San Juan 13 - Zapoteco de Aloápam

Jesús riguíe niꞌa ca biꞌini rudheti ca tisa ruleꞌe

¹ Deoba laní Pascua, Jesús yube chiba bisía ura atti edee yies lo yu-ni qui esíne atta do Tata gueha. Attiba ucanie gue ca benni guee seꞌe yies lo yu-ni nna aníaba ucanie gue ca biꞌiniha axta atti bisía sá uttie.

² Atti chi do Jesús len ca biꞌini rudheti ca tisa ruleꞌe go rse nna nu xxegüiha nna chila uxí yiena Judas Iscariote xiꞌini Simón, qui utena Benniha las ná ca nu utticane.

³ Jesús yube, iyába chi bete Tata gueha las nee, atta do Bennihaba biríe dee yies lo yu-ni lhe níaguaba esíne lhe.

⁴ Lee nna udulíttebe utúe lari nucueha, bedaxxuttebe attu lari bexxica lheꞌe.

⁵ Atti utaꞌattebe inda lheꞌe ttu xiga xeni, nianna udulottebe utíe niꞌa ca biꞌini rudheti ca tisa ruleꞌe. Leni lari xica lheꞌe Benniha nna rodibisie niꞌa ca biꞌiniha.

⁶ Atti die quie niꞌa Simón biꞌini láguaba Pedro nna biꞌiniha nna ráttebabi: —¿Si lu quilu niꞌaya, Benni bananie neti?

⁷ Jesús becabie re biꞌiniha: —Nnanna nna läga radú lelu nu runia-ni, lenla nna guasadúba lelu.

⁸ Pedro nna rábi Benniha: —¡Locachirba ugüelha lu quilu niꞌaya! Jesús becabie re: —Gansi bittuba quia niꞌalu nna läga acalu benni quia.

⁹ Simón biꞌini láguaba Pedro nna rábi Benniha: —Ganna anía nna xa Benni bananie neti, bittu sunru ca niꞌaya-ni quilu, quíguabalu iquia lhe ca náya lhe.

¹⁰ Jesús becabie re: —Ttu benni chiba udina, lägabi reasin nua gadina attu libe. A suna niꞌaba nua eyari, cumu itúba nua chi anca nari. Lebiꞌi nna chiba ancale nari lo Tata Do Iyyabaaha, masquiba lä iyále.

¹¹ Lee nna yube nuxcan nua utecane las ná ca nu utticane, larcala re: “Läga iyále chi ancale nari.”

¹² Dequide utíe niꞌa ca biꞌiniha nna beocuttebe lari rucueha atti bedottebe roꞌo mexaha, nianna ráttebe ca biꞌiniha: —¿Si guadú lele bi diale nu benia-na?

¹³ Lebiꞌi nna rále neti anca Benni ruleꞌenie le, Benni bananie le lhe. Gualíbinle, cumu unnuhaba anca.

¹⁴ Ganna anía nna neti ancala Benni bananie le lhe Benni ruleꞌenie le lhe nianna utía niꞌale, anáguaba lebiꞌi nna labíaba quii niꞌa loesle.

¹⁵ Neti nna chi beleꞌa gaxasná unle qui aníachu nna lebiꞌi nna unle atti benia len lebiꞌi.

¹⁶ Neti nna gualíbatia ria le, ni ttu benni reni sina bittu ancana nu ra xxeniru leni atti Benni bananie na, niguaba ttu benni rácana mandadu lhe läga anca nua nu raru xxeni leni atti benni ridhelhe na gaxa tsiana.

¹⁷ Lebiꞌi ca benni chi yu unní, carbárule gansi udole tisa unle na.

¹⁸ ’Läga iyáleonna rpea le aná, neti nna gua yuba nupaxale chi becueea. Ttiaca nna labíaba saxxína aca nu rá lo ca sitsi gue Tata Do Iyyabaaha, atta rá: “La nu ro yetta len netihaba bequinona neti.”

¹⁹ Nnannali chi rixxiꞌatia le antisla aca unní, qui gansi chi ucana nna lebiꞌi nna tsia lele, neti nna anca nu chi ria le anca.

²⁰ Neti nna gualíbatia ria, benni ulabina benni idhelha nna netiba nua rulabi nua, benni ulabina neti nna Benni udhelhe netihaba benniha rulabina.

Jesús rixxiꞌe, Judasba nua utene las ná ca nu utticane

²¹ Dequide rá Jesús anía nna bedú guatettebana lee, nianna re: —Neti nna gualíbatia rpea le, nuxa ttule nna utele neti las ná ca nu utticana neti.

²² Ca biꞌini rudheti ca tisa ruleꞌe nna udulottebacabi begüia lo loescabi, ni lä yucabi nu gue nua rinne Benniha.

²³ Ttu ca biꞌiniha nna biꞌini racaxxattani Jesús guebiha nna dobi gaxxaba cuitta Benniha.

²⁴ Simón biꞌini láguaba Pedro nna beleꞌettebinbi biꞌiniha senni qui innába tisabi Benniha nuxa nua re uni anía.

²⁵ Biꞌiniha nna ubigattebabi gaxxa cuitta Jesús, nianna unnaba tisattebabie rábi Benniha: —Benni bananie neti, ¿nú tu nua?

²⁶ Jesús ráttebe: —Nu ugüea ttaxtila odibidha-ni, unnuha nua. Laniala nna bodibidhe ttu pedazu ttaxtila begüee Judas Iscariote xiꞌini Simón.

²⁷ Dequide uto nua ttaxtilaha nna utaꞌatteba nu xxegüiha lheꞌeni. Jesús re na: —Nu chi relelu unlu nna tsala ben nua.

²⁸ Ttiaca ni ttu ca biꞌiniha sia roꞌo mexaha, bittu guadú lecabi biaca rá Benniha anía.

²⁹ Judas galá denna beduti yuꞌu belhi, nuarcala ttulhecabi nna ucaquinbi ga rába Jesús nua tsiana sayoꞌona nu reasa gue laní o ugüena ca benni bittu te guecani ttu latti belhi.

³⁰ Dequide chi uto Judas ttaxtila begüee Benniha na nna biríattebana. Lo relaba chi anca lania.

Jesús rute attu tisa cubi len ca biꞌini rudheti ca tisa ruleꞌe

³¹ Dequide chi biría Judas, nianna rátteba Jesús: —Nnanna nna uleꞌe lo anca nu ra xxeni leni, neti Benni unbiyuu daa iyyabaaha, de neti nna uleꞌe lo anca Tata Do Iyyabaaha Benni ra xxeni lee lhe.

³² Ganna neti runia ruleꞌe lo anca Tata Do Iyyabaaha Benni ra xxeni lee nna anáguaba Benniha, unguabe qui uleꞌe lo anca nu ra xxeni leni. Chi tte deoba unie nua.

³³ Xa xiꞌinto quia, attu sattirba doa len lebiꞌi. Lebiꞌi nna eguilale neti. Nnanna nna upea le attiba rpea ca nu lo gue ca benni Israel-na: Lebiꞌi nna bittu aca edále atta eyyaꞌaya.

³⁴ Ttu ley cubi utea len lebiꞌi: Aquin gue loesle. Attiba ucatia guele, anía aquin gue loesle.

³⁵ Gansi aquin gue loesle nna iyába ca benni ttedaaquinna gualíba ancale benni bedheti nu beleꞌa.

Jesús rixxiꞌe, Pedro nna bittu dhi roꞌobi gualí anca bienbi benniha

³⁶ Simón biꞌini láguaba Pedro nna unnaba tisabi Jesús rábi Benniha: —¿Xa Benni bananie neti, gala tsialu? Jesús becabie re: —Lu nna läga aca edálu atta eyyaꞌaya nnanna lenla nna esíaguabalu atta deyyaꞌaya.

³⁷ Pedro nna rábi Benniha: —¿Biaca bittu aca ettenoalu nnanna xa Benni bananie neti? ¡Neti nna chiba berú iqui berú lasia elha nabani quia utea cuenta guelu!

³⁸ Jesús becabie re: —¿Si gualíguinlu erú iqui erú lelu elha nabani guelu utelu cuenta quia? Cumu neti nna gualíbatia ria: “Antisla ixxá roꞌo berudi-na, lu nna chila beyonna libe bittu ridí roꞌolu gualí anca bienlu neti.”