San Lucas 19 - Zapoteco de Aloápam

Zaqueo nu anca güequixa rdacana ilenna Jesús

¹ Atti chi utaꞌa Jesús lheꞌe yiesi Jericó, lee nna diabe yuꞌe neda utee lheꞌe yiesiha.

² Nía do ttu unbiyuu texxatta gueni, lána Zaqueo. Ancana nu lo gue ca güequixa ridí belhi deyya Roma.

³ Lana nna rdacana ilenna nuxa benni nua lá Jesús, ttiaca bittu ralhana ilenna Benniha de bittu ancana ttunni, cumu yaderba de reru benni lhe.

⁴ De unnuha nna nuarca bigaana uneruna, atti gopittebana lo ttu yaga lá sicómoro du gaxxaba atta tte Jesús qui ilenna Benniha.

⁵ Atti chi bisína Jesús atta donaha, ulidhatteba loe begüie güetsaa, nianna re na: —Zaqueo, begüee lelu, jertte beadi, cumu nnolha raca duelha eyaꞌana lheꞌe yoꞌo gueluha.

⁶ Zaqueo nna quedha beadina nía, ruꞌu tsitsia leni unnabana lo Benniha gueꞌe lheꞌe yoꞌo gueniha.

⁷ Atti bilácani ca benni dia denalha nu ucaha, nianna iyábacana unne güecana gue Jesús, de biaca die seꞌane lheꞌe yoꞌo gue ttu nu runi nu bittu anca tsee lo Tata Do Iyyabaaha.

⁸ Ttiaca Zaqueo nna udulíttebana rána Jesús: —Benni bananie neti, begüiarga, neti utea len ca benni bittu te gueni rulha xea gue iyába nu te quia. Gansi ulana nuxa benni leni nu ben lasia nna, ttapa libe nu uxí sigáya gueni otea len lana.

⁹ Jesús re Zaqueo: —Nasá nna bisíaba sá odilá Tata Do Iyyabaaha ca benni seꞌe lheꞌe yoꞌo-ni, cumu unbiyuu du-ni nna ancaguabana benni datía Abraham.

¹⁰ Cumu neti Benni unbiyuu daa iyyabaaha nna delha eguila ca benni chi dia nitti qui odiláya cana.

Ejemplu gue nu guate ca benni uxí belhi

¹¹ Laca rudo naga ca benni seꞌe nía nu rá Jesús, lee nna utixxiꞌattebanie cana ttu ejemplu. Cumu de chi due gaxxaba Jerusalén nuarca ca benni nna rulaba lecani chi tte deoba innabia Tata Do Iyyabaaha.

¹² Larcala re cana: —Ttu unbiyuu ra xxeni leni diana lheꞌe attu yiesi re idittuchiga qui nía odúcan na acana nu innabia. Laniala nna eyequina esíana.

¹³ Atti chi deoba iríana, uxttebana tsii ca nu ttoꞌo lo sina gueniha, begüeen ttu ttu ca unnuha xxeni belhi, nianna rán ca unnuha: “Gualun sina len belhi quia-ni qui un xiꞌinni axta atti eyequia esíaya.”

¹⁴ Ttiaca ca benni gue yies gueniha nna rutía di lecan na. Lacana nna udhelhattebacana ttulhe ca nu dia atta dia unbiyuuha, qui gá ca unnuha nu rinnabia do nía: “Riꞌitu nna bittu raca letu aca unbiyuu du-ni nu innabiana riꞌitu.”

¹⁵ ʼTtiaca labíaba labana bedú acana nu innabia. Atti chi besinna lheꞌe yies gueniha nna benttebana mandadu gualisacana ca nu ttoꞌo lo sina gueni betena belhi len canaha, cumu raca leni ugüiana ttixa chi ben xiꞌini belhi begüeena ttu ttu ca unnuha.

¹⁶ Nu bisín primeroha nna rána: “Benni bananie neti, belhi gueluha nna chi ben xiꞌinni tsii libe a ttoníha.”

¹⁷ Nu rinnabiaha nna rána: “Tseeba anca, lu ancalu ttu benni riben tsee sina. Cumu de tsitsiba biyúlu saroꞌo belhi betea len luha nna nnanna nna unia acalu nu innabia tsii ca yiesi.”

¹⁸ Bisíntteba attuna rána: “Benni bananie neti, belhi gueluha nna chiguaba beni xiꞌinni a gayu libe a ttoníha.”

¹⁹ Nu rinnabiaha nna rána: “Lu nna acalu nu innabia gayu ca yiesi.”

²⁰ ʼLaniala bisína attuna, nianna rána: “Benni bananie neti, ni belhi gueluha te ni. Utúa tseeba unní lheꞌe ttu panitu.

²¹ Neti nna ustia lo cuinalu, cumu ancalu ttu unbiyuu rudhiubaxxatta lu benni lo sina. Redílu nu bittu ralhalu edílu lhe rialu raxílu lena atta bittu udalu lhe.”

²² Nu rinnabiaha nna rána: “Lu ancalu ttu nu riben sina runi nu lä anca tsee. La len ca tisa riría roꞌolhaba unia elha uxtisi guelu. Gansi gua yubalu dequi neti anca ttu unbiyuu rudhiubaxxatta benni lo sina, redía nu bittu ralha edía lhe riaya raxia lena atta bittu neti uda lhe

²³ ¿biacala bittu guacaꞌanlu belhi quia-ni atta uncana xiꞌinni, qui edíana len xiꞌinni, atti eyequia esíaya?”

²⁴ Laniala rá nu rinnabiaha ca nu seꞌe nía: “Gualcúa belhi-na lo náni, gualute na leni nu ulha tsii belhi-na.”

²⁵ Ca unnuha nna rácana: “¡Benni bananie riꞌitu, la chiba deni unná a tsii belhi!”

²⁶ Nu rinnabiaha nna becabina rána: “Neti ria le, nu te gueniha nna dhirla nua adí, ttiaca nu bittu te gueniha nna axtala saroꞌo nu te gueniha itúa.

²⁷ Anáguaba ca nu lä raca uyúcana neti, ca nu bittu uca lecani aca nu innabia guecani, gualsaxxí cana nii, gualutti cana aní loa.”

Jesús uteꞌe lheꞌe yiesi Jerusalén

²⁸ Dequide unne Jesús ca tisa-ni nna, uneruttebe lo ca benni die lheꞌe yiesi Jerusalén.

²⁹ Atti chi bisíne gaxxaba roꞌo lheꞌesi Betfagé leni lheꞌesi Betania, gaxxaba atta do lhilhi nu te láni Lo Lhilhi Atta Daa Ca Ya Olivu. Laniala nna udhelha Jesús chupa ca biꞌini rudheti ca tisa ruleꞌe,

³⁰ re ca biꞌiniha: —Gualtsia lheꞌesi re gaxxabana. Gansi chi utaꞌale lheꞌesi-na, na sattiꞌale ttu burru cuiti nalhana. Unnuha nna tsa nuttu nu chi udon cuꞌeni. Lebiꞌi nna gualudhán-na, atti gualetá tte lenna nii.

³¹ Gansi nuxa innába tisana innána: “¿Biaca unná ridhasle?” Lebiꞌi nna gualgás na: “Benni bananie ri-naba reasanie unní.”

³² Diatteba ca biꞌini udhelheha. Lacabi nna guattiꞌabacabi burrutoha attittiba rába Jesús.

³³ Atti ridhascabi burruha nna ca xxan nua nna unnaba tisacana rácana: —¿Biaca burru-na ridhasle?

³⁴ Lacabi nna becabicabi rácabi: —Cumu Benni bananie ri-naba reasanie unní.

³⁵ Bechettebacabi nua atta du Jesús. Dequide uluꞌucabi ca lari rucucabiha cuꞌe burruha nna belhopittebacabi Jesús cuꞌe nua.

³⁶ Cua diaba Jesús risile, ca benni nna ritsilacana ca lari nucucanaha lo nedaha.

³⁷ Atti chi bisíncabi atta ridú lo lhiaxu gue lo Lhilhi Atta Da Ca Ya Olivuha nna, iyába ca benni deno Jesús bedaca lecani, atti udulocana ribesiꞌacana, ribequi xencana Tata Do Iyyabaaha de chi begüiacana ca milagru ben Benniha.

³⁸ Lacabi nna rácabi: —¡Carbárulu lu ancalu Benni rinnabia udhelha Tata Do Iyyabaaha! ¡Riꞌi seꞌe tseeri len Tata Do Iyyabaaha! ¡Cuequi xenri Tata Dios Benni do iyyabaaha!

³⁹ Lania nna ttulhe ca fariseo nutsa len ca benni dia nía nna rácana: —Maestro, bedhaca disa ca nu denalhacan lu-na.

⁴⁰ Ttiaca Jesús becabie re: —Neti rpea le, gansi ca unní eyaca sicana, ca iyya-na cuesiꞌacana.

⁴¹ Atti chi bisína Jesús gaxxaba Jerusalén, begüiabe yiesiha nna uresttebe gueni.

⁴² Nianna re: —¡Atturu guen xa ca benni gue Jerusalén, ganruba ttirca sadú lele gue bi nua uni eseꞌe tseele len Tata Do Iyyabaaha, masquiba anca nasá sá bedúba! Ttiaca nnanna lärga aca ttedeenle gue nua.

⁴³ Chi isía sá atti biꞌa dhacabale ebiꞌano ca nu ritilha lenle-na le. Iyába ladu iríacana itilha lencan le.

⁴⁴ Yies-ni nna tsaba cuequi tinacan na lo yu, itupa lenna ca benni seꞌe lheꞌeni. Ni ttu iyya coa-na bittu eyaꞌana iqui loesni, cumu lebiꞌi nna tsa läga güia lele, Tata Do Iyyabaahaba udhelhe neti qui odiláya le.

Jesús bería lee ca nu yuꞌu güettoꞌo lheꞌeliꞌa gue yotuha

⁴⁵ Atti utaꞌa Jesús lheꞌeliꞌa gue yotuha nna udulottebe bería lee ca nu yuꞌu güettoꞌo nía.

⁴⁶ Nianna re cana: —Lo ca sitsi atta dia ca tisa gue Tata Do Iyyabaaha rinne Ben-na re: “Yoꞌo quia-ni ancana yoꞌo atta inne len ca benni neti”, ttiaca lebiꞌi nna attiba belea anca lisi ubana la chi beonle yotu-ni.

⁴⁷ Ttu ttu sába ruleꞌeni Jesús ca benni lheꞌeliꞌa gue yotuha. Ca nu lo gue ca bixxudiha lhe ca nu ruleꞌe nu rá lo ca ley bocaꞌana Moisés lhe anáguaba ca nu lo gue yiesiha lhe requicana reguila lecani gaxasná uncana utticane.

⁴⁸ Ttiaca bittu reselquinna gaxasná uncana, cumu iyába ca benni seꞌe nía itú iqui itú lecani rudo nagacani gue iyába nu rá Benniha.