San Juan 12 - Zapoteco de Aloápam

María riguꞌuna seti niꞌa Jesús

¹ A xxupa ubisa deoba isía laní Pascua, Jesús güie lheꞌesi lá Betania atta do Lázaro biꞌini benie beaquinbi dequide chi uttibi.

² Ca benni seꞌe lheꞌe lisi Lázaro bencana ttu rse qui go lencana Jesús. Marta nna rigaꞌana lheꞌe ca platuha, Lázaro nna labi biꞌiniha ttu ca benni do lanie roꞌo mexaha go etta.

³ María bedaxxuttebana attiba medi litro seti rure xixxi daca yaxi, nu anca ttagaꞌa gue ttu iyya te láni nardo, uluꞌuna niꞌa Jesús. Lenla nna leni itsiquibani bodibisna ca niꞌa Benniha. Betú rechaba lheꞌe yoꞌoha bebe tsiꞌi setiha.

⁴ Ttiaca Judas Iscariote, ttu nu sela guaba len ca biꞌini rudheti ca tisa ruleꞌe Jesús, nu utene las ná ca nu utticane unnena rána:

⁵ —¿Biaca lä bitoꞌo seti rure xixxi-ni qui dhi ca benni bittu te guecani belhi quixacana seti-na, cumu gua daca bunna nu ridí ttu benni gue tsunna gayua (300) ubisa sina?

⁶ Judas nna läga gualínna de ca nu bittu te guecaniha nua runna rána anía. De ancabana ubana nuarca rána anía, de laguabana denna beduti yuꞌu belhiha lhe lana nna chiba ancabienna rudaxxu sigána belhi ruꞌu lheꞌe nua.

⁷ Nianna, rá Jesús Judas: —Begüeelhunna. Run bunna aná qui chi bedú tseea gansi chi bisía sá igatsia.

⁸ Cumu ca benni bittu te guequinna satíaba tseꞌe ca unná len lebiꞌi, ttiaca neti nna läga aní dhoa len lebiꞌi ttu dia lii.

⁹ Ixeru ca benni Israel binacana dequi níaba do Jesús, lacana nna güiattebacana nía. Läga sunru güegüia Jesús diacana, dia guabacana qui iláquinna Lázaro nu beni Jesús beaquinna dequide chi utttina.

¹⁰ Ca nu lo gue ca bixxudiha nna boquinnatteba iquicani utti guabacana Lázaro,

¹¹ cumu de lo niꞌa gueni nna ixeru ca benni Israel chi biriescana len lacana. Ca unnuha nna chi ria lecani Jesús.

Jesús uteꞌe lheꞌe yiesi Jerusalén

¹² Ixeru benni güia laní Pascua. Betteyú sá nna binacana chi daa Jesús gueꞌe lheꞌe yiesi Jerusalén.

¹³ Laniala nna uchúcana dina qui dhencana, atti biríattebacana diacana esácana Benniha ribesiꞌacana rácana: —¡Xxeni ra lelu o! ¡Carbárulu! ¡Lu ancalu benni udhelha Tata Do Iyyabaaha! ¡Carbárulu! ¡Lu ancalu nu innabia riꞌitu ca benni Israel-ni!

¹⁴ Jesús guattiꞌe ttu burru cuiti, nianna udottebe cuꞌe nua, attiba rá lo ca sitsi gue Tata Do Iyyabaaha:

¹⁵ Bittu gasinle, lebiꞌi ca benni seꞌe lheꞌe yiesi Sión; Gualugüiarga, ni benni rinnabia gueleha dee doe cuꞌe ttu burru cuiti.

¹⁶ Ca biꞌini rudheti ca tisa ruleꞌe nna läga guadú lecabi gue nu raca lania. Dequide liba chi beopi Jesús iyyabaaha beleꞌe loe lee anque benni ra xxeni leni, lania liba guadú lecabi iyába nu bedhacacana Benniha nna chi dia lo ca sitsi gue Tata Do Iyyabaaha, aníaba guate.

¹⁷ Ca benni useꞌe len Jesús begüiacana beaxie Lázaro atti yuꞌubi lheꞌe baa atta yu ca nu yatti-na, qui benie beaquinbi, lacana nna rixxiꞌacana gue nu biláquinna.

¹⁸ Larcala nna biría ca benni gualedacana Benniha, cumu binacana gue milagru xxeni benie.

¹⁹ Ca fariseo nna rá loescani: —Urga xa, läga ridári lo unná. Gualugüiarga, iyárechaba ca benni diacana denocana unná.

Jesús rixxiꞌe gattie

²⁰ Lagüi gue ca benni dia laní lheꞌe yiesi Jerusalén qui cuequixxencana Tata Do Iyyabaaha, sela ttu chupa ca benni Grecia.

²¹ Ca unnuha nna ubigattebacana atta du Felipe, biꞌini beaca lasbi yiesi Betsaida nu re lo yu gue Galilea, unnabacana lenbi rácan bi: —Xa tata, raca letu ilentu Jesús.

²² Felipe nna güiattebabi guayúbi Andrés, laniala nna irupabacabi güiacabi guattixxiꞌaquinbi Jesús.

²³ Benniha nna re cabi: —Bisíaba ura neti Benni unbiyuu daa iyyabaaha nna eyopia iyyabaaha qui uleꞌe lo neti anca Benni ra xxeni leni.

²⁴ Neti nna gualíbatia ria le, gansi xua xuxtila nna bittuba tsuꞌe lhiꞌu yu qui gattie, delába usue qui eꞌeyu beotsi guee nna tturba benniha eyaꞌana. Ttiaca gansi gattie nna qui eꞌeyu beotsi guee nna lania nna xxenru xua xuxtila utee.

²⁵ Benni raca xxattinna gue elha nabani te gueni yies lo yu-ni nna unittibana elha nabani ralhana dhína iyyabaaha, benni rerú iqui rerú leni elha nabani te gueni yies lo yu-ni nna aca banba nua ttu dia lii lo Tata do Iyyabaaha.

²⁶ Gansi nuxa ttu benni raca leni acana nu ixuutia unna nu raca lasia nna itana etenalhana neti. Unnuha nna dhona atta dhoa. Nuxa benni rixuuna lo sina quia nna Tata quia nna unie acana nu ra xxeni leni.

Jesús riguixxiꞌabi dequi utticane

²⁷ ’Lora nnanna tte nna rudú guate juisiabana lasia. ¿Bila innía? ¿Si innía: “Tata, bodiláchi neti lo elha disa-ni”? Ttiaca nna de unnuhala nna delha.

²⁸ Tata, beleꞌe lo lu ancalu Benni ra xxeni leni. Laniala nna bieni tsiꞌi ttu Benni unnee iyyabaaha re: —Chiba beleꞌe loa neti anca Benni ra xxeni leni. Nnanna nna uleꞌe loa attu libe neti anca benni ra xxeni leni.

²⁹ Ca benni seꞌe nía nna bienbaquinna. Ttulhecana nna rácana: —Uyuꞌu beba. Adícana nna rácana: —Ttu ingeliba Ben-na unnee belise Ben-na.

³⁰ Jesús becabie re cana: —Läga lo niꞌa quionna bieni tsiꞌi-na, sinuqui lo niꞌa gueba leonna.

³¹ Nnanna nna bisíaba sá aca elha uxtisi gue ca benni seꞌe yies lo yu-ni. Nnanna nna bisíaba sá uría la Tata Do Iyyabaaha nu xxegüi rinnabiana ca benni seꞌe yies lo yu-ni.

³² Ttiaca gansi chi ulhidhacana neti güetsaa lo ya crusi nna lania nna iyába benni gaxia qui itacana len neti.

³³ Leni ca tisa-ni nna runie ttedaani benni gaxasná gattie.

³⁴ Ca benni seꞌe nía nna becabicana guee rácana: —Riꞌitu nna yutu, lo ca ley bocaꞌana Moisés len riꞌitu nna rá: Cristuha nna tsaba dho Benniha. Lu nna ¿biacala rálu dequi raca duelha ilhidhacana Benni unbiyuu daa iyyabaaha lo ya crusi? Ganna anía nna ¿Núla nua anca Benni unbiyuu daa iyyabaaha ganna?

³⁵ Jesús re cana: —Nnanna nna gua dorba len lebiꞌi, neti anca xieni nu rudani lagüi guele, ttiaca attu sattirba. Larcala nna laca dorua len lebiꞌi nna gua rudanru xieni-ni guele, gualdhá dhuti qui lä iyaxxuni ela le, cumu nu requi lheꞌe atta chulha nna ni lä yu nua ga nua diana.

³⁶ Gualtsia lele neti, Benni anca xieni-ni, nnanna gua dorua len lebiꞌi, qui acale xiꞌini Benni anca xieni-ni. Dequide rá Jesús anía nna deyyattebe, becatsitteba loe cana.

Ca nu Israel bittu ria lecani Jesús

³⁷ Masquiba chi beni Jesús ixeru milagru aní lo ca benni nna bittu ria lecanie.

³⁸ Anía liba nna guaxxína uca nu rá ca tisa unne profeta Isaías atti rábi: Nurla ria leni gue nu rinnetu-ni, xa Tata. Nurla rite deenna gue nu xxeni ra le Tata Do Iyyabaaha chi beleꞌenie cana lhe.

³⁹ Denua nna nuarca bittu uca tsia lecani Jesús, cumu ráguaba Isaías lo ca sitsi-na:

⁴⁰ Tata Do Iyyabaaha benie qui acacana attiba nu xua loni, benie qui aca lastoocani attiba iyya lhe qui masquiba gua rugüiacana bittu iláquinna masquiguaba te elha rieni guecani lhe bittu ttedaaquinna. “Anía nna qui bittu eyequicana esíacana len neti, neti nna eyonia cana”, rá Tata Do Iyyabaaha.

⁴¹ Anía rá Isaías, cumu bilenbi anca Jesús benni ra xxeni leni. Denuala nna utixxiꞌabi gue Benniha.

⁴² Läquiga de nua nna axta ca nu lo gue ca benni Israel, ixerucana güia lecani. Ttiaca de rasquinna lo ca fariseo nuarca bittu rixxiꞌacana aní lo benni, qui bittu cueacan cana ttu tsaba lheꞌe ca yoꞌo atta rudheticana ca tisa gue Tata Do Iyyabaaha.

⁴³ Cumu radirla lecani eyaꞌan tseecana len benni, attichula len Tata Do Iyyabaaha.

⁴⁴ Jesús unnee idisa re: —Benni tsia leni neti nna läga sunru neti nua ria le nua, riaguaba le nua Tata quia Benni udhelhe neti.

⁴⁵ Benni rilenna neti nna riláguabinna Benni udhelhe neti.

⁴⁶ Neti anca xieni, delha yies lo yu-ni qui iyába ca benni tsia lecani neti nna bitturu tseꞌecana atta chulha.

⁴⁷ Ca benni iyienini ca tisa quia-ni nna bittu udocana tisa gueque nna läga neti unia elha uxtisi guecani qui tsia nitticana, cumu neti nna läga delha qui unia elha uxtisi gue ca benni qui tsia nitticana, daba neti qui odiláya cana.

⁴⁸ Nu cuꞌu niꞌani neti nna bittu udo nagani gue nu ria nna gua teba nu unna tsia nitti nua. Ca tisa chi unnea-niba unque tsia nittina gansi chi bisía sá lhuxa.

⁴⁹ Cumu neti nna läganu anca quia rinnea, Tata quia Benni udhelhe netiha Bennihaba re neti bixa innea lhe quixxiꞌaya lhe.

⁵⁰ Neti nna yua, nu rá Benniha un benni nna ancana nu uni gatta elha nabani guecani ttu dia lii. Larcala nna nu rpea le-ni nna rixxiꞌaba na attiba rá Tata quia neti innea.