San Juan 3 - Zapoteco de Aloápam

Jesús rinnee len Nicodemo

¹ Udo ttu benni ancana fariseo lána Nicodemo. Ancana ttu benni lo gue ca benni Israel.

² Unnuha nna güiana ttu lo rela guannalhina Jesús, nianna rána Benniha: —Maestro, riꞌitu yutu nna Tata Do Iyyabaahaba udhelhe lu qui uleꞌenlu riꞌitu, cumu ni ttu benni bittu aca gueni unna ca milagru runlu-na gansi bittuba du Tata Do Iyyabaaha lenna.

³ Jesús becabie re: —Neti nna gualíbatia rpea lu, benni bittuba galina attu libe nna läga aca isela nua ca benni rinnabia Tata Do Iyyabaaha.

⁴ Nicodemo nna ráne: —¿Gasná un ttu benni chi anca yaxxu galna attu libe? ¿Si guacaba gue nua etaꞌana lheꞌe nan gueniha qui galna attu libe?

⁵ Jesús becabie re: —Neti nna gualíbatia rpea lu, benni bittu galina attu libe leni inda nna leni Espíritu gue Tata Do Iyyabaaha nna läga aca isela nua ca benni rinnabia Tata Do Iyyabaaha.

⁶ Benni rali yies lo yu-ni nna xiꞌini ca benni seꞌe yies lo yu-niba anca nua, benni anca xiꞌini Tata Do Iyyabaaha nna Espíritu gue Bennihaba benie nua xiꞌinie.

⁷ Bittu aca guatenlu de biaca rpea lu: “Raca duelha galile attu libe.”

⁸ Be-na gatti laduba riríana, lu nna masquiba gua rieninlu tsiꞌini, ttiaca läga yulu ga ladu dana lhe ga ladu diana lhe. Aná runi Espíritu gue Tata Do Iyyabaaha lhiꞌu lheꞌe lastoo ca benni rali attu libe.

⁹ Nicodemo nna becabina rána: —¿Gasná aca nu rálha?

¹⁰ Jesús becabie re na: —Lu ancalu maestro gue ca benni Israel-ni, ¿si bittuba ritedeenlu nu ria-ni?

¹¹ Neti nna gualíbatia ria lu, riꞌitu nna rinnebatu gue nu chi yutu, rixxiꞌabatu gue nu chi bilentu lhe ttiaca lebiꞌi nna läga ria lele gue nu rátu le.

¹² Inqui gue nu anca gue yies lo yu-niba rixxiꞌatia le nna bittu ria lele, ¿gasná tsia lele gue nu anca gue iyyabaaha gansi quixxiꞌatia le?

¹³ ’Tsa läganu benni chi gopi iyyabaaha sunruba neti Benni unbiyuu daa iyyabaaha goadia bisíaya nii.

¹⁴ Attiba beni Moisés lo yu bisiha, ulhidhabi ttu yaga xua ttu belha ancana leni bronce loni, anáguaba neti Benni unbiyuu daa iyyabaaha raca duelha ilhidhacana neti güetsaa,

¹⁵ qui anáchu nna iyába ca benni tsia lecani neti gatta elha nabani guecani ttu dia lii.

¹⁶ ’Tata Do Iyyabaaha nna raca juisianie gue ca benni, denuala nna udhelhe yies lo yu-ni neti Xiꞌinie Benni tturba donie, qui anáchu nna iyába ca benni tsia lecani neti nna bittu tsia nitticana, sinuqui gatta elha nabani guecani ttu dia liiba iyyabaaha.

¹⁷ Cumu Tata Do Iyyabaaha nna läga udhelha Benniha neti Xiꞌinie-ni qui unia tsia nitti ca benni seꞌe yies lo yu-ni, udhelhabe neti qui odiláya cana.

¹⁸ ’Benni ria leni neti Xiꞌini Tata Do Iyyabaaha, läga tsia nitti nua, ttiaca nu bittu ria leniha nna dia nittiba nua, de bittu güia leni neti Benni nu ttu cuinarba anca Xiꞌini Tata Do Iyyabaaha.

¹⁹ Chi dia nitticana cumu neti Benni anca xieniha nna chiba bita yies lo yu-ni, lacana nna de runcana nu lä anca tsee nuarca ucarlaquinna gue atta chulha attichula gue xieniha.

²⁰ Iyába ca nu runi nu lä anca tsee bittu raca uyúcana xieniha, läga ribigacana atta ruꞌu xieniha qui bittu tsanni lo nu runcana nianna itisacana.

²¹ Ttiaca benni runi nu anca gualí rá Tata Do Iyyabaaha, gua ribigaba ca nua atta yuꞌu xieniha qui ilá lacana nna runbacana nu radi le Tata Do Iyyabaaha.

Juan biꞌini rugadi inda rixxiꞌabi gue Jesús

²² Dequide lania nna güiatteba Jesús lenie ca biꞌini rudheti ca tisa ruleꞌe lo yu gue Judea, níaba bisee lenie ca biꞌiniha, rugadi guabe benni inda lhe.

²³ Anáguaba Juan rugadiguabi benni inda daca lo yu te láni Enón nu re gaxxaba lo yu nu te láni Salim, cumu nía yuꞌuxxatta inda. Nía ria ca benni radicana inda.

²⁴ Juan läga chi te biꞌiniha lisiyya lania.

²⁵ Ttulhe ca benni rudheti ca tisa ruleꞌe Juan bitilha tisacabi leni adí ca benni Israel lo niꞌa gue bi nua rigúarna nu tsiga ancari lo Tata Do Iyyabaaha qui reacari benni nari loe.

²⁶ Ca unnuha nna güiattebacana guayúcana Juan rácan bi: —Maestro, benni udú lenlu daca attu ladu gue roꞌo yoo Jordán, nu utixxiꞌaguabalu gueniha, nnanna nna rugadiguabana benni inda. Iyába benni diacana len lana.

²⁷ Juan becabibi rábi: —Ni ttu benni bittu aca gueni unna ttu bixa gansi läba Tata do iyyabaaha aca lanie na qui unna nua.

²⁸ Lebiꞌi nna gua rienbinle ria, läga neti nua Cristu, suntterba anca ttu benni neru udhelha Tata Do Iyyabaaha rixxiꞌa dequi chi daa Cristu.

²⁹ Attiba ttu atta rutsá nácani, unbiyuu utsá nániha liba nua dhína nuila. Unbiyuu raca ruyú tsee loesni leni unbiyuu utsá nániha du gaxxaba nía nna reꞌo juisia leni rieninna rinne nua. Denuala nna neti nna reꞌo juisia lasia cumu neti anca nu ruyú tsee loesni leni Jesús.

³⁰ Larcala nna raca duelha eꞌeyu Ben-na aque Benni ra xxeni leni, neti nna eyadi ga lasia eyaca nu bittu ra xxeni leni.

³¹ ’Ben-na dee iyyabaaha. Lee anque benni ra xxeni leni gue delo iyába. Benni anca gue yies lo yu-ni nna suntteba gue yies lo yu-ni anca nua, nu anca gue yies lo yu-niba rinnena. Ttiaca Benni daa iyyabaa nna Benniha anque Benni ra xxeni leni gue delo iyába.

³² Gue nu bilábanie lhe nu bienbanie lhe rixxiꞌe, ttiaca läganu ria leni guee.

³³ Ca benni ria lecani gue nu rá Ben-na nna leni unnuha ruleꞌe locana dequi gualíba nu rá Tata Do Iyyabaaha.

³⁴ Ben-na anque Benni udhelha Tata Do Iyyabaaha, ca tisa gue Bennihaba rinnee, cumu Tata Do Iyyabaaha nna itú iqui itú lee bete Espíritu guee len Ben-na.

³⁵ Tata Do Iyyabaaha nna raca juisien Benniha gue Xiꞌinie-na, larcala nna iyába nu tee chi bocaꞌane las ná Ben-na.

³⁶ Nu ria leni gue Xiꞌinie-na gua teba elha nabani ttu dia lii gueni, nu bittuba tsia leni Ben-na nna lägabi elha nabani gue nua te ttu dia lii. Unnuha nna elha disa la yuꞌubia ute Tata Do Iyyabaahaba ralha nua dhína.