Hechos 8 - Zapoteco de Aloápam

¹ Níaguaba du Saulo, lana nna uyuꞌuba leni betticana Esteban. La sáhatteba udulo ca benni besía lecani ca benni ria Jesús seꞌe lheꞌe yiesi Jerusalén. Ca biꞌiniha nna bexunnittebacabi diacabi gatti laduba gue lo yu gue Judea, benni diaba daca lo yu gue Samaria lhe. A sunruba ca biꞌini bedheti ca tisa beleꞌe Jesús beꞌancabi lheꞌe yiesi Jerusalén.

Saulo ruríalana ca benni ria le Jesús

² Ttu chupa ca unbiyuu rudoru tisa gue Tata Do Iyyabaaha nna guacatsicabi Esteban, ca biꞌiniha nna attulade urescabi gue biꞌiniha.

³ Laca Saulo nna gua diana rudhaca siꞌina ca benni ria le Jesús. Lana nna rataꞌana lheꞌe ca yoꞌo, rache naꞌayana ca benni nuila lhe ca unbiyuu lhe atti radheana ca biꞌiniha lheꞌe lisiyya.

Ttu güesaa güia leni ca tisa gue Jesús

⁴ Ttiaca ca benni bexunni biría lheꞌe yiesi Jerusalén, gaxaba diacabi riguixxiꞌacabi ca tisa gue Jesús.

⁵ Felipe nna uluꞌuttebabi neda diabi deca lheꞌe yiesi xeni re lo yu gue Samaria, labi nna riguixxiꞌenbi ca benni seꞌe nía gue Cristu.

⁶ Ca benni nna atti rienquinna gue nu rá Felipe, riláquinna ca milagru lhe ca nu runi reban leri lhe runi biꞌiniha, iyábacana ritupacana qui rudo tsee nagacani gue nu riguixxiꞌa biꞌiniha.

⁷ Ixe ca nu yuꞌu be xxegüi lheꞌe cuerpu guecani reacacana. Ca be xxegüiha nna ribesiꞌani ca nua reríacana. Anáguaba ixe ca nu daa yatti niꞌa nácani lhe ca nu xi lhe beacacana.

⁸ Lo niꞌa gue unnuha nna iyába ca benni seꞌe lheꞌe yiesiha redaca lecani.

⁹ La laniaguaba udo ttu benni lána Simón. Chi bisá rudhetina gue güesaa. Udábana uxí yienna ca benni seꞌe lo yu gue Samaria, axta güia lecani gueni dequi lana ancana ttu benni ra xxeni leni.

¹⁰ Iyárechaba ca benni rudo nagacani gueni, desdeba unto axtaba ca benniola. Nianna rácana: —Unní rapana elha ra xxeni le gue Tata Do Iyyabaaha.

¹¹ Isá chi güia lecani gueni cumu nucala dana ridí yiena ca nua leni elha güesaa gueniha.

¹² Ttiaca atti bienini ca benni ca tisa rixxiꞌani Felipe cana gue Jesucristuha, gue gaxasná innabia Tata Do Iyyabaaha ca benni lhe lania nna unbiyuu lhe nuila lhe güia lecani, atti udittebacana inda.

¹³ Axtaba Simón güia leni, nianna udiguabana inda. Bedaa lania udulona guanalhana Felipe gaxaba dia biꞌiniha, rebanbinna rilenna ca milagru lhe ca nu runi rebaninri lhe runi biꞌiniha.

¹⁴ Atti bina ca biꞌini bedheti ca tisa beleꞌe Jesús seꞌe Jerusalén dequi chi bedaxxu ca benni seꞌe Samaria tisa gue Tata Do Iyyabaaha nna laniala udhelhacabi Pedro lenbi Juan qui güiacabi nía.

¹⁵ Bisínba ca biꞌiniha nna udulottebacabi unnecabi leni Tata Do Iyyabaaha rinnabacabi aca len Benniha ca benni chi ria lecabi Jesús qui dhicabi Espíritu gue Tata Do Iyyabaaha.

¹⁶ Cumu ni ttu ca biꞌiniha lägabi chi uxicabi Espírituha, sunruba lá Jesús, Benni bananie ri-na betti atti udi ca biꞌiniha inda.

¹⁷ Laniala nna bexxúa ná Pedro lenbi Juan iqui ca biꞌiniha qui uxícabi Espíritu gue Tata Do Iyyabaaha.

¹⁸ Atti biláni Simón rixxua ná ca biꞌini bedheti ca tisa beleꞌe Jesús iqui ca biꞌiniha qui ridícabi Espíritu gue Tata Do Iyyabaaha, lana nna uxacattebana utena belhi leni ca biꞌini bedheti ca tisa beleꞌe Jesús,

¹⁹ atti rán ca biꞌiniha: —Gualute loesi elha raca lani-na len neti qui anáchu nna nuxaba benni ixxúa náya iquicani nna dhíguabacana Espíritu gue Tata Do Iyyabaaha.

²⁰ Laniala nna becabi Pedro gueni rábi na: —¡Itupa lenlu belhi guelha tsia nittilu! ¿Biaca runlu goꞌolu nu anca gue Tata Do Iyyabaaha, rute len riꞌi?

²¹ Lu nna lägabi elha ralhalu unlu loesi sina runtu-ni, cumu läga anca tsee nu rulaba lelu lo Tata Do Iyyabaaha.

²² Bedhana nu lä anca tsee runlu-na, atti unnabatte lo Tata Do Iyyabaaha qui nicaga guadíbe elha xen lasi guelu de belaba lelu aná.

²³ Cumu neti nna rilátia rexxatta malisi lheꞌelu, tsaba xicalu lo nu lä anca tsee-na lhe.

²⁴ Simón nna becabina rána: —Lebiꞌiba gualinnaba chi quia lo Benni bananie ri-na qui bittu satea ni ttu nu chi rále-na.

²⁵ Pedro lenbi Juan, dequide chi utixxiꞌacabi lhe beleꞌecabi lhe ca tisa gue Tata Do Iyyabaaha, beguꞌuttebacabi neda deyyacabi riguixxiꞌencabi ca benni seꞌe lheꞌe adí ca yiesi seꞌe lo yu gue Samaria ca tisa gue Jesús. Ni besinbacabi lheꞌe yiesi Jerusalén.

Felipe riguixxiꞌenbi ttu nu Etiopía ca tisa gue Jesús

²⁶ Dequide la nna bodoleꞌe lo ttu ingeli gue Tata Do Iyyabaaha re Felipe: —Bedú tsee nna güia daca sur daca atta dia neda nu riria lhiaxu Jerusalén nu diana daca lo yu bisi atta nuttu benni seꞌe, risinna lheꞌe yiesi te láni Gaza.

²⁷ Felipe nna guadhattebabi diabi. Lo neda atta diabiha nna nía betiꞌabi ttu unbiyuu ancana eunuco nu beaca lasni Etiopía. Unnuha ancana ttu uxtisi ra xxeni leni, lana denna belhi gue yoꞌo lagüi gue nuila rinnabia itúba lo yu gue Etiopía. Nuila rinnabia te láni Candace. Unbiyuuha nua dedaana güiana lheꞌe yiesi Jerusalén qui gualequixxenna Tata Do Iyyabaaha.

²⁸ Atti deyuꞌuna neda deyyana lasniha nna dedona lo carreta gueniha rulabana lo ca sitsi beni profeta Isaías.

²⁹ Espíritu gue Tata Do Iyyabaaha nna ráttebe Felipe: —Güia atta deyya carreta deyya-na.

³⁰ Atti bisín Felipe gaxxaba nna bienttebinbi rulaba nua lo ca sitsi beni profeta Isaías. Laniala nna rábi nua: —Lu nna ¿si gua radú lelu nu rulabalha?

³¹ Nu Etiopía nna becabittebana rána biꞌiniha: —¿Gasná sadú lasia gue nu rá lo sitsi-ni, cumu läganu te quixxiꞌenna neti nu dia le ca tisa-ni? Laniala nna unnaba unbiyuuha tsopi Felipe dho lenbi na lo carreta gueniha.

³² Lo sitsi gue Tata Do Iyyabaaha atta rulaba unbiyuuha nna rá: Uchebacane attiba ttu carneꞌe diana gattina, attiba ttu carneꞌe siba ancana duna lo ca nu richúcana itsa xoni lhe niba ttu tisa bittu unnee.

³³ Atti lagüi lo rate Benniha locachirba nu bedíne. Nurla te quixxiꞌana gue ca benni datía Benniha. Cumu de utúacane yies lo yu-ni.

³⁴ Unbiyuu Etiopíaha nna unnaba tisattebana Felipe rána biꞌiniha: —¿Si biba innáchibalu utixxiꞌen neti nu gueonni rinne profeta Isaías? ¿Si la guebabi unní rinnebi, aca? ¿Gue nu subi bunni rinnebi, aca?

³⁵ Laniala nna bedaxxu niꞌa Felipe atta rulaba nu Etiopíaha nna atti utixxiꞌenbi na ca tisa gue Jesús.

³⁶ Deyuꞌubacabi neda deyyacabi, nianna besincabi atta te ttu inda. Nu Etiopía nna ráttebana: —¡Ni inda te ni! ¿Si gua te ttu bixa lo niꞌa gue nna bittu aca gadia inda?

³⁷ [Felipe nna rábi: —Ganna si gua riaba lelu itú iqui itú lelu nna guacaba gadilu inda. Unbiyuuha nna becabittebana rána: —Bila, gua riaba lasia Jesucristu anque xiꞌini Tata Do Iyyabaaha.]

³⁸ Laniala nna benna mandadu becuedacana carretaha atti guadittebacabi lheꞌe indaha. Nianna begaditteba Felipe nua inda.

³⁹ Dequide beríacabi lheꞌe indaha nna Espíritu gue Tata Do Iyyabaaha nna bechettebe Felipe. Lania nna lärga nurua biꞌiniha biláni nu Etiopía. Lana nna reꞌolhaba leni deyuꞌuna neda deyyana.

⁴⁰ Felipe nna lheꞌe yiesi Azoto nía liba chi dubi atti betedeenbi. Aníaba deyyabi riguixxiꞌabi ca tisa gue Jesús lheꞌe iyába ca yiesi atta retebiha, axta liba besinbi lheꞌe yiesi Cesarea.