San Juan 7 - Zapoteco de Aloápam

Ca betsi Jesús bittu ria lecani Benniha

¹ Dequide unnuha nna, daca Galileaba requi Jesús. Läga raca lee dhoe deca Judea, cumu ca nu lo gue ca benni Israel nna reguilacane quini utticane.

² Chiguaba daa ribiga laní gue ca benni Israel nu te láni laní gue yoꞌo lhaga.

³ Ca betsi Jesús rácane: —Biría nii güia daca Judea, qui anáchu iláguani ca biꞌini rudheti ca tisa ruleꞌelu seꞌe nía ca milagru runlu-na.

⁴ Cumu ttu benni rdacana tsanni lona gue nu runna nna läga tsequi nua unna nua atta gatsi. Nu runlu-na benna aní lo iyá benni quini iláquinna.

⁵ Aníaba rá ca betsi Benniha, cumu ni ca unnuha bittu ria lecanie.

⁶ Jesús becabie re cana: —Läga chi bisía ura quia qui tsiaya nía, lebiꞌi nna bixaba ura nna guacaba tsiale.

⁷ Ca benni gue yies lo yu-ni nna lägabi te bixa lo niꞌa gue utía di le ca unná le. Neti libunni bittu raca uyúcana, cumu rixxiꞌaya guecani bittu anca tsee nu runcana.

⁸ Lebiꞌi gualtsia laní, neti bittu tsiaxxia, cumu läga chi bisía ura qui neti.

⁹ Dequide re cana anía nna níaba beꞌane Galilea.

Jesús güie laní nu te láni laní gue yoꞌo lhaga

¹⁰ Ttiaca dequide chi dia ca betsi Jesús laní nna anáguaba lee diaguabe, masquiba lä aní lo iyá benni cumu güequi gatsibe.

¹¹ Ca nu lo guetu, ca benni Israel nna ugüila labe requicana ca sá laníha, nianna rá loescani: “¿Nala nua ganna?”

¹² Anáguaba iyába ca benni requi nía rinnecana guee. Lhecana rácana: “Benni tsee bunna.” Adícana nna rácana: “Läga benni tseeonna, ridí yie bunna benni.”

¹³ Ttiaca ni ttu benni bittu reaxinna innena idisa guee, cumu rasquinna ca nu lo gue ca benni Israel.

¹⁴ Atti liba chi dia rilagüi laníha nna bisína Jesús lheꞌeliꞌa gue yotuha. Lee nna udulottebe beleꞌenie ca benni.

¹⁵ Rebanbani ca nu lo gue ca benni Israel, nianna rácana: —¿Gasná raca gueonni? Inqui lägabi bedhetina attiba riꞌi nna.

¹⁶ Jesús becabie re cana: —Läga nunca quionni ruleꞌa, nunca gue Benni udhelhe neti bunni.

¹⁷ Ca benni raca lecani uncana nu raca le Tata Do Iyyabaaha nna guate daabaquinna gansi guanca nu ruleꞌa-ni gue Tata Do Iyyabaaha, si nu anca quiba rinnea aca.

¹⁸ Nu rinne nu anca guebani nna runba nua qui gapa ca benni-na respeto, ttiaca benni raca leni gapacana respeto benni udhele na, unnuha nna rixxiꞌaba nua nu anca gualí, lägabi run le nua.

¹⁹ ’¿Si läba Moisés bocaꞌanbi ca ley-na len lebiꞌi? Lebiꞌi nna bittu rudole tisa guee. ¿Biacala neti rdacale uttile ganna?

²⁰ Ca benni nna becabicana rácana Jesús: —¡Nu xxegüihaba yuꞌu lheꞌelu! ¿Nú rdacana uttin lu?

²¹ Jesús re cana: —Iyábale rebanxxatta lele de biaca benia ttu nu xxeni sá reaca leri, ca benni Israel.

²² Gualíba Moisés bocaꞌanbi lo sitsi urencana senni, nu runcana leni ca unbiyuu Israel (masquiba läga Moisés biriequibi nua, ca benniola guerihali udulocabi bencabi unná). Lebiꞌi nna rurencana senni, nu runcana leni ca unbiyuu Israel masquiba anca sá redí leri.

²³ Masquiba anca sá redí leri nna rurencana senni ca unto chicaꞌa-na qui bittu quitsale tisa gue ca ley bocaꞌana Moisés. Ganna anía nna ¿biacala riseꞌenle len neti de beonia ttu tsaga ttu unbiyuu rani sá redí leri?

²⁴ Bittu cuenta innele gue nu rilenle. Nu unlale nna gualinne attiba raxxíbana innele.

Ca benni rinnaba tisacana gansi Jesús anque Cristu

²⁵ Ttulhe ca nu seꞌe Jerusalén nna ráttebacana: —¿Si läba unní nua reguilacana utticana?

²⁶ Gualugüiarga. Ni nua duna rinnena aní lo iyá benni, nianna tsa läganu bi rán unná. ¿Si chiba ria le ca nu lo gueri-na dequi gualíba unnába nua Cristu benni chi gaꞌanani Tata Do Iyyabaaha ita aca?

²⁷ Unní nna gua yubari ga beaca lasni, ttiaca gansi chi bisía Cristuha nna tsa läga yuri gaxa ladu daa Benniha.

²⁸ Jesús níaba due ruleꞌenie ca benni lheꞌeliꞌa gue yotuha. Atti bieninie nu rá ca nua nna unnettebe idisa re: —¡Lebiꞌi nna guanca biabinle neti lhe gua yuguale ga beaca lasia lhe, ttiaca läga titú neti delha! Benni udhelhe neti nna anque Benni rinne nu anca gualí. Lebiꞌi nna läga anca bienle Benniha.

²⁹ Neti nna anca biatie cumu atta doe biríaya delha, lee udhelhe neti lhe.

³⁰ Lania nna uxacacana udaxxucane, ttiaca ni ttucana bittu bedaxxucane, cumu läga chi bisía ura guee.

³¹ Ixeru ca benni seꞌe nía güia lecani guee, nianna rácana: —Gansi chi bisía Cristuha nna ¿si xxenrula anca ca milagru un Benniha atti ca milagru runi unní?

³² Atti bienini ca fariseo gue nu rá ca benni rinnecana gue Jesús, lacana lhe ca bixxudi anca nu loha lhe udhelhattebacana ca güensina gue yotuha qui tsiacana sadaxxucana Benniha.

³³ Laniala rá Jesús cana: —Attu sattirba dhoa len lebiꞌi, lenla nna eyaꞌatteba atta do Benni udhelhe neti.

³⁴ Lania nna lebiꞌi nna eguilale neti, ttiaca läga ettettiꞌale neti, cumu läga aca etaꞌale atta esína.

³⁵ Ca benni Israel nna unnaba tisatteba loescani rácana: —¿Ga ladu tsionni, riꞌi nna bittu eselinri na? ¿Si tsiana atta seꞌe adí ca benni gueri lheꞌe adí ca yiesi dittu-na qui uleꞌenna ca nu dittu-na aca?

³⁶ ¿Bi diale nu rán-na: “Masquiba eguilale neti nna läganu neti eselinle, cumu läga etaꞌale atta esína”?

³⁷ Atti bisía sá lhuxa laníha, la sá nua anca sá laní xeni, lania nna udulítteba Jesús unnee idisa re: —Gansi nuxale rebisle nna gualtá len neti gualiꞌiya inda.

³⁸ Attiba rá lo ca sitsi gue Tata Do Iyyabaaha: “Lheꞌe lastoo benni tsia leni neti nna satíaba dha inda rute elha nabani ttu dia lii.”

³⁹ Atti unne Jesús gue inda rute elha nabani ttu dia lii nna gue Espíritu gue Tata Do Iyyabaaha dhi ca benni tsia lecani Bennihaba nua rinnee. Lania nna lägabi chi uxí ca benni Espíritu cumu läga chi beopi Jesús iyyabaaha uleꞌe loe anque Benni ra xxeni lee.

⁴⁰ Atti bienini ca benni seꞌe nía nu rá Jesús, rátteba ttulhecana: —Bennirguaba nna gualíba anque profeta chi gaꞌana isía.

⁴¹ Adícana nna rácana: —Benniba nua Cristuha. Ttiaca adícana nna rácana: —Dica, läga Galilea-na iría Cristuha.

⁴² Lo ca sitsi gue Tata Do Iyyabaaha nna rá: “Cristuha nna anque ttu nu datía David, iríe lheꞌesi Belén nna attaguaba beaca lasi David.”

⁴³ Lo niꞌa gue Jesús, ulhaꞌa lheꞌe loescani de bittu ttudi rinnecana.

⁴⁴ Ttulhecana nna runcana udaxxucane, ttiaca ni ttucana lä bedaxxucane.

Ca nu lo gue ca benni Israel bittu ria lecani gue Jesús

⁴⁵ Ca güensina gue yotuha nna bequibacana deyyacana atta seꞌe ca nu lo gue ca bixxudiha lencana ca fariseo. Ca unnuha nna rácana ca güensinaha: —¿Biaca nua lä dechele?

⁴⁶ Ca güensinaha nna becabicana rácana: —¡Ni ttu benni bittu chi bienintu innena atti rinne nua!

⁴⁷ Ca fariseo nna becabicana rácana: —Lebiꞌi nna, ¿si chiguaba uxí yie nua le?

⁴⁸ ¿Si nux ttu ca nu lo gueri-ni o nux ttuttu riꞌitu ca fariseo-ni chi güia letu gueni aca?

⁴⁹ Ca benni rienini gue Jesús bittu yucana gue nu rá lo ca ley bodhaꞌana Moisés, dia nittibacana.

⁵⁰ Ttu benni fariseo lána Nicodemo nu güiana guanne lenna Jesús ttu lo rela nna unnettebana rána:

⁵¹ —Lo ca ley-na rá: “Läga dica udelha iyyari ttu benni bittu chi bieninri innána bixa benna.”

⁵² Ca unnuha nna becabicana rácan na: —Lu nna ¿si nu Galileoguabalu? Beguilarga lo ca sitsi gue Tata Do Iyyabaaha, tsa lägabi rixxiꞌa dequi chi biría ttu profeta Galilea-na.

⁵³ [Coa ttuttuba ca benni bodaxxu neda guecani deyya liscani.