San Juan 16 - Zapoteco de Aloápam

¹ ’Rixxiꞌatia le unní, qui tseꞌe tsitsile, bittu odhaꞌanle ria lele neti.

² Lebiꞌi nna ebea ca benni le lheꞌe ca yoꞌo atta rudhetile ca tisa gue Tata Do Iyyabaaha, isía sá nna nuxaba uttin le nna aquinna sina gue Tata Do Iyyabaahaba nua runna unna anía.

³ Anía uncana, cumu bittu anca biaquinna Tataha, niguaba neti.

⁴ Rixxiꞌatia le unní, qui gansi chi bisía sá satele aná nna lania nna exxa lele, neti nna chiba utixxiꞌatia le nu satele. ’Läga utixxiꞌatia le unní primeroha, cumu len lebiꞌiba doa.

Espíritu gue Tata Do Iyyabaaha uleꞌenie ca benni nu anca gualí

⁵ Nnanna nna chi eyyaꞌaya atta do benni udhelhe neti, lebiꞌi nna niba ttule bittu rinnaba tisale neti innále: “¿Ga eyyalu?”

⁶ Ttiaca seꞌe siꞌilale de utixxiꞌatia le nu rpea le-ni.

⁷ Neti nna rpeba le nu anca gualí: Tseerla salíanale eyyaꞌaya, cumu gansi bittuba eyyaꞌaya nna läga isía Espíritu Benni aca lanie le. Ttiaca gansi eyyaꞌaya nna lania nna idhelha Benniha len lebiꞌi.

⁸ Gansi chi bisía Benniha nna unie ttedaani ca benni bittu ria lecani Tata Do Iyyabaaha seꞌe yies lo yu-ni nú nua te tulha guecani, nú nua runi nu anca tsee lo Tata Do Iyyabaaha lhe nú nua satena lo elha disa ute Tata Do Iyyabaaha gansi chi benie elha uxtisi guecani lhe.

⁹ Unie ttedaaquinna lacana ancacana nu te tulha gueni de bittu ria lecani neti.

¹⁰ Unie ttedaaquinna neti anca benni runi nu anca tsee lo Tata Do Iyyabaaha. Denua nna chi deyyaꞌaya atta doe, lebiꞌi nna lärga nurua neti ilenle.

¹¹ Unie ttedaaquinna lacana nna dhibacana elha disa ute Tata Do Iyyabaaha cumu nu xxegüi rinnabia yies lo yu-ni nna chiba beni Tata Do Iyyabaaha elha uxtisi gue nua qui tsiana atta uyúna elha disa.

¹² ’Ixeru nu tetia upea le, ttiaca nnanna nna läga sadú lele nu innía.

¹³ Gansi chi bisía Espíritu gue Tata Do Iyyabaaha benni rixxiꞌa nu gualí, Benniha uleꞌenie le iyá nu anca gualí, cumu läganu anca gue Benniha innee, nu iyienbani Benniha inná Tata Do Iyyabaaha innee, quixxiꞌenie le iyába nu chi daa aca lhe.

¹⁴ Benniha nna unie uleꞌe lo anca Benni ra xxeni leni, cumu udaxxu niꞌe nu anca quia nna quixxiꞌenie le.

¹⁵ Iyába nu anca gue Tata quia nna quiba anca nua. Denuala nna ria, Espírituha nna udaxxu niꞌe nu anca quia qui quixxiꞌenie le.

Nu tseꞌe siꞌileha nna eyacana nu unna edaca lele

¹⁶ ’Lärga biruattega isá nna nuttur neti ilenle, bittuguaba isáttega aca nna chi edelenle neti attu libe.

¹⁷ Ttulhe ca biꞌini rudheti ca tisa ruleꞌe Jesús unnaba tisatteba loescabi rácabi: —¿Bi diani nu rá Ben-na: “Lärga biruattega isá nna nutturu neti ilenle, bittuguaba isáttega aca nna chi edelenle neti attu libe”? ¿Bi diani nu rá Ben-na: “Eyyaꞌaya atta do Tata quia”?

¹⁸ Lacabi nna rá loescabi: —¿Bi diani nu rá Ben-na: “Lärga birua isá”? Tsa läga rite deenri bi gueonna rinnee.

¹⁹ Jesús utedaattebanie rdacatu innába tisatue. Laniala nna re riꞌitu: —¿Si rinnaba tisa loesle gue bixa dia-ni nu ria: “Lärga biruattega isá nna nuttur neti ilenle, bittuguaba isáttega aca nna chi edelenle neti”?

²⁰ Neti nna gualíbatia ria, lebiꞌi nna cuesle lhe tseꞌe siꞌile lhe gue nu satea, laca ca benni seꞌe yies lo yu-ni nna eyoꞌo lecani. Ttiaca masquiba tseꞌe siꞌile, lenla nna edaca lele.

²¹ Gansi chi deoba gali unto gue ttu nuila, siꞌirurba runna cumu chi bisía ura gueni. Ttiaca dequide chi uli untoha nna tsa rixulhin nua gue elha disa biyúna, cumu de reꞌo leni bisía attu benni yies lo yu-ni.

²² Anáguaba lebiꞌi, ttu nnanna bunna seꞌe siꞌile, neti nna güetaba ettegüiaya le, lania nna eyoꞌo juisia lele. Unnuha ancana ttu elha redaca lee guele nu tsa nuttu nu dhana cuana.

²³ ’Gansi chi bisía la sá nna lärgabirua innába tisale neti gue ttu bixa. Neti nna gualíbatia ria, iyába bixa innábale leni Tata quia rudettile láya nna gutebe nua len lebiꞌi.

²⁴ Axta nnanna lägabi chi unnabale lenie udettile láya. Gualnnaba nna guadíbale, qui edaca lele itú iqui itú lele.

²⁵ ’Iyába nu ria-ni nna rinnea-na leni ejemplu, ttiaca chi isía sá nna bitturu innea aná len lebiꞌi, sinuqui lhixxa su innea quixxiꞌatia le gue Tataha.

²⁶ Gansi chi bisía sá nna lärga neti innába guele lo Tataha, lebiꞌiba nna innábale lenie udettile láya.

²⁷ Cuinaba Tata quia racanie guele cumu lebiꞌi nna raquinle quia, de güia lele neti nna biríaya atta doe delha-ni lhe.

²⁸ Atta do Tataha biríaya delha yies lo yu-ni. Nnanna nna odhaꞌana yies lo yu-ni qui eyyaꞌaya atta do Tataha.

²⁹ Ca biꞌini rudheti ca tisa ruleꞌe Jesús rácabi Benniha: —Nnannarguaba nna rinnelu lhixxa suu, bitturu rinnelu leni ejemplu.

³⁰ Nnannarguaba chi yutu lu nna iyába chi yulu. Tsa lägabi reasinlu nuxa innába tisan lu. Denuala nna nuarca yutu, lu nna atta do Tata Do Iyyabaahaba biríalu dalu.

³¹ Jesús becabie re: —¿Si gualíga chi ria lele nnanna?

³² Uraha nna chiba daa nua ribigana, chiba bisía ura atti isatsa lheꞌe loesle, coa ttuttubale udaxxu neda guele gaxa ladu tsiale, atturba ocaꞌanle lania. Ttiaca läga tturu neti dua, gua duba Tata quiaha len neti.

³³ Iyá unní rixxiꞌatia le qui edíle elha xen lasi rutea de guadúba len lebiꞌi. Yies lo yu-ni nna satele uyúle elha disa. Lebiꞌi nna tsitsi gualcuequi lele, cumu neti nna udába bedú niꞌaya iqui nu lä anca tsee gue yies lo yu-ni.