Hechos 25 - Zapoteco de Aloápam

Pablo rinnababi lo Festo tsiabi lo César nu rinnabia lo yu gue Roma

¹ Dequide chi beyonna ubisa bisína Festo lheꞌe yiesi Cesarea nu re lo yu gue Judea qui edí ladini, laniala nna udána diana lheꞌe yiesi Jerusalén.

² Ca bixxudi anca nu loha lencana ca nu lo gue ca benni Israel nna güiattebacana guattixxiꞌaquinna Festo iyába nu runcana xiyya gue Pablo.

³ Nianna rácana Festo: —O chiba uná. Bedhelha Pablo-na lheꞌe yiesi Jerusalén attu libe. Aníaba rácana cumu chi rulaba lecani dhu nocana biꞌiniha qui uttican bi gansi chi deyuꞌubi neda deyyabi.

⁴ Ttiaca Festo nna becabittebana guecani rán cana: —Cesarea liba te Pablo lisiyya, níaguaba chi rulaba lasia eyyaꞌaya tu uxxe güisa.

⁵ Ca nu anca nu lo guele-na, gua dicaba dhacana len neti tsia lania cana Cesarea, nía liba nna udelha iyyacana Pablo, gansi unná chi benna ttu nu lä anca tsee.

⁶ Festo nna bisáruna attu xxunu o attu tsii ubisa lheꞌe yiesi Jerusalén. Lenla nna deyyana lheꞌe yiesi Cesarea. Betteyú dila nna bedotseettebana lo xxila atta ridona runna elha uxtisi lheꞌe yoꞌo lagüiha. Nianna udhelhattebana ca nu güia guaxxícana Pablo qui utsá dubi loni.

⁷ Atti chi besin lencana Pablo atta do Festo nna ca nu Israel daa lheꞌe yiesi Jerusalén seꞌe nía nna ubigattebacana bedelha iyyacana biꞌiniha gue nu rácana dequi chi benbi xxeniba anca nu runcana xiyya guebi, ttiaca lägabi ria lí nu rácanaha.

⁸ Pablo nna unnettebabi rábi cana: —Neti nna lägabi chi bexxía leni ca ley guetu-na, niguaba leni yotuha lhe niguaba leni César nu rinnabia lo yu gue Roma lhe.

⁹ Ttiaca cumu Festo nna rdacana eyaꞌantseena leni ca benni Israel, nuarca unnaba tisana Pablo rána biꞌiniha: —¿Si guadúlu tsialu Jerusalén qui nía liba unia elha uxtisi guelu?

¹⁰ Pablo nna becabittebabi rábi na: —Inqui niba chi dua lo ttu ca nu rinnabia gue César atta dica aca elha uxtisi quia nna cumu anca benni Roma. Cuinalu nna gua yuxeabalu neti nna lägabi chi benia ni ttu nu bittu anca tsee len ca benni Israel.

¹¹ Gansi neti chi bexxía o benia ttu nu ralha gattia nna lägabi dhu disa neti gattia. Ttiaca gansi bittuba lí nu run ca unná xiyya quia nna läganu te innabiana qui etea las ná ca unná. Nnanna nna innába lo cuinalu: “Bette neti atta do César, unnua liba unna elha uxtisi quia.”

¹² Festo nna unnaba tisattebana ca nu teru elha rieni gueni riseꞌe cuꞌeniha bixa anca nu unna. Lenla nna rána Pablo: —Luba chi unnabalu tsialu satsá dulu lo César. Larcala nna tsiabalu atta do César ganna.

Pablo betsá dubi lo nu rinnabia te láni Agripa

¹³ Guadobana ttu chupa ubisa nna nu rinnabia lána Agripa lenna Berenice nna güiattebacana lheꞌe yiesi Cesarea guagüecana Festo ttu padiuxi.

¹⁴ Cumu biságala Agripa lenna Berenice nía nuarca utixxiꞌattebani Festo nua gue Pablo, rán na: —Asíquirla ni te ttu unbiyuu lisiyya nu bodhaꞌana Félix atti bedhan ladiniha.

¹⁵ Atti güiaya lheꞌe yiesi Jerusalén nna ca bixxudi anca nu lona lencana ca nu teru elha rieni gueni gue ca benni Israel nna unnabattebacana len neti innabiaya bixa anca nu sate Pablo-na gue nu rácana dequi chi benna.

¹⁶ Ttiaca neti nna becabitteba guecani rpea cana: “Ca uxtisi gue Roma lägabi labi ca unná innabiacana gatti ttu benni gansi bittuba chi betsá du nua lo xueda lenna ca nu rudelha iyyacan na qui ecabina gansi gualí benna nu runcana xiyya gueniha.”

¹⁷ Larcala atti bita ca nu Israel-na ni nna neti nna tsa lägabi uleda. Betteyú dila nna bedotteba lo xxila quia lheꞌe yoꞌo lagüi-ni, nianna udhelhatteba ca nu güia gualeacana Pablo.

¹⁸ Ttiaca ca nu rudelha iyyacana unná bisía ni nna tsa lägabi rudelhacana cuꞌe ni niba ttu nu lä anca tsee chi belaba lasia dequi chi benna.

¹⁹ Nu rárbacana nna dequi Pablo-na riguꞌu niꞌani nu ria lecani, requina rixxiꞌana gue ttu unbiyuu lána Jesús chi utti, ttiaca lana nna requina rána dequi gualíba anca banba nua.

²⁰ Neti nna tsaba läga reseltia gaxasná un lania na. Laniala nna unnaba tisa na rpea na: Gansi gua raca leni tsiana lheꞌe yiesi Jerusalén qui nía liba aca elha uxtisi gueni.

²¹ Ttiaca lana nna unnabattebana tsiana satsá duna lo César nu rinnabia xeni do lheꞌe yiesi Roma. Nioca nuarcala benia mandadu bodogaꞌa dacabacan na lheꞌe lisiyya-na, axta liba gattitia nna lania liba nna ebeaya na qui idhelha na tsiana atta do César.

²² Laniala nna rá Agripa: —Neti lhe racaguaba lasia udo naga gue unbiyuu-na. Festo nna becabittebana rána: —Uxxedilaha iyieninlu gueni ganna.

²³ Betteyú dila nna Agripa lenna Berenice nna attulade beocuru xo tsee guecani, tsitsiba xeni ra lecani diacana lheꞌe yoꞌo lagüiha lencana ca nu banquinna ca soldadoha lhe ca nu anca nu lo gue yiesiha lhe. Festo nna udhelhattebana nu güia guaxxína Pablo.

²⁴ Nianna unnettebana rána: —Xa tata Agripa benni anca nu rinnabia, iyábale ca benni seꞌe lheꞌe yoꞌo lagüi-ni nasá lhe ni du unbiyuu-ni lole. Iyába ca nu Israel-na chi bitacana betteyucana neti rinnabacana gatti unná. Aníaguaba rácana atti güiaya lheꞌe yiesi Jerusalén, unnuhaguaba redenácana Cesarea-ni lhe. Tsaba bittu redí lecani ribesiꞌacana rinnabacana gatti unná.

²⁵ Ttiaca neti nna lägabi chi guattiꞌaya ttu bixa chi beni unná qui ralhana gattina. Lana nna chiguaba unnabana tsiana satsá duna lo César benni anca nu rinnabia xeni gue Roma. Neti nna chiba boquinni iquia idhelha na nía.

²⁶ Ttiaca cumu de bittu chi biría lítia gaxasnonna anca gueonna qui anáchu udoa lo sitsi idhelha leni benni rinnabia xeni quia, nuarcala guaxxía na bedúa na lole, lo cuinalu lhe xa tata Agripa, qui anáchu nna dequide itsatsa niꞌale gueni nna chi yua bixa udoa lo sitsi.

²⁷ Cumu läga saxxína idhelha ttu nu te lisiyya las ná attu nu subi nianna bittu quixxiꞌaya bixa lo niꞌa gue rudelha iyyacan na.