Hechos 6 - Zapoteco de Aloápam

Boseꞌecabi gasi ca benni uni sina leni ca biꞌini bedheti ca tisa beleꞌenie

¹ Lania nna cumu chi dia rani adí ca benni ria le Jesús, ca benni rinne tisa griego nna chi udulocana rinnecana gue ca benni rinne tisa hebreo, rácana dequi ca nuila bidabi nu rinne griego bittu ralhacana dhicana guadi lo nu ritidhi ttu ttu sá.

² Lania nna ca benni tsiꞌinu (12) anca ca biꞌini bedheti ca tisa beleꞌe Jesús nna beaxittebacabi iyába ca benni ria le Jesús, atti rácabi ca biꞌiniha: —Läga anca tsee gansi riꞌitu udú situ quixxiꞌatu ca tisa gue Tata Do Iyyabaaha qui tsequitu quidhitu nu ritupa-na.

³ Larcala, xa betsito, raca duelha eguilale gasi ca unbiyuu chi rapa elha rieni, ca nu rinne tsee ca benni guecani lhe ca nu chi yuꞌu Espíritu gue Tata Do Iyyabaaha lheꞌe cuerpu guecani lhe qui oseꞌetu cana uncana sina-ni,

⁴ qui anáchu riꞌitu nna tsaba udo letu innetu leni Tata Do Iyyabaaha, qui acarguaba tsequitu uleꞌetu ca tisa gue Ben-na lhe.

⁵ Iyába benni guadi lecabi gue nu rá ca biꞌiniha, atti bodúttebacabi Esteban, biꞌini chi ria tsitsi lebi Jesús, chi yuꞌu Espíritu gue Tata Do Iyyabaaha lheꞌe itúba cuerpu guebi lhe. Bodúguacabi Felipe lhe Prócuro lhe Nicanor lhe Timón lhe Parmenas lhe Nicolás biꞌini beaca lasbi lheꞌesi Antioquía lhe biꞌiniha nua beacabi benni Israel.

⁶ Laniala nna uchecabi ca biꞌiniha atta seꞌe ca biꞌini bedheti ca tisa beleꞌe Jesús. Lacabi nna bexxúatteba nácabi iqui ca biꞌiniha, atti unnettebacabi leni Tata Do Iyyabaaha unnabacabi aca leni Benniha ca biꞌiniha.

⁷ Ttu diaba runa adí benni ca tisa gue Tata Do Iyyabaaha, aníaguaba tsitsiba dia rani ca benni ria le Jesús lheꞌe yiesi Jerusalén lhe anáguaba ixeguaba ca bixxudiha güia lecani Jesús.

Uchecana Esteban lo ca uxtisi

⁸ Esteban nna tsitsiba ra lebi lo neda gue Tata Do Iyyabaaha, tsitsiba raca leni Benniha bi lhe. Labi nna runbi ca milagru lhe ca nu runi rebaninri lhe leni ca benni seꞌe lheꞌe yiesiha.

⁹ Ttiaca ttulhe ca nu daa lheꞌe ttu yoꞌo atta rudheti ca benni Israel ca tisa gue Tata Do Iyyabaaha, nu te láni Yoꞌo Gue Ca Nu Chi Seꞌe Lá, lencana adí ca benni daa lheꞌesi Cirene lhe ca nu daa lheꞌesi Alejandría lhe ca nu daa lo yu te láni Cilicia lhe ca nu daa lo yu te láni Asia lhe udulottebacana unne dícana belisacana Esteban.

¹⁰ Ttiaca läga ridacana lobi cumu rinnebi leni elha rieni rute Espíritu gue Tata Do Iyyabaaha.

¹¹ Laniala nna sigába utixacana ttu chupa ca nu innácana dequi chi bienquinna gue Esteban riguebi iqui Moisés, iqui Tata Do Iyyabaaha lhe.

¹² Aní uca nuarca betsatsacana ca benni seꞌe lheꞌe yiesiha, ca nu teru elha rieni gueni gue ca benni Israel lhe ca nu ruleꞌe nu rá ca ley bocaꞌana Moisés lhe. Lo niꞌa gue unnuha nna bedaxxucana biꞌiniha uchecan bi guadúcan bi atta runcana elha uxtisiha.

¹³ Utilaguabacana ca nu ben lecani rácana: —Unbiyuu du-ni nna bittuba redí leni riguena iqui yotu anca leꞌa-ni lhe iqui ca ley-ni lhe.

¹⁴ Chiguaba bienintu rána dequi Jesús, benni udo lheꞌe yiesi Nazaret, utseꞌe lona yotu-ni lhe otsiana nu chi labiri runri nu bocaꞌana Moisés unri lhe.

¹⁵ Ca nu runi elha uxtisiha nna lencana iyába ca nu sia nía lhe begüiattebacana lo Esteban. Lacana nna biláquinna lo biꞌiniha ancana attiba lo ttu ingeli gue Tata Do Iyyabaaha.