San Lucas 18 - Zapoteco de Aloápam

Ejemplu gue nuila bidabi unnaba elha uxtisi lo xueda

¹ Jesús utixxiꞌattebanie ca biꞌini rudheti ca tisa guee ttu ejemplu nu uleꞌenna cabi satía innecabi len Tata Do Iyyabaaha, bittu edíl recabi.

² Nianna, re cabi: —Lheꞌe ttu yiesi, udo ttu xueda bittu ria leni Tata Do Iyyabaaha, lä rapaguaban respeto ca benni lhe.

³ La lheꞌe yiesiha guaba udo ttu nuila bidabi utta ttu elha utilha gueni, nianna riana lo xuedaha rána nua: “Benchi elha uxtisi quia lania nu ritilha lania na.”

⁴ Isáru guadána, bittu uca le xuedaha unna elha uxtisi gue nuila bidabiha. Ttiaca lenla uquinna: “Masquiba lä ria lasia Tata Do Iyyabaaha, niguaba lä rapa respeto ca benni lhe

⁵ de bittuba rudú si nuila bidabi-ni rutsitsinna neti nna unbalha elha uxtisi gueni, qui lä oditúna pasensi quia de satti belhaba ritana.”

⁶ Jesús re: —Gualudo nagale gue nu rá xueda bittu runi nu daa loni unna.

⁷ Anáguaba Tata Do Iyyabaaha, ¿si bittuba unie elha uxtisi gue ca benni chi becuee anca guee rinne rulisacane rela resába? ¿Si isá lhaba aca atti ecabie guele?

⁸ Neti ria dequi sattitte unie elha uxtisi guele. Ttiaca atti esíaya, neti Benni unbiyuu daa iyyabaaha nna ¿si gua seꞌe ca benni ria lecani neti ni yies lo yu-ni lania?

Ejemplu gue ttu fariseo lenna ttu güequixa

⁹ Utixxiꞌaguaba Jesús attu ejemplu, belise ca nu racaquinna ancacana nu runi nu anca tsee, nianna riguꞌu niꞌacani adí ca benni. Le nna re cana:

¹⁰ —Chupa ca unbiyuu güiacana atta do yotuha guannecana len Tata Do Iyyabaaha. Ttuna ancana fariseo, attuna nna ancana güequixa ridí belhi deyya Roma.

¹¹ Nu fariseo nna du ranina rinnena rulisana Tata Do Iyyabaaha rána Ben-na: “Xquixarulu, cumu bittu anca attiba adí benni, lacana ancacana ubana lhe nu bittu du ta leni lhe nu risá nu bittu anca latselani lhe. Anáguaba rutea xquixaru len cuinalu de bittu anca attiba güequixa du-na.

¹² Neti riguꞌu ubina lheꞌa chupa libe lheꞌe ttu xmanu, ruteguaba tsii gue de lo ttu gayua len lu gue iyába nu ridía gue sina runia lhe.”

¹³ Ttiaca güequixaha nna idittu liba duna, niba lä reaxinna ilidha loni ugüiana iyyabaaha, sunruba rugüe lastooni de re lenina, nianna rána: “¡Tata Do Iyyabaa quia, guatúachi lelu neti, cumu anca nu te tulha gueni lolu!”

¹⁴ Neti ria, güequixaha nna atti güequina deyyana lheꞌe yoꞌo gueniha nna chiba uxí Tata Do Iyyabaaha elha xen lasi gue ca tulha gue nua, ttiaca fariseo nna bittu uxíe elha xen lasi gueni. Cumu ca nu run ttaba ribequi xen lecani, eyadi gala lecani. Nu bittu run ttaba cuequi xen leniha nna tsopi leni.

Jesús rinnabe elha nabani gue ca unto

¹⁵ Anáguaba richeguaba ca benni ca unto guecaniha raseꞌecana lo Jesús qui uxxúa nee iquicani innábe elha nabani guecani lo Tata Do Iyyabaaha. Ttiaca atti biláni ca biꞌini rudheti ca tisa ruleꞌe nna, bedhaca disattebacabi ca benni che ca untoha.

¹⁶ Laniala nna uxi Jesús ca biꞌiniha, nianna re cabi: —Gualgüelha ca unto-na itacana len neti, bittu usunale, cumu ca benni anca attiba ca unní liba ancacana benni rinnabia Tata Do Iyyabaaha.

¹⁷ Neti nna gualíbatia rpea le, nu bittuba dhielhana innabia Tata Do Iyyabaaha-na attiba ttu unto, tsa läga aca isela nua ca benni rinnabia Tata Do Iyyabaaha.

Ttu unbiyuu te gueni unne lenna Jesús

¹⁸ Ttu nu lo gue ca benni Israel unnaba tisana Jesús ráne: —Maestro, lu ancalu ttu benni tsee. ¿Bi unia qui gatta elha nabani quia ttu tsaba?

¹⁹ Jesús becabie re: —¿Biaca neti rálu benni tsee? Cumu tsa läganu te ancana benni tsee, sunruba Tata Do Iyyabaaha anque benni tsee.

²⁰ Lu nna chiba yulu nu rá lo ca ley bocaꞌana Tata Do Iyyabaaha len Moisés: “Bittu utsá roꞌolu nu bittu anca latselalu, bittu uttilu benni lhe bittu lhanalu lhe bittu un lelu cuentaba unlu xiyya gue benni subi lhe gapalu respeto tata nan guelu lhe.”

²¹ Unbiyuuha nna rána: —Iyába unní, atti ancalia güexxaha uduloa runia.

²² Bienbani Jesús nu rá nua nna ráttebe: —Reasa attu nu unlu: Bettoꞌo iyá bixa te guelu. Belhiha nna betena len ca nu bittu te gueni. Anía liba nna gatta elha tsee guelu iyyabaaha. Lania nna utátte betteno neti.

²³ Ttiaca atti bienin unbiyuuha nu rá Jesús, attulade udú siꞌina, cumu de texxatta gueni.

²⁴ Bilábani Jesús udú siꞌi nua nna ráttebe: —¡Cattipa tsitsi anca eꞌeyu ca benni te guequinna acacana benni rinnabia Tata Do Iyyabaaha!

²⁵ Gaxa guaterla ttu camello lheꞌe belea do xan ttu tsioxa atti ttu benni te gueni eꞌeyuna acana benni rinnabia Tata Do Iyyabaaha.

²⁶ Ca nu bienquinna nu rá Benniha nna rácana: —Gansi anía anca, ¿núla guadána lhána qui bittu tsia nittina ganna?

²⁷ Jesús becabie re: —Nu bittu dhaa ca benni seꞌe yies lo yu-ni uncana, Tata Do Iyyabaaha guadábe unie nua.

²⁸ Pedro nna unnebi rábi: —Riꞌitu nna iyába nu te guetu bocaꞌanatu, atti dattebatu len cuinalu.

²⁹ Jesús becabie re: —Neti gualíbatia rpeale, nuxaba benni gansi lo niꞌa gue de ancana benni rinnabia Tata Do Iyyabaaha chi bedhá iquini yoꞌo gueni lhe nuila gueni lhe betsini lhe tata gueni lhe nan gueni lhe xiꞌinni lhe

³⁰ unnuha nna xxenrula nu dhína ni yies lo yu-ni, tiempu chi dabaha nna dhína elha nabani gatta ttu tsaba gueni.

Ni aca tsunna libe rixxiꞌa Jesús, lee nna uttibacane

³¹ Jesús uchee attu atta subi ca biꞌini tsiꞌinu (12) rudheti ca tisa ruleꞌe, nianna re ca biꞌiniha: —Gualuyurga, niba diari lheꞌe yiesi Jerusalén atta aca iyába nu daa lo ca sitsi beni ca benni uca profeta atta rixxiꞌa gue nu satea, neti Benni unbiyuu daa iyyabaaha.

³² Ca benni nna utecana neti las ná ca benni dittu, uxíscana quia lhe udhaca disacana neti lhe uttuttu xencani loa lhe.

³³ Dequide ugüecana neti nna utticana neti, ttiaca dequide tsunna ubisa nna eyacatia eríaya atta yuꞌu ca nu yatti-na.

³⁴ Ca biꞌini tsiꞌinuha nna tsa bittu guadú lecabi, niguaba lä yucabi bi gue nua rinne Benniha, cumu de anca ca tisaha nu bittu dica sadú lecabi.

Jesús beonie ttu benni xua loni lheꞌe yiesi Jericó

³⁵ Atti chi bisína Jesús gaxxaba roꞌo yiesi Jericó, nía do ttu benni xua loni roꞌo nedaha rinnabana belhi.

³⁶ Atti bienin nu xua loniha ritexxatta benni, nianna unnaba tisattebana rána: —¿Bilunni raca nii?

³⁷ Ca benni nna rácan na, Jesús gue Nazaretba Ben-na die ritee ni.

³⁸ Laniala uresiꞌana rána: —¡Jesús, Benni datía David, guatúachi lelu neti!

³⁹ Ca benni neruha nna bedhaca disacana nu xua loniha qui eyaca sina, ttiaca adíla idisa uresiꞌa nua rána: —¡Benni datía David, guatúachi lelu neti!

⁴⁰ Laniala nna uleda Jesús, nianna benttebe mandadu saxxícana nua. Atti chi duna lo Benniha nna unnaba tisattebe na re na:

⁴¹ —¿Bi raca lelu unia guelu? Nu xua loniha nna becabina rána: —Benni bananie neti, raca lasia ilátia.

⁴² Jesús becabie re na: —¡Biláni nnanna! Cumu de güia lelu güeyacabalu nuarca beacalu.

⁴³ Snaba lania bilen nu xua loniha, lana nna diattebana denona Jesús ribequi xenna Tata Do Iyyabaaha. Iyába ca benni begüia nu ucaha lhe anáguaba ribequi xencana Tata Do Iyyabaaha.