Hechos 11 - Zapoteco de Aloápam

Pedro rixxiꞌabi bixa lo niꞌa gue güiabi atta seꞌe ca benni dittu

¹ Ca biꞌini bedheti ca tisa beleꞌe Jesús, leni adí ca benni chi ria le Jesús seꞌe lo yu gue Judea binacabi dequi ca benni bittu anca benni Israel chiguaba güia lecani ca tisa gue Tata Do Iyyabaaha.

² Ttiaca atti besin Pedro lheꞌe yiesi Jerusalén, ttu chupa ca benni Israel ria lecani Jesús, uxacatteba lencana Pedro.

³ Nianna rácan bi: —¿Biaca güialu lheꞌe lisi ca benni dittu, güea uto lenlu ca nua yetta lhe?

⁴ Pedro nna udulottebabi utixxiꞌenbi cana gaxasná uca güiabi nía, gue bixa guatebi lhe. Nianna rábi cana:

⁵ —Doba neti lheꞌe yiesi Jope. Nianna lagüiba doa rinnea leni Tata Do Iyyabaaha nna beleꞌettebatia attiba ttu lari nixula xica itapa laduba roꞌoni goadina dana lo bea-na ttu lixxaba daca atta doa.

⁶ Begüiaxxa tseeba bixa nua yuꞌu lheꞌe nua nna nía bilátia iyáloba nimala, ca nu sia ttapa niꞌa náni ruyú benni lhe ca nu requi iꞌiyattoo lhe anáguaba ca nu raꞌaya lheꞌecani lo yu lhe ca nu sia xxilacani lhe.

⁷ Laniala nna bientia tsiꞌi ttu Benni unnee re neti: “Pedro, udulí betti ca unná uto.”

⁸ Neti nna becabitteba ria: “Bittu, tata, cumu ni ttu libe lägabi chi uto neti nu anca satsa o nu anca tsiga lo cuinalu.”

⁹ Laniala nna bedennee benni unnee lo bea-na attu libe re: “Nu chi ben Tata Do Iyyabaaha nari, lärga dica quixxalu lá nua nu satsa o nu anca tsiga.”

¹⁰ Tsunna libe uca anía. Laniala nna beopi lariha deyyana lo bea-na.

¹¹ Suntteba ute uca nua nna attirba chi ucaxxe tsunna ca unbiyuu bisíacana roꞌo yoꞌo atta doha reguilacan neti. Ca unnuha nua udhelha ttu benni do lheꞌe yiesi Cesarea.

¹² Espíritu gue Tata Do Iyyabaaha nna ráttebe neti: “Güia len ca unná, tsa bittu ulaba lelu aquinlu bittu tsialu.” Udáguaba xxupa ca benni ria lecabi Jesús seꞌe-ni len neti lhe. Iyábatu nna utaꞌatu lheꞌe yoꞌo gue unbiyuuha.

¹³ Laniala nna utixxiꞌen nua riꞌitu gaxasná uca bilenna ingeli gue Tata Do Iyyabaaha ucaxxe lheꞌe lisniha. Nianna re na: “Udhelha nuxa tsia lheꞌe yiesi Jope qui saxxícana Simón biꞌini láguaba Pedro.

¹⁴ Biꞌiniha quixxiꞌenbi lu gaxasná unlu qui lhálu bittu tsia nittilu lenlu iyába ca benni guelu seꞌe lheꞌe yoꞌo guelhi.”

¹⁵ Atti uduloa unnea belisa ca nua nna bisíatteba Espíritu gue Tata Do Iyyabaaha uteꞌe lheꞌe cuerpu guecani, attiba bisíabe lheꞌe cuerpu gueri primeroha.

¹⁶ Laniala nna bexxa lasia ca tisa unne Benni bananie ri-na atti re: “Gualíba, Juan sunruba inda bixuinbi qui begadibi benni inda, ttiaca lebiꞌi nna gadile inda leni Espíritu gue Tata Do Iyyabaaha.”

¹⁷ Cumu ganna si Tata Do Iyyabaaha ruteguabe len ca unná loesi elha tsee chi betee len riꞌi, ca nu chi ria leri Jesucristu, Benni bananie ri-na, neti nna ¿nu anca qui uquiꞌaya lo neda gue Tata Do Iyyabaaha?

¹⁸ Atti bienini ca benni chi ria lecabi Jesús seꞌe lheꞌe yiesi Jerusalén iyába nu rá Pedro, laniala nna beaca sicabi. Nianna rácabi: —¡Xxeni ra lelu Tata Do Iyyabaaha! Anla chiguaba betelu lo neda gue ca benni bittu anca benni Israel-na qui odú xiyyancana udaxxucana neda guelu, lania nna gatta elha nabani guecani ttu dia liiba.

Aní uca udulo ca benni seꞌe lheꞌe yiesi Antioquía ria lecabi Jesús

¹⁹ Dequide chi utti Esteban nna udulotteba ca benni bería lacana ca benni ria le Jesús. Ca biꞌiniha nna bexunnittebacabi diacabi daca lo yu gue Fenicia lhe daca lo yu gue Chipre lhe daca lheꞌe yiesi Antioquía lhe. Lacabi nna tsa bitturu utixxiꞌaquinbi ca benni dittu gue Jesús, sunruba len ca benni Israel utixxiꞌaquinbi gue Ben-na.

²⁰ Ttiaca nía sela ttu chupa ca benni daa daca lo yu gue Chipre lhe daca lheꞌe yiesi Cirene lhe ca biꞌiniha nna atti utaꞌacabi lheꞌe yiesi Antioquía nna utixxiꞌattebaquinbi ca benni dittu seꞌe nía gue Jesús, Benni bananie ri.

²¹ Tata Do Iyyabaaha nna ucaba lanie cabi, larcala ixe ca benni güia lecani Jesús de güia lecani gue nu riguixxiꞌa ca biꞌiniha.

²² Atti bina ca benni ria lecabi Jesús seꞌe lheꞌe yiesi Jerusalén gue nu raca nía nna udhelhattebacabi Bernabé lheꞌe yiesi Antioquía.

²³ Atti chi bisínbi nía nna biláttebinbi tseeba anca nu run Tata Do Iyyabaaha len ca biꞌiniha. Laniala nna bedaca lebi de reꞌoba lebi gue ca biꞌiniha. Lenla nna belisabi iyába ca biꞌiniha rábi cabi: “Ttu tsa oquinna iquicabi itú iqui itú lecabi tsia lecabi Jesús.”

²⁴ Cumu Bernabé ancabi ttu benni tsee, yuꞌu Espíritu gue Tata Do Iyyabaaha itúba lheꞌe cuerpu guebi lhe ancabi ttu benni ria tsitsi lebi Jesús lhe. Larcala ixeru benni bedaxxucana neda gue Benni bananie ri-na.

²⁵ Dequide lania nna güiatteba Bernabé deca lheꞌe yiesi Tarso guatilabi Saulo.

²⁶ Atti guatiꞌabi biꞌiniha nna bechettebabi biꞌiniha deca lheꞌe yiesi Antioquía. Nía bisácabi ttu ida leni ca benni ria le Jesús seꞌe nía, güeleꞌeni ixe ca benni. Lheꞌe yiesi Antioquía nua primerba utta lá ca benni ria le Jesús: “Ca Benni Gue Cristu”.

²⁷ Laniaguaba nua udá ttu chupa ca benni anca profeta lheꞌe yiesi Jerusalén diacabi lheꞌe yiesi Antioquía.

²⁸ Ttu ca biꞌiniha, biꞌini lá Agabo, udulíbi utixxiꞌabi ca tisa bete Espíritu gue Tata Do Iyyabaaha lenbi, labi nna rábi isía ttu ubina lheꞌe iyába ca yiesi seꞌe yies lo yu. Unnuha nua uca atti anca Claudio nu rinnabia.

²⁹ Laniala nna ca benni ria lecabi Jesús seꞌe lheꞌe yiesi Antioquía-na boquinnatteba iquicabi idhelha ttuttucabi cua teba guecabi leni ca benni ria le Jesús seꞌe lo yu gue Judea.

³⁰ Lenla nna udhelhacabi Bernabé lenbi Saulo guacaꞌancabi nua leni ca benni teru elha rieni guecabi anca nu lo gue ca benni ria le Jesús seꞌe nía.