Hechos 13 - Zapoteco de Aloápam

Bernabé lenbi Saulo udulocabi rixxiꞌacabi gue Jesús

¹ Leni ca benni ria le Jesús seꞌe lheꞌe yiesi Antioquía, nía sela ca benni anca profeta lhe ca benni ruleꞌe ca tisa gue Tata Do Iyyabaaha lhe delába Bernabé lhe Simón biꞌini teeguabaquinna lábi Nu Yadhi lhe Lucio benni beaca lasbi Cirene lhe Manaén benni bixeni la ttuba lheꞌe yoꞌo leni Herodes, nu unnabiana lo yu gue Galilea lhe. Níaguaba sela Saulo.

² Ttu sá nna laca yuꞌucabi ribequixxencabi Tata Do Iyyabaaha lhe rutte ubina lheꞌecabi lhe unnetteba Espíritu gue Tata Do Iyyabaaha re ca biꞌiniha: —Gualcuequiesi Bernabé-na lenbi Saulo-na qui uncabi sina nu chi gaꞌanatia uncabi.

³ Laniala nna dequide ute unnecabi leni Tata Do Iyyabaaha lhe bette ubina lheꞌecabi lhe bexxúatteba nácabi iqui ca biꞌiniha qui aca len Benni bananie ri-na ca biꞌiniha, atti bechú tisattebacabi ca biꞌiniha.

Pablo lenbi Bernabé riguixxiꞌacabi ca tisa gue Jesús lo yu te láni Chipre

⁴ Udhelatteba Espíritu gue Tata Do Iyyabaaha Bernabé lenbi Saulo tsiacabi daca lheꞌe yiesi Seleucia. Nía bedaxxucabi barco nu uchencabi deca lo yu re lagüi indattoo lána Chipre.

⁵ Atti bisíncabi lheꞌe yiesi Salamina nna udulottebacabi utixxiꞌacabi ca tisa gue Tata Do Iyyabaaha lheꞌe ca yoꞌo atta rudheti ca benni Israel ca tisa gue Benniha. Níaguaba sela Juan Marcos runbi yuda ca biꞌiniha.

⁶ Dequide chi utecabi itúba lo yu re lagüi indattooha nna bisínttebacabi lheꞌe attu yiesi nu lá Pafos. Nía guattiꞌacabi ttu güesaa, ancana nu Israel lána Barjesús, unnuha nna run leni rána dequi ancana profeta.

⁷ Güesaaha nna tseeba do lenna nu rinnabiana yiesiha lána Sergio Paulo. Nua ancana ttu unbiyuu re dhína iquini. Lana nna benttebana mandadu guaxxícana Bernabé lenbi Saulo cumu raca leni udo nagani ca tisa gue Tata Do Iyyabaaha.

⁸ Ttiaca güesaa lá Barjesús nu teeguaba láni Elimas leni tisa griego, udulottebana unnena richúna lo ca benni rinneha qui bittu tsia le Sergio Paulo ca tisa gue Jesús.

⁹ Saulo, biꞌini láguaba Pablo nna cumu yuꞌu galába itúba lheꞌe cuerpu guebi Espíritu gue Tata Do Iyyabaaha, begüiattebabi ttu liba loni

¹⁰ atti rábi na: —¡Lu nna ancalu ttu nu güen lasi, nu runi nu satsa lhe xiꞌini nu xxegüi lhe nu bittu raca uyúna iyába nu anca tsee! ¿Núcala udú silu rutsiattalu ca benni lo neda gue Tata Do Iyyabaaha?

¹¹ Nnanna nna utee Benniha ttu elha disa guelu. Xuaba lolu nnanna isá bitturu ilenlu xieni gue tatubisa-na. Lagüiba dubi rinnebiha nna bechulhatteba lo Elimas, tsaba bitturu bilenna dhana. Lana nna udulottebana requina reguilana sabiꞌaba nía nuxa galhina náni cumu tsa lärga rilenna.

¹² Atti biláni nu rinnabiaha nu ucaha nna güiatteba leni Jesús, rebanbinna gue ca tisa gue Benniha ruleꞌe Pablo lenbi adí ca biꞌiniha.

Pablo lenbi Bernabé rixxiꞌacabi ca tisa gue Jesús lheꞌe yiesi Antioquía

¹³ Pablo nna lenbi adí ca biꞌini dia lenbiha nna bodaxxuttebacabi barco roꞌo indattoo gue yiesi Pafos, besincabi lheꞌe yiesi Perge nu re lo yu te láni Panfilia. Bedaa nía bodhaꞌana Juan Marcos ca biꞌiniha, nianna bequittebabi deyyabi lheꞌe yiesi Jerusalén.

¹⁴ Dequide bedácabi Perge besinttebacabi Antioquía, yiesi re lo yu te láni Pisidia. Atti bisía sá redí le ca benni Israel nna utaꞌattebacabi lheꞌe yoꞌo atta rudheti ca nua ca tisa gue Tata Do Iyyabaaha, atti usiattebacabi.

¹⁵ Dequide chi uluxa belabacabi ca ley gue Tata Do Iyyabaaha lhe ca tisa dia lo ca sitsi bocaꞌana ca profetaha lhe laniala nna unne ca nu rinnabia lheꞌe yoꞌoha rácana ca biꞌiniha: —Xa betsito, gansi te ttu tisa guele innele ulisale ca benni seꞌe-ni qui tseꞌetsitsicabi lo neda gue Tata Do Iyyabaaha nna gualte daca-ni, gualnne.

¹⁶ Laniala nna udulí Pablo bettá nábi beleꞌenbi cana qui eyaca sicana, atti unnettebabi rábi: —Gualdo nagale, benni Israel lhe iyábale ca benni dittu lhe atta rapale Tata Do Iyyabaaha respeto.

¹⁷ Tata Do Iyyabaaha gue ca benni Israel-ni becuee ca benni uca benniola gueriha. Benie guanicabi lhe ucacabi benni ra xxeni leni lhe atti sna seꞌebacabi ancacabi benni dittu lo yu te láni Egipto. Dequila lania nna bebequie ca biꞌiniha lo yu atta useꞌecabiha leni elha ra xxeni le guee.

¹⁸ Delo chua (40) ida bechie biyúe ca biꞌiniha atti güequicabi lo yu bisi.

¹⁹ Gasi ca yiesi elha betseꞌe loe daca lo yu te láni Canaán qui uca betee ca lo yu gue ca nua leni ca benni uca benniola gueriha.

²⁰ Iyába unní uca lheꞌe delo ttapa gayua yuꞌu medi gayua (450) ida. ’Lenla nna boseꞌe xueda unnabiana ca biꞌiniha, bedaa profeta Samuel uca xueda.

²¹ Dequila nna unnabacabi edú ttu nu innabia xeni qui nneruna locabi. Laniala nna bodú Tata Do Iyyabaaha Saúl, xiꞌini Cis, unnuha nua datíana ca benni gue Benjamín. Lana nna unnabiana chua (40) ida.

²² Lenla nna utúe Saúl. Nianna bodúe David qui acabi nu innabia ca benni Israel. Gue biꞌiniha nua unnee atti re: “Neti chi guatiꞌaya David, xiꞌini Isaí. Lana ancana ttu unbiyuu radi lasia gueni, lana unna iyába nu raca lasia lhe.”

²³ Jesús anque Benni datía David, Benniha nua udhelha Tata Do Iyyabaaha qui odile ca benni Israel, benbe attiba chi begüee tisa unie.

²⁴ Atti bittu chi bisía Jesús, Juanba requi riguixxiꞌenbi iyába ca benni Israel qui odú xiyyancana odaxxucana neda gue Tata Do Iyyabaaha, gadicana inda lhe.

²⁵ Atti chi deoba lhuxa sina nu chi gaꞌana unbi nna rábi: “Läga neti nua anca nu rulaba lele gueni isía. Ttiaca dequide neti nna isía ttu Benni bittu elha ralha idhasia lo ca guaracha guee.”

²⁶ ’Lebiꞌi, xa betsito, ca benni datíale Abraham, lebiꞌi ca benni dittu atta gua rudole tisa gue Tata Do Iyyabaaha lhe gue iyábari anca ca tisa udhelha Ben-na ca ben-na rixxiꞌacanie ri gaxasná odilá Tata Do Iyyabaaha ri qui bittu tsia nittiri.

²⁷ Cumu ca benni seꞌe lheꞌe yiesi Jerusalén, lencana ca nu rinnabia guequinna läga utedaaquinna nuxa anca Jesús, bittuguaba radú lecani gue ca tisa dia lo sitsi bocaꞌana ca profetaha lhe ca benni rulabacana lheꞌe ca yoꞌo atta rudheticana ca tisa gue Tata Do Iyyabaaha ca sá atti redí lecani. Larcala atti betecana Jesús las ná ca nu betticana Benniha, lania guaxxína nu rá ca tisa dia lo ca sitsi-na.

²⁸ Masquiba bittu birialíquinna bixa lo niꞌa gue gatti Benniha, lacana nna labíaba unnabacana leni Pilato qui innabia nua utticana Benniha.

²⁹ Nianna dequide chi uluxa bedhacacana Benniha iyába nu rinne lo ca sitsi gue Tata Do iyyabaaha nna laniala belhidacane lo ya crusiha qui becatsicane.

³⁰ Ttiaca Tata Do Iyyabaaha nna belhidhe Benniha lheꞌe baa atta yuꞌu ca benni yatti-na.

³¹ Ixeru ubisa beleꞌe loe len ca benni denalhacabi Benniha atti biríe lo yu te láni Galilea bisíne lheꞌe yiesi Jerusalén. Nnanna nna ca biꞌiniha unna requicabi riguixxiꞌaquinbi ca benni gue Jesús.

³² ’Anáguaba riꞌitu, riguixxiꞌaguabintu le ca tisa gue Ben-na, delába nu chi rá Tata Do Iyyabaaha ca benniola gueriha unie.

³³ Unnuonni chi benie nnanna len riꞌi cumu ancari benni datía ca biꞌiniha. Atti belhidha Tata Do Iyyabaaha Jesús lheꞌe baa atta yuꞌu ca nu yatti-na, lania guaxxína ca tisa rinne benna lo Salmo berupa-na atta re: Lu ancalu xiꞌinia, neti bijalu nasá.

³⁴ Tata Do Iyyabaaha nna chila unne re echidhabe Jesús lheꞌe baa atta yuꞌu ca nu yatti-na qui tsa bittu usu cuerpu guee, attiba re lo ca sitsi guee-na atta rá: Gunba saxxína aca len lebiꞌi nu tsee rá ca tisa chi begüeea len David.

³⁵ Larcala rá David Tata Do Iyyabaaha lo attu Salmo-na: Bittu ugüelhalu nnitti cuerpu gue Benni do riesinlu anca guelu-na.

³⁶ Gualíba, David nna dequide bixuubi lo ca benni useꞌe atti udobiaha, benbabi nu rába Tata Do Iyyabaaha bi unbi, atti uttibi nna bigatsibabi attiba bigatsi ca benniola guebiha. Larcala cuerpu guebiha nna usuba nua.

³⁷ Ttiaca Benni bechidha Tata Do Iyyabaaha lheꞌe baa-na, läga usu cuerpu gue Benniha.

³⁸ Larcala, xa betsito, raca duelha unale nu riguixxiꞌentu le-ni, cumu leni nu chi guate Jesús lo ya crusiha liba guate elha xen lasi gue ca tulha gue ca benni.

³⁹ Ca ley bocaꞌana Moisés nna läga udá ca nua cuacana ca tulha gue ca benni, ttiaca iyába ca benni ria lecani Jesús te elha xen lasi guecani, de Benniha nna reacacana Benni bittu tulha gueni te.

⁴⁰ Larcala, lebiꞌi nna tsitsi gualgüia qui bittu satele loesi nu dia lo ca sitsi beni ca benni uca profeta, atta rá:

⁴¹ ¡Gualgüia, lebiꞌi ca nu bittu ria lele Güebanbinle nna lhuxabale cumu ca sá atti seꞌele yies lo yu-ni nna unia ttu nu unia, lebiꞌi nna läga tsia lele gansi chi bilenle na masquiba nuxa quixxiꞌenna le gue nua!

⁴² Atti bería Pablo lenbi Bernabé lheꞌe yoꞌo atta rudheti ca benni Israel ca tisa gue Tata Do Iyyabaaha nna ca benni seꞌe nía nna ráttebacabi ca biꞌiniha: —Itale attu libe agüesía qui quixxiꞌachatinle riꞌitu gue nu riguixxiꞌale-na.

⁴³ Dequide chi besatsa benni nna ixeru ca benni Israel lhe ca benni ria lecani attiba ria le ca nu Israel lhe guanalhattebacana Pablo lenbi Bernabé. Lacabi nna ráttebacabi cana usiguicana tseꞌetsitsicana lo neda gaꞌana tsee chi bedá lee Tata Do Iyyabaaha betee len lacana.

⁴⁴ Atti chi guadona xumanu bedesía sá atti redí le ca benni Israel nna lattiba la bea ca benni seꞌe lheꞌe yiesiha güiacana qui udo nagacani ca tisa gue Tata Do Iyyabaaha.

⁴⁵ Ttiaca atti biláni ca benni Israel de yatterba de re ca benni bisína nía nna lacana nna upattebacana malisi, atti udulottebacana bitti rábacana recabicana gue Pablo, riguecana iquibi lhe.

⁴⁶ Laniala nna unnee Pablo lenbi Bernabé itú iqui itú lecabi becabicabi rácabi cana: —Riꞌitu nna daba lotu quixxiꞌatu ca tisa gue Tata Do Iyyabaaha primertteba len lebiꞌi, ca benni Israel. Ttiaca lebiꞌi nna riguꞌula niꞌale ca tisa-ni. Leni unná nna ruleꞌe lole dequi bittu elha ralhale gatta elha nabani guele ttu dia lii. Larcala denua nna leni ca benni dittu la quixxiꞌatu ca tisa-ni.

⁴⁷ Cumu anába chi beni Benni bananie ri-na riꞌitu mandadu untu. Ben-na nna re: Lu chi bodúa qui acalu xieni gue ca benni dittu, qui icheelu ca tisa quia-ni lhe, acalu benni quixxiꞌenlu axta ca benni seꞌe xiꞌa gue yies lo yu-ni gaxasná lhácana qui bittu tsia nitticana.

⁴⁸ Atti bienini ca benni bittu anca benni Israel nu unnecabiha nna laniala bedaca lecani de beꞌoba lecani. Nianna ráttebacana: —¡Carbáru! ¡Anílirba de tsee anca ca tisa gue Benni bananie riha! Laniala nna güia le ca benni chi gaꞌana gatta elha nabani guecani ttu dia lii.

⁴⁹ Aní uca nna bisína ca tisa gue Benni bananie ri-na lheꞌe iyába ca lheꞌesi seꞌe ca nía.

⁵⁰ Ttiaca ca benni Israel nna unnetteba lencana ca nuila ria le ca tisa gue Tata Do Iyyabaaha ca nu ra xxeni lecani lo yiesiha lhe unneguaba lencana ca unbiyuu anca nu lo gue yiesiha lhe ca unnuha nna betsatsattebacana benni, qui besía le ca nua Pablo lenbi Bernabé. Ttutirba bebeacana ca biꞌiniha lo yu guecaniha.

⁵¹ Pablo lenbi Bernabé nna becuibitteba biste yu niꞌacabi aní lo ca nua, cumu unnuha runi qui ttedaaquin ca unnuha bittu anca tsee nu bencanaha lo Tata Do Iyyabaaha. Laniala nna diacabi deca lheꞌe yiesi Iconio.

⁵² Ttiaca ca benni güia lecabi Jesús seꞌe lheꞌe yiesiha nna attulade redaca lecabi, chi yuꞌu Espíritu gue Tata Do Iyyabaaha itúba lheꞌe cuerpu guecabi lhe.