Hechos 12 - Zapoteco de Aloápam

Ingeli gue Tata Do Iyyabaaha bebequie Pedro lheꞌe lisiyya

¹ Laniaguaba nua udulo Herodes nu rinnabiaha bedaxxuna ttu chupa ca benni ria le Jesús qui odidhaca siꞌincabi.

² Lana nna unnabiattebana betticana Jacobo betsi Juan leni espada.

³ Atti biyúna dequi gua reꞌoba le ca nu Israel gue nu benna laniala nna bodidaxxuttebana Pedro. La laniaguaba nua bisía laní atti ro ca benni Israel ttaxtila nu bittu levadura ria lenna.

⁴ Dequide la chi bedaxxucana Pedro nna unnabiatteba Herodes bedelhacan biꞌiniha lisiyya, cumu belaba leni cueana biꞌiniha ni lo benni dequide chi ute laní nu te láni Pascua. Lana nna beseꞌettebana ttapa xxia ca soldado, ca nu ugüiacana biꞌiniha qui bittu eríabi. Ttapa ttapa ca benni sela lheꞌe ttu ttu xxiaha.

⁵ Nuarca tsitsiba rapacana Pedro. Ttiaca ca benni ria le Jesús tsaba bittu redí lecabi rinnabacabi leni Tata Do Iyyabaaha gue Pedro.

⁶ La ulha atti tsan dila cuea Herodes Pedro udún bi lo ca benni nna labi nna tebabi tiꞌedhibi lagüi chupa ca soldado gue Herodes. Xicabi chupa cadena. Laca adí ca soldadoha nna tsitsiba rapacana roꞌo lisiyyaha.

⁷ Attirba chi ucaxxe ttu ingeli gue Tata Do Iyyabaaha, nianna tsaba betú lheꞌe lisiyyaha uyuꞌuchaba xieni. Ingeliha nna benipattebe lhuitta Pedro qui ebanbi, nianna re biꞌiniha: —¡Jerttexxirga guadha! Ca cadena xxica ná Pedro nna xeaba bitúatteba ca nua biyinnacana lo yu.

⁸ Ingeliha nna ráttebe: —Beocu xolu nna boleatte guaracha guelha lhe. Pedro nna ráttebabi: —O. Nianna redea ingeliha bi: —Beocu lari guelha lhe atti betátte betenalha neti.

⁹ Pedro nna beríattebabi denalhabi ingeli gue Tata Do Iyyabaaha, ttiaca läga yubi gansi nu runi ingeliha ancana nu gualí, cumu labi nna raquinbi dequi lo bisíala guebabi nua ruleꞌenbi anía.

¹⁰ Betebacabi lo ttu soldado du rapa nía nna bedetettebacabi lo attuna. Atti besincabi atta du puerta iyya du roꞌo neda nna ttitúba nua bealina beríacabi. Dequide chi belhácabi lo neda te nía nna benitti lotteba ingeliha, atturba Pedro beꞌanbi.

¹¹ Lania liba utedaatseenbi. Nianna rábi: —Nnanna liba chi yua gualíba udhelha Benni bananie ri-na ingeli guee-ni betedile neti lo ná Herodes, lo iyába nu chi rele ca nu Israel-na udhacacana neti lhe.

¹² Dequide chi utedaani Pedro gue iyába nu guatebi nna deyyattebabi lheꞌe lisi María, nan gue Juan biꞌini teeguaba lábi Marcos. Nía nua seꞌe ixeru ca benni rinnecabi leni Benni bananie ri-na rinnabacabi aca leni Benniha bi.

¹³ Atti unne Pedro roꞌo puerta gue yoꞌo do deca lo nedaha nna biríatteba ttu nuila rbani lána Rode bedo nagani nuxa nua rnne.

¹⁴ Dequide beaca bienna tsiꞌi Pedro nna de reꞌoba leni nna niba lä udhalna yoꞌoha, bexunnilana bequina betaꞌana lhiꞌu guattixxiꞌana Pedroba biꞌiniha rinnebi roꞌo yoꞌoha.

¹⁵ Ca benni seꞌe nía nna rácabi uncuitiha: —¡Iquibalu raca! Ttiaca uncuitiha nna tu duba nua rána: —¡Gualíbatia, biꞌinihaba biꞌin-na! Laniala nna redenácabi: —Läga labi unná. Ingeli guebabi unná.

¹⁶ Pedro nna tu dubabi rinnebi roꞌo yoꞌoha, attirba udhalcabi nna biláttebaquinbi biꞌiniha. Nianna bebanbaquinbi.

¹⁷ Labi nna bettátteba nábi beleꞌenbi cabi qui eyaca sicabi. Laniala nna utixxiꞌenbi ca biꞌiniha gaxasná uca bebea Benni bananie ri-na bi lheꞌe lisiyyaha. Ráguabi ca biꞌiniha quixxiꞌaquinbi Jacobo lhe adí ca benni ria le Jesús lhe gue nu guatebi. Atti biríattebabi diabi attu atta subi.

¹⁸ Guan dila nna bisatsatteba ca soldadoha cumu läga guanniquinna ga ladu dia Pedro.

¹⁹ Herodes nna benttebana mandadu beguilacana biꞌiniha, ttiaca läganu guattiꞌacana. Laniala nna bedelhana nu ucaha cuꞌe ca nu seꞌe rapacana roꞌo lisiyyaha, atti unnabiattebana betticana ca nua. Dequide nua nna biríatteba Herodes lo yu gue Judea güiana guadhona lheꞌe yiesi Cesarea.

Aní uca utti Herodes

²⁰ Herodes nna risaꞌabinna leni ca benni seꞌe lheꞌe yiesi Tiro lhe leni ca benni seꞌe lheꞌe yiesi Sidón lhe. Ttiaca ca unnuha nna ttuba beseꞌecana qui tsiacana güenne leni Herodes, qui dhacana innábacana eseꞌe tsee lencana unnuha nna unnetteba lencana Blasto ttu ca uxtisi nu du gaxxaba leni Herodes qui utsá du nua cana loni, cumu ca lo yu atta rinnabia nuarba nua rixuu lena roꞌocana rocana.

²¹ Herodes nna bedúttebana ttu sá atti tsiacana sanne lencan na. La sá nna beocutteba xo tsee gueni. Nianna udottebana lo xxila atta ridona rinnabiana, atti udulottebana uluꞌuna libana.

²² Lania nna biyyatteba ca benni seꞌe nía rácana: —¡Benni rinne-ni nna läga benni unní, tata diosihaba benni rinne!

²³ Attirba chi ucaxxe ttu ingeli gue Tata Do Iyyabaaha betee ttu isagüee gue Herodes de begüeelhana rácan na anía, cumu bittu ulequi xenna Tata Do Iyyabaaha. Nianna uttibana de uto bedúa na.

²⁴ Tisa gue Tata Do Iyyabaaha nna tu diaba runa adí benni benniha lheꞌe iyába ca yiesi seꞌe itúba nía, anáguaba ttu diaba rani ca benni ria le Jesús.

²⁵ Atti chi uluxa sina beni Bernabé lenbi Saulo nna bedáttebacabi Jerusalén deyyacabi, dechebacabi Juan biꞌini láguaba Marcos.