Gualcana neti, gualgüiatte nna cumu ttu espíritu läga anca nua len sitta bela atti rilenle anca dua-ni.

⁴⁰ Dequide unnee re anía, beleꞌettebe ca nee lhe ca niꞌe lhe.

⁴¹ Ca biꞌiniha nna de reꞌoba lecabi lhe de rebanbaquinbi lhe ituttuaba bittu ria lecabi gansi gualí Benniha nua du nía. Jesús unnaba tise re: —¿Bila te guele-ni qui gori?

⁴² Laniala begüeecabi Benniha salhaꞌa belha biyexxu lo gui len saroꞌo besinttoo.

⁴³ Benniha nna bedaxxuttebe nua utoe aníba locabi.

⁴⁴ Laniala re ca biꞌiniha: —Nu guatea-ni ancana nu utixxiꞌatia le atti sa duba len lebiꞌiha. Neti nna ria, labíaba aca iyába nu rixxiꞌa quia dia lo ca ley bocaꞌana Tata Do Iyyabaaha len Moisés, nu gaꞌana lo ca sitsi beni ca benni uca profetaha lhe nu gaꞌana lo ca Salmo-na lhe.

⁴⁵ Laniala utixxiꞌenie ca biꞌiniha bixa dia le nu rá lo ca sitsi-na, qui anáchu sadú lecabi,

⁴⁶ nianna re ca biꞌiniha: —Anába rá lo ca sitsi-na: “Neti Cristu labíaba gattia, atti eyonna ubisa nna eyacatia eríaya lheꞌe baa atta yuꞌu ca nu yatti-na.”

⁴⁷ Lebiꞌi nna tsiale cuenta quia lheꞌe iyába ca yiesi seꞌe itúba yies lo yu-ni qui quixxiꞌenle ca benni, gále cana: “Guadiba Tata Do Iyyabaaha elha xen lasi guele gansi odú xiyyanle gue nu lä anca tsee runle, eyequile odaxxule neda gue Ben-na lhe. Lheꞌe yiesi Jerusalén-ni dhulole quixxiꞌale ca tisa-na.

⁴⁸ Lebiꞌi ancale ca benni biyú lole iyá nu ucaha.

⁴⁹ Neti nna güidhelhaba benni chi rá Tata quiaha utee len lebiꞌi. Larcala niba gualtseꞌe lheꞌe yiesi Jerusalén-ni axta qui dhíle elha raca len daa iyyabaaha, qui acale nu ra tsitsi leni.”

Jesús beopie deyye iyyabaaha

⁵⁰ Laniala nna uchee Jesús ca biꞌiniha biría lenie cabi lheꞌe yiesi Jerusalén. Axtaba roꞌo yiesi Betania bisín lanie ca biꞌiniha. Lee nna ulhidhatteba nee güetsaa unnabe aca len Tata Do Iyyabaaha ca biꞌiniha.

⁵¹ Lagüiba due rinnabe aca len Tata Do Iyyabaaha ca biꞌiniha nna beriesttebe beopie deyye iyyabaaha.

⁵² Lacabi nna, dequi de ulequixxencabi Benniha nna attulade reꞌo lecabi bequicabi deyyacabi Jerusalén.

⁵³ Ttu ttu sába useꞌecabi lheꞌeliꞌa gue yotuha rulhacabi gue Tata Do Iyyabaaha, ribequixxencabi Ben-na lhe. Amén.