Hechos 22 - Zapoteco de Aloápam

¹ —Xa tata xeni lhe betsito lhe nnanna nna gualudo nagale gue nu innía ecabia gue cuinale.

² Atti bienini ca benni unne Pablo tisa hebraica nna laniala nna beaca sichatticana. Labi nna unnettebabi rábi:

³ —Neti nna anca ttu benni Israel. Ulia lheꞌe yiesi te láni Tarso nu baba lo yu te láni Cilicia, ttiaca lheꞌe yiesi Jerusalén-niba bixenia. Larcala nna niba güiaya scuela atta ruleꞌe Gamaliel-na. Ucana nu beleꞌenna neti atti ttiba rába lo ca ley bocaꞌana Tata Do Iyyabaaha leni ca benniola gueriha. Neti nna benia duelha unia nu dica ixuu lo Tata Do Iyyabaaha itú iqui itú lasia attiba runbale nnanna.

⁴ Ca ttu sáha nna neti nna beríalaya ca benni bedaxxu neda gue Jesús qui uttia cabi. Nuila lhe unbiyuu lhe ca biꞌiniha bedaxxua bedheaya lisiyya.

⁵ Bixxudi xeni rinnabia-na lenna iyába ca benni chi deaparu elha rieni gueri-na biyú locani gue nu benia. Laguabacana betecana sitsi denia diaya utea leni ca benni Israel seꞌe lheꞌe yiesi Damasco qui utecana lisensi quia udaxxua ca benni ria le Jesús uxica cabi echea cabi lheꞌe yiesi Jerusalén-ni qui gocabi ttu bedeꞌelu.

⁶ ’Ttiaca atti yuꞌa neda diaya nna chitteba deoba isína lheꞌe yiesi Damasco, attiba tu retin tsiꞌinu (12) resá, attirba lhaba ucaxxe ttu xieni daa iyyabaaha uyuꞌe sabiꞌaba.

⁷ Neti nna ubixxilotteba lo yu. Nianna atti bientia tsiꞌi ttu benni re neti: “Saulo, Saulo, ¿biaca neti denalhalu rudhaca siꞌilu?”

⁸ Neti nna unnaba tisatteba ria: “¿Núleonna tata?” Tsiꞌi Benniha nna becabittebe re: “Neti nua Jesús, gue Nazaret Benni denalhalu rudhaca siꞌilha.”

⁹ Ca nu dia lania nna usilhabaquinna biláquinna xieniha, ttiaca lägabi bienquinna tsiꞌi Benni rulise netiha.

¹⁰ Neti nna unnaba tisatteba Benniha: “¿Bi raca lelu unia, tata?” Benni Bananie ri-na ráttebe neti: “Beadha nna güia lheꞌe yiesi Damasco-na. Na quixxiꞌaquinna lu iyá nu chi gaꞌana unlu.”

¹¹ Ttiaca cumu xieniha nna tsaba becalhe loa, larcala lärga bilátia dhaya. Ca benni dia laniaba nalhicana náya qui bisína lheꞌe yiesi Damasco.

¹² ’Nía do ttu unbiyuu lábi Ananías. Ancabi ttu benni ribequi xenbi Tata Do Iyyabaaha, rudobi tisa gue ca ley bodhaꞌana Tata Do Iyyabaaha leni Moisés lhe. Iyába ca benni Israel seꞌe nía rinne tseecana gue biꞌiniha.

¹³ Ananías nna bitattebabi bettenalhibi neti. Bisíababi nna ráttebabi neti: “¡Saulo, betsito quia, chiba dica elenlu attu libe!” Laniatteba nna belatia, atti biláttebatia Ananías.

¹⁴ Labi nna ráttebabi neti: “Tata Do Iyyabaaha gue ca benniola gueriha chi becuee lu qui unalu nu raca lee unlu, qui ilenlu Jesús Benni runi nu anca tsee lo Ben-na lhe qui iyieninlu ca tisa rinne cuinaga Ben-na lhe.

¹⁵ Cumu lu acalu benni quixxiꞌa ca tisa gue Ben-na leni iyárecha ca benni gue nu chi bilenlu lhe gue nu chi bieninlu lhe.

¹⁶ Larcala nna bitturu cuedalu. Guadhatte qui gadilu inda, unnaba lo Benni Bananie ri-na dhie elha xen lasi gue ca tulha guelha.”

¹⁷ ’Dequila atti bequia besíaya lheꞌe yiesi Jerusalén-ni nna güiatteba lheꞌe yotu-na güenne len Tata Do Iyyabaaha,

¹⁸ atti lhaba beleꞌetia Benni bananie ri-na, re neti: “Begüe lelu biría lheꞌe yiesi Jerusalén-ni cumu ni nna läga udo naga ca unná ca tisa quia rinnelha.”

¹⁹ Neti nna rpettebe: “Xa Tata, ca unní gua yuxeabacana dequi neti nua riaya atta sia ca yoꞌo atta rudheti ca benni Israel ca tisa gue Tata Do Iyyabaaha ralheaya ca benni ria lecabi lu radheaya cabi lisiyya, rugoa cabi ttu bedeꞌelu lhe.

²⁰ Anáguaba atti betticana Esteban, benni utixxiꞌabi iyába nu uca atti güequilu yies lo yu-niha, neti nna níaguaba dua lania ria: O, betticana biꞌiniha, axtaba udúa utua tseea xo ca nu betticana biꞌiniha.”

²¹ Ttiaca Benni Bananie ri-na re neti: “Güia, cumu neti idhelha lu lheꞌe ca yiesi seꞌe idittu atta seꞌe ca benni bittu anca benni Israel.”

²² Ca nu seꞌe nía nna bedaa ttoníarba begüeelhacana unnebi, atti bededulottebacana bedebesiꞌacana rácana: —¡Gualutti unná lärgabi ralhunna dho banna!

²³ Ttiaca cumu tu seꞌebacana ribesiꞌacana, ribeacana ca xocaniha riguꞌunacana cana lhe rudelhacana yu lo be lhe

²⁴ laniala nna beni nu lo gue ca soldadoha mandadu ugaꞌacana Pablo lhiꞌu lheꞌe yoꞌo atta ruꞌucanaha qui quincana biꞌiniha, anía liba nna dhi roꞌobi bixa lo niꞌa gue do le ca nua bi.

²⁵ Ttiaca atti chi xicaquinna bi qui quincan bi, laniala nna unnaba tisabi ttu ca nu banani ttu xxia ca soldadoha rábi nua: —¿Si guagaꞌanaba lo ley-na utíale ugüele ttu benni gue Roma, nu bittu chi ulealile gansi gualí ancana nu te tulha gueni?

²⁶ Atti bienini nua nu rá Pablo nna deyyattebana guattixxiꞌenna nu lo guecaniha rána nua: —¿Bila anca nu un cuinalu nnanna? Unbiyuu-na nna nu Romaba unná.

²⁷ Laniala nna diatteba nu lo gue ca soldadoha atta du Pablo, atti unnaba tisattebana biꞌiniha rán bi: —¿Si gualí ancalu benni Roma? Pablo nna becabittebabi gueni rábi na: —Bila.

²⁸ Unnuha nna rátteban bi: —Neti nna xxeni belhi utixa qui chiba uca udáya uca benni Roma. Pablo nna becabittebabi gue nua rábi na: —Neti nna atti ulilia anca benni Roma.

²⁹ Unnuhaba bina ca nu chi seꞌe tsee nía qui ugüecana Pablo nna xeaba ubiattacana atta du biꞌiniha. Anáguaba nu lo gue ca soldadoha lhe usittebinna cumu de chi bexxicana biꞌiniha leni cadena.

Pablo betsá dubi lo ca nu runi elha uxtisi gue ca benni Israel

³⁰ Betteyú dila nna nu lo gue ca soldadoha nna raca leni una tseena bixa gue rusía le ca nu Israel Pablo. Nuarca udhasittebana cadena xica ná biꞌiniha. Nianna benttebana mandadu uxicana ca bixxudi anca nu loha leni iyába ca nu runi elha uxtisiha. Lana nna uleattebana Pablo, guadúna biꞌiniha lo ca nua.