San Juan 11 - Zapoteco de Aloápam

Ttu benni lána Lázaro uttina

¹ Lheꞌesi lá Betania nua do ttu benni rani lána Lázaro. Níaguaba nua beaca lasi María lenna xilani Marta.

² María dana Lázaro nu raniha nua uluꞌuna seti rure xixxi niꞌa Jesús. Leni itsiquibani bodibisna ca niꞌa Benniha.

³ Irpa xilabacani udhelhacana rasona len Jesús rácane: —Raniba nu raca xxattinlu gueniha, xa tata.

⁴ Atti chi bina Jesús nu rá ca nua nna ráttebe: —Isagüee yuꞌu nua nna läga anca nua nu uttin na, delába unnuha nna ixuula isagüeha qui inná ca benni: “¡Xxeni ra le Tata Do Iyyabaaha!”, anáguaba qui uleꞌe lo neti Xiꞌinie-ni anca Benni ra xxeni leni lhe.

⁵ Masquiba raca juisiani Jesús gue Lázaro lhe gue Marta lhe gue María lhe

⁶ beꞌanrube atta doe a chupa ubisa dequide bine rani Lázaro.

⁷ Dequilaha nna re ca biꞌini rudheti ca tisa ruleꞌe: —Gualtsá tsiari attu libe deca Judea.

⁸ Ca biꞌini rudheti ca tisa ruleꞌe nna rácabi Benniha: —Maestro, ¿si edeyya dacabari nía attu libe? Inqui ttu sába nua uxaca ca benni Israel seꞌe nía usiacan lu iyya nna.

⁹ Jesús becabie guecabi re: —¿Si läba tsiꞌinu ura yuꞌu lheꞌe ttu sá nna? Nu requi resá nna läga richecu nua cumu xieni gue yies lo yu-ni nna gua rudanbe gue nua.

¹⁰ Ttiaca nu requi lo rela nna ichecuba nua cumu bittu xieni yuꞌu atta diana.

¹¹ Dequide unnuha nna re: —Lázaro nu raquinri gueniha nna chi uttaꞌadhi nua. Tsiala qui odibania na.

¹² Ca biꞌini rudheti ca tisa ruleꞌe Benniha nna rácabi: —Benni bananie riꞌitu, gansi tiꞌedhiba nua nna güeyacaba nua ganna.

¹³ Gue elhutti gue Lázaroba nua rinne Jesús, ca biꞌiniha nna ucaquinbi ga gue bisiela nu runna raꞌadhiri-nba nua rinne Benniha.

¹⁴ Laniala nna utixxiꞌa tseenie ca biꞌiniha re cabi: —Uttiba Lázaro.

¹⁵ De lebiꞌi nna reꞌo lasia nuttuha du nía cumu unnuha nna ancana ttu nu tsee len lebiꞌi. Unnuha unna tsiaru lele neti. Larcala nna gualtsá sanga tsiari sagüiari na.

¹⁶ Tomás biꞌini rácana Cuachiha nna ráttebabi adí ca biꞌini rudheti ca tisa ruleꞌe Jesús: —Gualtsá guaba tsiari, qui ttuba gatti lenri Ben-na.

¹⁷ Atti bisína Jesús Betania nna binattebe dequi chila uca ttapa ubisa bigatsi Lázaro.

¹⁸ Lheꞌesi Betania nna gaxxaba rena leni Jerusalén, attiba nu ridá benni ttu ura.

¹⁹ Ixeru ca benni Israel chi güiacana guanalhicana Marta lenna María, rutecana elha xen lasi lencana cumu seꞌe siꞌicana de utti dancaniha.

²⁰ Atti bina Marta chi daa Jesús, biríattebana diana guatsána Benniha. María nna níaba beꞌanna lheꞌe yoꞌoha.

²¹ Marta nna rána Jesús: —Ttirca dobalu ni, xa Benni bananie neti, lania nna läga utti danaha.

²² Ttiaca neti nna yua nnanna bixaba innábalu leni Tata Do Iyyabaaha, lee nna gutebe nua lenlu.

²³ Jesús becabie re na: —Eyacabani danluha attu libe.

²⁴ Marta nna rána Jesús: —Chiba yua nna güeyacabani unná gansi chi beacani ca nu yatti-na attu libe, atti isía sá lhuxa.

²⁵ Jesús re na: —Neti anca benni runi reacani ca nu yatti-na lhe rutea elha nabani ttu dia lii lhe. Nu tsia leni neti nna masquiba chi uttina güeyacabinna attu libe.

²⁶ Iyába ca benni anca bani ria lecani neti nna läga gatti ca nua ttu tsa. ¿Si gua ria lelu nu ria-ni?

²⁷ Marta nna rána: —Agu, Benni bananie neti. Riaba lasia, lu ancalu Cristu, Xiꞌini Tata Do Iyyabaaha, benni chi gaꞌana isía yies lo yu-ni.

²⁸ Dequide rána anía nna, güiattebana gualisana xilani María, nianna sigába rána nua: —Niba chi du Maestroha. Lee nna raxie lu.

²⁹ Dequide chi bina María nna, rigánina udulína diana atta du Jesús.

³⁰ Jesús läga chi uteꞌe lheꞌesiha, sna dube atta betiꞌe Marta.

³¹ Atti biláni ca benni Israel rute elha xen lasi leni María seꞌe lenna lheꞌe yoꞌoha ruxunninina udulína biríana, lacana nna diattebacana denocana María, cumu ucaquinna ga lo baahaba dia nua sachesna.

³² Bisínba María atta du Jesús, bilábinna Benniha nna bedútteba xibini loe, nianna ráne: —Ttirca dochibalu ni, xa Benni bananie neti, lania nna läga utti benni danaha.

³³ Atti biláni Jesús ribesna, anáguaba ca benni Israel dia lennaha lhe, su suba guadina itúba lhiꞌu lheꞌe lastoo Benniha, bedú guatettebane.

³⁴ Unnaba tisattebe re cana: —¿Galiga guacatsile nua? Lacana nna becabicana rácane: —Utá begüia, tata.

³⁵ Jesús uresttebe.

³⁶ Ca benni Israel nna ráttebacana: —Gualgüiarga. ¡Cattipa racanie gueonna!

³⁷ Attu lhecana nna rácana: —Unní beni biláni nu xua loniha. ¿Si bittuba uca gueonni gaxasná unna qui bittu gatti Lázaro?

Lázaro beaquinna

³⁸ Jesús su suba bedeadina lhiꞌu lheꞌe lastooe attu libe atti bisíne roꞌo belea do lheꞌe iyyattooha. Unnuha nua ancana baa. Leni ttu iyya xeniba to roꞌo nua.

³⁹ Nianna, re: —Gualcua iyya-na. Marta dana nu yattiha nna ráne: —Xa Benni bananie neti, gaxa chiba rureonna, cumu chi uca ttapa ubisa atti uttina.

⁴⁰ Jesús re na: —¿Si läba ria lu, gansi tsia lelu nna gugüiabalu nu xxeni ra le Tata Do Iyyabaaha?

⁴¹ Utúabacana iyyaha nna ulhidhatteba lo Jesús begüie lo bea-na, nianna re: —Xquixarulu, xa Tata, cumu bienbinlu quia.

⁴² Neti nna gua yuba, lu nna satíaba rieninlu quia, ttiaca de ca benni seꞌe-niba nna ria aná, qui tsia lecani gualí lu udhelhalu neti.

⁴³ Dequide re anía nna uresiꞌe idisa re: —¡Lázaro, bería na!

⁴⁴ Nu yattiha nna detubiba lari niꞌani lhe náni lhe beríana, detubiguaba lari loni lhe. Jesús re ca benni seꞌe nía: —Gualedhasi na ca lar-na, qui aca edána.

Ca nu anca nu lo gue ca nu Israel boquinna iquicani utticana Jesús

⁴⁵ Ixeru ca nu dia leni María güia lecani Jesús atti biláquinna nu benie.

⁴⁶ Ttiaca attu lhecana nna güiattebacana guattixxiꞌaquinna ca fariseo gue nu beni Jesús.

⁴⁷ Nianna ca nu lo gue ca bixxudiha lencana ca fariseo bottupattebacana ca uxtisi gue ca benni Israel, nianna ráttebacana ca unnuha: —¿Bila unri nnanna? Unbiyuu requina nna ixe lhaba ca milagru runi unná.

⁴⁸ Gansi ugüelhabari anába na requibana, iyába benni tsia leni gueonna lania nna ca nu rinnabia gue Roma nna isíaba ca nua utseꞌe locana yotu anca leꞌa gueri-ni lhe yies gueri-ni lhe.

⁴⁹ Ttu nu sela len lacana lána Caifás, ancana bixxudi xxeni rinnabia guecani la ida nna unnena rána: —Lebiꞌi nna tsa läga yule,

⁵⁰ niguaba lä ritedeenle dequi tseerla anca len riꞌi gatti ttuba benni cuenta gue ttu yiesi, attichula iyába benni gattina.

⁵¹ Caifás nna läganu yuꞌu iquini nua unnena. De ancabana bixxudi xxeni rinnabia la idaha nna rána anía. Unnebana ca tisa bete Tata Do Iyyabaaha lenna qui quixxiꞌana Jesús gattie qui quixe nu dica quixa ca benni Israel.

⁵² Bittuguaba sunru qui lhá ca benni Israel, anáguaba gatti guabe qui ottupe iyárecha ca xiꞌini Tata Do Iyyabaaha seꞌe gatti laduba.

⁵³ Larcala nna bedaa la sá nna boquinna iqui ca nu lo gue ca benni Israel utticana Jesús.

⁵⁴ Denua nna lärga güequi Jesús uleꞌe loe leni ca benni Israel. Beríattebe lo yu lá Judea deyye gaxxaba daca lo yu bisi atta re ttu yiesi lá Efraín. Níaba güequie leni ca biꞌini rudheti ca tisa ruleꞌe.

⁵⁵ Atti chi deoba isía laní gue ca benni Israel nu te láni Pascua, ixeru benni seꞌe lheꞌe adí ca yiesi diacana Jerusalén qui eyacacana nu nari lo Tata Do Iyyabaaha attiba labicana runcana.

⁵⁶ Lacana nna requicana reguilacana Jesús, atti retiꞌa loescani lheꞌeliꞌa gue yotuha nna rinnaba tisatteba loescani rácana: —¿Bi raquinle? ¿Si güitachu nua laní aca, bittuba aca?

⁵⁷ Ca bixxudi anca nu loha lencana ca fariseo nna chi unnabiacana rácana ca benni, gansi nuxa ttu benni yuna gaxa requi Jesús, quixxiꞌa ttena qui tsiacana sadaxxucana Benniha.