Hechos 28 - Zapoteco de Aloápam

Nu guate Pablo lo yu re lagüi indattoo te láni Malta

¹ Dequide chi ulá iyábatu lo indattooha nna laniala binatu, lo yu re lagüi indattoo atta bisíntuha nna te láni Malta.

² Ca benni beaca lascani nía nna tseeba biyúcana riꞌitu. Cumu yalhagala raca iyya lhe racaxxatta idilha lhe nuarca beontteba ca nua ttu cue gui, atti uxttebacana iyábatu qui botsaꞌatu roꞌo te.

³ Pablo nna bettupattebabi ttu chupa yaga bisi, qui cuia lo guiha. Ttiaca atti diabi udelhabi yagaha lo guiha nna utá ttu belha yuꞌu lheꞌe nua gui, atti xeaba bería nua utoyaꞌana nábi.

⁴ Atti biláni ca benni gue nía belhaha nalhana yien ná Pablo nna rátteba loescani: —Nu runi elhuttiba unbiyuu du-ni. Nuarca masquiba ulána bittu uttina lo indattoo-na, diosi runi elha uxtisi gueri-ni nna läga utee balaꞌana dhorna yies lo yu-ni.

⁵ Ttiaca Pablo nna becuibitteba nábi qui ubinna belhaha lo guiha. Labi nna tsa lägabi uxacabi.

⁶ Iyába ca benni seꞌe nía ribedacana iláquinna tsuꞌu gui nábi o ttu nnelaba ibixxi lobi gattibi lhe. Dequide chi uca isá seꞌecana ribedacana bixa aca, bilábaquinna bittubabi uxaca Pablo nna laniala bodilába lecani redenácana: “Gaxa diosiba anca biꞌin-ni.”

⁷ Gaxxaba nía seꞌe ca lo yu gue ttu unbiyuu lábi Publio, ancabi nu rinnabia lo yu te láni Malta. Labi nna uxbi riꞌitu lheꞌe yoꞌo guebiha, nianna tseeba biyúbi riꞌitu tsunna ubisa.

⁸ La laniaguaba nua te tata gue biꞌiniha lo taꞌa ranina yuꞌuna xxilhá, ruchú yaꞌana lheꞌeni lhe. Pablo nna utaꞌattebabi atta te benni raniha. Dequide unnebi leni Tata Do Iyyabaaha nna bexxúatteba nábi iquini. Benni raniha nna beacattebana.

⁹ Atti chi bina adí ca benni rani seꞌe nía gue nu ucaha nna güiattebacana atta do Pablo. Ca unnuha nna iyábacana beacacana.

¹⁰ Attulade tsee biyú ca benni seꞌe nía riꞌitu. Atti chi deoba edátu nna betettebacana iyába nu reasintu gue neda guetu.

Pablo bisinbi lheꞌe yiesi Roma

¹¹ Dequide chi uca tsunna beo seꞌetu lo yu gue Malta nna laniala beopitu lo ttu barco gue yiesi Alejandría nu bisíana udúna nía itúttuba atti raca iyya beha. Unnuha nua sia xinni ca diosi cuachi te lácani Cástor nna Pólux nna.

¹² Atti bisíntu atta risin ca barco roꞌo yiesi te láni Siracusa nna níaba bisátu tsunna ubisa.

¹³ Nía udulo barcoha diana sa roꞌo indattoohaba ni bisínbatu roꞌo yiesi Regio. Betteyú dila nna biríatteba be daca sur, larcala a chupa sába nna chi bisíntu roꞌo yiesi nu te láni Puteoli.

¹⁴ Nía betiꞌatu ttu chupa ca benni ria le Jesús. Ca biꞌiniha nna bechecabi riꞌitu beꞌantu ttu xmanu liscabiha. Anía liba nna chibuca bisíntu lheꞌe yiesi Roma.

¹⁵ Ca benni ria le Jesús seꞌe lheꞌe yiesi Roma nna atti chi binacabi guetu nna biríattebacabi dacabi betteledacabi riꞌitu, axtaba atta te láni Foro Gue Apio. Adícabi nna bisíacabi bedaa atta te láni Tsunna Ca Taberna. Atti biláni Pablo ca biꞌiniha seꞌecabi nía nna begüeettebabi Tata Do Iyyabaaha xquixarue, laniala bebequi tsitsi lebi.

¹⁶ Atti bisíntu lheꞌe yiesi Roma nna nu banani ca soldadoha nna betena iyába ca nu te lisiyya cheenaha las ná nu lo gue ca soldado gue Roma. Pablo nna begüeelhabacana biꞌiniha udobi yabalebi lheꞌe attu yoꞌo subi, a ttuba ttu soldado udona upan bi.

Pablo riguixxiꞌabi ca tisa gue tata Jesús lheꞌe yiesi Roma

¹⁷ Dequide guadona tsunna ubisa seꞌetu nía nna uxitteba Pablo ca benni anca nu lo gue ca benni Israel seꞌe lheꞌe yiesi Roma. Atti chi bisía ca nua atta dobiha nna ráttebabi ca nua: —Xa betsito, neti nna lägabi chi bedhacatia ca benni gueriha, niguaba lä riguꞌu niꞌaya nu beleꞌeni ca benniola gueriha ri lhe. Delo nna bedaxxu ca benni gueri-na neti lheꞌe yiesi Jerusalén, nianna betecana neti las ná ca benni gue Roma-ni seꞌe nía.

¹⁸ Ca unnuha nna dequide chi utsatsa niꞌacani quia nna uxacattebacana ulhácana neti cumu läga guatiꞌacana bixa benia nu dica ralha gattia.

¹⁹ Ttiaca ca benni Israel nna läga uxielhacana. Anioca nna unnaba utecana neti lo ná César nu rinnabia do lheꞌe yiesi Roma-ni, qui unna elha uxtisi quia. Lo niꞌa gue unnuha bunni larca dua-ni, läga de re lasia udelha iyya ca benni gueri anca benni Israel.

²⁰ Larcala nna uxia cuinale qui inne lania le, qui unbia loesri lhe. Neti nna lo niꞌa gue de xenba lasia gue nu xen leri riꞌi ca benni Israel, nuarca dua ni xica ca náya-ni leni cadena.

²¹ Ca unnuha nna ráttebacan bi: —Riꞌitu nna lägabi sitsi gue ca benni seꞌe lo yu gue Judea chi uxítu nu rinne loni guelu, niguaba ca benni Israel daa nía lhe lägabi chi utixxiꞌaquinna riꞌitu dequi requilu bixa runlu, bittuguaba rinne güecana guelu lhe.

²² Ttiaca riꞌitu nna raca letu udo nagatu bixa innálu cumu lheꞌe iyába ca yiesi-na riguꞌu niꞌacani ca benni sela len lu chi bedaxxu neda gue Jesús.

²³ Nioca nna bedúcana ttu sá qui tsiacana sanne lencana Pablo lheꞌe yoꞌo atta dobiha. La sá nna güiatteba ixeru ca benni. Dilatte udulobi, ni ulhaba sá dubabi rixxiꞌenbi ca nua gue gaxasná rinnabia Tata Do Iyyabaaha. Labi nna rudaxxu niꞌabi nu rá lo ca ley bocaꞌana Moisés, nu rá lo ca sitsi bodhaꞌana ca benni uca profetaha lhe duelhaba run Pablo qui tsia le ca benni seꞌe nía Jesús.

²⁴ Ttu chupa ca benni nna güiaba lecani gue nu rá Pablo, ttiaca adícana nna läga güia lecani.

²⁵ Cumu de bittu ttudi rulaba lecani gue nu rá Pablo, nuarca udulottebacana bencana eyyacana. Laniala nna atti rá Pablo cana: —Gualíba nu rá Espíritu gue Tata Do Iyyabaaha profeta Isaías nu utixxiꞌenbi ca benni uca benniola gueriha. Espírituha nna re biꞌiniha:

²⁶ Güia atta seꞌe ca benni seꞌe-na, lu nna gus cana: “Masquiba tticaxa rudo nagale, ttiaca bittu sadú lele, masquiba tticaxa ugüiale, ttiaca läga ilenle.

²⁷ Cumu lastoo ca unná nna chiba beacana tsitsi attiba ttu iyya. Ca nagaquinna nna attisiba tsaba tocana, ca iyya loquinna nna attisiba yayabacana. Aná nna qui bittu iláquinna niguaba lä iyienquinna lhe lä ttedaaguabaquinna lhe qui bittu eyequicana odaxxucana neda quia-na neti nna eyonia cana.”

²⁸ Nnanna nna raca lasia una le: ―Atta seꞌe ca benni dittu-naba tsiatu sattixxiꞌentu cana ca tisa rixxiꞌa gue gaxasná rodilá Tata Do Iyyabaaha ca benni qui bittu tsia nitticana, cumu ca unná nna gudoba nagacani gue nu quixxiꞌentu cana.

²⁹ [Atti rá Pablo anía nna güequitteba ca nu Israel, tsitsiba chi ritilha tisa len loescani deyyacana.]

³⁰ Gua doxeabana chupa ida udo Pablo lheꞌe yoꞌo unnaba gannabiha. Níaba risina iyába ca benni ria ranalhican biꞌiniha.

³¹ Labi nna itú iqui itú lebi rixxiꞌabi gue gaxasná rinnabia Tata Do Iyyabaaha, rixxiꞌabi gue Jesucristu Benni bananie ri-na lhe. Tsa läganu biría usuna.