Hechos 3 - Zapoteco de Aloápam

Ttu unbiyuu xi beacana

¹ Ttu sá nna dia Pedro lenbi Juan atta do yotuha attiba tu retin tsunna ulha cumu uraha anca rinne ca benni len Tata Do Iyyabaaha.

² Roꞌo yotuha nna do ttu unbiyuu xi, aníaba anca nua ulina. Ttu ttu sába radocana nua roꞌo yotuha daca atta du puerta te láni Nu Gaꞌana Tsee, qui innábana belhi leni ca benni ria lheꞌeliꞌa gue yotuha.

³ Atti biláni benni anca xiha Pedro lenbi Juan chi diacabi gaꞌacabi lheꞌeliꞌa gue yotuha nna unnettebana rinnabana ca biꞌiniha belhi.

⁴ Laniala nna ttu liba begüiacabi loni, atti unnetteba Pedro rábi na: —¡Begüia riꞌitu!

⁵ Unbiyuuha nna bedo tseettebana begüiana locabi, cumu raquinna ga gutebacabi ttu bixa len lana.

⁶ Ttiaca Pedro nna ráttebabi na: —Bittu belhi quia te utea len luu. Nu teerba quia nna utea len luu. Jesucristu gue Nazaret rudettia, udulí nna udá.

⁷ Laniala nna bedaxxutteba Pedro ná derechu gue unbiyuuha, atti bedhulíttebabi na. La laniatteba bilí ca niꞌaniha lhe ca dhetiniha lhe.

⁸ Nu xiha nna tturba udhina udulína, atti udáttebana. Laniala nna utaꞌa lenna ca biꞌiniha lheꞌeliꞌa gue yotuha, ttubana ridána lhe radhina lhe nianna rinnena rána: “¡Xxeni ra lelu, Tata Do Iyyabaaha!”

⁹ Iyába ca nu biláquinna unbiyuuha ridána lhe rulhana lhe gue Tata Do Iyyabaaha,

¹⁰ ucatequinna lhe bebanquinna lhe biláquinna nu guate unbiyuuha, cumu chiba anca biaquinna labana nua ridona roꞌo yotuha daca atta du puerta te láni Nu Gaꞌana Tseeha rinnabana belhi.

Pedro riguixxiꞌenbi ca benni gue nuxa beonna nu xiha

¹¹ Nu xi chi beacaha nna tsaba bitturu rulhána Pedro lenbi Juan. Nianna iyába ca benni seꞌe nía rebanquinna atti diattebacana atta seꞌe ca biꞌiniha lheꞌe corredori daa roꞌo yotuha nu te láni Corredori gue Salomón.

¹² Atti biláni Pedro chi bisína ixe benni atta seꞌecabiha nna unnettebabi rábi cana: —Lebiꞌi, benni Israel, bittu ebaninle gue nu chi bilenle-na. Lä ugüiaguabale riꞌitu lhe. Cumu läga riꞌitu beni beaca unbiyuu-ni leni elha ra xxen le guetu, niguaba de ancatu benni ratúa leni lhe.

¹³ Tata Do Iyyabaa gue Abraham lhe gue Isaac lhe gue Jacob lhe Tata Do Iyyabaaha gue ca benniola gueriha chi benie cuequi xen iyáxea Benni Xiꞌinie Jesús Benni bedaxxule guatele las ná Pilatoha. Lebiꞌi nna bittu uxielhale olhána Benniha atti chi rána olháne.

¹⁴ Ttiaca lebiꞌi nna läga uca lele lhá Benni bittu tulha guee te, Benni do riesi anca gue Tata Do Iyyabaaha. Nu beni elhuttiha la unnabale belhá Pilatoha.

¹⁵ Lebiꞌi nna Benni rute elha nabani gueriha la bettile. Ttiaca Tata Do Iyyabaaha nna benie beaquin Benniha, belhidhe Benniha lheꞌe baa atta yuꞌu ca nu yatti-na. Riꞌitu ancatu benni biyú lotu gue iyá nu uca.

¹⁶ Larcala unbiyuu rilenle du-ni lhe nu anca bienle-ni lhe chi güia leni Jesús nuarca beni Benniha udána. De güia leni gue Benniha nuarcala chi beacarana. Lebiꞌi nna iyábale gua rugüiabale nu chi uca.

¹⁷ ’Neti racatia xa betsito, de chulhabinle lenle ca nu rinnabia guele-na nuarcala bedhacale Jesús anía.

¹⁸ Ttiaca aníaba uca qui guaxxína nu chi rá Tata Do Iyyabaaha iyába ca benni uca profeta guee, ca biꞌiniha nna chi utixxiꞌacabi rácabi, labíaba gatti Cristu.

¹⁹ Larcala lebiꞌi nna gualodú xiyyanle, gualodaxxutte neda gue Tata Do Iyyabaaha qui cue ca tulha guele-na, lania nna uni Benni bananie ri-na salía tseenle.

²⁰ Anáguaba qui edhelhe attu libe Jesús, delába Cristu Benni chi gaꞌananie idhelhe len lebiꞌi.

²¹ Benniha nna labíaba cuede iyyabaaha axta liba isía sá lhuxa oseꞌe tsee Tata Do Iyyabaaha iyáxea, attiba chi rá ca profeta utixxiꞌa ca tisa betee benna lencabi itú nurea.

²² Attiba chi rá Moisés ca benni uca benniola gueriha: “Tata Do Iyyabaaha, Benni bananie le-na idhelhe ttu Benni datíabi lebiꞌi, Benniha inne ca tisa utee Ben-na lenie. Benniha nua idhele attiba udhele neti. Benniha udole tisa gue iyába nu innee.

²³ Cumu iyába ca benni bittu udo nagacani gue Benniha nna ttu tsaba iría nua lo yiesi gue ca benni baba leni Tata Do Iyyabaaha.”

²⁴ ’Iyába ca benni uca profeta unnecabi gue nu raca nnanna udulo leni profeta Samuel.

²⁵ Lebiꞌi ancale benni datía ca benni uca profeta, larcala ralhaguabale dhíle nu chi rá Tata Do Iyyabaaha utee len ca biꞌiniha. Nu chi begüee tisa utee leni ca benniola gueri useꞌe ca tu nureha, atti re Abraham: “Leni ca benni aca betsi loesluha idhela elha tsee guee iyárecha ca benni seꞌe yies lo yu-ni.”

²⁶ Atti belhidha Tata Do Iyyabaaha xiꞌinie Jesús lheꞌe baa atta yuꞌu ca nu yatti-na, udhelhattebe benniha lola len lebiꞌi qui aca lanie le, anáchu nna eríale lheꞌe nu lä anca tsee runle-na.