San Juan 10 - Zapoteco de Aloápam

Jesús riguixxiꞌe gue ttu nu ria lo ca carneꞌe

¹ Jesús re: —Neti nna gualíbatia ria le, nu bittu ritaꞌana daca roꞌo puerta gue currali atta yuꞌu ca carneꞌe-na, sinuqui attu atta subila ropina qui ritaꞌana ubanaba nua, nu rigúa sigá nu te gue benniba nua lhe.

² Nu ritaꞌa daca roꞌo puertaha liba nna ancana nu ruyú ca carneꞌe-na.

³ Nu du rapa roꞌo curraliha nna nua nna ridhalbana puertaha ritaꞌa nu ria lo ca nua. Ca carneꞌeha nna reon biacana tsiꞌi nu ria locaniha. Lana nna raxxína ca nua coa ttuttu ca nua rudettina lácani qui cueancana lheꞌe curraliha.

⁴ Dequide chi uleana iyá ca nu anca gueni nna rinerttebana lo ca nua. Ca unnuha nna ranottebacan na cumu reon biacana tsiꞌini.

⁵ Delo attu nu subi nna läga ranocan nua, ruxunni lacana lo nua, de bittu anca biaquinna tsiꞌi attu nu subi.

⁶ Ca tisa utixxiꞌen Jesús ca benni seꞌe nía ancacana ttu ejemplu, ttiaca ni lä guadú lecani bixa dianie re cana anía.

Jesús anque attiba ttu benni ruyú tsee ca carneꞌe

⁷ Jesús re ca benni seꞌe nía attu libe: —Neti nna gualíbatia ria, neti anca puerta du roꞌo currali atta retaꞌa ca carneꞌe-na.

⁸ Iyába ca nu rácana dequi lacana ancacana Cristu chi bisía atti lati isíaya yies lo yu-ni nna ubanaba ca nua, larca bittu bedo naga ca carneꞌe-na guecani.

⁹ Neti anca puerta du roꞌo curraliha. Benni gaꞌana atta dua nna gualába nua. Unnuha nna acana attiba ttu carneꞌe rería retaꞌabana lheꞌe curraliha, saxxacana nu gona lhe.

¹⁰ ’Ubanaha nna suntteba daa nua lhanana, uttina lhe utseꞌe lona lhe ttiaca neti nna delha utea elha nabani guele qui gatta xxeni elha nabani guele ttu dia lii.

¹¹ Neti anca attiba ttu benni ruyú tseena ca carneꞌe gueniha. Nu ruyú tseena ca carneꞌe gueniha nna rerú iqui rerú leni rute elha nabani gueni cuenta gue ca carneꞌeha.

¹² Nu naxabana rena lo ca carneꞌeha nna atti rilenna daa sagueha nna ruseꞌe bixxina ca nua nía ruxunnina, cumu läga gueni ca nua, yaba le nu beaca gueni ca nua. Sagueha nna risinttebana rudaxxuna ca carneꞌeha, atti rutsiattebinna ca nua qui tsiacana gatti laduba.

¹³ Ruxunniba nu re lo ca carneꞌeha cumu läga de ca carneꞌeha nua run nua, lhiaxaba nua denona.

¹⁴ ’Neti anca attiba ttu benni ruyú tsee ca carneꞌe gueni. Anca biatia ca carneꞌe anca quia, anáguaba ca nu anca quia nna anca biaguabaquinna neti.

¹⁵ Attiba tata quia anca bienie neti, anáguaba neti anca biaguatie. Neti utea elha nabani quia qui odiláya ca benni, attiba ttu benni re lo ca carneꞌe rerú iqui rerú leni elha nabani gueni rutena cuenta gue ca carneꞌeha.

¹⁶ Seꞌe guabatia adí ca carneꞌe bittu babacana len ca nu seꞌe-ni. Lacana lhe saxía, ca unnuha nna güiyienbaquinna quia. Lania nna ttuba eyaca iyábacana, ttu guaba benni gape cana lhe.

¹⁷ ’Larcala nna tata quia racanie quia, cumu neti utea elha nabani quia qui odiláya ca benni, lenla nna eyacatia attu libe.

¹⁸ Tsa läganu ettettuana elha nabani quia-ni, netiba rerú iqui rerú lasia na utea na. Neti nna anca nu ra xxeni leni. Denua nna raca quia utea elha nabani quia-ni lhe edía na attu libe lhe. Unní rá tata quia unia.

¹⁹ Atti bienini ca benni Israel nu rá Benniha nna bedelaꞌatteba lheꞌe loesicani attu libe.

²⁰ Ixerucana rácana: —¿Biaca unná rudo nagale gueni? Gua yubale nna nu xxegüihaba yuꞌu lheꞌonna iquibunna raca lhe.

²¹ Adícana nna rácana: —Tsa läganu nu yuꞌu nu xxegüi lheꞌeni te aca gueni innena aná. Läga aca gue ttu nu xxegüi unna iláni ca nu xua loquinna.

Ca nu Israel bittu rulabicana Jesús

²² Atti risía raca idilhaha nua runi ca benni Israel ttu laní lheꞌe yiesi Jerusalén. Lania nua rexxa lecani la sá atti beaca leꞌa yotu guecaniha.

²³ Jesús níaba requie lheꞌeliꞌa gue yotuha atta te láni corredori gue Salomón.

²⁴ Ca benni Israel nna bitupattebacana sa biꞌabe, nianna rácane: —¿Núcalunni nna unlu qui bitturu udú chupana letu? Gansi luba nua Cristu, tsala utixxiꞌa aní lo iyátu.

²⁵ Jesús becabie re cana: —Lä chiba ria le nna lebiꞌi nna bittu güia lele. Ca milagru rute tata quia runia-ni nna ruleꞌe loque nuxa anca.

²⁶ Lebiꞌi nna läga ria lele, cumu läga ancale carneꞌe quia.

²⁷ Ca benni anca attiba carneꞌe quia nna gua rienbaquinna tsiꞌa rinnea. Neti nna anca biatia cana, lacana nna denocana neti.

²⁸ Neti rutea elha nabani guecani qui aca bancana ttu dia lii, bittu tsia nitticana lhe nuttuguaba nu dhana ettattuana cana lo náya lhe.

²⁹ Tata quia Benni betecana las náya nna xxeniru ra le Benniha atti nuxaba benni, larcala nna läganu dhana cuana cana lo nee.

³⁰ Tata quia nna neti nna ttuba ancatu.

³¹ Bodidaxxu dacaba ca benni Israel iyya qui useꞌecane.

³² Jesús re cana: —Ixe ca milagru tsee bete tata quia unia chi benia aní lole. ¿Lo niꞌa gue nu ca nua rdacale usiale neti iyya?

³³ Ca benni Israel nna becabicana rácana: —Läga usia riꞌitu lu iyya lo niꞌa gue ca milagru tsee runlu-na. Usiatu lu iyya cumu len nu rálha nna rinne güelu gue Tata Do Iyyabaaha. Lu nna benniba ancalu nna runlu dequi ancalu Dios.

³⁴ Jesús re cana: —¿Si läba lo ca ley denle-na rá Tata Do Iyyabaaha: “Neti chi ria, lebiꞌi ancale diosi”?

³⁵ Riꞌi nna yubari, läga aca gueri otsiari nu rá ca tisa gue Tata Do Iyyabaaha. Lee nna re diosi anca ca benni betee ca tisa guee-na lencabi.

³⁶ ¿Biacala neti Benni chi riesinie udhelhe yies lo yu-ni rále dequi rinne güea gue Tata Do Iyyabaaha de ria: “Neti anca Xiꞌini Tata Do Iyyabaaha”?

³⁷ Gansi bittuba runia nu runi tata quia nna bittu tsia lele quia.

³⁸ Ttiaca gansi runba nu runie nna masquiba lä ria lele neti, gualtsia lele gue nu runia, qui tsala nna ttedeenle, tata quia nna ttuba Benni anque lenie neti, neti nna ttuba Benni anca lenie.

³⁹ Bedeonttebacana odidaxxucane attu libe, ttiaca lee nna ulabe lo nácani.

⁴⁰ Dedhia dacaba Jesús attu ladu gue yoo Jordán. Níaba beꞌane atta udulo Juan begadibi benni inda.

⁴¹ Ixeru benni risina atta du Benniha, nianna rácana: —Gualí galá, lägabi milagru beni Juan, ttiaca iyába nu utixxiꞌabi gue Ben-ni nna gualíba nua.

⁴² Ixeru ca benni seꞌe daca nía güia lecani Jesús.