Hechos 27 - Zapoteco de Aloápam

Pablo yuꞌubi neda diabi lheꞌe yiesi Roma

¹ Atti chi boquinna iquicani idhelhacana riꞌitu lo yu gue Italia, laniala nna botecana Pablo lenbi adí ca nu te lisiyyaha las ná ttu nu banani ca soldado te láni Julio. Ca nua nua te lácani: ca soldado gue nu rinnabia do Roma.

² Laniala nna gopitu lo ttu barco gue yiesi nu te láni Adramitio. Unnuha nua chi du tseena roꞌo indattoo gue yiesi Cesarea qui tsiana daca roꞌo ca yiesi seꞌe roꞌo indattoo gue lo yu gue Asia. Níaguaba daa Aristarco len riꞌitu. Biꞌiniha nua beaca lasibi yiesi Tesalónica nu re lo yu te láni Macedonia.

³ Betteyú sá nna bisínttebatu roꞌo indattoo re roꞌo yiesi Sidón. Julio nna tseeba bedú leni leni Pablo, begüeelhabana biꞌiniha guannalhibi ca benni seꞌe tsee lenbi seꞌe nía qui betecabi nu reasinbi.

⁴ Biríabatu roꞌo yiesi Sidón nna diattebatu. Ttiaca cumu ruꞌuxxatta be lo barcoha nna nioca bosía lotu daca atta re be cuꞌe lo yu gue Chipre re lagüi indattooha cumu de daxxatta be deca atta diatuha.

⁵ Dequide utetu lo indattoo re gaxxaba daca roꞌo yu gue Cilicia len Panfilia nna bisínttebatu roꞌo yiesi te láni Mira nu re roꞌo indattoo baba lo yu gue Licia.

⁶ Nu banani ca soldado checana riꞌituha nna guattiꞌattebana ttu barco nu beaca gue yiesi te láni Alejandría du nía. Unnuha nna diana daca lo yu gue Italia. Nianna belhopittebana riꞌitu lo nua, atti diattebatu attu libe.

⁷ Ixe ubisa uyuꞌutu neda lo indattooha cumu de dia besi barcoha. Chibuca udátu utetu roꞌo yiesi nu te láni Gnido. Ttiaca cumu de daxxatta be daca atta diatuha nna nuarca bodaxxutteba barcoha daca roꞌo yu te láni Salmón, cumu níarba gua re be. Níala guatseequina daca cuꞌe lo yu gue Creta re lagüi indattooha.

⁸ Sa roꞌo indattoo gue lo yu gue Cretaba diatu. Chibuca bisíntu ttu atta do risin ca barco. Atta bisíntuha nna te láni Ca Puerto Tsee, rena gaxxaba atta re yiesi te láni Lasea.

⁹ Cumu chigalá bisá yuꞌu barcoha neda lo indattoo, nuarca ttu níarba requitu nna chi ute ca sá atti rutte ubina lheꞌe ca benni Israel, chiguaba bisía ca beo atti racaxxatta iyya be lhe. Larcala chi ruxunnina guetu bixa satetu ganna si ttu tsiabatu leni barcoha lo indattooha. Laniala nna utixxiꞌani Pablo ca benni daa lo barcoha rábi cana:

¹⁰ —Xa tata, neti nna ritedaatia dequi yalha nu sateri gansi ttuna diabari, cumu chi ruxunnina udelha lattiri ca yua-ni lhe barco-ni lhe anáguaba riꞌi lhe ruxunniguana gueri gattiri.

¹¹ Ttiaca nu banani ca soldado dia lentuha nna bedorla nagani gue nu rudhana barcoha lhe gue nu beaca gueni nua lhe attichula gue nu rá Pablo.

¹² Cumu atta seꞌetuha nna lägabi ttega tsee anca nía qui eyaꞌantu cuedatu tte iyya beha, anía uca nna nuarcala attiba la iyába ca nu daa lheꞌe barcoha boquinna iquicani usiguibatu tsiatu, qui nicaga guasinbatu roꞌo yiesi Fenice nu re lo yu gue Creta. Unnuha nna rena daca sudoeste leni noroeste, cumu nía anca ttu atta risin ca barco qui tseꞌetu cuedatu laca tte ca beo che iyya be.

Nu guate Pablo yuꞌubi neda diabi Roma atti uca iyya be lo indattooha

¹³ Lacana nna ucaquinna dequi guacaba usiguitu tsiatu de chi biría ttu be lhadhigaba daa daca sur. Nuarcala nna belhopittebacana iyya idiꞌi nu runna ribeda barcoha, atti biríattebatu sa roꞌo indattoo gue lo yu gue Cretaba diatu.

¹⁴ Ttiaca locarba bi bisá attirba chi biría ttu iyya be idí te láni Nordeste. Unnuha nna uyuꞌuttebana lo barcoha,

¹⁵ atti bennertteba loni nua. Ca nu rudhá barcoha nna lärga udácana tsia nua daca atta daa iyya beha, nuarca begüeelha chibacana uchena nua.

¹⁶ Aníaba che beha riꞌitu betetu sa cuꞌeba ttu lo yu güexxa re lagüi indattooha lána Clauda. Nía liba nna lätterba be raca. Lania liba nna chibuca udá ca nu banani barcoha belhopicana chalupa naꞌaya barcoha lo nua.

¹⁷ Dequide chi belhopicana chalupaha lo barcoha nna bexxicattebacana ca tuu sabiꞌaba barcoha qui bittu iseloxxi nua. Nianna belhidattebacana ca lari daa iqui nua cumu rasquinna qui lä inipa nua ca belhucu yuxi te láni Sirte re lheꞌe indattooha, atti begüeelhattebacana uꞌuya beha barcoha.

¹⁸ Cumu de adíla idí raca iyya beha nna nuarca betteyú sá nna udulottebacana bedelhacana ca yua sia lo barcoha lheꞌe indattooha.

¹⁹ Atti beyonna ubisaha nna bodidaxxuttebacana ca lorsina barcoha bedeguꞌunacana.

²⁰ Ixe ubisa chi uca bittu ruleꞌe lo tatubisa-na, niguaba ca beli-na lhe. Cumu de adílaba de idí chi bisía iyya beha nna larcala riꞌitu nna tsaba chi ruxxen letu dequi gattibatu.

²¹ Ttiaca cumu ixe bisa chi uca bittu yetta chi utotu, laniala nna udulí Pablo udúbi salhe gue iyába ca nu sia lo barcoha, nianna rábi cana: —Nala gualyú, xa tata seꞌe-na, bedo yuba nagale quia bittu biríari lo yu te láni Creta. Ttirca bienbinle nna lägabi dia latti ca yuha noja barco-ni, bittuguaba elha disa ruyúri lhe.

²² Ttiaca nnanna nna rpeale: ¡Bittu gasinle! ¡Tsitsi gualebequi lele! ¡Läga gattile! Suntteba barco-ni iseꞌe lona.

²³ Cumu bisíala ucaxxe ttu ingeli gue Tata Do Iyyabaaha, Benni bananie neti lhe rixuunie neti lhe

²⁴ nianna re neti: “Bittu gasinlu, Pablo, cumu labíaba satsá dulu lo César nu rinnabia do lheꞌe yiesi Roma. Larcala de lurba nna iyába ca nu daa lenlu lheꞌe barco-na gualábacana bittu gatticana.”

²⁵ Larcala, xa benni seꞌe-ni, tsitsi gualebequi lele cumu neti nna ruxxenba lasia gue nu rá Tata Do Iyyabaaha, unba Benna nu chi rá ingeli unne lanie netiha.

²⁶ Ttiaca barco-ni nna labíaba satságana roꞌo ttu yu re lagüi indattoo-ni.

²⁷ La ulha atti guadona stobisa chi naꞌaya iyya beha barcoha nna níaba diatu lo indattoo te láni Adriático. Attiba tu retin tsiꞌinu (12) lo rela nna utedaani ca nu riben sina lo barcoha dequi chi deoba isíntu atta anca yu.

²⁸ Laniala nna berixxi biacana attixarua lhiꞌu re indattooha, a rerua yuꞌu xxupa (36) metroba re indaha nía. A saroꞌogarba udátu leni barcoha nna atti bodorixxibiattebacana attu libe. Lania nna a sunruba gasierua (27) metro re indaha nía.

²⁹ De rasbaquinna qui lä inipa barcoha iqui ca iyya sia lheꞌe indattooha nna nuarca ulhidattebacana ttapa ca iyya idiꞌi daca xaniꞌa nua qui ucuedacana nua. Laca rinnabacana leni Tata Do Iyyabaaha qui yuba tsani.

³⁰ Ttiaca ca nu riben sina lo barcoha nna chi runcana chadi sigácana lo nua, larcala chi ulhídacana chalupaha. Lacana nna ocadiba runcana dequi ugalhacana ca iyya ca nu runcana ribeda barcoha daca lola nua.

³¹ Ttiaca Pablo nna utixxiꞌattebinbi nu banani ca soldadoha leni iyába ca soldadoha rábi cana: —Gansi ca unná bittuba eyaꞌancana lo barco-ni nna lebiꞌi nna läga lhále.

³² Laniala nna uchú ca soldadoha ca tuu nalha chalupaha qui ubinni nua lheꞌe indattooha.

³³ Atti chi daa tsaniha nna rátteba Pablo iyába ca nu daa lheꞌe barcoha chinca gocana yetta. Nianna rábi cana: —Chi uca stobisa bittu chi utole yetta cumu de rulaba lele gue bixa sateri.

³⁴ Nnanna nna rinnaba lole, gualgo yetta gansi gua rdacale lhále. Cumu neti yua nna läga gattiri, ni ttu itsiquile-na lägabi dhaca.

³⁵ Dequide la unne Pablo nna bedaxxuttebabi ttu ttaxtila atti begüeettebabi xquixaru leni Tata Do Iyyabaaha aníba lo iyába ca nu sia lo barcoha. Nianna ulhaꞌattebabi ttaxtilaha utobi.

³⁶ Laniala nna bebequi tsitsi lecani atti utotteba iyábacana ttaxtila.

³⁷ Delo iyátu nna chupa gayua yuꞌu gayuna yuꞌu xxupa (276) benni nua sia lo barcoha.

³⁸ Dequide chi uluxa utocana bedaa belbaquinna bedelhattebacana ca cutensi xuxtilaha lheꞌe indattooha qui goatsi diꞌi gue barcoha.

³⁹ Atti chi guaniha nna läga beaca bien ca nu riben sina lo barcoha gaxa nua seꞌetu, sunruba roꞌo ttu belhucu yuxi gue ttu lo latsi riláquinna. Laniala nna boquinna iquicani uncana duelha usigacana barcoha nía.

⁴⁰ Lacana nna uchúttebacana ca tuu do iqui ca iyya ca nu rucuedacana nua qui binna ca nua lheꞌe indattooha, atti udhasittebacana ca yaga ca nu rodequicana barcoha. Laniala nna ulhidhacana ca lari daa iqui nua qui tsuꞌu be lheꞌecani. Unnuha nna udulottebana ubigana roꞌo yu te lagüi indattooha.

⁴¹ Ttiaca merba lheꞌe ttu belhucu yuxi xua lheꞌe indaha bisín nua. Tsaba uxudi xin nua lheꞌe yuxiha. Laca daca cuꞌe nua nna diana riyuyana cumu de rettetsuꞌuba inda nu ridulí lo indattooha idí cuꞌe-ni.

⁴² Ca soldadoha nna uxacattebacana utticana ca nu te lisiyya checanaha qui bittu uxunnicana dequide chi beríacana lheꞌe indaha.

⁴³ Ttiaca nu banani ca soldadoha nna de odilána Pablo nna nuarca bittu begüeelhana utticana ca nua. Benlana mandadu rán ca nua: ―Ca benni gua racaba guecani utácana lo indaha nna lo ca unnuha chadhicana xxuacana lo indaha qui eríacana esíncana atta chi anca yu.

⁴⁴ Atta bittuba raca guecani utácana lo indaha nna leni ca yaga o breta salhaꞌa gue barcohaba exúacana loni qui aca eríacana lo indattooha. Anía liba nna ulátu, iyábatu lhatsirba beríatu besintu atta chi te yu.