Hechos 5 - Zapoteco de Aloápam

Nu guate Ananías lenna Safira

¹ Udoguaba attu unbiyuu lána Ananías, nuila gueniha nna lána Safira. Lacana nna bettoꞌocana ttu lo yu.

² Unbiyuu-ni nna unnena leni nuila gueniha qui uca bedátsicana iqui belhi gue lo yuha, adí nua nna güiacana guagüecana ca biꞌini bedheti ca tisa beleꞌe Jesús.

³ Ttiaca Pedro ráttebabi: —Ananías, ¿biaca begüeelhalu utaꞌa nu xxegüiha lheꞌelu ben lelu lo Espíritu gue Tata Do Iyyabaaha, lu nna bedátsibalu iqui belhi nu utixacana lo yuha?

⁴ ¿Si läba guebalu anca lo yuha atti bittu chi bettoꞌolu nua? Larcala guegualu anca belhi nu utixacana nua. ¿Tti uca belaba lelu benlu aná? Läga lo benni unní ben lelu, lo Tata Do Iyyabaaha unní ben lelu.

⁵ Atti bienini Ananías unnuha nna beyyattebana udhá, nianna uttittebana. Iyába ca nu binacana gue nu ucaha nna usixxattaquinna.

⁶ Laniala nna udulí ttu chupa ca uncuiti bottesican na lari, atti güiattebacana guacatsican na.

⁷ Dequide utee attiba tu tsunna ura nna attirba chi bisína Safira nuila gue Ananías. Ttiaca ni lä yuna bixa chi uca.

⁸ Pedro nna unnaba tisattebabi nuilaha rábi na: —Utixxiꞌen neti, ¿si belhi betelenaba anca iyá nu beguixacana lo yuha? Lana nna becabina rána: —¡Ttoníaba beguixacana nua!

⁹ Pedro nna ráttebabi na: —¿Biaca ttulapaba güiale benle cuꞌu biale Espíritu gue Benni bananie ri-na? Nnanna nna ni ca nu guacatsicana unbiyuu gueluha chi dedaa-na. Anáguaba lu lhe icheeguabacan lu qui salhuꞌucana lu lheꞌe baa.

¹⁰ La uratteba nna bedebixxi lotteba Safira atta du Pedro, atti uttittebana. Atti betaꞌa ca uncuiti guacatsicana Ananías nna níaba chi dedeete nuilaha uttina. Laniala uchecana nuilaha guacatsican na atta yuꞌu unbiyuu gueniha.

¹¹ Iyába ca benni ria lecabi Jesús lhe iyába ca nu binacana gue nu guate ca nua lhe usixxattaquinna.

Tu racaba ixe ca benni ria le ca tisa gue Jesús

¹² Ixeru ca milagru lhe ca nu runi rebaninri lhe beni ca biꞌini bedheti ca tisa beleꞌe Jesús lheꞌe yiesiha. Iyába ca benni ria le Jesús riacabi riseꞌecabi lheꞌe corredori nu te láni Corredori Gue Salomón daa roꞌo yotuha.

¹³ Adí ca benni seꞌe lheꞌe yiesiha nna tsitsiba rapacana ca biꞌiniha respeto, ttiaca bittu reaxiquinna satselacana ca biꞌiniha.

¹⁴ Läquiga de nua, adíla guani ca benni güia lecabi Jesús, unbiyuu lhe nuila lhe.

¹⁵ Axtaba roꞌo ca nedaha ribeacana ca benni raniha, rixxacana ca nua lo taꞌa lhe lo breta lhe qui gansi chi utee Pedro nna ladiba xula guebi tsuꞌu atta te ca nua qui eyacacana.

¹⁶ Ca benni seꞌe lheꞌe adí ca lheꞌesi seꞌe sabiꞌaba Jerusalén lhe ixerucana güiacana nía leni ca benni rani lhe ca benni yuꞌu be xxegüi lheꞌe cuerpu guecani lhe. Iyába ca nua beacacana.

Ca nu rinnabia gue ca benni Israel rudhaca siꞌicana ca biꞌini bedheti ca tisa beleꞌenie

¹⁷ Bixxudi xeni rinnabiaha lenna iyába ca benni saduceo sela len lana, upattebacana malisi.

¹⁸ Denua nna nuarca bedaxxucana ca biꞌini bedheti ca tisa beleꞌe Jesús bedheacana cabi lheꞌe lisiyya.

¹⁹ Ttiaca lo relaha nna bisína ttu ingeli gue Tata Do Iyyabaaha udhalbi roꞌo lisiyyaha qui bebeabi ca biꞌiniha, nianna rábi ca biꞌiniha:

²⁰ —Gualeyya lheꞌeliꞌa gue yotuha. Gualquixxiꞌani ca benni ca tisa gue Jesús qui gatta elha nabani guecani ttu dia liiba lo Tata Do Iyyabaaha.

²¹ Lacabi nna bedobacabi tisa gue nu rá ingeliha. Nuarca betteyú dila nna dilatte chi bisíncabi roꞌo yotuha. Atti bededú lottebacabi rodileꞌequinbi ca benni. Laca bixxudi xeni rinnabiaha lenna adí ca nu seꞌe lennaha, uxittebacana ca nu teru elha rieni guecani gue ca benni Israel lhe ca nu runi elha uxtisiha lhe atti udhelhattebacana ca nu dia saleacana ca benni te lisiyyaha.

²² Ttiaca atti bisína ca nu dia saleacana ca biꞌiniha lheꞌe lisiyyaha nna lärga nurua te nía. Laniala nna bequicana guatixxiꞌacana rácana:

²³ —Tsitsiba yaya lisiyyaha bisíntu. Ca nu seꞌe rapacana roꞌo nua nna níaba seꞌe ca nua. Ttiaca atti udhaltu utaꞌatu nna lärga nu te lheꞌe lisiyyaha.

²⁴ Atti bienini bixxudi xeni rinnabia lenna adí ca bixxudi anca nu loha lhe nu lo gue ca nu riseꞌe rapa yotuha lhe gue nu rá ca nua, ucattebaquinna nianna rácana: “¿Bilabunni sateri nnanna?”

²⁵ Unnuhaba rácana seꞌecana attirba chi ucaxxe ttu nu bisína, rán cana: —Ni ca nu utixxale lisiyyaha seꞌe lheꞌeliꞌa gue yotuha ruleꞌequinna ca benni.

²⁶ Nianna diatteba nu lo gue ca nu riseꞌe rapa yotuha itupaba lenna ca güensina gueniha guaxxícana ca biꞌiniha. Ttiaca bittu beaxquinna bixa udhacacana ca biꞌiniha, cumu usquinna qui lä useꞌe ca benni seꞌe nía cana iyya.

²⁷ Atti besin lencana ca biꞌiniha lheꞌe atta runcana elha uxtisiha nna unnetteba bixxudi xeni rinnabiaha rána:

²⁸ —¿Läba chi xa rátu le dequi tsa bitturu uleꞌele ca tisa gue unbiyuu rinnele guen-na nna? Lebiꞌi nna adíla runle. Nnanna nna iyába ca benni seꞌe Jerusalén-ni chi begunale gue nu ruleꞌele na. Güea rinnele rále dequi riꞌituba bettitu unbiyuuha lhe.

²⁹ Pedro becabittebabi lenbi adí ca biꞌini bedheti ca tisa beleꞌe Jesús rácabi: —Ttiaca runrulana duelha udotu tisa gue Tata Do Iyyabaaha, attichula gue ca benni seꞌe yies lo yu-ni.

³⁰ Tata do Iyyabaaha gue ca benniola gueriha belhidhe Jesús lheꞌe baa. Benniha nua bettile betále lo ya crusiha.

³¹ Ttiaca Tata Do Iyyabaaha nna bedo lhuitta derechu guee Benniha benie aque Benni ra xxeni lee. Nianna benie aca Benniha benni rinnabia gueri lhe Benni rodile ri lhe qui anáchu riꞌi ca benni Israel-ni nna odú xiyyanri qui odaxxuri neda gue Tata Do Iyyabaaha, Benniha nna dhie elha xen lasi gue ca tulha gueri.

³² Riꞌitu ancatu benni begüia lotu gue iyába nu beni Benniha, anáguaba Espíritu bete Tata Do Iyyabaaha len ca benni rudo tisa guee lhe.

³³ Atti bienquinna nu rá ca biꞌiniha nna bisaꞌattebaquinna nianna uxacattebacana utticana ca biꞌiniha.

³⁴ Ttiaca len ca nu runcana elha uxtisiha nna nutsa ttu benni fariseo lábi Gamaliel. Ancabi benni ruleꞌe ca ley bocaꞌana Moisés, biꞌini riaguaba le iyá ca benni seꞌe lheꞌe yiesiha guebi lhe. Biꞌiniha nna udulíttebabi rábi ca nu seꞌe nía ebeacana ca biꞌini bedheti ca tisa beleꞌe Jesús ttu satti atta seꞌecana.

³⁵ Nianna unnettebabi rábi ca benni runi elha uxtisiha: —Benni Israel, primerxa gualulaba tsee lele guee bixunna rdacale udhacale ca unbiyuu-na.

³⁶ Gua yuxeabale nu uca ca axta tu nurea, biríaguaba ttu benni lána Teudas rána dequi lana ancana ttu benni ra xxeni leni. Larcala attiba tu ttapa gayua (400) ca benni guanalhacan na. Ttiaca bettibacana nua, nianna iyába ca nu guanocana nua gatti laduba bedaxxucana. Níaba uluxa nua.

³⁷ Dequila lania nna bedería Judas, benni Galilea, atti ulhidhacana censuha. Unnuha nna udáguabana guano ixeru ca benni na. Ttiaca atti bedeotticana unnuha nna iyába ca nu guanalhacana nua gatti laduba bedaxxucana.

³⁸ Larcala neti ria le: Gualulhá ca unná. Bittubi udhaquinle cana, cumu nu rinnecan nna ganna si ancabunna gue benni seꞌe yies lo yu-ni nna güedeluxa bunna.

³⁹ Ttiaca ganna si ancabunna gue Tata Do Iyyabaaha nna lebiꞌi läga dhale utseꞌe lole unná. Gualuyurga cadiga len Tata Do Iyyabaaha lä yuꞌule utilha.

⁴⁰ Bedoba nagacani guebi. Laniala nna beaxicana ca biꞌini bedheti ca tisa beleꞌe Jesús atta seꞌecanaha. Nianna dequide chi unnabiacana begocana ca biꞌiniha ttu bedeꞌelu nna atti ráttebacana ca biꞌiniha: —Bitturu innele ca tisa gue Jesús. Laniala nna bolhácana cabi.

⁴¹ Dequide beríacabi atta seꞌe ca nu runcana elha uxtisiha nna reꞌolhaba lecabi de begüeelha Tata Do Iyyabaaha uxícabi ttu elha disa de rixxiꞌacabi gue Jesús.

⁴² Ttu ttu sába guaseꞌebacabi lheꞌeliꞌa gue yotuha, lheꞌe lisi ca benni lhe. Tsa bittu rudú sicabi ruleꞌecabi lhe riguixxiꞌacabi lhe dequi Jesús anque Cristu.