Hechos 18 - Zapoteco de Aloápam

Pablo dobi lheꞌe yiesi Corinto

¹ Dequide la lania nna bería Pablo lheꞌe yiesi Atenas, nianna bisínbi lheꞌe yiesi Corinto.

² Nía betiꞌabi ttu benni Israel lábi Aquila, ancabi ttu unbiyuu bababi lo yu te láni Ponto. Aquila nna chi bisínbabi nía lenbi nuila guebi lána Priscila. Lacabi nna bedácabi lo yu gue Italia besincabi Corinto, cumu nu rinnabia gue Roma lána Claudio nna unnabiattebana bebeacana iyárechaba ca benni Israel seꞌe lo yu gue Roma. Pablo nna güiattebabi guanalhibi ca biꞌiniha.

³ Cumu labi nna runguabi sina loes nu run ca biꞌiniha güen ca yoꞌo lari, anía uca nna beꞌanbi urenbi sina len ca biꞌiniha.

⁴ Nianna cua risíaba sá redí le ca benni Israel nna riabi lheꞌe yoꞌo atta rudheti ca nua ca tisa gue Tata Do Iyyabaaha ránne lenbi ca nu Israel lhe ca nu dittu lhe. Runbi qui oquinna iqui ca nua tsia lecani gue nu rixxiꞌenbi cana.

⁵ Atti bisína Silas lenbi Timoteo dacabi deca lo yu gue Macedonia nna Pablo nna a suntteba ca tisa gue Jesús bedona lebi utixiꞌabi, rixxiꞌenbi ca benni Israel Jesús anque Cristu.

⁶ Ttiaca ca unnuha nna besíala lecani biꞌiniha utelacana iquibi. Laniala nna becuibi xobi biste de bittu güia le ca nua nu rábi cana, atti ráttebabi: —Nnanna nna cuꞌebale tsia tulha guele-na cumu neti nna chiba benia len lebiꞌi nu ralha unia. Bedá nnanna leni ca benni bittu anca Israel-na la tsiaya satixxiꞌaya ca tisa-ni.

⁷ Laniala nna beríabi lheꞌe yoꞌo atta rudhetti ca benni Israel ca tisa gue Tata Do Iyyabaaha, atti deyyattebabi lisi ttu benni do gaxxaba nía lábi Justo, ancabi ttu benni ria lebi Tata Do Iyyabaaha.

⁸ Anáguaba Crispo nu rinnabia lheꞌe yoꞌo atta rudheti ca benni Israel ca tisa gue Tata Do Iyyabaaha, iyába lenna ca benni gueni seꞌe lheꞌe yoꞌo gueniha güia lecani ca tisa gue Benni Bananie ri-na. Ixerguaba ca benni seꞌe lheꞌe yiesi Corinto güia lecani atti bienquinna ca tisaha, laniala nna udicana inda.

⁹ Ttu lo rela nna beleꞌeni Pablo Benni Bananie ri-na rinnee re: —Bittu gasinlu. Utixxiꞌa chatti ca tisa-na Bittu eyaca silu.

¹⁰ Neti nna guadúba lania lu. Larcala läganu dhana bixa udhaquinna lu, cumu lheꞌe yies-ni nna ixe ca benni chi gaꞌanatia acacana quia seꞌe.

¹¹ Anía uca nuarca beꞌana Pablo lheꞌe yiesi Corinto ttu ida nalha güeleꞌen ca benni seꞌe nía ca tisa gue Tata Do Iyyabaaha.

¹² Ttiaca atti anca Galión nu rinnabia lo yu te láni Acaya nna ca benni Israel nna beaxitteba loescani qui usia lecani Pablo. Atti bedaxxuttebacana biꞌiniha uchecan bi lo ca nu anca uxtisiha.

¹³ Nianna ráttebacana nu rinnabiaha: —Unbiyuu du-ni nna requina ridí yiena ca benni cuequixxencana Tata Do Iyyabaaha attu yalee, ruleꞌenna ca benni nu bittu raxxína leni nu dia lo ca ley bocaꞌana Moisés lhe.

¹⁴ Pablo nna chitteba diabi innebi bixa innábi, attirba chi unne Galión rána ca nu Israel: —Lebiꞌi, benni Israel gansi unbiyuu du-ni ulána-na o nuxa bettina lhe lania liba nna güeya lasia udo naga guele.

¹⁵ Unná nna cumu ancabunna gue suna tisaba, gue ca tisa rinnabia guele-nba lhe larcala läga un neti elha uxtisi guele. Naba gualyú. Lebiꞌiba gualuluxa guele.

¹⁶ Laniala nna bebeana cana lheꞌe yoꞌo lagüiha.

¹⁷ Nianna iyábacana bedaxxuttebacana Sóstenes nu rinnabia lheꞌe yoꞌo atta rudheti ca benni Israel ca tisa gue Tata Do Iyyabaaha, snaba nía begüeelhabacana biꞌiniha. Ttiaca Galión nna niba saroꞌo lä betabinna gue nu ben ca nua.

Pablo bequibi deyyabi lheꞌe yiesi Antioquía

¹⁸ Pablo nna isáru beꞌanbi lheꞌe yiesi Corinto leni ca benni seꞌe nía. Lenla nna bechú tisabi ca benni ria le Jesús, nianna bedáttebabi deyyabi leni Aquila lhe Priscila lhe bodaxxucabi barco besincabi lo yu gue Siria. Lheꞌe yiesi Cencrea nna atti chi deoba odaxxucabi barco nna nía begá iqui Pablo, cumu chiba uluxa benbi nu dica unbi attiba chi bocaꞌanbi tisa leni Tata Do Iyyabaaha.

¹⁹ Atti chi bisíncabi lheꞌe yiesi Éfeso nna nía bodhaꞌanbi Priscila lenbi Aquila. Labi nna diattebabi lheꞌe yoꞌo atta rudheti ca benni Israel ca tisa gue Tata Do Iyyabaaha. Nía unne lenbi ca nua ca tisa gue Jesús.

²⁰ Ca unnuha nna unnabattebacan rácan bi eyaꞌanbi a ttu chupa tsunna ubisa len lacana, ttiaca labi nna läga uca lebi.

²¹ Labi nna bechú tisattebabi ca nua rábi cana: —[Labíaba eyyaꞌaya Jerusalén. Níaba uttea laní nu chi deoba isía.] Ganna si Tata Do Iyyabaaha aca lee nna guadedhába etadinalhia le attu libe. Dequila nna bodaxxu Pablo barco bedábi Éfeso besinbi lheꞌe yiesi Cesarea.

²² Atti besinbi lheꞌe yiesi Cesarea nna güiattebabi lheꞌe yiesi Jerusalén rábi padiuxi ca benni ria le Jesús seꞌe nía. Nianna deyyattebabi besinbi lheꞌe yiesi Antioquía.

²³ Níaba udobi isá. Lenla nna bederíabi dedheyyabi attu libe. Utettebabi lheꞌe coa ttu ttuba ca yiesi seꞌe lo yu gue Galacia lhe lo yu te láni Frigia lhe. Ruseꞌetsitsibi iyába ca benni chi ria lecabi Jesús seꞌe itúba ca nía.

Apolos rixxiꞌabi gue Jesús lheꞌe yiesi Éfeso

²⁴ Laniaguaba nua bisína ttu unbiyuu lheꞌe yiesi Éfeso lábi Apolos. Ancabi benni Israel, ulibi lheꞌe yiesi Alejandría. Labi nna ancabi ttu benni redaꞌani tisa, tsitsiba yubi gue nu rá lo ca sitsi gue Tata Do Iyyabaaha lhe.

²⁵ Chiba bedhetibi gaxasná anca neda gue Benni Bananie ri-na, labi nna tsitsiba reꞌo lebi rixxiꞌabi lhe ruleꞌebi lhe lixxa suba gue Jesús, masquiba sunruba yubi gue bi gue begadi Juan ca benni inda.

²⁶ Apolos nna udulottebabi unnebi itú iqui itú lebi rixxiꞌenbi ca benni seꞌe lheꞌe yoꞌo atta rudheti ca benni Israel ca tisa gue Tata Do Iyyabaaha. Ttiaca atti bienini Priscila lenbi Aquila gue biꞌiniha nna uxttebacan bi ttu re atta utixxiꞌatseequinbi biꞌiniha adí gue gatigasná anca neda gue Tata Do Iyyabaaha.

²⁷ Atti chi runi Apolos tsiabi deca lheꞌe ca yiesi seꞌe lo yu gue Acaya nna ca benni ria le Jesús nna benttebacabi biꞌiniha yuda. Atti begüeettebacabi biꞌiniha ttu sitsi atta rulisacabi ca benni ria le Jesús seꞌe nía qui ulabicabi Apolos gansi chi bisínbi nía. Atti chi bisínbi lo yu gue Acaya nna tsitsiba bixuubi benbi yuda ca benni chi bedaa le Tata Do Iyyabaaha uca lanie cabi güia lecabi Jesús.

²⁸ Cumu aníba lo iyába ca benni seꞌe lheꞌe yiesiha ritilha tisabi leni ca nu Israel, riguꞌu niꞌabi nu rá ca nua. Labi nna rinnebi ca tisa anca gualí, rudaxxu niꞌabi nu rá ca tisa dia lo sitsi gue Tata Do Iyyabaaha, rixxiꞌenbi cana Jesúsba Benniha anque Cristu.