San Juan 21 - Zapoteco de Aloápam

Jesús bodileꞌen loe a gasi ca biꞌini rudheti ca tisa ruleꞌe

¹ Dequide lania nna bodileꞌen loen Jesús attu libe ca biꞌini rudheti ca tisa ruleꞌe roꞌo indattoo gue Tiberias. Aní uca beleꞌen loe ca biꞌiniha:

² Simón biꞌini láguaba Pedro lhe Tomás biꞌini te lábi Cuachiha lhe Natanael gue yiesi Caná re lo yu gue Galilea lhe, ca xiꞌini Zebedeo lhe a chupa ca biꞌini sela len ca biꞌini rudheti ca tisa ruleꞌe Jesús lhe. Iyába ca biꞌin-ni ttu reba seꞌecabi nía.

³ Simón biꞌini láguaba Pedro rábi ca biꞌiniha: —Tsiaya güedaxxu belha. Lacabi nna becabicabi rácabi: —Dhaba riꞌitu len luu. Laniala nna diacabi, gopittebacabi lo ttu barco, ttiaca la elaha nna tsa bittu biexxuincabi ni ttu belha.

⁴ Atti chi daa raniha nna ucaxxetteba Jesús roꞌo indattooha. Ca biꞌini rudheti ca tisa ruleꞌe nna ni lä yucabi ganna Bennihaba nua.

⁵ Jesús unnaba tise re ca biꞌiniha: —Ca xiꞌinto, ¿si biexxuinle belha qui gori? Riꞌitu nna becabitu rátu: —Nuttu biexxuintu.

⁶ Jesús re riꞌitu: —Gualudelha yexxa guele-na daca ladu derechu gue barco-na, uyúrgale bi güiyaxxubinle belha. Aníaba bencabi. Dequila nna ganua riedhintu yexxaha ebeatu na lheꞌe indaha de deyuꞌuxxatta belha lheꞌeni.

⁷ Nianna, ttu ca biꞌini rudheti ca tisa gue Jesús, biꞌini racaruni Benniha guebiha nna rábi Pedro: —¡Benni bananie rihaba Ben-na! Atti bienini Simón biꞌini láguaba Pedro dequi Benni bananie ca biꞌinihaba Benniha nna, beocutteba xobi cumu riaba xobi, nianna utaꞌattebabi lheꞌe indaha.

⁸ Adí ca biꞌini rudheti ca tisa gue Benniha nna deyya lencabi barcoha qui eríacabi roꞌo indattooha, denaꞌayacabi yexxaha de sa tina belha, cumu attiba attu gayua (100) metroba reasa esíncabi atta daa roꞌo indaha.

⁹ Atti besintu roꞌo indaha nna biláttebintu ttu gui yali re nía. Lo guiha nna xua ttu belha, chiguaba te ttaxtila lhe.

¹⁰ Jesús re riꞌitu: —Gualsaxxí ttu chupa ca belha chi guadaxxubale-na.

¹¹ Simón biꞌini láguaba Pedro nna gopittebabi lo barcoha, bebe naꞌayattebabi yexxaha bebeabi na roꞌo indaha de sa tina belha elha. Ttu gayua yuꞌu medi gayua yuꞌu tsunna (153) belha deyuꞌu lheꞌe nua. Delo ttoníali nua deyuꞌu lheꞌe yexxaha nna tsa läga biseꞌelo nua.

¹² Jesús re riꞌitu: —Gualtá, gualgo xtilhe. Niba ttuttu bittu beaxintu innába tisatu gátu Benniha: “¿Núleonni?”, cumu yutu Benni bananie ttuhaba Benniha.

¹³ Jesús ubigattebe bedaxxue ttaxtilaha benne riꞌitu, aníaguaba benie len ca belhaha lhe.

¹⁴ Lania beyonna libe ruleꞌen loe riꞌitu ca biꞌini rudheti ca tisa ruleꞌe, dequide beacanie beríe lheꞌe baa atta yuꞌu ca nu yatti-na.

Jesús rulise Pedro qui uyúbi ca benni ria lecabi benniha

¹⁵ Dequide chi uluxa utoxtiltu nna, rátteba Jesús Simón biꞌini láguaba Pedro: —Simóni xiꞌini Jonás, ¿si racaruinlu quia atti ca biꞌini seꞌe ni? Pedro becabibi rábi: —Bila. Lu nna gua yuxeabalu, xa Benni bananie neti, gua racabatia guelu. Jesús re biꞌiniha: —Biyú ca carneꞌe quia-na ganna.

¹⁶ Bedequi dacabe re biꞌiniha attu libe: —Simóni xiꞌini Jonás, ¿si gua raquinlu quia? Pedro becabibi rábi: —Bila. Lu nna gua yubalu, xa Benni bananie neti, gua racabatia guelu. Jesús re biꞌiniha: —Biyú ca carneꞌe quia-na ganna.

¹⁷ Nu beyonna libe re biꞌiniha: —Simóni xiꞌini Jonás, ¿si gua raquinlu quia? Pedro nna siꞌirurba benbi lania, cumu nía beyonna libe rá Benniha bi, ¿si gua raquinlu quia? Laniala nna rábi Benniha: —Lu nna iyába yulu, xa Benni bananie neti. Gua yuxeabalu neti nna gua racabatia guelu. Jesús re biꞌiniha: —Biyú ca carneꞌe quia-na ganna.

¹⁸ Neti gualíbatia rpea lu, atti ancalu cuitiha nna ttubalu reocu xolu, riabalu attaba racaba lelu. Ttiaca gansi chi ucalu benniola nna ulhíba nálu qui ugucu nu subi xolu. Unnuha nna icheen lu tsia lenna lu atta bittu raca lelu tsialu.

¹⁹ Aníaba rá Jesús, rixxiꞌe gaxasná gatti Pedro. Leni elhutti guebiha nna unbi uleꞌe lo anca Tata Do Iyyabaaha benni ra xxeni lee. Lenla nna re biꞌiniha: —¡Utá, bettenalha neti!

Biꞌin-ni nua ucaxxattani Jesús guebi

²⁰ Atti bodequi lo Pedro bilenbi denoo biꞌini racaxxattani Jesús guebiha nna, biꞌiniha guaba nua udo cuitta Jesús atti uto rsetuha. Labi nua unnaba tisabi Jesús rabi Benniha: “Benni bananie neti, ¿núnna uten lu las ná ca nu uttican lu?”

²¹ Atti biláni Pedro biꞌiniha nna unnaba tisattebabi Jesús rábi benniha: —Benni bananie neti, unní nna ¿bila sateonni?

²² Jesús becabie re biꞌiniha: —Gansi aca lasia nna anába na dona axta liba esíaya, lu nna ¿bi elha ralhalu rinnaba tisalu? Lu nna utába betteno neti.

²³ Anía uca nna nuarca biría tisa bina adí ca benni ria le Jesús dequi biꞌiniha nna bittu gattibi. Ttiaca Jesús läga re Pedro dequi biꞌiniha nna bittu gattibi. Rábe biꞌiniha: “Gansi aca lasia nna, anába na dona axta liba esíaya, lu nna, ¿bi elha ralhalu rinnaba tisalu?”

Ni lhuxa ca tisa beni Juan lo sitsi

²⁴ Biꞌin-ni nua biꞌini bedheti ca tisa beleꞌe Jesús, labi nna rixxiꞌabi iyába unní, cuinaba labi benbi ca tisa-ni lo sitsi lhe. Riꞌi nna gua yubari, labi nna rixxiꞌababi nu anca gualí.

²⁵ Jesús ixeru nu beni Benniha. Gansi tsia ttuttu ca nu beni Benniha lo sitsi nna neti nna racatia, gaxa läga aca ni yies lo yu-ni atta tsuꞌu ca sitsi aca locani gue iyá nu benie. Amén.