Hechos 15 - Zapoteco de Aloápam

Ca biꞌini bedheti ca tisa beleꞌenie lencabi ca benni anca nu lo gue ca benni ria le Jesús bitupacabi Jerusalén

¹ Laniaguaba nua udá ttu chupa ca unbiyuu seꞌe lo yu gue Judea bisíncabi lheꞌe yiesi Antioquía. Nianna udulottebacabi beleꞌequinbi ca benni ria le Jesús bittu anca benni Israel seꞌe nía, rácabi ca biꞌiniha: “Läga odilá Tata Do Iyyabaaha cabi gansi bittuba cuecabi senni nu runcana ca unbiyuu Israel attiba rá ca ley bodhaꞌana Moisés.”

² Ttiaca Pablo lenbi Bernabé nna uyuꞌuttebacabi bitilha tisacabi len ca unnuha lo niꞌa gue nu rá ca nua. Laniala nna bodúcabi Pablo lenbi Bernabé, adírba ca benni ria le Jesús lhe qui tsiacabi lheꞌe yiesi Jerusalén sanne lencabi ca benni deaparu elha rieni anca nu lo gue ca benni ria le Jesús, ca biꞌini bedheti ca tisa beleꞌenie seꞌe nía lhe gue nu chi unnecabiha.

³ Dequide chi udhelha ca benni ria le Jesús seꞌe lheꞌe yiesi Antioquía ca biꞌiniha nna utettebacabi deca lo yu te láni Fenicia, lo yu te láni Samaria lhe lacabi nna utixxiꞌattebaquinbi ca benni seꞌe nía dequi ca benni dittu lhe chiguaba bedaxxucana neda gue Tata Do Iyyabaaha. Laniala nna iyáxeaba ca benni ria le Jesús seꞌe nía beꞌolhaba lecabi de binacabi nua.

⁴ Atti bisína Pablo lenbi Bernabé lheꞌe yiesi Jerusalén nna ca benni ria le Jesús lencabi ca benni deaparu elha rieni anca nu lo guecabiha lhe ca biꞌini bedheti ca tisa beleꞌe Jesús lhe chi seꞌetseecabi ribedacabi ca biꞌiniha. Pablo lenbi adí ca biꞌiniha nna utixxiꞌattebaquinbi ca benni seꞌe nía iyába bixa chi ben Tata Do Iyyabaaha lencabi.

⁵ Ttiaca ttu chupa ca benni fariseo chi ria lecani Jesús seꞌe nía nna udulíttebacabi rácabi: —Labíaba raca duelha uren senni unbiyuu bittu anca benni Israel chi ria le Jesús, udoguabacana tisa gue ca ley bodhaꞌana Moisés lhe.

⁶ Laniala nna beaxi loesi ca biꞌini bedheti ca tisa beleꞌe Jesús lencabi ca benni chi deaparu elha rieni anca nu lo guecabiha qui innecabi gue nu rá ca nua.

⁷ Dequide chi unnexxattacabi gue nua nna laniala udulí Pedro unnebi rábi ca biꞌiniha: —Xa betsito, lebiꞌi gua yuxeabale, axta ttuali becuee Tata Do Iyyabaaha neti, la lheꞌe lebiꞌiba qui tsequia quixxiꞌaya gue Jesús atta seꞌe ca benni dittu-na qui tsia lecani Ben-na.

⁸ Cumu Tata Do Iyyabaaha Benni yue ttixa anca lheꞌe lastoo ttu tturi chiba beleꞌe loe dequi güedibe cana. Nuarca betee Espíritu guee lencana attiba riꞌi.

⁹ Tata Do Iyyabaaha nna ttuba runie len riꞌi lhe leni ca unná lhe lee nna chiguaba benie nari lhiꞌu lheꞌe lastoocani de güia lecani Jesús.

¹⁰ Lebiꞌi nna ¿biaca rutseꞌenle Tata Do Iyyabaaha? Rdacale uni ca benni dittu chi ria le Jesús ttu nu niba riꞌi lhe ca benniola gueriha lhe bittu udácabi uncabi.

¹¹ Riꞌi nna riaba leri, de bedába le Jesús Benni bananie ri-na odile ri nuarca ulári, anáguaba ca unná lhe.

¹² Laniala nna iyábacana beaca sicana rudo nagacani gue Bernabé lenbi Pablo riguixxiꞌacabi gue ca milagru lhe gue ca nu runi rebaninri lhe chi beni Tata Do Iyyabaaha bencabi atta seꞌe ca benni dittu.

¹³ Atti uluxa unnecabiha nna udulítteba Jacobo rábi: —Betsito, gualudo nagale quia.

¹⁴ Simón-ni chi utixxiꞌenbi ri gue gasná uca desde primeroha li uca lani Tata Do Iyyabaaha ca benni bittu anca benni Israel-na, qui ulequiesie ca benni aca guee lheꞌe yiesi gue ca unná.

¹⁵ Nu beni Ben-na raxxína leni nu unnee ca benni uca profetaha, attiba rá lo ca sitsi gue Ben-na atta rá:

¹⁶ Isía sá eyequia echidha yoꞌo gue David nu chi ubixxina. Eyonia ca deꞌe biseꞌelona lhe atti echidhana attu libe,

¹⁷ qui anáchu adí benni nna odequi locani eguilacana neti itupa leni iyá ca benni dittu chi uxia acacana quia.

¹⁸ Anía rá Benni bananie ri-na, lee chi utixxiꞌe iyába unní axta atti nía li.

¹⁹ ’Jacobo rárguababi: Larcala neti nna racatia, läga dica unri duelha gue ca benni dittu chi bedaxxu neda gue Tata Do Iyyabaaha uncabi nu rá ca ley bodhaꞌana Moisés.

²⁰ Riꞌi nna nu unlari nna idhelhari sitsi lencabi qui bitturu gocabi elha go gue nu rutecana úna len ca nu rácana anca diosi-na, bitturu isácana nu bittu anca latselacani lhe. Anáguaba bitturu gocabi bela gue nimala utti bidí yienni lhe niguaba reni lhe.

²¹ Cumu desde ca ttu nu reali chi beseꞌe lheꞌe ttu ttu ca yiesi ca benni riguixxiꞌacabi ca ley bodhaꞌana Moisés. Ca benniha unna rulabacana lheꞌe ca yoꞌo atta rudhetiri ca tisa gue Tata Do Iyyabaaha atti risía ca sá redí leri-na.

Ca benni ria le Jesús seꞌe Jerusalén ridhelhacabi sitsi leni ca benni dittu

²² Ca biꞌini bedheti ca tisa beleꞌe Jesús lhe ca benni deaparu elha rieni anca nu lo lhe iyába ca benni ria le Jesús lhe boquinnatteba iquicabi ucueecabi ttu chupa ca benni sela len lacabi qui idhelhacabi ca biꞌiniha leni Pablo lhe Bernabé lhe qui tsiacabi lheꞌe yiesi Antioquía. Nianna bodúttebacabi Judas, biꞌini láguaba Barsabás, Silas lhe ca biꞌiniha nua ancacabi benni raparu ca benni ria le Jesús seꞌe nía respeto.

²³ Len ca biꞌiniha udhelhacabi sitsi nu rá loni aní: “Riꞌitu, ca biꞌini bedheti ca tisa beleꞌe Jesús lentu ca benni deaparu elha rieni anca nu lo gue ca benni ria le Jesús, ni ridhelhatu ttu padiuxi guele lebiꞌi ca benni dittu chi ria lele Jesús seꞌe lheꞌe yiesi Antioquía lhe daca lo yu gue Siria lhe daca lo yu gue Cilicia lhe.

²⁴ Riꞌitu chi binatu dequi chi bita ttu chupa ca benni sela riꞌitu atta seꞌele-na. Ca unnuha nna läga riꞌitu udhelhatu cana, titúba ca unnuha bitacana atta seꞌele-na. Lacana nna chi bettacannacana iquile leni nu betteleꞌequinnale, cumu rácana le dequi labíaba udole tisa gue ca ley bodhaꞌana Moisés lhe cue senni ca unbiyuu-na lhe.

²⁵ De nua nna ttuba chi beseꞌetu unnetu boquinna iquitu idhelhatu ttu chupa ca benni sela len riꞌitu atta seꞌele-na, lencabi Pablo lhe Bernabé lhe ca benni raca betsiri raquinri guecabi.

²⁶ Ca biꞌin-ni nna tsaba chi berú iqui berú lecabi masquiba gatticabi de riguixxiꞌacabi ca tisa gue Jesucristu, Benni bananie ri-na.

²⁷ Larcala nna udhelhatu Judas lenbi Silas qui cuinaga lacabi quixxiꞌatseequinbi le gaxasná anca tisa chi begüeetu.

²⁸ Espíritu gue Tata Do Iyyabaaha lenie riꞌitu nna chi boquinna iquitu, lärga udo duelhatu le unle attu bixarua. Suntteba nu rá lo sitsi-ni raca duelha unle,

²⁹ delába bitturu gole elha go gue nu rutecana úna leni ca nu rácana anca diosi-na, bitturguaba gole reni lhe niguaba bela gue nimala utti bidí yienni lhe. Anáguaba bitturu isále nu bittu anca latselale. Gansi lebiꞌi unle nu rátu-ni nna tseeba salíanle. Lhatsiru gualtseꞌe.”

³⁰ Nianna dequide chi bechú tisa loescabi nna biríattebacabi lhiaxu diacabi deca lheꞌe yiesi Antioquía. Atti bisíncabi nía nna uxíttebacabi iyába ca benni ria le Jesús seꞌe nía, qui begüeecabi ca biꞌiniha sitsi nojacabiha.

³¹ Atti chi belaba ca benni seꞌe nía lo sitsiha nna beꞌolhaba lecabi gue elha xen lasi rute ca benni udhelha sitsiha.

³² Cumu Judas lenbi Silas ancacabi profeta. Larcala xxeniba nu unnecabi rácabi ca benni ria le Jesús seꞌe nía qui bettipacabi le ca biꞌiniha lhe betecabi elha xen lasi len ca biꞌiniha lhe.

³³ Dequide chi uca isá useꞌe ca biꞌiniha nía, laniala nna bechú tisa ca benni ria le Jesús Judas lenbi Silas qui eyequi ca biꞌiniha esíncabi atta seꞌe ca benni udhelhacabi ca biꞌiniha.

³⁴ [Ttiaca Silas nna radi lebi eyaꞌanbi nía.]

³⁵ Pablo lenbi Bernabé nna níaba beꞌancabi lheꞌe yiesi Antioquía. Lacabi nna güequittebacabi güeleꞌe lhe ugüixxiꞌa lhe ca tisa gue Benni bananie ri-na lencabi adí ca benni ria le Ben-na seꞌe nía.

Pablo lenbi Bernabé ulhaꞌa lheꞌe loescabi

³⁶ Isába uca nna lenla nna rá Pablo Bernabé: —Tsiari sannalhiri ca benni chi bianini ca tisa gue Jesús seꞌe lheꞌe ttu ttu ca yiesi atta chi guatixxiꞌari ca tisa gue Ben-na, qui ugüiari gaxasná seꞌecabi.

³⁷ Bernabé nna rdacabi ichecabi Juan, biꞌini láguaba Marcos.

³⁸ Ttiaca Pablo nna läga uyuꞌu lebi ichecabi Marcos, cumu atti uchecabi biꞌiniha nna bedaa Panfilia bequibi. Lärga uca lebi tsia lenbi ca biꞌiniha qui quixxiꞌacabi ca tisa gue Jesús.

³⁹ Idíba bencabi nua, nuarca ulhaꞌa lheꞌe loescabi. Bernabé nna uchettebabi Marcos diacabi bedaxxucabi barco nu dia daca lo gue Chipre.

⁴⁰ Pablo nna becueettebabi Silas. Nianna dequide bocaꞌan ca benni ria le Jesús seꞌe nía cabi las ná Benni bananie ri-na, biríattebacabi diacabi.

⁴¹ Laniala nna utecabi daca lo yu gue Siria lhe daca lo yu gue Cilicia lhe ruseꞌetsitsicabi ca benni chi ria le Jesús seꞌe nía.