Hechos 19 - Zapoteco de Aloápam

Pablo rixxiꞌabi ca tisa gue Jesús lheꞌe yiesi Éfeso

¹ Laca re Apolos lheꞌe yiesi Corinto, Pablo nna diattebabi utebi atta sia ca iꞌiya lo yu te láni Galacia, lo yu gue Frigia lhe. Níala nna besinbi lheꞌe yiesi Éfeso. Nía guatiꞌabi ixe ca benni ria le Jesús.

² Labi nna unnaba tisattebabi ca biꞌiniha rábi cabi: —¿Si uxíle Espíritu gue Tata Do Iyyabaaha atti güia lele ca tisa gue Jesús? Ca biꞌiniha nna becabittebacabi rácabi: —¡Dica! Lägabi chi bienin riꞌitu innecana gue Espíritu gue Tata Do Iyyabaaha.

³ Pablo nna ráttebabi ca biꞌiniha: —¿Núla güia lele atti udile inda? Lacabi nna becabittebacabi rácabi: —Ca tisa unne Juanba güia letu atti uditu inda.

⁴ Pablo nna ráttebabi ca biꞌiniha: —Gualíba, Juan begadibi inda ca benni bodú xiyyancana gue nu lä anca tsee runcana qui bedaxxucana neda gue Tata Do Iyyabaaha, ttiaca laguabi nna unnebi rábi: “Tsia lele Benni isía dequide neti”, delába Jesús.

⁵ Atti bina ca biꞌiniha nu rá Pablo, laniala nna udicabi inda betti lá Jesús Benni bananie ri.

⁶ Atti bexxúatteba ná Pablo iqui ca biꞌiniha qui uxícabi Espíritu gue Tata Do Iyyabaaha, lacabi nna udulottebacabi unnecabi attu tisa subi. Unneguabacabi ca tisa betee Tata Do Iyyabaaha lencabi lhe.

⁷ Tsiꞌinuba (12) ca unbiyuu-na.

⁸ Delo tsunna beo bisá Pablo nía, güiattebabi lheꞌe yoꞌo atta rudheti ca benni Israel ca tisa gue Tata Do Iyyabaaha, guattixxiꞌabi gue Jesús itú iqui itú lebi. Tsitsiba rinnebi qui iyienquin ca unnuha tsia lecani gue gaxasná rinnabia Tata Do Iyyabaaha.

⁹ Ttiaca adí ca nua nna benditibacana, tsaba bittu uca lecani tsia lecani. Rinnelacana aníba lo benni gue neda gue Jesús. Laniala nna biriesi Pablo lenbi ca benni ria le Jesús, deyya lenbi ca biꞌiniha lheꞌe ttu yoꞌo scuela gue ttu benni lána Tirano. Nía beleꞌen Pablo ca benni ttu ttu sába.

¹⁰ Aníaba benbi delo chupa ida. Larcala iyába ca benni seꞌe daca lo yu gue Asia bienquinna ca tisa gue Benni Bananie ri-na, ca nu Israel lhe ca nu dittuba lhe.

¹¹ Tata Do Iyyabaaha nna bixuunie Pablo qui benie ca milagru xxeni.

¹² Larcala axtaba ca lari ruxí lobi lhe ca lari rixuinbi rucubi ribenbi sina lhe rechecana atta seꞌe ca benni raniha. Ca unnuha nna reacattebacana, ca be xxegüi yuꞌu lheꞌe cuerpu guecaniha lhe reríattebacana.

¹³ Ttiaca ttu chupa ca nu Israel requi lo nedaha, rebeaguabacana be xxegüi yuꞌu lheꞌe cuerpu gue ca benni, lacana nna benttebacana udetticana Jesús Benni bananie ri-na, qui ebeacana ca be xxegüiha lheꞌe cuerpu gue ca benni. Nianna rácana: —Jesús, benni riguixxiꞌa Pablo ca tisa guee-na rudettitu rulisatu le, gualería lheꞌe cuerpu gue ca benni-ni.

¹⁴ Anía beni gasi ca xiꞌin biyuu ttu nu Israel lána Esceva. Ancana bixxudi lo rinnabia.

¹⁵ Ttiaca ttu libe nna becabi ttu be xxegüi guecani rána cana: —Guanca biabatia Jesús lhe gua yuguaba nuxa nua Pablo lhe ttiaca lebiꞌi nna ¿nú ancale?

¹⁶ Unbiyuu yuꞌu lheꞌe cuerpu gueni be xxegüiha nna tturba bisínna bedaxxuna ca unnuha, cumu tipar nua atti lacana, nuarca udábana locani, nnela betsutsa belea nua cana ttu nu dica ixuu, chiba uca urecana beríacana lheꞌe yoꞌoha, aníaba ttunttucana lhe chi ancaxxattacana güee lhe bexunnicana deyyacana.

¹⁷ Iyába ca nu seꞌe lheꞌe yiesi Éfeso binacana gue nu ucaha, benni Israel lhe ca nu dittuba lhe. Lacana nna usilhabaquinna. Denua nna nuarca iyábacana rinnecana rácana: “Xxeni ra le Jesús Benni Bananie ri-na.”

¹⁸ Ixeru ca benni chi güia lecani Jesús risincana riguixxiꞌacana aníba lo benni gue nu bittu anca tsee chi bencana.

¹⁹ Anáguaba ixe ca nu beni gue güesaa uchecana ca libro ca nu dia locani gue nu bedheticanaha qui bettecana ca nua lo gui aníba lo iyába ca benni seꞌe nía. Atti bebeacana lidhaca ca libro biteha nna gualíana attiba medi gayua (50) mili belhi plata.

²⁰ Larcala nna tu diaba racaru ixe ca benni ria le ca tisa gue Benni Bananie ri-na, ruleꞌe lo ancaque tisa ra xxeni le lhe.

²¹ Dequide chi ute uca iyá unní nna ucattebani Pablo tsiabi lo yu gue Macedonia, lo yu gue Acaya lhe. Níala nna esínbi lheꞌe yiesi Jerusalén. Ráguabi: —Dequide chi güiaya Jerusalén nna unguaba duelha tsiaya lheꞌe yiesi Roma.

²² Laniala nna udhelhabi chupa ca biꞌini run sina lenbiha tsiacabi Macedonia. Ca biꞌiniha nua lácabi Timoteo lenbi Erasto. Pablo nna isáru beꞌanbi lo yu gue Asia.

Lheꞌe yiesi Éfeso risatsacana

²³ Lania nua uca ttu elha utilha xeni lheꞌe yiesi Éfeso lo niꞌa gue ca benni rudaxxu neda gue Jesús.

²⁴ Ttu unbiyuu lána Demetrio nua udulona leni elha utilhaha. Cumu lána runna leni plata lisi xunaxi teequinna láni Diana. Xxeni belhi rocaꞌana sinaha gue ca nu runcana nua.

²⁵ Demetrio nna beaxittebana ca nu runi sina gueniha leni adí ca nu runi loesi sina runnaha, nianna ráttebana ca nua: —Ca unbiyuu seꞌe-ni, lebiꞌi nna gua yuxeabale sina runri-ni nna tseeba rocaꞌanna belhi gueri.

²⁶ Ttiaca nnanna nna lebiꞌi nna gua rienbinle lhe gua rilábinle lhe gue nu runi nu lána Pablo-na, lana nna requina rána dequi ca diosi ca nu runi leni nári nna läga anca ca unná diosi. Larcala ixe ca benni chi uxí yiena, läga sunru lheꞌe yiesi Éfeso-ni requina runna aná, anáguaba runna lheꞌe iyába ca yiesi seꞌe daca Asia lhe.

²⁷ Läga sunru ruxunnina gue ca sina gueri-ni dhu sicana, anáguaba ruxunnina gue yoꞌo gue nan xunaxi ra xxeni leni gueri lá Diana-ni bitturu etábiquinne, lä tsiarguaba le adí ca benni seꞌe lo yu gue Asia lhe adí ca nu seꞌe yiesi lo yu-ni lhe gue ben-na.

²⁸ Atti bienquin nua nu rána nna bisaꞌatsitsiabaquinna. Nianna uresiꞌattebacana rácana: —¡Xxeni ra le Diana gue ca nu Éfeso-ni!

²⁹ Iyába ca benni seꞌe lheꞌe yiesiha biganna lecani, ttu xxia xeniba ancacana utaꞌacana bedaxxucana benni lá Aristarco lenbi benni lá Gayo. Ca biꞌiniha nua daa daca lo yu gue Macedonia. Ancacabi benni ria tiaba leni Pablo. Lacana nna ure naꞌayattebacana ca biꞌiniha guaseꞌecana atta riseꞌecana rugüiacana ca laní runi yiesiha.

³⁰ Pablo nna uxacattebabi gaꞌabi atta seꞌe ca nua qui inne lenbi ca benni seꞌe nía, ttiaca adí ca benni chi ria le Jesús läga begüeelhacabi biꞌiniha gaꞌabi nía.

³¹ Anáguaba ttulhe ca benni anca uxtisi gue Asia seꞌe tsee leni Pablo, udhelhattebacana ttu nu güia guayún bi qui bittu sattaꞌabi atta yuꞌu ca nua.

³² Ca nu yuꞌu nía nna riyalhabacana: nu subi rá ttuna, nu subi redená a ttuna. Aníaba runcana yuꞌucana cumu chi bichixxi lecani. Adí benni nna nibala yu ca nua bi lo niꞌa gue seꞌecana nía.

³³ Ttiaca ttulhe ca benni Israel seꞌe nía nna besigattebacana ttu unbiyuu lána Alejandro qui ibigana innena edín cana. Unnuha nna bettátteba náni beleꞌenna ca nu riyiyyaha qui eyaca sicana qui iyieni innena edína ca nu Israel lo ca benni gue yiesiha.

³⁴ Ttiaca atti utedaaquinna dequi nu Israelba nua, atti uresiꞌatteba iyábacana tu ttu chupa uraguaba, rácana: —¡Xxeni ra le Diana gue ca nu Éfeso-ni!

³⁵ Dequide chi udá nu runi ca sitsi gue yiesiha beaca si ca nu yuꞌu ribesiꞌaha nna laniala nna udulona unnena rána: —Benni Éfeso, lebiꞌi gua yuxeabale, iyába benni yucana dequi riꞌi ca benni Éfeso-ni ancari benni nu tsitsiba rapari yotu gue diosi Diana gueri-ni, benni anque benni ra xxeni leni, tsitsiguaba rapari retratu gue ben-na daa iyyabaaha bisía yies lo yu-ni lhe.

³⁶ Cumu läganu te innána dequi läga gualí nu ria-ni, larcala lebiꞌi nna siru gualtseꞌe balha, bittu cuenta unle ttu bixa.

³⁷ Cumu ca unbiyuu guadaxxule-ni nna lägabi chi ulanacana ttu bixa lheꞌe yotu-na, bittuguaba rigúacana balaꞌana gue xunaxi gueri-na lhe.

³⁸ Ganna si Demetrio-na lenna ca nu riben lenna sina-na te elha utilha guecani leni nuxa benni, gua dicaba uncana unná lheꞌe yoꞌo lagüi-na lo ca xueda-na qui quixxiꞌacana bixa gue ritilhacana.

³⁹ Gansi lebiꞌi bixarba attu nu subi rinnabale aca nna gua dicaba gaxiri iyába benni roꞌo yoꞌo lagüi-na qui lhatsirba inneri gue bixa raca lele.

⁴⁰ Cumu aní nna ruxunnibana gueri udelhacana cuꞌeri dequi ancari nu rutsatsa benni lo niꞌa gue nu uca nasá. Ttirca innába tisacana ri innácana: “¿Bi lo niꞌa gue runle aná? Riꞌi nna ¿bila innári? Cumu läga yuri bi lo niꞌa gue risatsa benni.”

⁴¹ Uluxaba rána anía nna bechú tisattebana benni.