Hechos 17 - Zapoteco de Aloápam

Risatsa ca benni seꞌe lheꞌe yiesi Tesalónica gue Pablo lenbi Silas

¹ Dequide bete Pablo lenbi Silas lheꞌe yiesi Anfípolis lhe Apolonia lhe besinttebacabi lheꞌe yiesi Tesalónica. Nía do ttu yoꞌo atta rudheti ca benni Israel ca tisa gue Tata Do Iyyabaaha.

² Attiba chi labi Pablo runbi güiattebabi lheꞌe yoꞌo atta rudheti ca nua ca tisa gue Tata Do Iyyabaaha delo tsunna xumanu coa risíaba ca sá redí le ca benni Israel, labi nna ritilha tisabi len ca nu ria nía. Rudaxxu niꞌabi nu rá lo ca sitsi gue Tata Do Iyyabaaha,

³ rixxiꞌenbi cana rábi cana dequi Cristuha nna labíaba gatti Benniha, lenla nna eyacanie eríe lheꞌe baa atta yuꞌu ca nu yatti-na. Ráguabi cana: —Jesús, Benni rixxiꞌatia le guee-ni, Ben-na anque Cristu.

⁴ Ttu chupa ca nu Israel nna güiaba lecani, lacana nna guattattebacana Pablo lenbi Silas. Güiaguaba le adí ca benni Grecia ca nu rudo tisa gue Tata Do Iyyabaaha lhe ixeguaba ca nuila ca nu rapacana respeto lheꞌe yiesiha lhe güia lecani Jesús.

⁵ Ttiaca ca nu Israel bittu güia lecaniha nna upattebacana malisi. Laniala nna güiacana guattupacana ca nu lä du ta leni requi utá lo nedaha qui tsequi ca nua güetsatsa benni. Güia gua ca nua guattaꞌacana lheꞌe yoꞌo gue benni lá Jasón, cumu reguilacana Pablo lenbi Silas qui ichecan ca biꞌiniha atta chi seꞌe ca benni.

⁶ Ttiaca atti nuttu ca biꞌiniha guattiꞌacana nna la dula Jasón leni attu chupa ca benni chi ria le Jesús uchecana, naꞌayanicana ca biꞌiniha guaseꞌecan cabi lo ca nu rinnabia gue yiesiha, atti ribesiꞌanicana rácana: —¡Ca unbiyuu requi rucannacana iqui ca benni seꞌe itúba yies lo yu-ni nna chiguaba bisíacana nii!

⁷ ¡Jasón-ni nna belábin ca nua lheꞌe lisni! ¡Iyábacana riguꞌu niꞌacani ca ley gue César nu rinnabia lo yu gue Roma. Nianna rácana dequi do attu nu rinnabia ra xxeniru leni lána Jesús!

⁸ Atti bienini ca benni lhe ca nu rinnabia lhe nu rá ca nua nna biyiyattebacana.

⁹ Ca nu rinnabiaha nna benttebacana duelha gue Jasón lenbi adí ca biꞌiniha utecabi belhi, anía liba nna bodilácan cabi.

Pablo lenbi Silas riguixxiꞌacabi ca tisa gue Jesús lheꞌe yiesi Berea

¹⁰ Cuantusiba uca lo rela nna bedhelhatteba ca benni ria le Jesús Pablo lenbi Silas daca lheꞌe yiesi Berea. Atti chi bisíncabi nía nna güiattebacabi lheꞌe yoꞌo atta rudheti ca benni Israel ca tisa gue Tata Do Iyyabaaha.

¹¹ Ca benni Israel seꞌe lheꞌe yiesi Berea nna ancacana benni radúru lecani atti ca benni seꞌe lheꞌe yiesi Tesalónica. Larcala itú iqui itú lecani güia lecani ca tisa gue Jesús. Nianna ttu ttu sába riseꞌecana rulabacana lo ca sitsi gue Tata Do Iyyabaaha qui ttedaaquinna gansi gualí nu riguixxiꞌen Pablo cana.

¹² Larcala ixe ca benni Israel seꞌe nía güia lecani. Güiaguaba le ixeru ca benni dittu rinne tisa griego lhe ca nuila rapacana respeto lheꞌe yiesiha lhe ca unbiyuu lhe güia lecani Jesús.

¹³ Ttiaca atti bina ca benni Israel seꞌe Tesalónica chi requi Pablo güeleꞌe ca tisa gue Tata Do Iyyabaaha lheꞌe yiesi Berea nna güiattebacana guatsatsacana ca benni seꞌe nía.

¹⁴ Ttiaca ca benni ria le Jesús, bebeattebacabi Pablo bedhelhacabi biꞌiniha daca roꞌo indattooha. A sunruba Silas lenbi Timoteo beꞌancabi lheꞌe yiesi Berea.

¹⁵ Ca benni dia güeruꞌun Pablo nna bisín liba lencabi biꞌiniha lheꞌe yiesi Atenas nía liba bequicabi. Pablo nna ráttebabi ca biꞌiniha: —Gále Silas lenbi Timoteo etattegabacabi qui yuba esela loestu attu libe.

Pablo riguixxiꞌabi ca tisa gue Jesús lheꞌe yiesi Atenas

¹⁶ Laca do Pablo ribedabi Silas lenbi Timoteo esíncabi lheꞌe yiesi Atenas nna tsaba bittu uca tseenbi de bilenbi itúba lheꞌe yiesiha sia ca nu bittu gualí anca diosi.

¹⁷ Larcala nna riabi lheꞌe yoꞌo atta rudheti ca benni Israel ca tisa gue Tata Do Iyyabaaha rattisabi ca nua, ca nu dittu rinne tisa griego rudú xibicani lo Tata Do Iyyabaaha lhe. Aníaguaba runbi ttu ttu sába lheꞌe atta raca iꞌiyaha leni ca benni risina nía.

¹⁸ Bitilha tisaguaba lenbi ttu chupa ca nu teru elha rieni guecani te lácani epicurios lhe estoicos lhe. Adícana nna rácana: —¿Biunni rá nu roꞌo rucha requi-ni? Alhecana nna redenácana: —Gaxa gue ca diosi subi bunna rixxiꞌa unná. Anía rácana cumu de riguixxiꞌa Pablo gue Jesús, gue reacani ca benni yattina lhe.

¹⁹ Laniala nna uchecana biꞌiniha lo tu lhilhi te láni Areópago atta riacana riseꞌecana rinnecana. Atti unnaba tisattebacan bi rácana: —¿Si guaca quixxiꞌenlu riꞌitu bi tisa cubi unní cheelu?

²⁰ Cumu lu nna rinnelu gue ca nu läga yutu gueni. Nnanna nna raca letu quixxiꞌenlu riꞌitu ¿bi gueonna rinnelu?

²¹ Cumu iyába ca benni seꞌe lheꞌe yiesi Atenas lhe ca nu dittu seꞌe nía lhe suntteba do lecani rudo nagacani lhe rinnecana lhe gue bixaba ttu nu cubi rienquinna.

²² Laniala nna udulí Pablo lagüi gue ca nu seꞌe atta te láni Areópago, atti unnebi rábi: —¡Lebiꞌi, benni Atenas! Neti nna ritedaatia ancale benni nu riaxxatta leni ca diosi-na,

²³ cumu coa atta riteba diaya rilátia sia ca becoa atta runle leꞌa. Na chi bilátia ttu becoa dia ca letra loni rána: “Diosi nu nuttu nu anca bienna na.” Güelha gue Dios benni rudú xibile loe-na, masquiba bittu anca bienle, delha rixxiꞌatia le nnanna.

²⁴ ’Tata Do Iyyabaaha, benie yies lo yu-ni lhe iyába nu seꞌe loni lhe lee anque Benni bananie iyyabaaha lhe yies lo yu-ni lhe. Läga do Benna lheꞌe yotu nu runi ca benni seꞌe yies lo yu-ni.

²⁵ Bittuguaba reasanie nuxa bixa unna guee lhe cumu lee anque benni rute elha nabani gue iyári. Rute be qui anca banri lhe adírba nu reasinri lhe.

²⁶ ’Leni ttuba benni benie useꞌe benni lheꞌe iyába ca yies-na qui tseꞌecana itúba yies lo yu-ni. Utixxiꞌaguabanie cana bedaa nuca tseꞌecana lhe gaxa tseꞌecana lhe.

²⁷ Aníaba beni Tata Do Iyyabaaha qui eguilacane masquiba tu rigána rideencana qui nicaga guasatiꞌabacane, ttiaca läga idittu do Ben-na leni atta seꞌe ttu tturi.

²⁸ Cumu de larbe nna gua anca banri lhe gua ritári lhe gua seꞌeri yies lo yu-ni lhe. Attiguaba rá ttulhe ca benni rinne ca tisa elha guele-na rácana: “Riꞌi ancari xiꞌini Tata Do Iyyabaaha.”

²⁹ Larcala nna riꞌi ancari xiꞌin Tata Do Iyyabaaha, nuarcala läga dica ulaba leri dequi Tata Do Iyyabaaha anque ttu diosi nu ancana leni oro, o leni plata lhe o leni iyya nu rotsiꞌinu le ca benni rilhachu leni nácani lhe.

³⁰ Ca tu nurea nna Tata Do Iyyabaaha lägabi casu benie gue nu beni ca benni atti bittu chi yucana. Ttiaca nnanna nna rinnee rulise iyáxea ca benni seꞌe yies lo yu-ni qui odú xiyyancana odaxxucana neda guee.

³¹ Cumu Tata Do Iyyabaaha chi bedúe ttu sá atti unie elha uxtisi lixxa gue ca benni seꞌe yies lo yu-ni. Unnuha unie leni benni chi becuee bodúe, Benniha nua lá Jesús. Atti belhidhe Benniha lheꞌe baa atta yuꞌu ca nu yatti-na lania beleꞌe loe leni iyá benni gualíba chi becuee Benniha qui unie elha uxtisi.

³² Atti bienin ca nua gue eyacabani ca nu yatti-na, bedacalin ttulhecana, adícana nna rácana: —Gudoga nagatu gue nu rálha attu sá.

³³ Laniala nna güequi Pablo atta seꞌe ca nua.

³⁴ Ttiaca adí ca benni nna guanalhattebacana biꞌiniha cumu güia lecani gue nu rábi. Ttu ca benni güia lecaniha nna lána Dionisio. Lana nna ancana ttu ca nu sela len ca benni ria lo lhilhi te láni Areópago. Selaguaba attu nuila lána Dámaris lhe adírba ca benni lhe.