Hechos 23 - Zapoteco de Aloápam

¹ Pablo nna begüiattebabi ttu lhixxaba lo ca nu runi elha uxtisiha, atti ráttebabi cana: —Xa betsito, neti nna itú tturba doa yies lo yu-ni, lägabi racatia dequi chi benia ttu nu lä dica ixuu lo Tata Do Iyyabaaha.

² Ananías nu anca bixxudi xeni rinnabiaha nna benttebana mandadu ca nu seꞌe gaxxa atta du Pablo ugüecana roꞌo biꞌiniha.

³ Ttiaca Pablo nna becabittebabi gueni rábi na: —¡Tata Do Iyyabaaha ugüe roꞌolu xa nu ni lo ni tisaba runi dequi ancalu nu runi nu anca tsee! Inqui doxalu-na qui unlu elha uxtisi quia attiba rába lo ca ley-na, lu nna riguꞌula niꞌalu ca ley-na rinnabialu ugüecana roꞌa.

⁴ Ca nu seꞌe nía nna unnettebacana rácana Pablo: —¿Si aná dica innelu ulisalu benni anca bixxudi xeni rinnabia gue Tata Do Iyyabaaha?

⁵ Pablo nna ráttebabi cana: —Xa betsito, läga yu neti ganna biꞌin-na anca bixxudi xeni rinnabia, cumu lo ca sitsi atta dia ca tisa gue Tata Do Iyyabaaha nna rá: “Bittu quelu iqui nu rinnabia gue lo yies guelha.”

⁶ Laniala nna utedeenbi, salhe ca nu runi elha uxtisiha nna ancacana ca nu te lácani saduceo a salhe ca nua nna ancacana ca nu te lácani fariseo. Labi nna unnettebabi idisa rábi cana: —Xa betsito, neti anca ttu benni fariseo, datíaya ca benni fariseo lhe ttiaca lebiꞌi nna runle elha uxtisi quia cumu de xen lasia reacani ca benni chi uttina.

⁷ Suntteba uca uluxa unne Pablo rábi anía nna udulotteba ca fariseo lencana ca saduceo bitilha tisa len loescani, atti ulhaꞌatteba lheꞌe loescani

⁸ cumu ca saduceo nna rácana dequi läga gualí reacani ca benni chi uttina, bittuguaba gualí seꞌe ingeli gue Tata Do Iyyabaaha lhe bittuguaba gualí seꞌe espíritu lhe. Ttiaca ca fariseo nna gue iyába unní ria lecani.

⁹ Ca nu seꞌe nía nna biyiyyattebacana. Ttu chupa ca nu ruleꞌe nu rá lo ca ley bodhaꞌana Moisés ancacana fariseo seꞌe nía nna udulíttebacana unnedícana rácana: —Unbiyuu du-ni nna lägabi ratiꞌatu ttu bixa nu lä anca tsee chi ben-na. Gaxa ttu espíritu o ttu ingeliba unne lenie unná. Gansi anía anca, riꞌi nna läga dica eseꞌe disari lo Tata Do Iyyabaaha.

¹⁰ Ttiaca ca benni seꞌe nía nna adílaba biyiyyacana. Larcala nna nu lo gue ca soldadoha nna usittebinna qui lä uduyacana Pablo de ugüebacan bi. Laniala nna uxina ttu chupa ca soldadoha qui ebeacana Pablo lo ná ca nu seꞌe nía eche dacabacan bi lheꞌe atta ruꞌu ca soldadoha.

¹¹ Bequi ulha nna beleꞌetteba lo Benni bananie ri-na leni Pablo. Nianna re biꞌiniha: —Tsitsi udú, Pablo, cumu attiba chi unnelu utixxiꞌalu quia Jerusalén-ni, anáguaba innelu quixxiꞌalu quia lheꞌe yiesi Roma.

Ca nu Israel relecani utticana Pablo

¹² Betteyú sá nna uyuꞌutteba ttu chupa ca nu Israel unnecana gue gaxasná uncana qui utticana Pablo. Lacana nna bocaꞌan tsitsicana tisa masquiba cuꞌuquixa guecani tsa bittu gocana etta, niguaba lä iꞌiyacana inda lhe axta liba dequide gansi chi betticana Pablo.

¹³ Guatela chua (40) ca unbiyuu begüee tisa uncana anía.

¹⁴ Laniala nna güiacana leni ca bixxudi anca nu loha, leni ca benni teru elha rieni guecaniha lhe. Nianna rácana ca nua: —Riꞌitu nna chi begüeetu tisa aní lo Tata Do Iyyabaaha tsa bittu gotu axta liba dequide chi bettitu Pablo-na.

¹⁵ Nnanna nna lebiꞌi lenle adí ca benni runi elha uxtisi-na, gualgási nu anca nu lo gue ca soldado-na saxxína Pablo uxxedila udún na lole. Ocadiba gualgás na dequi lebiꞌi nna rdacale cuequili tseele bixa beni unná. Riꞌitu nna chi seꞌe tseetu gatsi lotu roꞌo neda-na qui gansi chi utena yuꞌuna neda dana atta seꞌele-ni nna uttittebatu na.

¹⁶ Ttiaca xiꞌinbiyuu dana Pablo nna binabana nu rá ca nua. Laniala nna güiana atta do Pablo lheꞌe atta ruꞌu ca soldadoha guattixxiꞌenna biꞌiniha nu rá ca nua.

¹⁷ Pablo nna uxttebabi ttu ca nu banani ca soldadoha rábi na: —Uche uncuiti du-ni lo nu anca nu lo guele-na qui quixxiꞌenna na ttu tisa chi binana.

¹⁸ Unnua nna uchettebana uncuitiha guadúna lo nu anca nu lo guecaniha. Nianna ráttebana nua: —Pablo nu te lisiyya-na uxna neti. Nianna unnabana len neti ettedhaꞌana uncuiti du-ni len cuinalu qui quixxiꞌenna lu ttu tisa.

¹⁹ Laniala nna ulhí nu lo gue ca soldadoha ná uncuitiha dia lenna nua attu atta subi. Nía liba nna unnaba tisana nua rán na: —¿Bi raca lelu gálu neti?

²⁰ Uncuitiha nna ráttebana: —Ca nu Israel-na chi unne len loescani qui innábacana leni cuinalu tsia lenlu Pablo-na uxxea sadúlu bi lo ca nu runi elha uxtisi-na. Lacana nna ocadiba innácana dequi cuequili chaticana bixa benbi.

²¹ Cuinalu nna bittu tsia lelu gue ca unná cumu guatela chua (40) ca unbiyuu tseꞌe ucatsi locani roꞌo nedaha ribedacana Pablo, lacana nna chi bocaꞌan tsitsicana tisa masquiba cuꞌuquixa guecani rácana dequi tsa bittu gocana etta, niguaba lä iꞌiyacana inda lhe axta liba dequide chi betticana Pablo. Nnanna nna chi beseꞌetseecana, a suntteba ribedacana bixa inná cuinalu.

²² Nu lo gue ca soldadoha nna ráttebana uncuitiha: —Tsa nuttu nu quixxiꞌenlu bixa chi rálu neti. Nianna bedhelhattebana nua.

Ca soldado checana Pablo lheꞌe yiesi Cesarea atta do nu rinnabia lá Félix

²³ Laniala nna uxi nu lo gue ca soldadoha chupa ca nu banani ca soldadoha rán cana oseꞌetseecana chupa gayua (200) ca soldado dha niꞌacani, a gayuna yuꞌu tsii (70) ca nu sia coayu nna a chupa gayua (200) ca nu deni iyya ttuni do nu tutsi loni nna qui iríacana tsiacana lheꞌe yiesi Cesarea retin jaa rela.

²⁴ Benguana mandadu udú tseecana ttu coayu qui dho Pablo cuꞌeni lhe. Nianna ráguabana ca soldado gueniha lhatsiru tsia lencana biꞌiniha qui isín tsee lencan bi lo nu rinnabia Félix.

²⁵ La len ca unnuhatteba nna udhelhana ttu sitsi nu rinne loni rána:

²⁶ “Neti, Claudio Lisias, ridhelha len cuinalu ttu padiuxi, xa tata Félix, benni rinnabia do lheꞌe yiesi Cesarea.

²⁷ Ca benni Israel-na bedaxxucana unbiyuu udhelha len cuinalha. Lacana nna uxacattebacana utticana unná, ttiaca neti nna atti bina dequi anca unná benni Roma nna güiatteba lenia ca soldado quia-na guadiláya na.

²⁸ Neti nna cumu uxaca una naga bixa xiyya runcana gueni, nuarca uchetteba na guadúa na lo ca benni runi elha uxtisi guecaniha qui una bixa lo niꞌa gue bedaxxucan na.

²⁹ Atti bisína lania na lo ca nua nna bientia runcana xiyya gueni dequi riguꞌu niꞌani ca ley guecaniha. Ttiaca tsa lägabi te bixa lo niꞌa gue ralha unná gattina, niguaba gattana lisiyya lhe.

³⁰ Neti nna chi bina dequi rdaca ca nu Israel-na uttican na. Lo niꞌa gue unnuha nna nuarca udhelha na len cuinalu. Chiguaba unne lania ca nu rudelha iyyacana unná ettetsa ducana lo cuinalu qui aní lolu innácana bixa beni unná. Güedesaabari ttu bixa sá.”

³¹ Ca soldadoha nna benbacana attiba chi rá nu lo guecaniha cana uncana, laniala nna gualeacana Pablo uchecan bi lo relaha dia lencan bi, axtaba lheꞌe yiesi nu te láni Antípatris bisín lencan bi.

³² Betteyú dila nna bequitteba ca soldado dia niꞌacaniha besincana lheꞌe yoꞌo atta biríacana. A suna ca nu sia cuꞌe coayuhaba dia lencana Pablo.

³³ Atti bisíncana lheꞌe yiesi Cesarea nna begüeettebacana nu rinnabia lá Félix sitsi nojacanaha, bedúttebacana Pablo loni lhe.

³⁴ Uluxaba belaba nua lo sitsiha nna unnaba tisattebana Pablo gaxa beaca lasbi. Dequide chi utixxiꞌa Pablo dequi ancabi benni baba lo yiesi Cilicia nna rátteba nu rinnabiaha biꞌiniha:

³⁵ —Gudoga naga guelu gansi chi bisía ca nu rudelha iyyacan lu. Laniala nna benna mandadu ugaꞌacana Pablo lheꞌe yoꞌo lagüi atta udo Herodes, useꞌecana nu gapan bi lhe.