Hechos 16 - Zapoteco de Aloápam

Timoteo dia lenbi Pablo lhe Silas lhe

¹ Atti bisína Pablo deca lheꞌe yiesi Derbe nna utettebabi diabi deca lheꞌe yiesi Listra. Nía guattiꞌabi ttu benni chi ria lebi Jesús lábi Timoteo, xiꞌini ttu nuila Israel nu riaguaba leni Jesús. Tata guebiha nna ancabi benni Grecia.

² Ca benni ria le Jesús seꞌe lheꞌe yiesi Listra lhe lheꞌe yiesi Iconio lhe rinnecabi rácabi dequi tseeba runi Timoteo.

³ Pablo nna rdacabi ichebi Timoteo, larcala labíaba berenttebabi biꞌiniha senni nu runcana ca unbiyuu Israel qui bittu inne güee ca nu Israel seꞌe nía guebi, cumu de bittu anca tata gue biꞌiniha benni Israel.

⁴ Lheꞌe iyába ca yiesi atta ritecabiha utixxiꞌaquinbi ca benni ria le Jesús gue nu rá lo sitsi beni ca biꞌini bedheti ca tisa beleꞌe Jesús lencabi ca benni deaparu elha rieni anca nu lo gue ca benni ria le Jesús seꞌe Jerusalén. Ráguabacabi ca biꞌiniha udocabi tisa gue nu rá lo sitsiha lhe.

⁵ Larcala ca benni chi ria le Jesús seꞌe itúba ca nía nna chi ria tsitsiru lecabi. Ttu ttu sába diacabi racaru ixecabi lhe.

Pablo beleꞌenbi rinne lenbi ttu unbiyuu gue lo yu te láni Macedonia

⁶ Ttiaca Espíritu gue Tata Do Iyyabaaha nna läga begüeele Pablo lenbi Timoteo quixxiꞌaquinbi ca benni seꞌe daca lo yu te láni Asia ca tisa gue Jesús. Larcala nna utettebacabi diacabi daca lo yu te láni Frigia lhe lo yu te láni Galacia lhe.

⁷ Atti bisíncabi lo bedaa gue lo yu te láni Misia nna belabatteba lecabi gaꞌacabi deca lo yu te láni Bitinia. Ttiaca Espíritu gue Jesús, läga begüeelhe cabi gaꞌacabi nía.

⁸ Larcala neda yuꞌubacabi utecabi lo yu gue Misia. Níala nna bisíncabi lheꞌe yiesi Troas nu re roꞌo indattooha.

⁹ Lo relaha nna beleꞌeni Pablo ttu unbiyuu gue yiesi Macedonia du ditibana rinnabana rána: “Betechi Macedonia-na qui unlu riꞌitu yuda.”

¹⁰ Suntteba uluxa beleꞌeni Pablo anía lo relaha nna ráttebabi: “Eseꞌe tseeri qui tsiari Macedonia, nía chi raxi Tata Do Iyyabaaha ri, qui quixxiꞌari ca tisa gue Jesús.”

Pablo lenbi Silas riguixxiꞌacabi ca tisa gue Jesús lheꞌe yiesi Filipos

¹¹ Atti bedátu Troas nna bodaxxuttebatu barco nu uchena riꞌitu ttu lixxaba daca lo yu re lagüi indattoo lána Samotracia. Betteyú sá nna bisíntu lheꞌe yiesi te láni Neápolis.

¹² Nía bedátu nna diatu deca lheꞌe tu yiesi te láni Filipos nu baba Roma. Unnuha nua ancana ttu yiesi ra xxeni leni re lo yu gue Macedonia. Níaba bisátu ttu chupa ubisa.

¹³ Ttu sá redí le ca benni Israel nna biríattebatu roꞌo yiesiha diatu gaxxaba roꞌo ttu yoo te nía, cumu chi uquintu dequi níaba ria ca benni Israel rannecana leni Tata Do Iyyabaaha. Níaba usiatu, atti udulottebatu riguixxiꞌentu ca nuila risía nía ca tisa gue Jesús.

¹⁴ Nía du ttu nuila lána Lidia dana deca lheꞌe yiesi lána Tiatira ruttoꞌona ca lari xinaa chulha daca yaxi. Nuilaha nna ancana ttu benni ribequi xxeni Tata Do Iyyabaaha. Lagüiba duna rudo naganiha nna bentteba Benni bananie ri-na utaꞌa ca tisaha lheꞌe lastooni qui güia leni gue nu rá Pablo.

¹⁵ Laniala nna udittebana inda lenna iyába ca benni raca betsi loesni seꞌe lheꞌe yoꞌo gueniha. Nianna ráttebana riꞌitu: —Gansi gualínle rále dequi chi anca benni ria le ca tisa gue Benni bananie ri-na, nnanna nna gualtsá eyaꞌanle lheꞌe yoꞌo quiaha. Lana nna duelhaba benna guetu beꞌantu lheꞌe yoꞌo gueniha.

Pablo lenbi Silas utixxacan cabi lisiyya lheꞌe yiesi Filipos

¹⁶ Guatetu ttu libe atti diatu atta rannetu leni Tata Do Iyyabaaha, nía betiꞌatu ttu nuila cuiti yuꞌu ttu be xxegüi lheꞌe cuerpu gueni, nu runi qui rinne yaꞌana. Unnuhaba anca sina runi nuilaha. Ca nu banquinna nua nna xxeni belhi ridícana gue nu rinne yaꞌa nua.

¹⁷ Nuilaha nna betenalhattebana riꞌitu lentu Pablo, lana nna rinnena idisa rána: —Ca unbiyuu-ni ancacana benni rixuuni Tata Do Iyyabaaha, benni ra xeni lee. Lacabi riguixxiꞌacabi gue gaxasná lhári qui bittu tsia nittiri.

¹⁸ Aníaba benna güequina ixe ubisa, axta liba bitisini Pablo atti bequibi belisabi be xxegüi yuꞌu lheꞌe cuerpu gue nua rábi na: —Jesucristuha rudettia rulisa lu, neti nna rinnabiaya lu, bería lheꞌe cuerpu gue nuila-na. Atti beríatteba be xxegüi yuꞌu lheꞌe cuerpu gue nuilaha.

¹⁹ Ttiaca atti utedaani ca nu banquinna nuilaha bitturu aca dhicana belhi gue nu rinne yaꞌa nua nna bedaxxuttebacana Pablo lenbi Silas, naꞌayani cana ca biꞌiniha checan cabi guaseꞌecan cabi lheꞌeliꞌa gue yoꞌo lagüiha lo ca nu rinnabia.

²⁰ Atti chi seꞌequinna ca biꞌiniha lo ca xuedaha nna ráttebacana: —Ca nu Israel-ni requicana rutsatsacana ca benni gueri seꞌe lheꞌe yies gueri-ni.

²¹ Lacana nna dacana ruleꞌecana nu chi labicana runcana, nu bittu dica ugüelhari gaꞌa lo yies gueri-ni lhe nu bittu dica unri lhe cumu riꞌi ancari benni Roma.

²² Ca benni seꞌe nía nna ubigattebacana besía lecani Pablo lenbi Silas. Ca xuedaha nna bentebacana mandadu cueacana xo ca biꞌiniha, atti quitsacana lheꞌecabi len ya lhadhi.

²³ Dequide chi begüeexxatta ca nua ca biꞌiniha nna utixxattebacana ca biꞌiniha lisiyya. Nianna rácana nu du rapa roꞌo lisiyyaha gapa tsitsina ca biꞌiniha.

²⁴ Dequide rácana nua anía nna begaꞌattebana Pablo lenbi Silas lheꞌe lisiyya do axta lhiꞌuru, atti bedágattebana niꞌa ca biꞌiniha lheꞌe ttu yaga xxeni do belea lheꞌeni.

²⁵ Ttiaca tu riloelaha nna udulotteba Pablo lenbi Silas rinnecabi leni Tata Do Iyyabaaha, rulhacabi gue Benniha lhe. Adí ca nu te lisiyya nna siba beacacana qui rudo nagacani.

²⁶ Attirba chi bixú idí, ttuttíru bitá axta lo cimientu gue lisiyyaha, atti xeaba beali ca puerta yaya roꞌo ca yoꞌo sia lheꞌe lisiyya. Nianna iyába ca nu te lisiyyaha beasi ca cadena xicacanaha.

²⁷ Atti bebani nu du rapana roꞌo lisiyyaha, nianna bilenna chi du yali ca puerta yaya roꞌo nua nna uleattebana espada gueniha diana uxxudi lheꞌeni cumu raquinna ga chiba bexunni ca nu yaya lisiyyaha.

²⁸ Ttiaca Pablo nna uresiꞌattebabi rábi na: —¡Bittu unlu aná! ¡Niba seꞌe iyába riꞌitu!

²⁹ Laniala nna unnaba nua ttu gui qui ilenna atti rigánina utaꞌana tu rixidibana de rasbinna bedú xibini lo Pablo lhe lo Silas lhe,

³⁰ laniala bebeana ca biꞌiniha, nianna unnaba tisattebana rán cabi: —Xa tata, ¿bila anca nu unia qui lháya bittu tsia nittia?

³¹ Lacabi nna becabittebacabi gueni rácabi na: —Güia lelu Jesús, Benni bananie ri-na, lania nna gualábalu itupa lenlu ca benni datíalu seꞌe lheꞌe lisluha.

³² Laniala nna utixxiꞌencabi na ca tisa gue Benni bananie ri-na lenna iyába ca benni seꞌe lheꞌe lisniha.

³³ La lo relatteba utí nu du rapa roꞌo lisiyyaha lo ca güee gue Pablo lenbi Silas. Nianna uditteba nua inda itupa lenna ca benni seꞌe lheꞌe lisniha.

³⁴ Laniala nna dechena ca biꞌiniha lisniha, qui begona cabi yetta. Lana lenna iyába ca benni seꞌe lheꞌe lisniha nna tsitsiba reꞌo lecani de chi güia lecani Tata Do Iyyabaaha.

³⁵ Atti guaniha nna dilatte udhelha ca xuedaha chupa ca nu riseꞌe rapa roꞌo yoꞌo lagüiha diacana sayúcana nu du rapa roꞌo lisiyyaha qui ebeana Pablo lenbi Silas.

³⁶ Unnuha nna rána Pablo: —Ca xuedaha nna chi udhelhacana nu bettettixxiꞌa-na dequi chiba anca ebeaya le lheꞌe lisiyya-ni. Larcala chiba anca eríale. Lhatsiru gualeyya.

³⁷ Ttiaca Pablo nna ráttebabi ca nu riseꞌe rapa roꞌo yoꞌo lagüiha: —Riꞌitu ancatu benni Roma. Cuentaba chi begüeexxattacana riꞌitu aníba lo benni. Lacana nna niba lä ulequilicana bixa bentu. Nianna begaꞌarcana riꞌitu lheꞌe lisiyya-ni nna. Nnanna nna runcana ebeacana riꞌitu sigába. ¡Bittu! ¡Läga ería riꞌitu! Labacana ita sangacana ebeacana riꞌitu.

³⁸ Ca nua nna besinttebacana utixxiꞌaquinna ca xuedaha nu rá ca biꞌiniha. Lacana nna usittebaquinna atti binacana dequi anca ca biꞌiniha benni Roma.

³⁹ Laniala nna güia ca xuedaha guannabacana elha xen lasi lo Pablo lhe Silas lhe. Dequide bebeacana cabi lheꞌe lisiyya nna belisattebacana cabi leni tisa tsee qui eríacabi lheꞌe yiesiha.

⁴⁰ Atti chi bería Pablo lenbi Silas lisiyya nna deyyaxeattebacabi besincabi lisi Lidia. Dequide unne lencabi ca benni ria le Jesús, beseꞌetsitsichaticabi ca biꞌiniha lhe laniala nna bedáttebacabi deyyacabi.