Hechos 2 - Zapoteco de Aloápam

Atti bisía Espíritu gue Tata Do Iyyabaaha

¹ Atti bisía laní nu te láni Pentecostés iyába ca benni ria le ca tisa gue Jesús seꞌecabi ttu reba lheꞌe ttuba yoꞌo.

² Attirba iyyaba lecabi uyuꞌu be daca lo bea-na, attiba atta daa ttu be idí uluꞌu tsiꞌini lheꞌe itúba yoꞌo atta seꞌecabiha.

³ Nianna ucaxxetteba attiba ca belha gue gui, atti bilaꞌatteba lheꞌe guiha udona iqui ttu ttucabi.

⁴ Lania nna iyábacabi utaꞌa Espíritu gue Tata Do Iyyabaaha lheꞌe itúba cuerpu guecabi. Nianna udulottebacabi unnecabi attu tisa subi, cua ruteba Espírituha rinnecabi.

⁵ La laniaguaba nua resina ca benni Israel seꞌe lheꞌe ca yiesi dittu lheꞌe yiesi Jerusalén. Ancacana benni rudoru tisa gue Tata Do Iyyabaaha.

⁶ Ca benni bienquinna uyuꞌu beha nna güiattebacana guagüiacana bixa nua ucaha. Lacana nna niba lä beselaquinna bixa innácana, cumu ttu ttubacana rieniquinna rinne ca benni ria le ca tisa gue Jesús ca tisa nu rinne ttu ttucana lheꞌe ca yiesi atta seꞌecanaha.

⁷ Nianna rugüiaba lo loescani, rebanbaquinna lhe atti rinnaba tisa loescani rácana: —¿Lä nu Galileaba iyába ca nu seꞌe rinne-ni nna?

⁸ ¿Biacala rieninri rinne ca unna tisa nu rinne ttu ttubari lasri ganna?

⁹ Riꞌi ancari ca benni daa daca lo yu gue Partia lhe daca lo yu gue Media lhe daca lo yu gue Elam lhe daca lo yu gue Mesopotamia lhe daca lo yu gue Judea lhe daca lo yu gue Capadocia lhe daca lo yu gue Ponto lhe daca lo yu gue Asia lhe

¹⁰ daca lo yu gue Frigia lhe ca nu daa daca lo yu gue Panfilia lhe ca nu daa daca lo yu gue Egipto lhe. Niguaba seꞌe ca benni daa gaxxaba atta re yiesi lána Cirene nu re lo yu gue Libia. Niguaba seꞌe ca benni daa daca lheꞌe yiesi Roma ancacana benni Israel atti ulicana, attu chupacana ancacana benni Israel cumu bedaxxucana elha runi gue ca benni Israel.

¹¹ Niguaba seꞌe ca nu daa daca lo yu gue Creta lhe daca lo yu gue Arabia lhe. Nianna iyába ca nu Galilea-ni rieninri rinnecana loesi ca tisa rinneri, rixxiꞌacana gue nu runi reban leri runi Tata Do Iyyabaaha.

Pedro riguixxiꞌenbi ca benni gue nu raca

¹² Iyábacana rebanquinna niguaba lä yucana bixa ulaba lecani lhe. Laniala nna unnaba tisa loescani rácana: —¿Bi diani nu raca-ni?

¹³ Ttiaca adí ca nu seꞌe nía nna redacalaquinna rácana: —¡Cumu dusbacani unná!

¹⁴ Laniala nna udulí Pedro lenbi a sinía (11) ca biꞌini bedheti ca tisa beleꞌe Jesús, atti unnebi idisa rábi ca nu seꞌe nía: —¡Ca benni Israel lhe iyále ca nu seꞌele lheꞌe yiesi Jerusalén-ni lhe gualdo nagale gue nu innea-ni qui unale gue bixunní raca-ni!

¹⁵ Ca nu seꞌe-ni nna läga duscani ca unní atti nu rále-na. Gua rgüiabale nna chi begüeerbana retin jaa dila nna.

¹⁶ Nnanna nna ni chi rilenle raca nu unne profeta Joel, atti rábi:

¹⁷ Tata Do Iyyabaaha nna re: “Ca sá deoba lhuxa yies lo yu-ni nna unia gaꞌa Espíritu quia lheꞌe cuerpu gue iyá ca benni seꞌe yies lo yu-ni. Lania nna ca xiꞌin biyuule-na lhe ca xiꞌiniunnále-na lhe innecana ca tisa utea len lacana. Ca uncuiti gueleha nna uleꞌequinna ttu nu runna reban leri, ca benniolaha nna itsiaquinna yiela.

¹⁸ Laniaguaba unia gaꞌa Espíritu quia lheꞌe cuerpu gue ca unbiyuu lhe ca nuila runi sina quia lhe qui innecana ca tisa utea len lacana.

¹⁹ Ulheꞌeguaba elha reban xxen leri iyyabaaha lhe aníaguaba aca yies lo yu-ni lhe. Ilali reni lhe ite lhe chadha bea seni lhe;

²⁰ tatubisa-na nna echulha loni, nanto beo-na nna eyacana xinaa attiba reni atti chi deoba isía sá esía Benni bananie ri-na, sáha ancana sá xeni, sá eban le benni lhe.

²¹ Nianna iyába ca benni, innábacana lo Benni bananie ri-na odile cana gualábacana qui bittu tsia nitticana.”

²² ’Larcala gualdorga nagale, xa benni Israel, gue nu innía. Lebiꞌi nna gua yuxeabale, Jesús Benni udo lheꞌe yiesi Nazaret, uque Benni ulea tsee Tata Do Iyyabaaha lo iyábale, cumu Jesús bixuunie qui benie ca elha reban leri lhe ca milagru lhe.

²³ Atti betecana Benniha las nále qui guaxxína uca attiba chi gaꞌanani Tata Do Iyyabaaha aca, bedaxxulale Benniha leni ca nu lä duta leni qui betti lee lo ya crusiha.

²⁴ Ttiaca Tata Do Iyyabaaha nna bechidhabe Benniha lheꞌe baa atta yuꞌu ca nu yatti-na, bodilábe Benniha lo elha disa ruyú Benni gue elhuttiha. Cumu elhuttiha nna läga udána un gueni Benniha.

²⁵ David biꞌini uca nu rinnabia gue ca benni Israel ca tu atti nía utixxiꞌabi gue Jesús rábi: Neti satíaba rilátia Benni bananie neti nerue loa. Gansi lee due daca lhuitta derechu quia nna tsa läganu dhana uttínna neti iyya.

²⁶ Larcala neti nna reꞌolhaba lasia, rulha guee itú iqui itú lasia lhe neti nna ruxxenba lasia lägabi satea.

²⁷ Cumu lu, Tata Do Iyyabaa, läga odhaꞌanlu neti atta yuꞌu ca nu yatti-na, niguaba lä ugüelhalu usu bela gue Benni ulequiesilu uni sina guelu-ni lhe.

²⁸ Cuinalu beleꞌenlu neti neda atta raxxacari elha nabani lhe yalha reꞌo lasia de dulu len neti lhe.

²⁹ ’Betsito, gualugüelha neti quixxiꞌatseetia le gue David benni uca benniola gueri udo ca tu nurea. Gua yubale nna uttiba biꞌiniha nianna bigatsibabi. Nnanna nna sna rilábinri sa teba baa gue biꞌiniha atta seꞌeri-ni.

³⁰ Cumu David ucabi profeta, labi nna guayúbabi Tata Do Iyyabaaha nna chi bocaꞌan tsitsie tisa, re biꞌiniha: “Ttu ca benni datíalu odúa aca nu innabia attiba lu”,

³¹ larcala David nna chiba yubi guee nu chi daa aca, nuarcala unnebi dequi eyacabani Cristu. Läga eyaꞌana Benniha atta yuꞌu ca nu yatti-na, niguaba lä usu bela gue Benniha lhe.

³² Gualíba Jesúsba Benniha beni belhidha Tata Do Iyyabaaha lo elhuttiha. Gue unnuha nna iyábatu ancatu benni biyú lotu.

³³ Benniha nua beni Tata Do Iyyabaaha aque Benni ra xxeni leni, bodo daca lhuitta derechu gue Benniha lhe. Nianna uxíe Espíritu bete Tata Do Iyyabaaha lenie, benni chi becan yienie idhelhe len riꞌi. Benniha benni chi bieninle lhe chi bilenle lhe betee len ca benni seꞌe-ni.

³⁴ Cumu läga David biꞌiniha beopi iyyabaaha. Ttiaca labi unnebi rábi: Ni rá Tata Do Iyyabaaha Benni bananie neti: “Udo ni daca lhuitta derechu quia-ni,

³⁵ axta liba unia tseꞌe ca nu rutía di lecanlu na xaniꞌalu qui acacana nu udú niꞌalu iquicani.”

³⁶ ’Larcala nna xa benni Israel, gualuna iyárechattele, gualíba Jesús Benni betále lo ya crusihaba Benniha benni beni Tata Do Iyyabaaha aque Benni bananie ri lhe Cristu lhe.

³⁷ Atti bienini ca nu seꞌe nía nu rá Pedro, lania nna siꞌirurba runcana cumu de guadú lecani nu rá biꞌiniha cana. Nianna unnaba tisattebacana biꞌiniha, adí ca biꞌini bedheti ca tisa beleꞌe Jesús lhe rácan cabi: —Xa betsito, ¿bila anca nu untu ganna?

³⁸ Pedro nna becabittebabi guecani rábi cana: —Gualodú xiyyanle nna gualodaxxutte neda gue Tata Do Iyyabaaha. Nianna atti cua ttu ttubale gadile inda udettile lá Jesucristuha, qui anáchu dhi Tata Do Iyyabaaha elha xen lasi gue ca tulha chi benle-na. Lania nna utee Espíritu guee-na len lebiꞌi.

³⁹ Cumu chiba begüee Tata Do Iyyabaaha tisa utee Espíritu-na len lebiꞌi, len ca xiꞌinle-na lhe anáguaba leni ca benni dittu lhe delába iyába ca benni raca le Tata gueri do iyyabaaha Benni bananie ri gaxie.

⁴⁰ Unnerguaba Pedro adí ca tisa, belisabi cana rábi cana: —Gualeriesi ca nu runi nu lä anca tsee seꞌe nnanna.

⁴¹ Anioca nuarca ca benni güia lecabi gue ca tisa unne Pedro nna udittebacabi inda. La sátteba bisela attiba tsunna mili ca benni cubi leni ca benni chi ria le Jesús.

⁴² Iyábacabi rudobacabi tisa gue nu ruleꞌe ca biꞌini bedheti ca tisa beleꞌe Jesús, ruteguaba gue loescabi ttu bixa reasaquinbi lhe ttulapaba ro iyábacabi yetta lhe aníaguaba runcabi atti rinnecabi leni Tata Do Iyyabaaha lhe.

Nu run ca benni chi güia le ca tisa gue tata Jesús

⁴³ Iyába ca benni rebanquinna cumu riláquinna ca milagru lhe ca nu runi rebaninri lhe runi ca biꞌini bedheti ca tisa beleꞌe Jesús.

⁴⁴ Iyába ca benni chi ria lecabi Jesús ttu reba atta riseꞌecabi. Iyába nu te guecabi nna gue iyábacabi reaca nua.

⁴⁵ Ruttoꞌoguabacabi ca lo yu guecabiha lhe adírba nu te guecabi lhe. Belhiha nna riguidhi gue loescabi cua reasabani ttu ttucabi.

⁴⁶ Ttu ttu sába riacabi riseꞌecabi ttu reba lheꞌeliꞌa gue yotuha. Dequila nna reyya lheꞌe lisi loescabi qui rocabi rse gue Jesús, anáguaba qui rocabi yetta lhe. Yalha reꞌo lecabi de seꞌe tsee len loescabi,

⁴⁷ satíaba ribequi xencabi Tata Do Iyyabaaha lhe. Larcala iyába ca nu seꞌe lheꞌe yiesi Jerusalén racaquinna guecabi. Aníaguaba ttu ttu sába runi Benni bananie ri-na risela adí ca benni rodile qui bittu tsia nitticabi ca biꞌini chi ria le Jesús.