San Juan 6 - Zapoteco de Aloápam

Jesús betee nu uto guatela gayu mil ca benni

¹ Dequide lania nna diatteba Jesús daca attu ladu gue roꞌo indattoo gue Galilea, nu teeguaba láni indattoo gue Tiberias.

² Ixeru ca benni denocane cumu chi biláquinna ixe ca milagru runie reonie ca benni rani.

³ Jesús gopittebe lo ttu lhilhi. Níaba udoe len ca biꞌini rudheti ca tisa ruleꞌe.

⁴ La lania guaba nua chi daa ribiga laní gue ca benni Israel, lá Pascua.

⁵ Atti biláni Jesús de ya de re benni denocane nna ráttebe Felipe: —¿Gala sayoꞌori ttaxtila qui go iyá ca benni deno-ni?

⁶ Aníaba re Felipe qui ilánie bittuca inná biꞌiniha, cumu lee nna chiba yue bixa unie.

⁷ Felipe nna becabibi rábi: —Gaxa niba belhiu gue chupa gayua ubisa sina lä aca ni qui iyoꞌo ttaxtila go ttuttu ca unná sa saroꞌo.

⁸ Attu biꞌini rudheti ca tisa ruleꞌe Jesús lá Andrés, betsi Simón biꞌini láguaba Pedro, ráttebabi Benniha:

⁹ —Ni ttu uncuiti du-ni denna gayu ttaxtila gue cebada, a chupa belha nna, ttiaca ¿gani unná go iyá ca benni seꞌe-ni?

¹⁰ Jesús ráttebe: —Gualgási iyáxea ca benni seꞌe-na ebíacana. Nianna, bebíattebacana lo ixxiha cumu attulade ixxi anca nía. Attiba tu gayu mil suntterba ca benni unbiyuu seꞌe len ca benni bebíaha.

¹¹ Jesús bedaxxuttebe ca ttaxtilaha. Dequide betee xquixaru leni Tata Do Iyyabaaha nna utidhittebe benniha gue iyába ca benni seꞌe nía. Aníaguaba benie len ca belhaha. Betebe nu uto iyárecha ca benni seꞌe nía bedaa belbaquinna.

¹² Dequide chi belin ca benni nna rátteba Jesús ca biꞌini rudheti ca tisa ruleꞌe: —Gualottupa iyárecha ca pedazu bexxa-na, qui tsa bittubi tsia latti.

¹³ Riꞌitu nna bottupattebatu benni bexxaha. Tsiꞌinu sumi bisá ca pedazu bexxa gue gayu ttaxtila gue cebadaha.

¹⁴ Atti biláni ca benni milagru beni Jesús, ráttebacana: —Gualíba Benniba nua profeta chi gaꞌana isía yies lo yu-ni.

¹⁵ Utedaabani Jesús rdaca ca nua echecane la fuerzaba qui aque nu rinnabia guecani nna, dedhiattebe ttube attu libe axta lo lhilhiha.

Jesús ridee die lo indattoo

¹⁶ Atti chi uca ela nna beaditteba ca biꞌini rudheti ca tisa ruleꞌe Jesús, roꞌo indattooha,

¹⁷ gopittebacabi lo ttu barco qui elhácabi lo indattooha esíncabi lheꞌesi Capernaum. Chiba uca ela nua nna Jesús läganue chi besina len ca biꞌiniha.

¹⁸ Indattooha nna chi udulí lo nua de raca ttu be idí.

¹⁹ Dequide chi bedácabi attiba tu gayu o xxupa kilómetro lo indattooha nna, biláquinbi Jesús ridee lo indaha dedee rebigue cuꞌe barcoha, lacabi nna usilhabaquinbi.

²⁰ Lee nna unnettebe re ca biꞌiniha: —Neti bunni. ¡Bittu gasinle!

²¹ Lacabi nna reꞌo juisia lecabi bolhopicabi Benniha lo barcoha. Barcoha nna besinttegua nua roꞌo yu atta diacabiha.

Jesús anque ttaxtila rute elha nabani ttu dia lii

²² Betteyú sá nna ca benni sna seꞌeba ttu ladu gue indattooha nna utedaabaquinna gopi ca biꞌini rudheti ca tisa ruleꞌe Jesús lo barco nuttu iqui iyya xuaru du nía diacabi. Jesús läganue gopi lheꞌe nua.

²³ La ságuaba nua besina ca barco dedaa daca lheꞌesi Tiberias gaxxaba atta uto ca benni ttaxtila dequide bete Benni bananie ri-na xquixaru leni Tata Do Iyyabaaha.

²⁴ Atti biláni ca benni seꞌe nía nuttu Jesús du nía, niguaba ca biꞌini rudheti ca tisa ruleꞌe lhe, gopittebacana lo ca barcoha diacana satilacana Benniha daca Capernaum.

²⁵ Atti guattiꞌacana Jesús attu ladu gue indattooha nna, unnaba tisattebacane rácane: —Maestro, ¿núca bisíalu nii?

²⁶ Jesús becabie guecani re cana: —Neti nna gualíbatia ria le, lebiꞌi reguilabale neti de betea ttaxtila utole axta qui belinle, läga reguilale neti de begüiale ca milagru runia.

²⁷ Bittu udoxxatta lele quilale elha go nu bittu ruchía isá yies lo yu-ni. Nu unlale nna gualuni duelha gualeguila elha go nu ute elha nabani ttu dia lii guele. Elha go-ni nua utea len lebiꞌi, neti Benni unbiyuu daa iyyabaaha. Denua nna Tata quia do iyyabaaha chi bodúe neti.

²⁸ Lacana nna rácane: —¿Galasná untu qui aca nu raca le Tata Do Iyyabaaha aca?

²⁹ Jesús becabie re cana: —Tsia lele neti Benni udhelhe ni. Unní raca le Tata Do Iyyabaaha unle.

³⁰ Lacana nna unnaba tisattebacana rácana: —¿Bila milagru uleꞌenlu riꞌitu qui ilentu nna tsia letu lu? ¿Bi raca guelu runlu?

³¹ Ca benniola guetu useꞌe atti nía nna utocana nu te láni maná udhelha Tata Do Iyyabaaha lo yu bisi atta useꞌecanaha, attiba rá lo ca sitsi guee-na: “Ttaxtila daa iyyabaaha bete Tata Do Iyyabaaha utocana.”

³² Jesús becabie re cana: —Neti nna gualíbatia ria le, läga Moisés nua betebi ttaxtila daa iyyabaaha len ca nua, Tata quiaba bete nua, nnanna nna rute nu gualíga anca ttaxtila daa iyyabaaha.

³³ Cumu netiba nua goadia iyyabaaha anca ttaxtila gue Tata Do Iyyabaaha rutea elha nabani gue ca benni seꞌe yies lo yu-ni.

³⁴ Nianna rácane: —Tata, satíaba bete loesi ttaxtila-na gotu.

³⁵ Jesús re cana: —Neti anca ttaxtila rute elha nabani ttu dia lii. Benni itana len neti nna tsa lärgabi ttun nua, nu tsia leni neti nna tsa lärgabi ebis nua.

³⁶ Ttiaca attiba chi rpea le, masquiba chi bilenle neti nna tsa läga ria lele quia.

³⁷ Iyába ca benni rute tata quia len neti nna guadába ca nua len neti. Ca benni daa len neti nna läga odequia ca nua.

³⁸ Cumu neti nna läga guadia iyyabaaha qui unia nu raca lasia. Neti nna delha unia nu raca le Tata quia.

³⁹ Unní anca nu raca le Tata quia Benni udhelhe neti unia, bittu ugüelha tsia nitti ni ttu ca benni utee len neti. Nu unla nna unia eyacaquinna attu libe gansi chi bisía sá lhuxa.

⁴⁰ Nu ruꞌu le Tata quia nna ancana, iyába ca benni odequi locani ugüiacana neti Xiꞌinie-ni, tsia lecani neti lhe ca unnuha gatta elha nabani guecani ttu dia lii, neti nna unia eyacaquinna attu libe gansi chi bisía sá lhuxa.

⁴¹ Lo niꞌa gue nua nna udulo ca benni Israel unnecana gue Jesús, de rá Benniha: “Neti anca ttaxtila daa iyyabaaha.”

⁴² Ráguabacana: —¿Lä Jesús xiꞌini José bunni nna? Riꞌi nna guanca biabinri tata gueniha lhe nan gueniha lhe. ¿Biacala rá unní dequi dana iyyabaaha ganna?

⁴³ Jesús becabie re: —Bitturu innele gue nu chi ria-ni.

⁴⁴ Ni ttu benni lä isíana anátteba len neti gan läba Tata quia Benni udhelhe neti unie itana. Neti nna unia eyaquinna attu libe gansi chi bisía sá lhuxa.

⁴⁵ Lo ca sitsi bocaꞌa ca profeta nna rá: “Tata Do Iyyabaaha uleꞌenie iyába ca benni.” Larcala nna iyába ca nu bienquinna gue Tataha lhe bideticana guee lhe dacana len neti.

⁴⁶ ’Tsa läganu chi bilenna Tata quia do iyyabaaha, sunruba neti Benni delha atta doe chi bilátie.

⁴⁷ Neti nna gualíbatia rpea le, benni ria leni neti nna gua teba elha nabani gue nua ttu dia lii.

⁴⁸ Neti anca ttaxtila rute elha nabani ttu dia lii gue ca benni.

⁴⁹ Ca benniola gueleha nna utocana ttu elha go te láni maná lo yu bisiha, ttiaca läquiga de unnuha nna bittuba utticana.

⁵⁰ Neti nna rinnea gue ttaxtila daa iyyabaaha. Benni gona ttaxtila-ni nna tsa läga gatti nua lo Tata Do Iyyabaaha.

⁵¹ Neti nua anca ttaxtila rute elha nabani guadi iyyabaaha. Benni gona ben-ni nna aca banna ttu dia liiba iyyabaaha. Ttaxtila utea-ni nna anque cuinaga cuerpu quia, utea na qui ca benni seꞌe yies lo yu-ni nna gatta elha nabani guecani ttu dia lii.

⁵² Lania nna ca benni Israel nna udulottebacana bitilha tisacana rácana: —¿Gasná uniunná utena bela gue cuerpu guen-na gori?

⁵³ Jesús becabie guecani re cana: —Neti nna gualíbatia ria le, gansi bittuba gole bela quia-ni lhe iꞌiyale reni quia-ni lhe neti Benni unbiyuu daa iyyabaaha, läga aca banle ttu dia lii.

⁵⁴ Nu gona bela quia-ni lhe iꞌiyana reni quia-ni lhe gua teba elha nabani gueni ttu dia lii. Neti nna gunba eyaquinna attu libe ca sá daa lhuxa.

⁵⁵ Cumu bela quia-ni nna ancana nu gualíga anca elha go, reni quia-ni nna ancana nu gualíga anca iꞌiya ca benni.

⁵⁶ Nu gona bela quia-ni lhe iꞌiyana reni quia-ni lhe unnuha duna len neti, neti nna dua len lana.

⁵⁷ Tata quia Benni udhelhe neti nna yuꞌu elha nabani guee. Larcala nna neti nna yuꞌuguaba elha nabani quia. Denuala nna ca benni gocana bela quia-ni, de netirba nna aca bancana.

⁵⁸ Benni anque ttaxtila daa iyyabaaha, bittu anque loesi ttaxtila lá maná uto ca benniola gueri useꞌe atti nía. Masquiba utocana benniha nna labíaba utticana, ttiaca benni gona ttaxtila-ni nna aca banbana ttu dia lii iyyabaaha.

⁵⁹ Unní utixxiꞌa Jesús lheꞌe yoꞌo atta ritupa ca benni Israel rudheticana ca tisa gue Tata Do Iyyabaaha do lheꞌesi Capernaum.

Jesús anque benni rinne ca tisa rute elha nabani ttu dia lii gue ca benni

⁶⁰ Atti bienquinna nu rá Jesús, ixe ca nu rudheti ca tisa ruleꞌe rácana: —Tsitsi anca ca tisa ruleꞌe Ben-ni. ¿Nú dhana udo nagani gue Ben-ni?

⁶¹ Utedaabani Jesús rinne ca biꞌini rudheti ca tisa ruleꞌe gue nu unnee nna, ráttebe cana: —¿Si rien díbinle ca tisa unnea-ni?

⁶² ¿Titialiga unle gansi ilenle neti Benni unbiyuu daa iyyabaaha eyopia atta doa ttuha?

⁶³ Espíritu gue Tata Do Iyyabaaha rute elha nabani guele ttu dia lii, läga bela gue cuerpu guele-na unná rute elha nabani guele. Ca tisa rinnea-ni nna ancaque gue Espíritu gue Tata Do Iyyabaaha rute elha nabani gue ca benni ttu dia lii.

⁶⁴ Ttiaca seꞌe ttu chupale nna bittu ria lele. Jesús re anía cumu desde primeroha li chi yue nupaxa bittu tsia lenie lhe nú nua utene las ná ca nu utticane lhe.

⁶⁵ Ráguabe: —Denuala nna ria le, ni ttu benni bittu aca itana natteba len neti, gansi läba Tata quia unie ita nua len neti.

⁶⁶ Snatteba lania nna ixeru ca benni rudheti ca tisa ruleꞌe bequicana, bitturu güiacana sanalhacane.

⁶⁷ Laniala nna rá Jesús ca biꞌini tsiꞌinu rudheti ca tisa guee: —Lebiꞌi nna, ¿si rdacaguale eyyale?

⁶⁸ Simón biꞌini láguaba Pedro nna becabibi rábi: —Benni bananie riꞌitu, ¿núrua la len nua tsiatu ganna? Inqui sunruba lu rinne ca tisa rute elha nabani gatta ttu dia lii gue ca benni nna.

⁶⁹ Riꞌitu nna chi ria letu lhe chi yutu lhe lu ancalu Cristu xiꞌini Tata Do Iyyabaaha Benni doe anque Benni bani.

⁷⁰ Jesús becabie re: —Tsiꞌinule chi becueea, ttiaca ttule nna ancana ttu nu xxegüi.

⁷¹ Atti re anía nna rixxiꞌe nu uni Judas xiꞌinbiyuu Simón Iscariote, cumu masquiba selana len tsiꞌinu ca biꞌini rudheti ca tisa ruleꞌe Benniha nna lana utena Benniha las ná ca nu utticane.