Hechos 4 - Zapoteco de Aloápam

Pedro lenbi Juan rutsá ducabi lo ca uxtisi

¹ Sna duba Pedro lenbi Juan rulisacabi ca benni seꞌe lheꞌeliꞌa gue yotuha, attirba chi bisína ca bixxudiha dia lencana nu lo gue ca nu rapa yotuha, cheeguabacana ca benni saduceo lhe.

² Ca unnuha nna risaꞌaquinna biaca ruleꞌeni Pedro lenbi Juan ca benni seꞌe nía, de biaca rixxiꞌaquinbi ca nua gue atti beacani Jesús beleꞌe lo gualíba eyacani ca nu yatti-na lhe.

³ Lania nna bedaxxutteba ca nua ca biꞌiniha, begaꞌacana lheꞌe lisiyya la ulhaha, cumu chiba ulha sá nua larcala betteyú sá liba bebeacana ca biꞌiniha.

⁴ Ixe ca benni bienquinna ca tisaha güia lecani Jesús, larcala attiba tu gayu mili ca benni cubi bisela, suntterla ca benni unbiyuuha bibaba.

⁵ Beteyú dila nna beseꞌetteba ca nu rinnabia gue ca benni Israel ttu reba lheꞌe yiesi Jerusalén lencana ca benniola teru elha rieni guecaniha lhe ca nu ruleꞌe nu rá lo ca ley bocaꞌana Moisés lhe.

⁶ Níaguaba du Anás nu anca bixxudi xeni rinnabiaha, Caifás lhe Juan lhe Alejandro lhe adírba ca nu datía bixxudi xeni rinnabiaha lhe.

⁷ Laniala nna udhelhacana ca nu güia gualeacana Pedro lenbi Juan lheꞌe lisiyyaha. Atti chi besin lencana ca biꞌiniha atta seꞌe ca nua nna unnaba tisattebacana ca biꞌiniha rácan cabi: —Lebiꞌi nna ¿nú betena derechu guele nuarca requile runle aná, nú udhelhana le lhe?

⁸ Pedro nna cumu itúba lheꞌe cuerpu guebi yuꞌu Espíritu gue Tata Do Iyyabaaha, bequittebabi rábi cana: —Ca benni rinnabia gue Israel, anáguaba lebiꞌi ca benni teru elha rieni gueni gue lo yies-ni lhe

⁹ lebiꞌi nna rinnaba tisale riꞌitu gue nu tsee uca leni unbiyuu xi-ni, cumu raca lele unale gasná uca beacana.

¹⁰ Qui una tseele nna anáguaba iyárecha ca benni Israel-ni lhe unbiyuu du lole-ni nna lá Jesucristu gue Nazaretba bedettitu nna beaca unní. Benniha nua bettile betále lo ya crusiha, ttiaca Tata Do Iyyabaaha nna belhidhe Benniha lheꞌe baa atta yuꞌu ca nu yatti-na.

¹¹ Jesús nua anque attiba ttu iyya nu uluꞌu niꞌale, lebiꞌi benni anca attiba nu rucua yoꞌo. Ttiaca lee nua beꞌeyue uque attiba ttu iyya nu ribe riden tsitsina yoꞌo.

¹² Larcala lärga nurua attu te dhana odilán ri qui bittu tsia nittiri, cumu lärga nu attu benni chi udhelha Tata Do Iyyabaaha yies lo yu-ni, qui odilán ri.

¹³ Atti biláni ca nu rinnabiaha bittu rasini Pedro lenbi Juan atti rinnecabi nna bebanbaquinna guecabi, cumu yuxeabacana läga raca gue ca biꞌiniha sitsi, niguaba lä bedheticabi lhe. Laniala nna boquinna iquicani gualíba anca ca biꞌiniha benni güequi leni Jesús.

¹⁴ Güea níaguaba du unbiyuu beacaha len lacabi lhe larcala bi rlaba teequinna bixa gácana ca biꞌiniha.

¹⁵ Laniala nna bebeacana Pedro lenbi Juan lheꞌe yoꞌo lagüiha. Nianna a sun ca nu rinnabiahaba beꞌana rinne leni loescani,

¹⁶ rácana: —¿Bila anca nu unri leni ca unbiyuu-ni ganna? Cumu iyába ca benni seꞌe Jerusalén-ni chi yucana dequi chi ben ca unná ttu milagru. Riꞌi nna ¿ga sacatsiri innári dequi bittu lí?

¹⁷ Suntterba qui bitturu gadhi tisa-ni lheꞌe yiesi-ni nna uniasinri cana qui udhá iquicani bitturu quixxiꞌaquinna nuxaruha benni ca tisa gue unbiyuu rácana Jesús.

¹⁸ Aní uca nna beaxicana Pedro lenbi Juan attu libe atta seꞌecanaha, atti bedhaca disattebacana ca biꞌiniha qui tsa bitturu quixxiꞌacabi gue Jesús, bitturguaba uleꞌequinbi ca benni gue Benniha lhe.

¹⁹ Ttiaca Pedro lenbi Juan, becabilacabi rácabi cana: —Lebiꞌitteba attiba seꞌele-na, gualnna sanga, ¿si tseerla anca lo Tata Do Iyyabaaha udotu tisa guele attichula gue Benniha?

²⁰ Cumu riꞌitu nna läga aca udhantu quixxiꞌatu nu chi bienintu lhe nu chi bilentu lhe.

²¹ Dequide bedhaca disa chatti ca nu rinnabia ca biꞌiniha nna laniala nna bolhácana cabi. Ttiaca lägabi ria lencana eselquinna gaxasná uncana udhaca siꞌicana ca biꞌiniha lo niꞌa gue de iyába ca benni seꞌe nía rinnecana rácana: “¡Xxeni ra le Tata Do Iyyabaaha!” de begüiacana nu chi uca.

²² Cumu unbiyuu beaca leni milagru ucaha nna chiba anquin nua guatela chua (40) ida.

Ca benni ria le Jesús rinnecabi leni Tata Do Iyyabaaha

²³ Dequide chi ulá Pedro lenbi Juan, deyyattebacabi atta seꞌe adí ca benni ria le Jesús. Nianna utixxiꞌattebaquinbi ca biꞌiniha iyába nu rá ca bixxudi anca nu loha lhe nu rá ca nu teru elha rieni gueni gue ca benni Israel lhe.

²⁴ Atti chi binacabi iyába nu utixxiꞌa ca biꞌiniha nna iyábacabi ttulapaba unnecabi belisacabi Tata Do Iyyabaaha, rácabi: —Benni bananie riꞌitu, lu ancalu Benni ra xxeni leni, cuinalu benlu iyyabaaha lhe yies lo yu-ni lhe indattoo-na lhe anáguaba iyába nu seꞌe locani lhe.

²⁵ Lu unnelu leni Espíritu guelu ca tisa unne David biꞌini uca benniola guetu beni sina guelu ca tu nurea atti rábi: ¿Biaca risatsa ca benni dittu-na, rulaba lecani nu lä dica ixuu lhe?

²⁶ Ca nu rinnabia xeni gue yies lo yu-ni lhe ca nu anca nu lona lhe ttuba riacana reseꞌe disacana lo Tata Do Iyyabaaha, lo Cristu Benni udhelha Ben-na lhe.

²⁷ ’Gualíba aníaba beni Herodes lenna Poncio Pilato lheꞌe yies-ni, lencana iyába ca nu dittu lhe iyáguaba ca nu Israel-ni lhe atti bebiꞌa nottebacana Xiꞌinlu Jesús benni do riesinlu anca guelu. Benniha nua chi gaꞌaninlu aque Cristu.

²⁸ Aníaba ben ca nua qui guaxxína uca iyá nu chi gaꞌaninlu lhe nu chi bedaa lelu lhe aca.

²⁹ Nnanna nna xa Benni banani riꞌitu, biyúrga nu runcana, urga bi rudhaca disacana riꞌitu. Larcala nna rinnabatu lo cuinalu, qui aca lenlu riꞌitu, ca benni runtu sina guelu-ni, qui bittu gasintu gansi chi riguixxiꞌatu ca tisa guelha.

³⁰ Beleꞌe lo nu ancalu, beni ca milagru lhe beoni ca benni rani lhe leni elha ra xxeni le guee Xiꞌinlu Jesús benni do riesinlu anca guelu.

³¹ Uluxaba unnecabi leni Tata Do Iyyabaaha nna attirba chi bixú atta seꞌecabiha. Lania nna utaꞌatteba Espíritu gue Tata Do Iyyabaaha lheꞌe itúba cuerpu guecabi, atti udulottebacabi utixxiꞌacabi itú iqui itú lecabi ca tisa gue Tata Do Iyyabaaha.

Ca benni ria le ca tisa gue Jesús rute len loescabi iyába nu te guecabi

³² Iyába ca benni chi ria lecabi Jesús, ttuba rulaba lecabi, ni ttu ca biꞌiniha bittu rácabi: “Suna quiba bixa te quia.” Gue iyábacabi anca ttu bixa te guecabi.

³³ Ca biꞌini bedheti ca tisa beleꞌenie nna tsitsiba chi ra lecabi, itú iqui itú lecabi requicabi riguixxiꞌacabi beacabani Jesús Benni bananie ri. Tsitsiguaba raca leni Tata Do Iyyabaaha iyába ca benni ria le Jesús.

³⁴ Ni ttu ca benni sela leni ca biꞌiniha bittu reasaquinbi ttu bixa, cumu ca benni seꞌe lo yu guecabi o sia liscabi lhe ruttoꞌobacabi ca nua. Belhiha nna

³⁵ rutecabi leni ca biꞌini bedheti ca tisa beleꞌenie qui quidhicabi nua gue ca benni cua reasabani ttu ttucabi.

³⁶ Anía beni ttu benni lábi José, datíabi Leví, dabi daca lo yu nu te láni Chipre. Biꞌini nua utixxa ca biꞌini bedheti ca tisa beleꞌenie lábi Bernabé, dienna innána Benni rute elha xen lasi.

³⁷ Labi nua bettoꞌobi ttu lo yu guebi. Nianna betebi iyába belhiha leni ca biꞌini bedheti ca tisa beleꞌenie.