Hechos 9 - Zapoteco de Aloápam

Saulo bedaxxubi neda gue Jesús

¹ Saulo nna garula rudú sina, ttu diabana rinnena rána dequi uttibana ca benni ria le Jesús. Nía güiana lo bixxudi xeni rinnabiaha,

² guannabana qui utee nua lisensi tsiana lheꞌe ca yoꞌo atta rudheti ca benni Israel ca tisa gue Tata Do Iyyabaaha sia lheꞌe yiesi Damasco, qui satilana ca benni chi bedaxxu neda gue Jesús, nuxaba ancacabi si unbiyuu lhe si nuila lhe qui uxxicana cabi echena cabi lheꞌe yiesi Jerusalén.

³ Ttiaca atti chi deoba isínna lheꞌe yiesi Damasco nna lhaba ucaxxe ttu xieni daa iyyabaaha uyuꞌe sabiꞌaba atta dianaha.

⁴ Lana nna ubixxi lottebana. Nianna atti bieninna tsiꞌi ttu Benni unne re: —¡Saulo! ¡Saulo! ¿Biaca neti denalhalu rudhaca siꞌilu?

⁵ Saulo nna unnaba tisattebana rána: —¿Nú leonna tata? Tsiꞌi Benni unneha nna becabie re: —Neti Jesús, Benni denalhalu rudhaca siꞌilha. [Ttiaca luba rila guelu runlu aná attiba ttu nu la labana ruseꞌe niꞌani lo tu clavu.]

⁶ Lana nna [tu rixidibana de rasbinna unnena] rána: —Tata, ¿bi raca lelu unia? Jesús ráttebe na: —Nnanna nna guadha, güia lheꞌe yies-na. Na quixxiꞌaquinna lu bixa anca nu unlu.

⁷ Ca benni dia leni Saulo nna nibala ucaru innecana de usixxattabaquinna atti bieniquinna tsiꞌi Benniha, ttiaca läganu biláquinna.

⁸ Laniala nna beadhatteba Saulo lo yu, ttiaca atti bedhali loni diana ugüiana nna garua bilenna. Larcala denalhibacan náni bisín lencan na lheꞌe yiesi Damasco.

⁹ Níaba udona tsunna ubisa bittu bilenna niguaba lä utona lhe lä uꞌuyaguabana inda lhe.

¹⁰ Lheꞌe yiesi Damasco do ttu benni ria lebi Jesús lábi Ananías. Biꞌiniha nua beleꞌen lo Benni bananie ri-na, atti re biꞌiniha: —¡Ananías! Biꞌiniha nna becabibi rábi: —Ni doa, tata.

¹¹ Benni bananie ri-na ráttebe biꞌiniha: —Udulí, güia atta te ttu neda te láni Neda Lixxa. Nía beguila lheꞌe lisi Judas ttu unbiyuu lána Saulo, unnuha beaca lasni lheꞌe yiesi Tarso. Nía do nua rinnena leni Tata Do Iyyabaaha.

¹² Lana nna chi beleꞌenna ttu unbiyuu lána Ananías utaꞌana bexxúa náni iquini qui eyali loni.

¹³ Ananías nna becabittebabi rábi: —Benni bananie neti, ixe benni chi utixiꞌaquinna neti gue nu runi unbiyuu rálha, yalha nu chi bedhá ca unna ca benni chi seꞌe riesi anca guelu seꞌe lheꞌe yiesi Jerusalén.

¹⁴ Nnanna nna dana ni cumu bete ca bixxudi anca nu lo na lisensi qui udaxxuna ca benni ria lecabi lu.

¹⁵ Ttiaca Jesús re biꞌiniha: —Güia, cumu chi becueea unná qui tsiana quixxiꞌana ca tisa quia-na leni ca benni dittu, leni ca nu rinnabia lhe anáguaba leni ca benni Israel lhe.

¹⁶ Cumu neti uleꞌetia na, lana nna tsitsiba nu satena lo niꞌa quia.

¹⁷ Ananías nna diattebabi lheꞌe yoꞌo atta do Saulo, bisínbabi nna bexxúatteba nábi iqui Saulo atti rábi na: —Betsito, Jesús Benni unnee lanie lu atti yuꞌulu neda dalu nii, Benniha guaba udhelhe neti nii qui eyali lolu lhe dhílu Espíritu gue Tata Do Iyyabaaha lhe.

¹⁸ Laniatteba bitúa nu attiba anca xui yuꞌu iyya lobiha, atti belattebinbi. Laniala nna udulíttebabi lenla nna udibi inda.

¹⁹ Dequide utobi yetta nna bedú tsitsittebabi. Lania nna níaba bisá Saulo attu chupa ubisa leni ca benni ria le Jesús seꞌe lheꞌesi Damasco.

Saulo riguixxiꞌabi gue Jesús lheꞌesi Damasco

²⁰ Dequila nna udulottebabi rixxiꞌabi gue Jesús lheꞌe ca yoꞌo atta rudheti ca benni Israel ca tisa gue Tata Do Iyyabaaha seꞌe lheꞌesi Damasco. Nianna rábi: —Jesúsba Benniha anque xiꞌini Tata Do Iyyabaaha.

²¹ Iyába ca nu rienquinna nu rinnebiha nna rebanbaquinna atti rácana: —Inqui unníba nua requina rudaxxuna ca benni ria le ca tisa gue Jesús seꞌe Jerusalén nna. Läguabana nua dana nii güedaxxu ca benni seꞌe-ni qui echena cana lo ca bixxudi anca nu lo-na.

²² Ttiaca Saulo-na adíla itú iqui itú lebi rinnebi rixxiꞌenbi cana Jesúsba Benniha anque Cristu. Tuttírba becannabi iqui ca nu Israel seꞌe Damasco.

²³ Dequila de chi utee ixe ubisaha nna lania liba nna unnee len loesi ca nu Israel dequi uttibacana Saulo.

²⁴ Ttiaca binatteba Saulo gue nu rele ca nua udhacacan bi. Ca unnuha nna rela resába seꞌecana atta do rería benni roꞌo yiesiha qui ganna eríabi nna uttittebacan bi.

²⁵ Ttu lo rela nna ca benni ria le Jesús seꞌe lenbi lheꞌesi Damasco nna uluꞌuttebacabi Saulo lheꞌe ttu sumi atti bechidacabi biꞌiniha lo deꞌe iyya coa biꞌaba yiesiha. Anía liba uca nna ulábi.

Saulo besinbi lheꞌe yiesi Jerusalén

²⁶ Atti besina Saulo lheꞌe yiesi Jerusalén nna benttebabi satselabi ca benni ria le Jesús seꞌe nía. Ttiaca iyába ca biꞌiniha nna rasquinbi Saulo cumu läga ria lecabi dequi chiguaba anca biꞌiniha benni ria le Jesús.

²⁷ Laniala nna uchee Bernabé Saulo guatsá dubi biꞌiniha lo ca biꞌini bedheti ca tisa beleꞌe Jesús. Nianna atti utixxiꞌenbi ca biꞌiniha gaxasná uca biláni Saulo Benni bananie ri-na atti yuꞌubi neda, unneguaba Benniha lenbi lhe. Utixxiꞌaguabinbi ca biꞌiniha gaxasná unne Saulo itú iqui itú lebi utixxiꞌabi gue Jesús lheꞌesi Damasco.

²⁸ Anía uca nuarca beꞌana Saulo lheꞌe yiesi Jerusalén leni ca biꞌini bedheti ca tisa beleꞌe Jesús. Labi nna dia dedaababi requibi lheꞌe itúba yiesiha.

²⁹ Tsa bittu usinbi rixxiꞌabi gue Jesús Benni bananie ri-na, ritilha tisaguaba lenbi ca benni Israel rinne tisa griego lhe. Ttiaca ca unnuha nna rudhiubacana uttican bi.

³⁰ Atti bina adí ca benni ria le Jesús nu rulaba le ca nua udhacacana Saulo nna laniala nna uleacabi biꞌiniha lheꞌe yiesiha dia lencabi bi lheꞌesi Cesarea. Bedaa nía nna bedhelhacabi biꞌiniha lheꞌesi te láni Tarso.

³¹ Lania nna ca benni ria le Jesús seꞌe lo yu gue Judea lhe Galilea lhe Samaria lhe tseeba seꞌecabi, ttu diabacabi riseꞌe tsitsicabi lo neda gue Tata Do Iyyabaaha, tsitsiba rapacabi respeto Ben-na lhe. Lacabi nna ttu diabacabi ranicabi, cumu Espíritu gue Tata Do Iyyabaaha nna guaracaba lanie cabi.

Ttu benni daa yatti niꞌa náni beacana

³² Pedro nna requibabi güenalhi iyába ca benni seꞌe itúba nía. Güiaguabi guanalhibi ca benni chi seꞌe riesi anca gue Tata Do Iyyabaaha seꞌe lheꞌesi Lida.

³³ Nía guattiꞌacabi ttu benni lána Eneas. Chi uca ttu xxunu ida tena taꞌa cumu daa yatti niꞌa náni.

³⁴ Pedro nna rábi na: —¡Eneas, Jesucristuha eyonie lu! ¡Guadha! ¡Uchidhatte taꞌa guelha! Eneas nna guadhattebana.

³⁵ Lania nna iyába ca nu seꞌe daca lheꞌesi Lida lhe daca lheꞌesi Sarón lhe biláquinna beaca nua. Ca unnuha nna bedaxxuttebacana neda gue Tata Do Iyyabaaha.

Ttu nuila beaquinna dequide chi uttina

³⁶ La laniaguaba nua udo ttu nuila ria lebi Jesús lheꞌesi Jope, lábi Tabita. Leni tisa griego nna dienna innána Dorcas. Nuilaha nua satíaba benbi nu anca tsee lhe beteguabi nu reasani ca benni bittu te guecani lhe.

³⁷ Laniaguaba nua uni Tabita, nianna uttibabi. Dequide chi bogadican bi nna belhopittebacan bi lheꞌe attu yoꞌo do güetsaa.

³⁸ Cumu gaxxaba re lheꞌesi Jope leni lheꞌesi Lida atta do Pedro. Larcala ca benni ria le Jesús binattebacabi dequi níaba do Pedro. Udhelhattebacabi chupa ca unbiyuu güiacan guayúcan bi, rácan bi: —O chiba unaa, goachi tsiari lheꞌesi Jope. Bittu aquinlu isálu.

³⁹ Pedro nna diatteba lenbi ca nua. Bisínba lencan biꞌiniha nna belhopittebacan bi lheꞌe yoꞌo do güetsaa atta te benni yattiha. Ca nuila bidabi seꞌe nía nna bebiꞌattebacan bi, ribesicana atti ruleꞌecana ca xalhoocani beni Tabita atti do banbi len lacana.

⁴⁰ Pedro nna bebeattebabi iyába ca benni seꞌe nía. Nianna bedútteba xibibi, unnebi belisabi Tata Do Iyyabaaha, atti bodettatteba lobi atta te benni yattiha, nianna rábi: —¡Tabita, guadha! Nuilaha nna bedhaltteba lobi, bilábinbi Pedro nna guadhattebabi udobi.

⁴¹ Pedro nna bedaxxuttebabi ná nuilaha bedhulíbi na. Laniala nna beaxbi ca benni ria le Jesús seꞌe nía leni ca nuila bidabiha, atti bedúbi nuilaha locani.

⁴² Sattitte bina iyába ca benni seꞌe lheꞌe yiesi Jope gue nu ucaha, nianna ixerucana güia lecani Benni bananie ri-na.

⁴³ Isáru udo Pedro lheꞌesi Jope lisi ttu benni rucusi ca yieti lábi Simón.