Judas 1 - Zapoteco de Aloápam

¹ Neti Judas betsi Jacobo, anca benni rixuu lo sina gue Jesucristuha. Ridhelha sitsi-ni guele lebiꞌi ca benni racani Benni anque Dios gueri-na guele lhe Benni anque Tata gueri lhe do iyyabaaha, ca benni chi uxie lo neda guee lhe. Anáguaba Jesucristuha, rapaguaba benniha le.

² Cuina laque satúa chatti leque le, aca chaticanie guele lhe unque tseꞌele xen su lee lhe.

Bittu tsia lele gue ca nu run leni requi-na

³ Ca benni ria le Jesús racatia gueni, neti nna tsitsiba chi re lasia unia lo sitsi qui quixxiꞌatia le gue gaxasná uca bodilá Tata Do Iyyabaaha iyáxeabari qui bittu tsia nittiri. Nnanna nna racatia raca duelha unia lo sitsi-ni qui idhelha na atta seꞌele-na, atta rulisa le tseꞌe tsitsile len ca tisa chi ria leri-na, tsitsi gualedí gualedeni nu bodilá Ben-na ri bittu ugüelhale cuꞌu niꞌa ca benni ben-na. Ca tisa-na ben-na nu desdeba ttua chi bocaꞌana Tata Do Iyyabaaha len riꞌi ca benni chi anca guee.

⁴ Cumu sigába chi utaꞌa ttulhe ca benni runi nu lä anca tsee len lebiꞌi, ca unná nna desdeba atti nía chi rá lo ca sitsi gue Tata Do Iyyabaaha ralhabacana tsia nitticana. Lacana ancacana ca nu lä duta leni, chi rinnecana rácana: Tata Do Iyyabaaha chiba bodile ri. Denuala nna runri nu racaba leri. Nuarcala riguꞌuguaba niꞌacani Tata Do Iyyabaaha Benni tturbe doe anque Benni rinnabie ri lhe anáguaba runcana leni Jesucristu Benni bananie ri-na lhe.

⁵ Lebiꞌi nna masquiba chi yule gue nu beni Tata Do Iyyabaaha, ttiaca neti nna raca lasia orexxa lele gue nu benie, lee nna dequide bebequie ca benni Israel lheꞌe yiesi Egipto, belhuxaguabe ca benni bittu güia lecani guee.

⁶ Aníaguaba guate ca ingeli ca nu bittu begüee lidhaca ladicani begüee Tata Do Iyyabaaha cana, sinuqui bedhala iquicani atta begüee Benniha cana tseꞌecana. Larca bedhea Tata Do Iyyabaaha cana ttu tsaba atta anca chulha, nía guayacana qui ttua tseecana aca elha uxtisi guecani gansi chi bisía sá uni Tata Do Iyyabaaha elha uxtisi gue ca benni seꞌe yies lo yu-ni.

⁷ La unnuha guaba guate ca benni useꞌe lheꞌe ca yiesi lá Sodoma leni yiesi Gomorra, adí ca benni useꞌe lheꞌe ca yiesi useꞌe gaxxaba nía lhe. Ca unnuha nna tsaba bedona lecani güequi mannicana, bencana nu satsa bittu dica un benni len la loesi unbiyuuba cani lhe len la loes nuilaba cana lhe. Lo niꞌa gue nua nna betee Tata Do Iyyabaaha ttu elha disa tsitsi guecani, bedelhe cana lo gui nu ttu dia liiba ralha-na. Unní nna ancana ttu nu ugüia iyába benni qui bittu uncana atti ben ca unnuha.

⁸ Anáguaba sate ca benni rulisa-ni, ca nu sigába biselacana lebiꞌi. Lacana nna bitti bittiba runcana, cumu de bitsiequinna yiela uncana anía. Ca unná nna rutsiga cuerpu guecani leni nu satsa runcana, riguꞌu niꞌacani elha rinnabia gue Tata Do Iyyabaaha lhe riguecana iqui ca nu ra xxeni leni seꞌe iyyabaaha lhe.

⁹ Ni ingeli lá Migueli biꞌini anca nu lo gue ca ingeli seꞌe iyyabaaha, atti ritilhabi len nu xxegüiha qui nuxa leni eyaꞌana cuerpu gue Moisés bittu beaxinbi innábabi dhi nua elha disa ute Tata Do Iyyabaaha, sinuqui suntteba rábi nu xxegüiha: “Tata Do Iyyabaaha dhaca lanie lu.”

¹⁰ Ttiaca gue ca benni rulisa le-ni, gue iyába nu bittu radú lecani rinne güecana. Lacana nna attiba runi ttu nimala nu bittu elha rieni gueni te runcana, suna nu racaba le cuerpu guecani runcana. Unnuha nna sunruba rixuu nua runna qui tsia nitticana.

¹¹ ¡Carusiꞌirucana cumu diacana runcana attiba beni Caín! De dhicana belhi nna runcana nu lä dica uncana attiba Balaam, lacana nna gattibacana attiba utti Coré, unnuha nna uluxabana de bitturu bedona tisa gue Tata Do Iyyabaaha,

¹² Ca unná nna sunruba runcana rettuinle lo ca laní runle gue de seꞌe tsee len loesle. Tsaba bittu rapacana respeto, ladiaba ruꞌucana riꞌa rocana attiba racaba lecani. Lacana nna ancacana nu rulaba leni suntteba gue nu anca guecani. Ancabacana attiba ttu bea bisi bittu chee iyya nu gatti laduba che be-na, attiba ttu yaga nu bittu ribía gueni atti dica cuia gueni lhe attiba ttu yaga nu chi ilupilana nucala ubisi itupa lhu-ni lhe.

¹³ Lacana ancacana attiba inda run disa xatta ridú lí lo indattoo-na, nu lä anca tsee runcana ancana attiba besina gue nu satsa rettelequi nu ridú lí lo indattoo-na roꞌo indattoo-na. Ancabacana attiba beli biganna nu bittu anca lo ga ladu diana, lacana chiba gaꞌana tsequicana ttu tsaba atta anca chulha bexcu gue atta chulha-na.

¹⁴ Anáguaba Enoc, biꞌini uca nu gasi libixxi uli dequide Adán, utixxiꞌaguabi gue ca unní len ca tisa bete Tata Do Iyyabaaha len labi, atti unnebi rábi: “Gualgüiarga, chi dedaa Benni bananie ri-na leni ixe mili ca ingeli guee,

¹⁵ qui unie elha uxtisi gue iyába ca benni, utee elha disa ralha ca nu lä duta leni gue iyá nu satsa runcana lhe gue iyába ca tisa idí unne ca nu lä du ta leni runi nu lä anca tsee-na atti unne güecana gue Ben-na lhe.”

¹⁶ Lacana nna ancacana nu iyába bittu ruꞌu leni, gue iyába rinne güecana lhe suna nu reꞌoba lecani raca lecani aca, ttaba lhabacana len ca tisa rinnecana lhe ocadiba lheꞌe lhaba daa roꞌocani rinnecana gue ca benni qui ridacana ridícana nu raca lecani dhicana.

Tsitsi gualtseꞌe lo neda gue Tata Do Iyyabaaha

¹⁷ Ttiaca lebiꞌi ca benni ria le Jesús racatia gueni, gualorexxa lele gue nu chi rá ca biꞌini bedheti ca tisa beleꞌe Jesucristu Benni bananie ri-na.

¹⁸ Lacabi nna rácabi le: “Atti isía ca sá lhuxa, tseꞌe ca benni edacalaquinna gue Tata Do Iyyabaaha, tsequicana uncana nu lä anca tsee racaba lecani lhe.”

¹⁹ Ca unnonna rilácana elha utilha gue ca benni qui rilhaꞌacana lheꞌe loescani, suna gue nu anca gue yies lo yu-niba do lecani runcana, cumu bittu yuꞌu Espíritu gue Tata Do Iyyabaaha lheꞌe lastoocani.

²⁰ Ttiaca lebiꞌi ca benni ria le Jesús racatia gueni, gualusigui gualtsia tsitsi chatti lele gue nu chi ria lele anca gue Tata Do Iyyabaaha. Atti innele len Ben-na, Espíritu gue Ben-na quixxiꞌenie le bixanca nu innále.

²¹ Satía gualtseꞌe gualuxxen lele gua racabani Tata Do Iyyabaaha guele, gualtseꞌe gualcueda isía sá atti utee Jesucristu Benni bananie ri-na elha nabani gatta ttu dia lii guele de guatúa le Ben-na le.

²² Gualuseꞌe tsitsi lo neda gue Tata Do Iyyabaaha ca benni rudú chupana lequinna.

²³ Adícana nna gualodilá cana, qui bittu tsiacana lo gui gue atta lexúaha, attu lhecana nna gualsatúa lele cana, gueba nna gualdo cuidadu qui lä iyietile unle atti run ca unná, lebiꞌi nna axta xocani bitsiga gue nu satsa runcana ixxinle.

Tata Do Iyyabaaha anque benni ra xxeni lee

²⁴ Xxeni ra lee Tata Do Iyyabaaha. Lee uyúe le qui bittu inittile lo neda guee, aná nna attulade redaca lele atti utsadúle lo atta gaꞌana tsee do Ben-na bitturu ancale tsiga lo Ben-na.

²⁵ Tturba Ben-na do anque Dios te elha rieni guee. Lee bodile ri de nu guate Jesucristuha. Tata Do Iyyabaaha anque Benni ra xxeni lee, Benni ruꞌu xieni gaꞌana tsee guee lhe Benni ra tsitsi lee lhe Benni rinnabia lhe. Anába anque atti deobali cue yies lo yu-ni, anába anque nnanna lhe anába aque ttu dia liiba lhe. Amén.