San Lucas 15 - Zapoteco de Aloápam

Benni beselani carneꞌe bigannaha

¹ Iyába ca güequixa, nu ruquixacana ca benni belhi qui eyya Roma, lencana adí ca nu te tulha guecani lo Tata Do Iyyabaaha lhe ubigacana atta du Jesús qui iyienquinna gue nu rá Benniha.

² Ca nu fariseo lencana ca nu ruleꞌe nu rá lo ley bocaꞌana Moisés, rinne güecana gue Jesús rácana: —Unbiyuu du-ni nna rulabina ca nu te tulha guecani lo Tata Do Iyyabaaha, roguaba lenna ca unná yetta lhe.

³ Laniala nna utixxiꞌani Jesús cana ttu ejemplu, nianna re cana:

⁴ —Gansi nuxle seꞌe ttu gayua (100) carneꞌe gueni, nianna iganna ttuna, ¿läba ganna useꞌe bixxi nua ca nu tta yuꞌu chennia (99) qui tsiana satilana carneꞌe bigannaha, axta qui eselinna nua?

⁵ Gansi chi beselinna nua nna eyoꞌo tsitsia leni, atti odaxxuna nua oxxúa xiquini.

⁶ Gansi chi besinna lheꞌe yoꞌo gueniha nna saxxíttebana ca benni seꞌe tsee lenna ca nu seꞌe gaxxa atta do yoꞌo gueniha lhe nianna innána: “Gualedacani len neti, cumu chi guattiꞌaya carneꞌe bigannaha.”

⁷ Neti rpea le, anáguaba adílaba güedaca le te iyyabaaha gue ttu benni te tulha gueni atti rodú xiyyan na rodaxxuna neda gue Tata Do Iyyabaaha attichula gue ca nu tta yuꞌu chennia (99) bitturu reasa odú xiyyancana lo Tata Do Iyyabaaha.

Nuila nu bedelhana belhi gueniha

⁸ ’O si ttu nuila denna tsii ca belhi, nianna udelhana ttu nua, ¿läba ganna ugalhattebana ttu gui lhe ulhubana lheꞌe yoꞌo gueniha eguila te suna axta qui eselinna nua?

⁹ Atti sattiꞌana unnuha nna salisattebana ca nu seꞌe tsee lennaha lhe adí ca nuila ca nu seꞌe gaxxa atta do yoꞌo gueniha lhe nianna innána: “Gualedacani len neti, cumu chi beseltia belhi bedelhaha.”

¹⁰ Neti ria le, anáguaba redaca le ca ingeli gue Tata Do Iyyabaaha gansi chi rodú xiyyan ttu benni te tulha gueni qui rodaxxuna neda gue Tata Do Iyyabaaha.

Benni uxí elha xen lasi gue xiꞌin biyúbi biría lheꞌe yoꞌo guebiha

¹¹ Ráguaba Jesús: —Ttu unbiyuu seꞌe chupa xiꞌin biyuuni.

¹² Nu güexxaha nna rána tata gueniha: “Tata, benna interés quia nu ralha dhia.” Laniala nna ulhaꞌa tata gueniha nu te gueni begüeena irupaba ca xiꞌin biyuuniha.

¹³ Lägabi bisá dequide lania, uncuiti güexxaha nna bettupana iyába nu uxínaha. Atti diattebana attu yiesi subi atta guannitti lona itúba interés uxínaha, benna nu ucaba leni.

¹⁴ Atti chi bea iyába nu cheenaha bennitti lona, ucatteba ttu ubina xeni lheꞌe yiesi atta donaha. Nianna udulotteba beasinna nu gona.

¹⁵ Laniala nna güiana guannabana sina lo ttu unbiyuu beaca lasni lo yiesiha. Unnuha nna udhelhan na ranchu gueniha güeyú cutsi.

¹⁶ Lana nna attulade ridá leni gona ttu nu ro ca cutsiha de ritunxxattana, ttiaca tsa läganu rutena nu gona.

¹⁷ Laniala nna bodhá leni, nianna rána: “¡Ixe ca nu yuꞌu sina lheꞌe yoꞌo gue tata quia rexxala nu rocana, neti nna gua doa ni rattia ubina!

¹⁸ Eyequibalha neti eyya lheꞌe yoꞌo gue tata quia, nianna upe: Tatato quia, benba nu bittu anca tsee lo Tata Do Iyyabaaha lhe len cuinalu lhe.

¹⁹ Larca bitturu ralha aca xiꞌinlu, benba aca attiba ttu ca nu yuꞌu sina guelha.”

²⁰ Anía uca nna beguꞌuna neda deyyana lheꞌe yoꞌo gue tata gueniha. ’Atti sa dedaalina idittu nna chi biláni tata gueniha na. Lana nna guatúatteba leni na. Bigaattebana guatsána na, atti utesttebana yienni, betsá loni xxagani lhe.

²¹ Xiꞌinniha nna rán na: “Tatato quia, benba nu bittu anca tsee lo Tata Do Iyyabaaha, len cuinalu lhe larcala bitturu ralha aca xiꞌinlu.”

²² Ttiaca tata gueniha nna benttebana mandadu ca nu ren sina gueniha rána ca nua: “¡Jertte gualsalheaxxi ca lari tsee gualugucu na, gualcuꞌu ttu beꞌe xbináni lhe gualcuꞌu guaracha niꞌani lhe!

²³ ¡Gualsaxxíguaba ttu uꞌuna cuiti nu rixenruha, nianna gualuttitte na qui gori unri laní!

²⁴ Cumu neti nna ucatia chiba utti xiꞌinia-ni, ttiaca besía banrubana, tsaba chi unitti lona lhe nianna beselarbana attu libe.” Atti udulottebacana bencana laní.

²⁵ ’Xiꞌinbiyuu xen gueniha nna ranchula diana. Atti besinna gaxxaba atta do yoꞌoha nna bienttebinna tsiꞌi ca nu rulha, raca güeyaꞌa lhe.

²⁶ Laniala nna uxna ttu ca nu ren sina gue tata gueniha unnaba tisana rána: “¿Biunna raca nii?”

²⁷ Nu ren sinaha nna rán na: “Betsiluha bunna besía. Tata guelha nna benbi mandadu bettitu ttu uꞌuna cuiti rixenruha, cumu de bequi betsilha besíana lhatsiru len labi, bittubi uxacana.”

²⁸ Nianna betsi xen gueniha nna bisaꞌatsitsiabinna nianna bittu uca leni etaꞌana yoꞌo. Laniala nna biría tata gueniha benna ruegu loni qui etaꞌana.

²⁹ Ttiaca lana nna becabina rána tata gueniha: “Lu gua yubalu ixe ida chi bixuua lo sina guelu, niba tsa lati quitsa tisa guelu lhe. Nianna tsaba bittu chi bennalu niba ttu chiva chicaꞌa qui uttia unia laní len ca nu chi do tseea len lacana.

³⁰ Ttiaca nnanna besía xiꞌinlu-na, nu chi guanitti lona belhi gueluha len ca nuila requi satsa-na, nianna lu nna bettirlu uꞌuna cuiti rixenruha qui runlu laní gueni.”

³¹ ’Tata gueniha nna becabina rána: “Xiꞌinto quia, lu nna ttu tsaba dolu len neti, nianna iyába nu te quia, guebalu ancana,

³² ttiaca nnanna raca duelha unri laní lhe edaca leri lhe cumu betsilhi nna attisiba chiba uttina, nianna beaquinna attu libe. Chiguaba unittina lhe nianna beselabana.”