San Juan 9 - Zapoteco de Aloápam

Jesús beonie ttu nu xua loni

¹ Atti bete Jesús deyye nna bilánie ttu unbiyuu xua loni. Aníaba anca nua atti ulna.

² Ca biꞌini rudheti ca tisa ruleꞌe nna unnaba tisa cabi rácabi Benniha: —Maestro, ¿biaca xua lo unbiyuu-na atti ulna? ¿Si de ben ca tata gueniha ttu nu bittu anca tsee aca, si labana benna nu lä anca tsee aca?

³ Jesús becabie re: —Läga de beni ca tata nan gueonna ttu nu bittu anca tsee, niguaba de beni unná ttu nu lä anca tsee, anca bunna aná qui leni milagru uni Tata Do Iyyabaaha nna uleꞌe loe anque nu ra xxeni lee.

⁴ Laca anca resá nna unxxiri sina gue Benni udhelhe neti, cumu gua daa ribiga aca lo rela nna lania nna tsa lärga nuruha aca gueni cuenna sina.

⁵ Laca doa yies lo yu-ni nna neti anca xieni gue ca benni seꞌe yies lo yu-ni.

⁶ Dequide rá Jesús anía nna bettuttutteba xxenie lo yu. Leni unnuhaba benie saroꞌo yuna, atti utabittebe nua roꞌo lo nu xua loniha.

⁷ Nianna ráttebe unbiyuuha: —Güia guattí lolu roꞌo bila inda te láni Siloé-na. (Tisa Siloé dienna innána sola.) Nu xua loniha nna güiattebana guattí loni, atti bequina besinna nna chi rilenna.

⁸ Ca benni seꞌe gaxxaba atta reꞌanna lhe ca benni chi biláquinna ridona güennaba belhi lhe rinnaba tisa loescani rácana: —¿Si läba unníba nua ridona güennaba belhi?

⁹ Ttulhecana nna rácana: —Gualíba, unnuha bunna. Adícana nna rácana: —Dica, läga unnuha unná. De ruleꞌe bunna attiba ruleꞌe unnuha. Lana nna rána: —Netiba nua.

¹⁰ Nianna unnaba tisacan na rácan na: —¿Galasná uca bilenlu?

¹¹ Lana nna becabina rána: —Unbiyuu lá Jesúsba benie yuna utabie roꞌo loa, nianna re neti: “Güia guattí lolu roꞌo bila inda lá Siloé-na.” Neti nna güiatteba, utíba loa nna biláttebatia.

¹² Laniala nna rácan na: —¿Nala unbiyuuha? Lana nna rána: —Bittu yua.

¹³ Uchettebacana nu uxua loniha guadúcan na lo ca nu fariseo,

¹⁴ cumu de anca sá redí le ca nu Israel, la sá atti beni Jesús yuna leni xxenie, utabie roꞌo lo nu uxua loniha qui ilenna.

¹⁵ Ca nu fariseo nna bedennaba tisattebacan na gaxasná uca beali loni. Lana nna becabina rána: —Yunaba utabie roꞌo loa, nianna utítteba loa nna biláttebatia.

¹⁶ Ttulhe ca fariseo nna ráttebacana: —Unbiyuu beni unní nna läga anca unná gue Tata Do Iyyabaaha, nuarca runbana sina sá redí leri. Adícana nna rácana: —Läga aca gue ttu unbiyuu runi nu lä anca tsee unna ca milagru runi unná. Lo niꞌa gue unnuha nna bilaꞌa lheꞌe loescani de bittu ttudi rinnecana.

¹⁷ Bedennaba tisa dacabacana unbiyuu uxua loniha redeácan na: —Lu nna ¿bila rálu gue nu benna rilenlu-na? Lana nna rána: —Neti nna ria, Ben-na anque ttu profeta.

¹⁸ Ttiaca ca nu lo gue ca benni Israel nna tsa läga ria lecani dequi gualí uca nua ttu nu xua loni, nnanna nna chi ancana nu riláni, axta qui uxcana tata nan gue nua.

¹⁹ Nianna, unnaba tisacana ca unnuha rácan cana: —¿Si xiꞌinle nu du-ni, nu rále anába xua loni ulna? ¿Ttiluca nna riláni unná nnanna?

²⁰ Ca tata nan gue nua nna becabicana rácana: —Yubatu xiꞌinbatu unní lhe xuaba loni atti ulna lhe

²¹ ttiaca läga yutu gaxasná uca chi rilenna nnanna, bittuguaba yutu nuxa benna bilenna lhe. Na gualnnaba tisa na chiba anca unná nu xxeni, guaguixxiꞌa bunna gaxasná uca bilenna.

²² Aníaba rá ca tata nan gue nua de rasbaquinna ca nu lo gue ca benni Israel, cumu ca unnuha nna chi unnecana rácana, ttu tsaba ebeacana lheꞌe yoꞌo atta rudheticana ca tisa gue Tata Do Iyyabaaha nuxa innána Jesús anque Cristu Benni chi gaꞌanani Tata Do Iyyabaaha odile ca benni.

²³ Nuarcala nna rá ca tata nan gue nua: “Na gualnnaba tisa-na, nu xxenba chi anca unna.”

²⁴ Ca nu lo gue ca benni Israel nna bedeaxi dacabacana nu uxua loniha, nianna rácan na: —Aní lo Tata Do Iyyabaaha uxí roꞌolu. Riꞌitu nna yutu nu runi nu lä anca tseeba anca nu benna bilenlu-na.

²⁵ Lana nna becabina rána: —Bittu yua gansi ancana nu runi nu lä anca tsee o bittu. Nu yurba nna neti uca nu xua loni, nnanna nna chi rilátia.

²⁶ Bedennaba tisa dacabacan na attu libe rácan na: —¿Bi bedhacan lu? ¿Bi benna qui bilenlu?

²⁷ Becabittebana rán cana: —Lä chiba ria le nna lebiꞌi nna bittu bedo nagale. ¿Biaca rdacale quixxiꞌatia le attu libe? ¿Si rdacaguale acale benni rudheti ca tisa ruleꞌe Ben-na?

²⁸ Laniala nna bedhaca disacan nua rácan na: —Luba ancalu nu rudheti ca tisa ruleꞌe unná, riꞌitu nna nu rudheti nu beleꞌe Moisés liba anca riꞌitu.

²⁹ Riꞌitu nna yutu unne Tata Do Iyyabaaha len Moisés, ttiaca unbiyuu-na nna niba lä yutu ga ladu don-na.

³⁰ Nu uxua loniha nna becabina rána: —Unnírguaba nna ancana ttu nu runna reban leri. Lebiꞌi nna rále dequi bittu yule ga ladu daa Ben-na, ttiaca neti nna benie bilátia.

³¹ Riꞌi nna gua yubari, Tata Do Iyyabaaha nna läga rienini benniha gue ca nu runi nu lä anca tsee-na, sunruba gue ca nu ria lecanie lhe rudocana tisa guee lhe rieninie.

³² Ni ttu libe bittu chi bieninri gue nuxa quixxiꞌana innána beni ttu benni biláni ttu nu ulina ancana nu xua loni,

³³ gansi läba Tata Do Iyyabaaha udhelhe Ben-na nna, tsa läga aca gue Ben-na unie ttu bixa.

³⁴ Lania nna ráttebacana nua: —Lu nna atti ulililu chi ancalu nu te tulha gueni. ¿Rdacalu uleꞌenlu riꞌitu nna? Bebequittebacan na ttu tsaba lheꞌe yoꞌo atta rudheticana ca tisa gue Tata Do Iyyabaaha.

³⁵ Jesús bine rácana dequi uleabacana nu uxua loniha. Atti betiꞌe nua nna ráttebe na: —¿Si gua ria lelu Benni unbiyuu daa iyyabaaha?

³⁶ Unbiyuuha nna becabina rána: —Utixxiꞌen neti nuxque nua, xa tata, qui tsia lasie.

³⁷ Jesús re na: —La chiba bilenlu Benniha. Neti nua.

³⁸ Laniala nna bedútteba xibi unbiyuuha lo Jesús, nianna rána: —Gua riaba lasia lu, xa tata.

³⁹ Jesús re: —Neti daya yies lo yu-ni qui unia elha uxtisi, delha qui unia iláni ca nu xua loquinna ca nu racaquinna ancacana nu riláni nna acacana attiba nu xua loni.

⁴⁰ Atti bienini ttu chupa ca fariseo seꞌe nía re anía nna unnaba tisattebacana Benniha rácane: —Riꞌitu nna, ¿si nu xua lobani ancatu?

⁴¹ Jesús becabie re: —Ttirca ancale nu xua loni nna lägabi te tulha guele. Ttiaca de rále, rilenle nna nuarca ancabale nu te tulha gueni.