Hechos 21 - Zapoteco de Aloápam

Pablo deyyabi Jerusalén

¹ Dequide chi bechú tisa loestu laniala nna bodaxxutu barco, ttu lixxaba diatu bisíntu lo yu re lagüi indattoo te láni Cos. Betteyú sá nna bisíntu lo yu re lagüi indattoo te láni Rodas, nía bededátu nna bisíntu lheꞌe yiesi re roꞌo indattoo te láni Pátara.

² Roꞌo yiesi Pátara nna betiꞌatu ttu barco deyyana daca lo yu gue Fenicia, lo nua nna beopitu deyyatu.

³ Atti deyuꞌutu neda deyyatu lo indattooha nna nía bilentu lo yu re lagüi indattoo te láni Chipre, rena daca ná rabesa gueri. Riꞌitu nna deyyabatu besintu daca lo yu gue Siria. Ttiaca cumu barco deyya lentuha nna bete nua bodhaꞌanna yua lheꞌe yiesi Tiro re roꞌo indattooha, larcala nna labíaba guaditu.

⁴ Nía guattiꞌatu ca benni ria le Jesús. Len ca biꞌinihaba bisátu ttu gasi bisa. Ca biꞌiniha nna chi utixxiꞌani Espíritu gue Tata Do Iyyabaaha cabi larcala rácabi Pablo bittu eyyabi lheꞌe yiesi Jerusalén.

⁵ Gua dobana gasi bisa useꞌetu nía nna laniala nna beríatu lheꞌe yiesiha. Níaba dedaa ca biꞌiniha lentu itupa lenbacabi ca nuila guecabiha lhe ca unto guecabiha lhe. Atti chi besintu roꞌo indattooha nna bedútteba xibi iyábatu, atti unnettebatu belisatu Tata Do Iyyabaaha.

⁶ Laniala nna bechú tisa loestu atti beopittebatu lo barcoha. Ca biꞌiniha nna bequittebacabi deyyacabi.

⁷ Riꞌitu nna beríabatu lheꞌe yiesi Tiro nna besinttebatu lheꞌe attu yiesi te láni Tolemaida re roꞌo indattoo. Nía liba uluxa neda guetu dedaatu lo indattoo. Laniala nna betetu rátu padiuxi ca benni chi ria le Jesús seꞌe nía. Níaba beꞌantu lencabi ttu sá.

⁸ Betteyú sá nna beríatteba lentu Pablo deyyatu lheꞌe yiesi Cesarea. Nía güiatu lisi Felipe, biꞌini requi rixxiꞌa ca tisa gue Jesús. Biꞌiniha nua ttu ca benni gasi beseꞌe qui uncabi yuda ca biꞌini bedheti ca tisa beleꞌe Jesús. Riꞌitu nna níaba beꞌantu lisbiha.

⁹ Felipe nna seꞌe ttapa xiꞌiniunnábi ancacabi nu rbani. Ca biꞌiniha nna rixxiꞌacabi ca tisa rute Tata Do Iyyabaaha lencabi.

¹⁰ Ixe ubisa chi uca seꞌetu nía, atti bisía ttu profeta lábi Agabo, dabi daca lo yu gue Judea.

¹¹ Biꞌiniha nna dabi güenalhi riꞌitu. Atti bisíabi atta seꞌetuha nna bedaxxuttebabi yieti ridhí lheꞌe Pablo, nianna bexxicatteba niꞌa nábi nua, atti rábi riꞌitu: —Espíritu gue Tata Do Iyyabaaha rixxiꞌe re: “Lheꞌe yiesi Jerusalén udaxxu ca benni Israel nu beaca gueni yieti-ni, atti uxxicacan na qui salhuꞌucan na las ná ca nu dittu.”

¹² Atti bienintu nu rá biꞌiniha nna riꞌitu lentu ca benni seꞌe lheꞌe yiesi Cesarea nna belisattebatu Pablo qui bittu eyyabi Jerusalén.

¹³ Ttiaca labi nna becabibi rábi: —Bittu unle dhu siꞌi lasia leni nu ribesle na. Neti nna gua duba uxxicacana neti lhe o utticana neti lhe lheꞌe yiesi Jerusalén lo niꞌa gue Jesús Benni bananie ri-na.

¹⁴ Riꞌitu nna biyúbatu bittuba rudo nagabi guetu nna laniala nna bitturu bentu duelha guebi, atti ráttebatu bi: —Nu innába Benni Bananie ri-na aca ganna.

¹⁵ Dequide nua nna beseꞌetseettebatu, atti deyyattebatu Jerusalén.

¹⁶ Laniala nna udá ttu chupa ca benni ria le Jesús seꞌe lheꞌe yiesi Cesarea len riꞌitu. Ca biꞌiniha bechecabi riꞌitu lisi benni lábi Mnasón. Biꞌiniha beaca lasbi Chipre. Labi nna ixeru ida chi anca ria lebi Jesús. Biꞌiniha nua betee ganna atta beꞌantu.

Pablo besinbi lheꞌe yiesi Jerusalén

¹⁷ Atti besintu lheꞌe yiesi Jerusalén, ca benni ria le Jesús seꞌe nía nna attulade reꞌo lecabi, chi seꞌetseecabi ribedacabi riꞌitu.

¹⁸ Betteyú sá nna güiattebatu leni Pablo lisi Jacobo. Níaba seꞌe iyába ca benni chi deaparu elha rieni anca nu lo gue ca benni ria le Jesús.

¹⁹ Dequide rá Pablo ca biꞌiniha padiuxi, lenla nna udulobi utixxiꞌenbi ca biꞌiniha iyába nu chi beni Tata Do Iyyabaaha leni ca benni dittu atti requibi rixxiꞌenbi cana ca tisa gue Jesús.

²⁰ Atti bienini ca biꞌiniha nu rá Pablo nna ráttebacabi: “¡Xxeni ra le Tata Do Iyyabaaha!” Nianna rácabi Pablo: —Biyúrga, xa betsito, gua yuxeabalu ixeru mil ca benni Israel chi ria lecani Jesús. Ca unná nna runcana duelha dhoru tisa gue ca ley bocaꞌana Tata Do Iyyabaaha leni Moisés.

²¹ Ca unná nna chi binacana dequi iyába ca nu Israel seꞌe lheꞌe ca yiesi gue ca benni dittu ruleꞌenlu cana dequi bitturu udocana tisa gue nu rá lo ca ley-na. Anáguaba rálu cana dequi bitturu cue senni ca unto anca unbiyuu-na lhe bitturguaba uncana ca nu labiri runri riꞌi ca benni Israel lhe.

²² ¿Bila unri nnanna? Guasiatte ca unná nii, cumu chi binacana dequi chi besíalu.

²³ Larcala tseeba anca gansi unlu nu innátu-ni: Ni ttapa ca unbiyuu seꞌe-ni ca nu chi begüee tisa lo Tata Do Iyyabaaha ulhuxacana nu chi rácana uncana.

²⁴ Uchecana güia lencana roꞌo yotu-na, gualsattí cuerpu guele qui eyacale nu nari lo Tata Do Iyyabaaha. Lu nna quixalu gue nu gaꞌana ute ca unná qui aca ugá iquicani. Aná beni qui ugüia iyá benni läga gualí nu chi binacana rácana runlu, cumu iláquinna lu nna gua rudobalu tisa gue ca ley bocaꞌana Tata Do Iyyabaaha leni Moisés.

²⁵ Ca benni dittu chi ria le Jesús, chiba udhelhatu sitsi lencabi atta rixxiꞌentu cabi nu chi boquinna iquitu uncabi: Lacabi nna suntteba bitturu gocabi elha go gue nu rutecana úna leni ca nu rácana anca diosi-na, bitturguaba gocabi reni lhe niguaba bela gue nimala utti bidí yienni lhe. Anáguaba bitturu isácabi nu bittu anca latselacabi lhe.

²⁶ Betteyú sá nna uchetteba Pablo ittapaba ca unbiyuuha roꞌo yotuha, atti utítteba cuerpu guecabi qui eyacacabi nu nari lo Tata Do Iyyabaaha. Lenla nna utaꞌabi lheꞌeliꞌa gue yotuha qui quixxiꞌabi bixa sá sadona gasi bisa quii cuerpu guecabi, cumu lania nna utee ttu ttucabi úna.

Ca nu Israel daa Asia betsatsacana ca benni qui ugüecana Pablo Jerusalén

²⁷ Ya merba sadona gasi bisa guecabi, attirba chi biláni ttu chupa ca nu Israel dacana daca lo yu gue Asia Pablo dubi lheꞌeliꞌa gue yotuha. Atti betsatsattebacana ca benni. Ca unnuha nna bedaxxuttebacana Pablo.

²⁸ Ribesiꞌanicana rácana: —¡Benni Israel, gualtáxxirga nii! Unní nua unbiyuu nu requi lheꞌe iyába ca yiesi-na riguꞌu tisana ca benni qui cuꞌu niꞌacani ca benni gueri lhe ca ley bocaꞌana Tata Do Iyyabaaha leni Moisés lhe yotu gueri-ni lhe. Güea chiguaba begaꞌana ca nu dittu lheꞌeliꞌa gue yotu-ni lhe. Ca unná nna bencana bitsiga yotu anca leꞌa gueri-ni.

²⁹ Anía rácana cumu chi biláquinna bi lheꞌe yiesiha, requi lenbi Trófimo biꞌini beaca lasbi Éfeso. Lacana nna racaquinna ga chiba uchebi biꞌiniha lheꞌeliꞌa gue yotuha.

³⁰ Larcala nna iyába ca nu seꞌe lheꞌe yiesiha bisatsattebacana diacana bitupacana atta du Pablo, atti bedaxxuttebacana biꞌiniha uꞌuyacana bi bebeacan bi atta do yotuha. Nianna bottottebacana ca puertaha.

³¹ Chitteba rutticana biꞌiniha atti bina nu lo gue ca soldado gue Roma dequi iyába ca benni seꞌe lheꞌe yiesiha risatsacana.

³² Laniala nna beaxtteba nua ca soldado gueniha leni adí ca nu banani ca nua, atti bigaatteba lenna ca nua diacana bisíncana atta seꞌe ca nu rugüecana Pablo. Bilálibani ca benni ca soldadoha leni nu lo gue ca nua nna lania liba beseꞌe sicana rugüecana Pablo.

³³ Atti bisína nu lo gue ca soldadoha atta du Pablo nna unnabiattebana bedaxxucana biꞌiniha bexxicacan bi leni chupa cadena. Laniala nna atti unnaba tisana nuxa anca Pablo lhe gue bixa ben biꞌiniha lhe.

³⁴ Ttiaca ca nu seꞌe nía nna güea güeaba rácana. Nuarca niba lä guadú tsee le nu lo gue ca soldadoha bixa nua rá ca nua cumu de riyaxxattacana. Laniala nna benna mandadu ca soldado gueniha echecana Pablo lheꞌe yoꞌo atta ruꞌucanaha.

³⁵ Atti bisín lencana biꞌiniha atta anca chiniepia nna bijatteba ca soldadoha Pablo cumu de runi ca nu denalhaha ugüecana biꞌiniha.

³⁶ Iyába ca nu denalhaha ribesiꞌacana rácana: —¡Gualutti unná!

Pablo runbi exúbi lo ca benni Israel

³⁷ Atti chi diacana ugaꞌacana Pablo lhiꞌu atta ruꞌu ca soldadoha nna laniala nna rábi nu lo gue ca nua: —¿Si guaca inne lania cuinalu sattito? Unnuha nna becabina rán bi: —¿Si gua rinnebalu tisa griego?

³⁸ ¿Anla läga lu nua ttu nu Egipto bedú disana lo ca nu rinnabia-na ttuha, nianna biríana leni ttapa mili ca unbiyuu beni soldado gueni, dia lenna ca nua daca lo yu bisi atta nuttu benni seꞌe?

³⁹ Pablo nna ráttebabi nua: —¡Dica! Benni Israelba neti. Yiesi atta beaca lasia nna te láni Tarso, ancana ttu yiesi ra xxeni leni baba lo yu te láni Cilicia. Larcala nna ochiba uná begüeelha neti innea ulisa ca benni seꞌe-ni.

⁴⁰ Nu baninna ca soldadoha nna: —O, ba rá nua. Begüeelhan bi unnebi. Labi nna udulíttebabi udúbi lo ca chicoha, atti bettátteba nábi beleꞌenbi ca benni seꞌe nía qui eyaca sicana. Atti chi beaca si ca nua nna belisattebabi cana leni tisa hebraica rábi cana: