San Lucas 10 - Zapoteco de Aloápam

Jesús ridhelhe gayuna yuꞌu tsiꞌinu (72) ca benni qui quixxiꞌacabi ca tisa gue Tata Do Iyyabaaha

¹ Dequide unnuha nna becuee Jesús a gayuna yuꞌu tsiꞌinu (72) ca benni rudheti ca tisa ruleꞌe. Ca biꞌiniha nna udhelhe chupa chupacabi, bennerue ca biꞌiniha tsiacabi lheꞌe iyába ca yiesi atta tsie.

² Nianna re ca biꞌiniha: —Neti rpea le, xxen tsitsia lena bani te exuu, ttiaca ttu chuparba ca benni riben sina seꞌe. Larcala gualnnaba lo Tata Do Iyyabaaha Benni beaca guee sina-ni qui idhelhe adí benni edícana lena-na.

³ Lebiꞌi nna gualtsia. Neti ridhelha le tsiale attiba ttu carneꞌe atta seꞌe ca benni du lecani attiba du le sagueo.

⁴ Bittu ujale belhi, niguaba atta yuꞌu xole lhe niguaba attu cue guaracha lhe bittuguaba cuedale gále padiuxi nuxa benni esále diale neda lhe.

⁵ Nuxaba lisi gaꞌale nna primero innále: “Xen su lee tseꞌe ca benni seꞌe lheꞌe yoꞌo-ni.”

⁶ Gansi lheꞌe yoꞌoha do ttu benni do tseena len Tata Do Iyyabaaha, lania liba nna saxxína aca nu ráleha len ca unnuha, gansi bittuba nna läga aca nu unnabaleha.

⁷ Lebiꞌi nna níaba tseꞌele lheꞌe yoꞌo atta isínleha, gobale lhe iꞌiyabale lhe iyába nu utecana len lebiꞌi, cumu ttu benni riben sina, ralhaba nua dhína lhiaxani. Bittu eríale lheꞌe ttu yoꞌo nna sataꞌale lheꞌe attu yoꞌo.

⁸ Gaxaba yiesi isínle atta ulabican le, gualgo iyába nu usiacana lole.

⁹ Gualeoni ca nu rani seꞌe nía, nianna gualgás cana: “Chi daa ribiga isía sá innabia Tata Do Iyyabaaha lebiꞌi.”

¹⁰ Ttiaca gansi gaꞌale lheꞌe ttu yiesi atta bittu ulabican le nna gualtsia lo ca neda guecaniha, gualgás cana:

¹¹ “Axta biste re lheꞌe yies guele-ni nu utá xan ca guaracha guetu-ni rucuibitu. Unní ruleꞌe lo bittu anca tsee nu benle len riꞌitu. Ttiaca gualodhá lele, chi daa ribiga isía sá innabia Tata Do Iyyabaaha.”

¹² Netiunní ria, gansi chi bisía sá uni Tata Do Iyyabaaha elha uxtisi gue ca benni seꞌe yies lo yu-ni, xxenirla anca elha disa utee gue ca benni seꞌe lheꞌe ca yiesi atta bittu ulabican le attichula elha disa utee gue ca benni useꞌe lheꞌe yiesi Sodoma.

¹³ ’¡Carusiꞌirule xa benni seꞌe lheꞌe yiesi Corazín! ¡Carusiꞌirule, xa benni seꞌe lheꞌe yiesi Betsaida! Cumu ttirca lheꞌe yiesi Tiro lhe Sidón lhe chi uca ca milagru uca len lebiꞌiha nna nucala chi bodú xiyyan ca nua bodaxxucana neda gue Tata Do Iyyabaaha qui dhie elha xen lhasi guecani. Chi ucucana ca lari ttipa lhe chi usiacana lheꞌe te gue gui lhe qui uleꞌe lo gualí re lenquinna gue nu bencana.

¹⁴ Ttiaca gansi chi bisía sá un Tata Do Iyyabaaha elha uxtisi gue ca benni, xxenirla anca elha disa dhíle atti elha disa dhi ca benni seꞌe lheꞌe yiesi Tiro lhe Sidón lhe.

¹⁵ Lebiꞌi nna ca benni seꞌe lheꞌe yiesi Capernaum, ¿si rquinle dequi eyopile iyyabaaha? ¡Dica! Axta atta lexúaha la iyinnale.

¹⁶ ’Nu udo nagani guele nna quiba nua rudo naga nua, nu cuꞌu niꞌani lebiꞌi nna netiba nua riguꞌu niꞌa nua. Nu riguꞌu niꞌani neti nna Benni udhelhe netihaba Benniha riguꞌu niꞌani.

¹⁷ Atti chi besina iyába gayuna yuꞌu tsiꞌinu (72) ca benni udhelha Jesús güia güixxiꞌa ca tisaha, ruꞌu tsitsia lecabi rácabi: —Tata, axta ca be xxegüi-na rudocana tisa guetu atti rudettitu lálu.

¹⁸ Jesús becabie re: —Gualí galá, neti bilátia nu xxegüiha dana lo bea-na binnana attiba ttu edha.

¹⁹ Neti chi betea elha ra xxen le quia len lebiꞌi qui utsutsa uleale iqui ca belha-na lhe ca lacrana-na lhe qui dhale lo iyá nu runna anca nu xxegüiha nu ra tsitsi leni lhe lebiꞌi nna tsa lägabi dhacale.

²⁰ Ttiaca bittu eyoꞌo lele de rudo ca be xxegüi-na tisa guele. Nu unlale nna gualeꞌo lele de chi dia lále iyyabaaha.

Jesús redaca lee

²¹ Snaba lania nna Espíritu gue Tata Do Iyyabaaha benie beꞌo tsitsia le Jesús, nianna re Tata Do Iyyabaaha: —Tata, cuinalu ancalu Benni banani iyyabaaha lhe yies lo yu-ni lhe. Neti ribequi xenia lu de bittu begüeelhalu ttedaani ca nu rá ancacana nu yu te elha rien guequinna gue nu ria-ni, lu nna benlu ttedaaquin ca benni bittu ra xxeni leni gue unní. Gualíba, Tata, cumu anába beda le cuinalu unlu.

²² ’Tata quiaha nna iyába nu tee betee las náya. Tsa läganu yu gattigasná anca Xiꞌini Tata Do Iyyabaaha, sunruba lee yue nuxa anca Xiꞌinie. Nuttuguaba yu gattigasná anca Tataha lhe sunruba neti Xiꞌinie-ni yua nuxa anque, ca benni raca lasia quixxiꞌatia cana gue Benniharba nna yucana nuxa anque.

²³ Nianna bodequitteba loe re suntteba ca biꞌini rudheti ca tisa ruleꞌe: —Carbáru ca benni riláquinna nu rilenle.

²⁴ Netiunní ria le, ixe tsitsia ca benni uca profeta lhe ca benni unnabia lhe udá lecabi ugüiacabi nu rilenle nnanna ttiaca bittu biláquinbi-na, uxacacabi iyienquinbi nu rieninle nnanna lhe ttiaca bittu bienquinbi-na.

Ejemplu gue benni gue Samaria beni nu anca tsee

²⁵ La laniatteba nna udulí ttu ca nu ruleꞌe nu rá lo ca ley bocaꞌana Moisés unnena belisana Jesús qui cuꞌubiana Benniha nna unnaba tisane ráne: —Maestro, ¿bi unia qui gatta elha nabani quia ttu tsaba?

²⁶ Jesús becabie re na: —¿Bi rá lo ca ley bocaꞌana Tata Do Iyyabaaha len Moisés? ¿Gasná radú lelu nu rá ca tisa-na?

²⁷ Unnuha nna becabina rána: —“Aquinlu gue Tata Do Iyyabaaha Benni bananie lu itú iqui itú lelu, leni itúxea lastoolu lhe leni itú fuerza guelu lhe leni itú elha rieni guelu lhe. Anáguaba acaguabinlu gue ca benni attiba raquinlu gue la luba lhe.”

²⁸ Jesús becabie re na: —Tseeba chi becabilu. Unnába beni nna guateba elha naban guelu ttu tsaba iyyabaaha.

²⁹ Ttiaca de rdaca nu ruleꞌe nu rá lo ley eyaꞌan tseena lo benni nna larcala nna bedennaba tisana Jesús rána Benniha: —Nianna, ¿nú nua anca benni acatia gueni?

³⁰ Jesús becabie re: —Ttu libe ttu unbiyuu biríana lheꞌe yiesi Jerusalén, bedaxxuna neda dia daca lheꞌe yiesi Jericó. Nía biría ca ubana ulanacan na, axtaba ca xoni nucunaha utúa ca nua. Chi liba anca nua attiba nu yatti de begüeebacan na, lania liba nna utixxa bixxican nua nía atti güequicana deyyacana.

³¹ Cattipa guaxxína, laniaguaba ute ttu bixxudi dianala lo nedaguaba. Ttiaca atti bilenna unbiyuuha tena lo nedaha nna betsiattalana, besiguibana diana.

³² Aníaguaba beni ttu benni datíana Leví bisína atta te unbiyuuha. Atti bilenna nua nna betsiattalana atti utettebana diana.

³³ Ttiaca ttu unbiyuu beaca lasni yiesi lá Samaria diana yuꞌuna neda bisínna atta te unbiyuuha. Atti bilenna nua nna guatúatteba leni nua.

³⁴ Ubigattebana atta te nua, benttebana ramedi ca lo güee gue nua len seti lhe vinu lhe bettubina lari ca atta anca güee gue nua lhe. Lenla nna belhopin nua cuꞌe bia gueniha, qui uchen nua atta do ttu yoꞌo reꞌan ca benni. Nía upan nua.

³⁵ Beteyú sá nna benni beaca lasni Samaria, uleana belhi gue chupa ubisa sina betena leni xxan yoꞌoha, nianna rán nua: “Biyúchi unbiyuu-ni. Iyába adí belhi unnitti lolu gueonni nna guaguixaba nua atti eyequia esíaya.”

³⁶ Jesús unnaba tise: —Delo tsunna ca unbiyuu uteha nna ¿nú ca nua raquinlu beleꞌe lo gualí ancana benni racani gue benni begüee ca ubanaha?

³⁷ Nu ruleꞌe nu rá lo ley bocaꞌana Moisés nna rána: —Benni guatúa leni unbiyuuha. Jesús re na: —Gansi anía anca, lu nna aníaguaba beyya beni ganna.

Jesús bisíne lheꞌe yoꞌo gue Marta lenna María

³⁸ Jesús besiguibe yuꞌe neda die lenie ca biꞌini rudheti ca tisa ruleꞌe. Lee nna utaꞌattebe lheꞌe ttu lheꞌesi re nía. Ttu nuila lána Marta nna bete gannana lheꞌe yoꞌo gueniha qui eyaꞌan Benniha.

³⁹ Marta nna do ttu xilani lána María. María nna urettebana gaxxaba atta do Jesús qui bedo nagani ca tisa rinne Benniha.

⁴⁰ Ttiaca Marta nna tsitsiba richacha iquini gue sina te lheꞌe yoꞌoha. Lana nna ubigattebana lo Jesús rána Benniha: —Benni bananie neti, ¿si bittuba retábinlu quia? Tturba neti bocaꞌana xila-ni unia sina-ni. Gus na qui unna neti yuda.

⁴¹ Ttiaca Jesús becabie re na: —Marta, lu nna tsitsiba richacha iquilu lhe riubinlu lhe de texxatta sina guelu,

⁴² ttiaca tturba ttu nu te gualíga raca duelha acana. María-ni nna chi becueena nu tseeru, larcala nna tsa läganu te cuana unná lo náni.