Hechos 24 - Zapoteco de Aloápam

Pablo runbi exúbi lo nu rinnabia lá Félix

¹ Dequide guadona gayu ubisa nna lania liba bisína Ananías nu anca bixxudi xeni rinnabia gue ca benni Israel lheꞌe yiesi Cesarea lenna attu chupa ca benni teru elha rieni guecaniha. Cheeguabacana ttu nu yu gue ley te láni Tértulo qui inne nua cuenta guecani. Bisínbacana nna güiattebacana lo nu rinnabia Félix guattixxiꞌaquinna nua bixa beni Pablo.

² Atti chi gualeacana Pablo nna udulotteba Tértulo bedúna tisa lo Félix rána nua: —Xquixaba cuinalu, xa tata Félix, cumu de cuinalu nna chi seꞌe tseetu. Xquixaru cuinalu cumu de rinnabia tseelu nuarca ixeba nu tsee chi uca lheꞌe ca yiesi guetu-na.

³ Gaxaba seꞌetu lhe gaxaba requitu lhe chi redibaatu nu tsee run cuinalu xa tata Félix, larcala nna rutetu xquixaru len cuinalu.

⁴ Ttiaca qui bittu utsáxxatta cuinalu nna rinnaba lolu udochi nagalu guetu ttu satti.

⁵ Riꞌitu nna chi guattiꞌatu unbiyuu du-ni rutsatsana ca benni, lana nna requina rilhaꞌana lheꞌe loesi ca nu Israel seꞌe itúba yies lo yu-ni. Laguabana rinneruna lo ttu xxia ca nu ria lecani ttu nu udo lheꞌe yiesi Nazaret.

⁶ Anáguaba runguabana qui itsiga yotu anca leꞌa guetuha lhe. Denua nna bentu untu elha uxtisi gueni attiba rá lo ca ley guetuha.

⁷ [Ttiaca bisíatteba Lisias nu anca nu lo gue ca soldado-na lenna ca soldado gueniha bettetúacana unná lo nátu.

⁸ Lana nna udhelhana ca nu rudelha iyyacana Pablo-na qui utsá du cana lo lu.] Cuinalu nna atti unlu elha uxtisi gueni, lania nna ttedeenlu iyába nu rátu runi unná anca gualí.

⁹ Adí ca nu Israel seꞌe nía nna unnettebacana rácana dequi gualíba nu rá Tértulo.

¹⁰ Laniala nna bettá ná nu rinnabiaha beleꞌenna Pablo qui innebi. Pablo nna unnettebabi rábi: —Neti nna yua chi anca cuinalu xueda gue yies-ni delo ixe ida, denuala nna itú iqui itú lasia innea ecabia gue ca nu rudelha iyyacana neti lo cuinalu.

¹¹ Cuinalu nna guacaguaba itsatsa niꞌalu qui una tseelu, neti nna chi ucaba tu tsiꞌinu (12) ubisa besina lheꞌe yiesi Jerusalén qui sadú xibia cuequi xenia Tata Do Iyyabaaha.

¹² Ca benni Israel-ni nna lägabi chi bettettiꞌacana neti ritilha tisa lania nuxa benni, o rutsatsa benni roꞌo yotuha lhe niguaba lheꞌe ca yoꞌo atta rudhetitu ca tisa gue Tata Do Iyyabaaha lhe niguaba ca lo neda seꞌe lheꞌe yiesiha lhe.

¹³ Larcala ca benni seꞌe ni nna lägaga dhacana cuequilicana nu runcana xiyya quia.

¹⁴ Nu dhírguaba roꞌa innía nna gualíba diaya lo neda gue Jesús runia sina gue Tata Do Iyyabaaha, Benni güia le ca benniola guetuha, nu rá ca nu rudelha iyyacana neti dequi ancana attu neda subi. Neti nna guaríaba lasia iyába nu rá lo ca ley bodhaꞌana Tata Do Iyyabaaha leni Moisés, nu rá lo ca sitsi bodhaꞌana ca benni uca profetaha lhe.

¹⁵ Xenguaba lasia gue nu rá Tata Do Iyyabaaha attiguaba xen le ca benni seꞌe-ni, delába eyacani ca benni chi uttina, nu bedú taba leni lhe nu lä bedú taba leni lhe.

¹⁶ Denua nna runia duelha runia nu anca tsee lo Tata Do Iyyabaaha lhe lo ca benni lhe.

¹⁷ ’Neti nna dequide chi uca ixe ida güequia yiesi dittu nna beguꞌutteba neda deyya besina lheꞌe yiesi quia Jerusalén qui saruꞌuna tu latti belhi leni ca benni quia ca nu bittu te guecani, salhuꞌa úna gue Tata Do Iyyabaaha lhe.

¹⁸ Unnuhaba runia dua roꞌo yotuha dequide chi utí cuerpu quia qui beaca nu nari lo Tata Do Iyyabaaha attiba gaꞌana lo ca ley guetu-na, atti biláni ttu chupa ca nu Israel daa daca lo yu te láni Asia-na neti, tsa läganu ixe benni seꞌe len neti nía, bittuguaba runia resi lhe.

¹⁹ Ca nua dica tseꞌecana nii qui innácana bixa do lecani neti.

²⁰ Gansi bittuba nna ca nu seꞌe niba inná sangacana, ¿bi nu lä anca tsee guattiꞌacana chi benia atti betsá dua lo ca nu runi elha uxtisi gue ca benni Israel-na?

²¹ Sunruba nu benia nna atti dua locaniha nna unnea idisa rpea cana: “Lebiꞌi nna runle elha uxtisi quia nnanna cumu de ria lasia eyacabani ca benni chi uttina.”

²² Atti bienini Félix nu rá Pablo, uchulottebana elha uxtisiha, cumu chiba yuxeabana gaxasná anca gue neda gue Jesús. Nianna ráttebana ca nu seꞌe nía: —Gansi chi liba bisía Lisias nu lo gue ca soldadoha, lania liba una tseea gaxasná anca guele.

²³ Laniala nna beni Félix mandadu nu banani ca soldadoha eche dacabana Pablo lheꞌe yoꞌo atta rapacana biꞌiniha. Ugüelhana biꞌiniha tsequi labi lhe bittu usunana tsia ca benni ancabien biꞌiniha nía sanalhicabi biꞌiniha lhe sadhaꞌancabi nu reasinbi lhe.

²⁴ Dequide ute ttu chupa ubisa nna bedesintteba Félix lenna nuila gueni lá Drusila. Nuilaha nna ancana benni Israel. Félix nna udhelhattebana nu güia guaxxína Pablo qui udá nagani quixxiꞌa biꞌiniha gue gaxasná ria lebi Jesucristuha.

²⁵ Ttiaca atti utixxiꞌani Pablo-na gue raca duelha un benni nu anca tsee lo Tata Do Iyyabaaha, gue aca gueri innabiari elha rieni gueri lhe gue gansi chi bisía sá atti utsá duri lo Tata do Iyyabaaha qui unie elha uxtisi gueri lhe. Félix nna usittebinna. Nianna ráttebana Pablo: —¡Chinca, beyya! Güedeaxba lu nucaxa gansi chi nattitia.

²⁶ Cumu rulabaguaba le Félix raquinna nicaga guteba Pablo ttu latti belhi len lana qui ebeana biꞌiniha lisiyya, nuarcala ixe libe uxna biꞌiniha unne lenna bi.

²⁷ Dequide uca chupa ida nna Félix nna bedhanna ucana nu rinnabia. Lo ladini nna betaꞌa ttu nu lána Porcio Festo. Ttiaca cumu Félix nna rdacana eyaꞌan tseena leni ca nu Israel, larcala nna bodhaꞌanbana Pablo lheꞌe lisiyya.