Hechos 7 - Zapoteco de Aloápam

Esteban recabibi gue ca uxtisi

¹ Lania nna unnaba tisatteba bixxudi xeni rinnabiaha Esteban gansi gualíni ca nu rinne guebiha.

² Labi nna becabibi rábi: —Xa tata xeni lhe betsito lhe gualudorga nagale quia. Tata Do Iyyabaaha, benni ruꞌu xieni guee, beleꞌen loe benniola gueri Abraham, atti dobi lo yu te láni Mesopotamia, atti chi deoba iríabi tsiabi sadhobi lheꞌe yiesi Harán.

³ Nianna re biꞌiniha: “Bedhá iquilu yies guelha lhe ca benni datíalu-na lhe biría güia lo yu atta uleꞌetia lu.”

⁴ Laniala nna biría Abraham lo yu gue Caldea, atti güiabi guadhobi Harán. Dequide utti tata guebiha nna Tata Do Iyyabaaha uche Abraham bisíabi lo yu atta seꞌele nnanna.

⁵ Bittuguaba begüee Benniha bi saroꞌo lo yu-ni guebi, ladiba saroꞌo atta dhobi. Sunruba begüee tisa re: “Neti godhaꞌanba lu lo yu-ni lenlu ca xiꞌinlu lhe ca xidhoalu chi daba isía lhe ca nu udaxxucana lo tia guelu.” Masquiba lä nu xiꞌini Abraham chi te lania.

⁶ Ráguabe Abraham: “Ca xiꞌini xidhoalu, ca nu udaxxucana lo tia guelu, acacana benni dittu tseꞌecana lo yu dittu atta acacana benni ttoꞌo lo sina, nía udhaca siꞌican cana, urenxxattacan cana sina ttapa gayua (400) ida.”

⁷ Ráguaba Tata Do Iyyabaaha bi: “Neti nna gualíba lasia ugüea elha disa yiesi nu urenna cana sina. Dequide nua nna eríacana nía esíacana ni qui udú xibicani loa.”

⁸ Qui eyaꞌan tsitsi tisa begüee Tata Do Iyyabaaha leni Abraham nna bodhaꞌanguabe leni biꞌiniha urenbi senni nu runcana leni ca unbiyuu Israel qui uleꞌe lo ancacana benni gue Tata Do Iyyabaaha. Larcala atti chi ucani Isaac xxunu bisa dequide ulina, berentteba tata guebi, Abraham, senni-ni lenbi. Aníaguaba beni Isaac leni xiꞌinbi Jacob. Jacob nna bedeonbi nua leni ca xiꞌinbi, ca nu uca benniola gue tsiꞌinu (12) xxia ca benni Israel.

⁹ ’Ca unnuha nua betia di lecani betsicani José, nianna bettoꞌocan na leni ca nu uchecan na daca lo yu gue Egipto. Ttiaca Tata Do Iyyabaaha nna udúbe leni José.

¹⁰ Labe bodile bi lo ca elha disa biyúbi, begüeeguabe bi elha rieni lhe benguabe qui benbi nu dica uyuꞌu le Faraón, nu unnabiana Egipto. Nianna bodúguaba Faraón José ucabi nu innabia berupa gue Egipto, gue lheꞌe yoꞌo lagüi lhe.

¹¹ ’Lania nua bisía ttu ubina itúba lo yu gue Egipto axtaba lo yu gue Canaán. Ca benniola gueriha nna biyúttebacabi elha disa cumu bea nu rocabi.

¹² Ttiaca atti bina Jacob dequi deca Egiptoha te xua xuxtila nna, udhelhattebabi ca xiꞌin biyuubiha delába ca benni uca benniola gueriha. Lania nua güiacabi primerba.

¹³ Atti güiacabi berupaha nna lania liba utixxiꞌa José dequi lababi nua anca betsicabi. Lania liba bina Faraón gaxa ladu beaca lasi José.

¹⁴ Dequide nua nna bentteba José mandadu guaxí ca biꞌiniha tata guebi Jacob, itupa leni adí ca benni raca betsi loesicabiha. Gayuna yuꞌu tsinu (75) ca biꞌiniha bisína nía.

¹⁵ Anía uca bisíni Jacob lo yu gue Egipto. Níaba uttibi. Níaguaba utti ca benniola gueriha lhe.

¹⁶ Dequila nna dechecana ca sitta gue ca biꞌiniha becatsicana lheꞌe baa uyoꞌo Abraham, nu bettoꞌo ca xiꞌini Hamor daca lheꞌesi te láni Siquem.

¹⁷ ’Atti chi deoba isía aca nu unne Tata Do Iyyabaaha atti begüee tisa leni Abraham, lania nna chi guaniru adí ca benni Israel seꞌe Egiptoha. Yalha ixecabi chi raca.

¹⁸ La laniaguaba nua utaꞌa attu nu unnabiana Egipto nu bittu anca bienna José.

¹⁹ Unnuha uxí yienna ca benniola gueriha. Tsaba bittu uluꞌubiana nu bedhacana ca biꞌiniha, lana nna benna duelha guecabi udhá iquicabi ca xiꞌini chicaꞌa guecabi chi ralbaha qui gatticana, anía nna bitturu tsancana.

²⁰ Lania nua uli Moisés. Biꞌiniha nna ucabi ttu unto guadi le Tata Do Iyyabaaha. Ca tata nan guebiha nna biyú gatsibacabi biꞌiniha tsunna beo lheꞌe liscabiha.

²¹ Ttiaca atti bitturu uca igatsibi nna bedhába iquican bi. Lania nna xiꞌiniunná Faraónba bedína biꞌiniha, labana biyúna biꞌiniha attisiba xiꞌinbani.

²² Anía uca nuarca bideti Moisés iyába elha rieni gue ca nu Egipto, ucabi ttu unbiyuu beni ca sina xxeni lhe unnebi ca tisa elha lhe.

²³ ’Atti chi ucani Moisés chua (40) ida nna bexxa lebi uquinbi sannalhibi ca benni guebiha, delába ca benni Israel.

²⁴ Atti güiabi guannalhibi ca benni guebiha nna bilenbi ttu nu Egipto dana rugüena ttu ca benni guebiha. Nianna güiattebabi guadilábi nua. Ttiaca tuttíru bettibi nu Egiptoha.

²⁵ Cumu labi nna raquinbi nicaga guate daabani ca benni Israel dequi len labi nua odilá Tata Do Iyyabaaha cana. Ttiaca lacana nna läga guadú lecani.

²⁶ Betteyú sa nna guaditiꞌatteba Moisés chupa ca benni Israel yuꞌucana utilha. Labi nna benttebabi etsilabi ca nua. Nianna rábi cana. “¿Biaca ritilha len loesle? Gua yubale nna betsibale raca.”

²⁷ Ttiaca attu nu rugüena attu nua nna besigalana Moisés. Nianna atti rán bi: “Lu nna ¿nú bodún lu acalu nu innabia riꞌitu o acalu xueda guetu lhe?

²⁸ ¿Si rdacaguabalu edeottilu neti attiba benlu leni nu Egipto bettilu nnayaha, aca?”

²⁹ Atti bienini Moisés nu rá nua nna bexunnittebabi guadhobi lo yu te láni Madián, atta ucabi benni dittu. Nía betsá nábi, nianna useꞌe chupa xiꞌinbi.

³⁰ ’Dequide utee chua (40) ida dobi lo yuba atta nuttu benni seꞌe nna gaxxaba atta do Iꞌiya Sinaí, nía beleꞌe loen ingeli gue Tata Do Iyyabaaha Moisés lheꞌe belha radha gue ttu bibu rite re nía.

³¹ Atti biláni Moisés nua nna bebanabinbi. Nianna ubigattebabi diabi rugüiabi qui ilátseenbi nua. Laniala nna bieninbi tsiꞌi Tata Do Iyyabaaha re biꞌiniha:

³² “Neti anca Tata Do Iyyabaa gue ca benni uca benniola gueleha. Anca Tata Do Iyyabaaha gue Abraham lhe gue Isaac lhe gue Jacob lhe.” Moisés nna bixidittebabi de usbinbi, garua beaxinbi ugüiabi nía.

³³ Laniala nna rá Benni bananie ri na: “Ulea niꞌalu ca guaracha guelha, cumu atta dulha nna ancana yu anca leꞌa.

³⁴ Gualíba neti nna chi bilátia atti rate ca benni quia seꞌe Egipto-na chiguaba bientia ribescana lhe. Nnanna nna guadia qui odiláya cana. Larcala nna bedú tsee qui idhelha lu tsialu Egipto nna.”

³⁵ ’La Moisés nu uluꞌu niꞌa ca benni Israel atti rácana bi: “Ttiba ancalu nna ¿nú bodún lu acalu nu innabia riꞌitu o acalu xueda guetu lhe?” La biꞌinihaba nua udhelha Tata Do Iyyabaaha. Ingeli ucaxxe lheꞌe belha radha gue bibuha bixuuni Tata Do Iyyabaaha qui bodúe Moisés acabi nu innabia lhe nu odilána cana lhe.

³⁶ Labi nua bebeabi ca benniola gueriha Egiptoha. Nianna benbi ca elha rebanin xxeni leri Egiptoha. Lo Indattoo Xinaaha lhe lo yu bisi atta nuttu benni seꞌeha lhe delo chua (40) ida.

³⁷ Moisés guaba nua rábi ca benni Israel: “Tata Do Iyyabaaha idhelhe ttu benni anque profeta attiba neti. Benniha nua aque Benni datíale.”

³⁸ Moisés guaba biꞌiniha udúbi lagüi gue ca benni Israel lo yu bisiha. La laguababi nua unne lenbi ingeli gue Tata Do Iyyabaaha iqui Iꞌiya Sinaí lhe. Lenla nna unnebi len ca benniola gueriha. La laguabi nua uxíbi ca tisa ca benni rute elha nabani ttu dia lii gueri lhe nianna betebi Benniha len riꞌi.

³⁹ ’Ttiaca ca benniola gueriha nna läga uca lecabi udocabi tisa guebi. Uluꞌula niꞌacabi bi atti uxacacabi eyequicabi Egiptoha attu libe.

⁴⁰ Nianna rácabi Aarón: “Beni ca diosi qui nnerucana lori cumu läga yuri bixa guate Moisés nu bebeana ri lo yu te láni Egiptoha.”

⁴¹ Laniala nna bencabi ttu me leni oro nu uca diosi guecabi. Nianna bettittebacabi ca nimala qui betecabi úna len nua, atti benttebacabi laní de reꞌoba lecabi gue diosi anca leni oro bencabiha.

⁴² Lo niꞌa gue ca biꞌini nna bedhá iqui Tata Do Iyyabaaha cabi, begüeelhe cabi bencabi leꞌa gue ca beli sia lo bea-na lhe attiba dia lo ca sitsi bodhaꞌana ca profeta, atta rinne Tata Do Iyyabaaha re: Lebiꞌi, benni Israel, ¿si nimala bettile betele úna len neti delo chua (40) ida güequile lo yu bisi atta nuttu benni seꞌe?

⁴³ Delaba unnuha nna yoꞌo lari gue nu te láni diosi Moloc, la dechele leni beli gue nu te láni diosi Renfán. Ca unnuha nna lebiꞌiba uyuꞌule benle cana, atti bilhattebale leꞌa guecani. Denua nna cueaya le udelha le daca nurearu gue lo yu te láni Babilonia, atta acale benni dittu.

⁴⁴ ’Udorba yotu lari gue Tata Do Iyyabaaha len ca benniola gueriha atti requicabi lo yu bisi atta nuttu benni seꞌe. Unnuha rixxiꞌana dequi gualíba due len lacabi. Yotu lariha nna bencabi benniha attiba rá Tata Do Iyyabaaha Moisés unbie, attiba anca nu chi bilenbiha.

⁴⁵ Ca benniola gueriha nna beꞌan lencabi yotu lariha, nianna betecabie leni ca xiꞌincabi betaꞌa leni Josué lo yu atta besincabiha. Nía nua udácabi lo ca benni bittu anca benni Israel seꞌe nía, ca nu bebea Tata Do Iyyabaaha aníba locabi lo yuha. Yotu lariha nna níaba udoe axta liba atti bisía David.

⁴⁶ Labi nua guadi lee Tata Do Iyyabaaha guebi. Nianna unnababi udobi ttu yotu atta cuequi xxen ca benni datía Jacob Tata Do Iyyabaaha.

⁴⁷ Ttiaca Salomón liba bedobi yotuha.

⁴⁸ Masquiba Tata Do Iyyabaaha, Benni ra xxeni le, läga do Benniha lheꞌe yotu runi ca benni seꞌe yies lo yu-ni, attiba rá biꞌini uca profeta gue Ben-na:

⁴⁹ Iyyabaaha ancana atta doa rinnabiaya rá Benni bananie ri-na. Yies lo yu-ni nna ancana atta rudú niꞌaya. ¿Bi yotu nua udole quia? Bittuguaba aca guele unle ttu atta dhoa eyaca lasia lhe.

⁵⁰ Cumu netiba benia iyába ca nu seꞌe yies lo yu-ni.

⁵¹ ’Ttiaca lebiꞌi —rá Esteban—, ancale benni diti, nu lastoo tsitsi. Gua siaba nagale nna lä rieninle. Satíaba redú disale lo Espíritu gue Tata Do Iyyabaaha. Attiba ben ca benniola gueriha runle.

⁵² Iyába ca benni uca profeta gue Tata Do Iyyabaaha besía le ca benniola gueleha, axtaba betticana ca profeta utixxiꞌa dequi isía ttu benni runi nu anca tsee lo Tata Do Iyyabaaha. Nnanna nna chi bita Benniha. Ttiaca lebiꞌi nna bedaxxulale Benniha bettile.

⁵³ Lebiꞌi la nua uxíle ca ley-na las ná ca ingeli gue Tata Do Iyyabaaha. Nianna bittu rudole tisa gue nu re.

Betticana Esteban leni iyya

⁵⁴ Atti chi bina ca benni seꞌe nía iyába nu rá Esteban nna bisaꞌalhabaquinna roni lo layacani de riláxxattaquinna.

⁵⁵ Ttiaca biꞌiniha nna yuꞌu itúba lheꞌe cuerpu guebi Espíritu gue Tata Do Iyyabaaha. Attiba ulhidha lobi begüiabi güetsaa, biláttebinbi xieni gue Tata Do Iyyabaaha, Jesús due daca lhuitta derechu gue Benniha lhe.

⁵⁶ Laniala nna unnebi rábi: —Nnannatte nna rilátia iyyabaaha du yalie. Riláguabatia Benni unbiyuu daa iyyabaaha due daca lhuitta derechu gue Tata Do Iyyabaaha lhe.

⁵⁷ Ttiaca lacana nna bettola nagacani, atti uresiꞌacana idisa, nianna bebiꞌa notteba iyábacana biꞌiniha.

⁵⁸ Atti uleattebacana Esteban roꞌo yiesiha, besiacan bi iyya. Ca nu rudelha iyyacan biꞌiniha nna bodhaꞌanttebacana ca xocaniha leni ttu uncuiti lána Saulo.

⁵⁹ Lagüiba yuꞌucana rusíacana Esteban iyyaha nna labi nna unnettebabi rábi: —Jesús, Benni bananie neti, na chi dedaaya len cuinalu. Bedíchi neti.

⁶⁰ Nianna bedútteba xibibi atti unnebi idisa rábi: —¡Benni banani neti, bixulhachini gue nu lä anca tsee run ca unní! Uluxaba rábi anía nna sigába bixun lebi.