San Juan 20 - Zapoteco de Aloápam

Jesús beacanie

¹ Dumincu, primerba sá redú lo xumanu, diltochiga sna ancarla chulha güia María Magdalena atta te baa gue Jesús. Biláttebinbi chi bitúa iyya yaya roꞌo baaha.

² Laniala nna begáttebabi deyyabi atta do Simón biꞌini láguaba Pedro lenbi biꞌini racaxxattani Jesús guebiha. Nianna, rábi ca biꞌiniha: —¡Bebeabacana Benni bananie ri lheꞌe baaha! ¡Bittu yutu gaxa ladu guadhaꞌancane!

³ Pedro lenbi attu biꞌiniha nna diattebacabi atta te baaha.

⁴ Irupabacabi ruxunnini cabi diacabi, ttiaca attu biꞌiniha nna bigaarbi atti Pedro. Nuarca lo biꞌiniha bisínbi atta te baaha.

⁵ Biachuttebabi becá lobi lhiꞌu, níaba bilenbi ca lari bitesi Jesús, ttiaca bittu utaꞌabi lhiꞌu.

⁶ Dequila nna bisía Simón biꞌini láguaba Pedro. Biꞌiniha nna utaꞌattebabi lhiꞌu. Labi nna biláguabinbi ca lari bitesi Benniha seꞌecana nía.

⁷ Lari bottesicana iqui Benniha nna läga re nua leni adí ca lariha, atta subila latsi tte yapa nua rena.

⁸ Laniala utaꞌa biꞌini bisína primero atta te baaha. Bilábinbi lheꞌe baaha nna güiatteba lebi.

⁹ Cumu läga chi guadú lecabi gue nu chi gaꞌana lo ca sitsi gue Tata Do Iyyabaaha, atta rá Jesús labíaba eyaquin Benniha qui eríe lheꞌe baa atta yuꞌu ca nu yatti-na.

¹⁰ Lacabi nna güequittebacabi deyyacabi atta reꞌancabiha.

Jesús beleꞌen loe María Magdalena

¹¹ María nna níaba dubi roꞌo baaha ribesbi. Laca dubi ribesbiha nna biachuttebabi becá lobi begüiabi lheꞌe baaha.

¹² Nía bilenbi chupa ingeli nucu xo sitsi guecabi. Ttubi dobi daca xequi atta utta Jesús, attubi nna dobi daca xaniꞌa atta utta Benniha.

¹³ Ca ingeliha nna unnaba tisacabi rácabi: —Xa nuila du-na, ¿biaca ribeslu? Labi nna becabibi rábi: —Cumu dechebacana Benni bananie neti. Neti nna bittu yua gaxa guacaꞌancane.

¹⁴ Unnuhaba rábi nna bodequitteba lobi daca cuꞌebi, biláttebinbi Jesús níaba due, ttiaca läga yubi gansi Benniha nua.

¹⁵ Jesús unnaba tise re biꞌiniha: —Nuila, ¿biaca ribeslu? ¿Nú reguilalu? Labi nna uquinbi ga nu rapa lo yu atta daa ca ya xixxihaba nua, nuarca rábi: —Xa Tata, gansi luba dechelu Benniha nna utixxiꞌen neti gaxa guacaꞌanlu Benniha qui tsiaya saxíe.

¹⁶ Jesús re biꞌiniha: —¡María! Labi nna bodequitteba lobi, unnebi tisa arameo rábi: —¡Raboni! —Tisa-ni nna dienna innána Maestro.

¹⁷ Jesús re biꞌiniha: —Bittu udaxxulu neti, cumu läga chi beopia atta do Tata quia. Beyyala guattixxiꞌen ca betsito quia chi deyyaꞌaya atta do Tata quia, Benni ancaguaba Tata guele. Lee anque Dios quia, Benni ancaguaba Dios guele.

¹⁸ Laniala nna deyya María Magdalena qui quixxiꞌenbi ca biꞌini rudheti ca tisa ruleꞌe Jesús, labi nna chi bilenbi Benniha, quixxiꞌaguabi iyába nu rá Benniha bi lhe.

Jesús ucaxxe lheꞌe yoꞌo atta seꞌe ca biꞌini rudheti ca tisa ruleꞌe

¹⁹ Atti chi daa raca ela la sá dumincutteba, sá redú niꞌa xumanu, ca biꞌini rudheti ca tisa ruleꞌe Jesús, yayabincabi puerta gue yoꞌo atta bitupacabiha, cumu rasquinbi lo ca nu lo gue ca benni Israel. Nianna ucaxxe Jesús udúe salhe guecabi, atti re ca biꞌiniha: —¡Xen su lee gualtseꞌe!

²⁰ Dequide re anía nna beleꞌettebanie ca biꞌiniha ca ne lhe uxtil guee lhe. Ca biꞌini rudheti ca tisa guee nna beꞌo juisia lecabi bilencabi Benniha.

²¹ Jesús re ca biꞌiniha attu libe: —¡Xen su lee gualtseꞌe! Attiba udhelha Tata quia neti, aníaguaba idhelha lebiꞌi.

²² Unnuhaba re nna belubittebe, nianna re: —Gualdhí Espíritu gue Tata Do Iyyabaaha.

²³ Ca benni gále gua teba elha xen lasi gue nu lä anca tsee runcana nna gua teba elha xen lasi guecani. Ca benni innále bittu elha xen lasi guecani te nna bittuguaba elha xen lasi te gue ca nua.

Bittu ria le Tomás dequi gualí beacani Jesús

²⁴ Tomás biꞌini teeguaba lábi nu Cuachi, labi nna selaguabi ca biꞌini rudheti ca tisa ruleꞌe Jesús. Läganu bi te atti beleꞌen lo Jesús adí ca biꞌiniha.

²⁵ Lenla nna rácabi biꞌiniha: —Chi bilentu Benni bananie riꞌi. Ttiaca Tomás nna becabibi rábi: —Gansi bittuba ilátia las nee anca güee gue ca clavuha lhe ugaꞌa xbináya atta utaꞌa ca clavuha lhe lheꞌe belea bedocana lheꞌe uxtil guee lhe läga tsia las neti.

²⁶ Dequide ute xxunu ubisa nna ca biꞌini rudheti ca tisa ruleꞌe Jesús bedetupattebacabi attu libe lheꞌe ttu yoꞌo. Laniarguaba nna níaba du Tomás len ca biꞌiniha. Riꞌitu nna yayabintu yoꞌoha. Jesús ucaxxettebe lheꞌe yoꞌoha udúe salhe guetu. Nianna re riꞌitu: —¡Xen su lee gualtseꞌe!

²⁷ Lee nna ráttebe Tomás: —Bedo xbinálu nii. Begüiatte ca náya-ni lhe besiga nálu nna begaꞌa nálu lheꞌe belea do lheꞌe uxtil quia-ni. Bittu acalu nu lä ria leni. Uca benni ria leni.

²⁸ Tomás nna becabibi rábi: —¡Lu ancalu Benni bananie neti lhe Tata Do Iyyabaaha quia lhe!

²⁹ Jesús re biꞌiniha: —¿Si de bilenlu neti nna ria lelu? ¡Carbáru ca benni bittu biláquinna nianna ria lecani!

Bi lo niꞌa gue beni Juan lo sitsi-ni

³⁰ Ixeru adí ca milagru beni Jesús aní lo ca biꞌini rudheti ca tisa ruleꞌe. Ca benniha nna lägabi diaque lo sitsi-ni.

³¹ Ca ben-ni nna ucaque lo sitsi qui anáchu lebiꞌi nna tsia lele Jesús anque Cristu Benni chi gaꞌanani Tata Do Iyyabaaha odile ca benni, anque Xiꞌini Tata Do Iyyabaaha lhe. De tsia lele gue Ben-na nna gatta elha nabani guele iyyabaaha ttu dia lii.