Hechos 20 - Zapoteco de Aloápam

Pablo betebi lo yu te láni Macedonia leni Grecia attu libe

¹ Dequide chi ute elha utilhaha nna laniala uxi Pablo ca benni chi ria le Jesús qui bettipabi le ca biꞌiniha. Lenla nna bechú tisabi ca biꞌiniha, atti bedáttebabi deyyabi daca Macedonia.

² Dequide güequibi itúba ca nía tsitsiba unnebi bettipabi le ca benni seꞌe nía, laniala nna deyyabi deca lo yu gue Grecia.

³ Níaba beꞌanbi tsunna beo. Chitteba redú tseebi odaxxubi barco qui tsiabi deca Siria nna atti binabi dequi runi ca nu Israel udaxxucan bi uttican bi. Laniala nna bequibi, niꞌababi deyyabi betebi Macedonia.

⁴ Ca unbiyuu deyya lenbiha nna lácabi Sópater, dabi lheꞌe yiesi Berea, ancabi xiꞌini biꞌini lá Pirro; Aristarco lenbi biꞌini lábi Segundo nna dacabi lheꞌe yiesi Tesalónica, biꞌini lábi Gayo nna dabi lheꞌe yiesi Derbe. Níaguaba sela Timoteo lhe a chupa ca biꞌini daa daca lo yu gue Asia lhe ttu biꞌiniha nna lábi Tíquico, attu biꞌiniha nna lábi Trófimo.

⁵ Ca biꞌiniha nna beneruttebacabi deyyacabi lheꞌe yiesi Troas. Nía liba uledacabi riꞌitu.

⁶ Riꞌitu nna dequide liba atti chi utee laní atti ro ca benni Israel ttaxttila nu bittu levadura dia lennaha, lania liba beríatu lheꞌe yiesi Filipos leni barco. Lheꞌe gayu sába nna guaxentu cabi lheꞌe yiesi Troas atta beꞌantu gasi sá.

Pablo benbi beacani ttu uncuiti uttina lheꞌe yiesi Troas

⁷ La sá bedú niꞌa xumanu nna beseꞌettebatu ttu reba qui gotu rse gue Benni Bananie ri-na. Pablo nna udulottebabi unnebi belisabi ca benni chi ria le Jesús. Cumu etteyú dilaba nua chi edábi, nuarca bisábi unnebi leni ca benni seꞌe nía axta bisía riloela.

⁸ Iyábatu seꞌetu lheꞌe yoꞌo do güetsaa atta ralha ixeru gui.

⁹ Nía nutsa ttu unbiyuu cuiti lána Eutico dona roꞌo ventana gue yoꞌoha. Cumu iságala bisá Pablo unnebi nuarca bita bisiela lo uncuitiha. Ttiaca bedaxxu tsitsitteba bisielana nuarca tuttíru ubinnina lo yu. Yadhagala nua xxeni cumu nu eyonna coali nua. Larcala nu yattiba anca nua gualidhacan na.

¹⁰ Laniala nna guadi Pablo uxuabi iqui uncuitiha, atti utesbi lheꞌeni. Nianna rábi ca benni seꞌe nía: —¡Bittu gasinle! Guanca ban bunni.

¹¹ Dequide unnuha nna beopitteba Pablo attu libe lheꞌe yoꞌo do güetsaa qui ulhaꞌabi ttaxtilaha utocabi rse gue Benni Bananie ri-na. Labi nna bededú lo dacababi bedennebi, axta liba daa ridulí xieni. Lenla nna deyyabi.

¹² Adí ca biꞌiniha nna bechettebacabi uncuiti biyinnaha lisni, cumu anca banba nua. Larcala adí ca beꞌo le ca biꞌiniha.

Pablo deyuꞌubi neda besinbi lheꞌe yiesi Mileto

¹³ Riꞌitu nna beneruttebatu deyyatu bodaxxutu barco besintu roꞌo yiesi te láni Asón, cumu nía chi anca etiꞌatu Pablo qui odaxxu lentu bi barco. Lababi uca lebi edá niꞌabi esínbi axta nía.

¹⁴ Atti chi besá loestu lentu bi lheꞌe yiesi Asón nna nía bodaxxutteba lentu bi barco deyyatu daca lheꞌe yiesi re roꞌo indattoo te láni Mitilene.

¹⁵ Beriabatu nía nna betteyú sá nna utettebatu roꞌo yu te láni Quío. Bequi sá nna utettebatu roꞌo yu te láni Samos. Attu sába bisátu leni barcoha nna bisíntu lheꞌe yiesi Mileto.

¹⁶ Aníaba bentu cumu Pablo nna chiba boquinni iquibi ete xeababi Éfeso qui bittu isábi lo yu gue Asia, cumu runna duelha guebi esínxxibi lheꞌe yiesi Jerusalén, tircala aca nna chila rebi nía atti isía sá Pentecostés.

Pablo rechú tisabi leni ca nu lo gue ca benni ria le Jesús seꞌe Éfeso.

¹⁷ Atti chi bisíntu lheꞌe yiesi Mileto nna Pablo nna uxttebabi ca benni deaparu elha rieni anca nu lo gue ca benni ria le Jesús seꞌe lheꞌe yiesi Éfeso.

¹⁸ Atti chi bisía ca biꞌiniha nna rátteba Pablo cabi: —Lebiꞌi nna gua yuxeabale gaxasná benia atti chi bisíatteba lheꞌe ca yiesi seꞌe lo yu te láni Asia-ni.

¹⁹ Itú ttuba atti urea len lebiꞌi, benba sina gue Benni Bananie ri-na len siꞌile, yalhaguaba uresia guele lhe biyúguaba elha disa gue nu rele ca nu Israel-na udhacacana neti lhe.

²⁰ Ttiaca läga bedhea lasia quixxiꞌatia le ca tisa nu gua dica ixuucana len lebiꞌi, beleꞌebatia le aníba lo benni lhe coa lheꞌe lisbale lhe.

²¹ Ca benni Israel lhe ca benni dittu lhe benia duelha guecani rpea cana oduxiyyancana odaxxucana neda gue Tata Do Iyyabaaha, tsia lecani Jesucristu, Benni Bananie ri-na lhe.

²² Nnanna nna deyyaꞌaya lheꞌe yiesi Jerusalén, cumu duelhaba runi Espíritu gue Tata Do Iyyabaaha quia eyya nía. Ttiaca neti nna niba lä yua bixa satea nía.

²³ Sunruba nu yua nna Espíritu gue Tata Do Iyyabaaha rixxiꞌenie neti, lheꞌe ttu ttu ca yiesi atta tsiaya nna ugüecana neti lhe quixxacana neti lisiyya lhe.

²⁴ Ttiaca neti nna tsa lägabi racatia cadirba bi satea, nigua lä runia cua tseea elha nabani quia-ni qui bittu gattia lhe. Nu runla nna duelhaba runia ruttipa lasia qui eꞌeyua ulhuxa sina betee Jesús Benni Bananie ri-na len neti, delába quixxiꞌaya ca tisa tsee gue nu redá le Tata Do Iyyabaaha rute len riꞌi.

²⁵ ’Nnanna nna neti nna chi yua, ni ttule ca nu chi utixxiꞌatia le gue gaxasná rinnabia Tata Do Iyyabaaha lä iláruinle neti attu libe.

²⁶ Larcala nasá nna rixxiꞌatia le, läga tulha quia nua gansi nuxale tsia nitti,

²⁷ cumu neti nna tsa lägabi bedhea lasia lä utixxiꞌabatia le iyá nu chi gaꞌanani Tata Do Iyyabaaha unie len lebiꞌi.

²⁸ Larcala nnanna nna rulisa le, gualtseꞌe tsitsi, gualuyú ca benni ruleꞌenle nna atta chi bodú Espíritu gue Tata Do Iyyabaaha le acale nu lo gue ca biꞌin-na. Attiba ttu benni rapa carneꞌe tsitsi gualuyú ca benni chi anca gue Jesús, cumu leni reni belali Benniha lo ya crusiha nna benie aca ca biꞌin-na guee.

²⁹ Neti nna yuxeaba, dequi de gansi chi deyyaꞌaya nna lania isía ca benni du lecani attiba ca sagueo ledha-na uncana ulhuxacana ca benni ria le Jesús, tsaba bittu satúaquinna ca biꞌin-na.

³⁰ La lheꞌe ca benni sela len lebiꞌiba iría ca güen lhasi dhi yiecana ca biꞌin-na qui tsiacabi sanocabi cana.

³¹ Larcala tsitsi gualtseꞌe. Gualorexxa lele neti nna itú ribesba delo tsunna ida rela resába bittu bedú sia rutea elha rieni len ttu ttule.

³² ’Nnanna nna xa benni ria le Jesús, las ná Tata Do Iyyabaaha rodhaꞌana le. Rodhaꞌanguabale len ca tisa rixxiꞌa gue elha tsee chi bedaa le benna betee len riꞌi lhe. Cumu ca tisa-na ancaque benni ra xxeni lee guaca gueque useꞌe tsitsique le lo neda gue Benni Bananie ri-na, unque dhíle iyá nu chi rá Tata Do Iyyabaaha ugüe ca benni guee lhe.

³³ Neti nna lägabi udá lasia belhi guele, niguaba xo nuxa attu benni lhe.

³⁴ Lebiꞌi gua yuxeabale, leni niꞌa nába neti urenia sina qui uyoꞌa nu beasatia lenia adí ca benni useꞌe len netiha.

³⁵ Satíaba beleꞌetia le ria, aní cuenri sina qui te nu uteri len ca benni bittu te guecani. Orexxa leri ca tisa unne Jesús, Benni bananie ri, atti re: “Adílaba tsee anca gansi riꞌi uteri nu reasani ca benni, attichula riꞌi dhíri nu utee benni.”

³⁶ Dequide uluxa rá Pablo anía nna bedútteba xibibi unnebi leni Tata Do Iyyabaaha leni iyába ca benni seꞌe nía.

³⁷ Nianna iyábacabi urescabi. Atti utesttebacabi yieni Pablo betsá locabi xxagabi.

³⁸ Tsitsiba seꞌe siꞌicabi lo niꞌa gue de rá Pablo bitturu uyú loescabi attu libe. Laniala nna deyya lencabi biꞌiniha guaruꞌuncabi axta atta bodaxxubi barco.