Hechos 10 - Zapoteco de Aloápam

Pedro rixxiꞌabi gue Jesús lheꞌe yoꞌo gue ttu benni dittu lána Cornelio

¹ Udo ttu unbiyuu lheꞌe yiesi Cesarea lána Cornelio. Ancana nu banani ttu gayua (100) soldado te lácani Italiano.

² Lana lenna iyába ca benni seꞌe lheꞌe lisniha nna ancacana benni rudoru tisa gue Tata Do Iyyabaaha, tsitsiba ria lecani Benniha lhe. Cornelio nna satíaba rinnebi len Tata Do Iyyabaaha. Labi nna itú iqui itú lebi redá lebi rutebi nu reasani ca benni Israel bittu te guecani.

³ Ttu sá nna attiba tu retin tsunna ulha beleꞌenbi ttu nu beleꞌenbi. Nianna bilásabinbi ttu ingeli gue Tata Do Iyyabaaha uteꞌe lheꞌe yoꞌo atta dobiaha, ingeliha nna re: —¡Cornelio!

⁴ Cornelio nna siba bedobi, ttu lixxaba rugüiabi ingeliha. Itú rasbinbi unnaba tisabi rábi: —¿Bi raca lelu, tata? Ingeliha nna becabie re: —Tata Do Iyyabaaha chiba bieninie ca tisa rinnelu rulisa lue, chiguaba uxieba neda nu redá lelu rutelu leni ca benni bittu te guequinna lhe.

⁵ Nnanna nna udhelha nuxa tsia lheꞌe yiesi Jope saxxícana Simón biꞌini láguaba Pedro.

⁶ Nía dobi lheꞌe lisi ttu benni láguabana Simón nu rucusi ca yieti, nu do gaxxaba roꞌo indattooha.

⁷ Atti chi deyya ingeli unne len Cornelio nna uxttebabi chupa ca nu ttoꞌo lo sina rixuinbi lheꞌe yoꞌo guebiha, leni attu soldado guebi nu rinnetiaba lenbiha. Unnuha nna riaguaba le nua Tata Do Iyyabaaha.

⁸ Dequide utixxiꞌenbi ca nua iyába nu guatebi nna udhelhattebabi cana diacana lheꞌe yiesi Jope.

⁹ Betteyú sá nna attiba tu retin tsiꞌinu (12) ttu yuꞌuru ca nua neda diacana, atti chi deoba isíncana Jope, Pedro nna gopittebabi iqui yoꞌo atta dobiaha qui innebi leni Tata Do Iyyabaaha.

¹⁰ Labi nna bitunttebabi, nianna uquinbi gobi, ttiaca ttu runrucana elha go qui gobi nna labi nna beleꞌenbi ttu nu beleꞌenbi.

¹¹ Nianna bilenbi beali lo bea-na guadi attiba ttu lari nixula xica ittapa laduba roꞌoni dana iyinnana yies lo yu-ni,

¹² lheꞌe lariha nna yuꞌu iyáloba nimala sia ttapa niꞌa náni. Yuꞌuguaba belha raꞌaya lheꞌeni lo yu lhe nu sia xxilani requi lo bea-na lhe.

¹³ Nianna bieninbi tsiꞌi ttu Benni unnee re: —¡Pedro, udulí! Betti ca nu rilenlu na, uto.

¹⁴ Ttiaca Pedro nna becabittebabi rábi: —¡Bittu, tata! Ni ttu libe bittu chi utoa nu bittu gaꞌana gotu, nu anca tsiga lo cuinalu.

¹⁵ Ttiaca bedeyien dacabinbi tsiꞌi Benni unneha attu libe re biꞌiniha: —Nu chi beon Tata Do Iyyabaaha nari nna lärga dica gálu nua nu anca tsiga.

¹⁶ Beyonna liba libe uca anía nna lania liba beopi lariha deyyana lo bea-na.

¹⁷ Pedro nna dobabi richacha iquibi raquinbi: “¿Bi dia le nu beleꞌetia ni?” Attirba chi bisína ca unbiyuu udhelha Cornelio roꞌo yoꞌo atta dobiha, cumu chiba unnaba tisacana gaxa do lisi Simón.

¹⁸ Nianna unnettebacana rácana: —¿Si ni do Simón biꞌini láguaba Pedro?

¹⁹ Ttiaca Pedro chi dolabi rulaba lebi gue nu beleꞌenbiha, Espíritu gue Tata Do Iyyabaaha nna ráttebe biꞌiniha: —¡Begüiarga! Ni tsunna ca unbiyuu bisía-na reguilacan lu.

²⁰ Bedulí nna beadi tte. Bittu ulaba lelu aquinlu: “Bittu tsia lania ca unná cumu netiba udhelha ca unná.”

²¹ Pedro nna beadittebabi atta seꞌe ca unbiyuuha, ráttebabi ca nua: —Neti bunna benni reguilale-na. ¿Bi gue dale axta nii?

²² Ca nua nna becabicana rácana: —Niba datu udhelha Cornelio nu banani ttu gayua (100) ca soldadoha riꞌitu. Labi ancabi ttu benni tsee, nu ria tsitsi lebi Tata Do Iyyabaaha lhe iyába ca benni Israel rinne tseecana guebi. Ttu ingeli gue Tata Do Iyyabaaha re biꞌiniha gaxbi cuinalu lheꞌe lisbiha qui udo nagabi gue nu gálbi.

²³ Laniala nna bette Pedro ca nua lheꞌe yoꞌo atta dobiha. Níaba beꞌana ca nua la ulhaha. Betteyú dila liba nna dia Pedro lenbi ca nua. Diaguaba attu chupa ca benni ria lecabi Jesús seꞌe lheꞌe yiesi Jope lenbi.

²⁴ Betteyú liba bisíncabi lheꞌe yiesi Cesarea. Níaba chi do Cornelio ribedabi cabi. Labi nna chi uxbi ca benni datíabi lhe ca benni seꞌe tsee lenbiha lhe.

²⁵ Atti chi bisína Pedro roꞌo yoꞌoha nna Cornelio nna biríattebabi guatsábi biꞌiniha. Nianna bedútteba xibibi lo Pedro, atti diattebabi utsá lobi biꞌiniha.

²⁶ Ttiaca Pedro nna bodhulíttebabi biꞌiniha, nianna rábi: —¡Bedulí! Cumu attiguaba ancalu benni, anáguaba anca neti.

²⁷ Laca rinne Pedro leni Cornelio nna utaꞌattebacabi lheꞌe yoꞌoha. Nía bilenbi ixeru ca benni chi seꞌe.

²⁸ Pedro nna ráttebabi cana: —Lebiꞌi nna gua yubale, ca ley guetu-na bittu rugüelhacana ttu benni Israel iselana ca nu dittu o gaꞌana lheꞌe lisi ca nua lhe. Ttiaca Tata Do Iyyabaaha nna chi utixxiꞌe leni nu benie beleꞌetia, neti nna bitturu dica quixxa lá ca benni bittu anca benni Israel nu anca satsa, o nu anca tsiga lo Tata Do Iyyabaaha lhe.

²⁹ Larcala atti bisía ca unní rácana neti: “Dhalu tsiari”, tsa lägabi bedú neti tisa lo ca unní, datteba lania cana. Nnanna nna raca lasia quixxiꞌale, ¿bi gue uxle neti?

³⁰ Cornelio nna becabittebabi rábi: —Chi uca ttapa ubisa nua, attiba tu ura-ni nua rea lheꞌe yoꞌo quia-ni rutte ubina lheꞌa. Nianna rinnea leni Tata Do Iyyabaaha attiba labitu runitu retin tsunna ulha. Attirba chi beleꞌetia ucaxxe ttu benni nucu xo raca la guee.

³¹ Nianna re neti: “Cornelio, Tata Do Iyyabaaha chiba bieninie ca tisa rinnelha. Chiguaba uxieba neda nu redá lelu rutelu leni ca benni bittu te guequinna lhe.

³² Nnanna nna udhelha nuxa tsia lheꞌe yiesi Jope qui saxxícana Simón biꞌini láguaba Pedro. Nía dobi lheꞌe yoꞌo gue ttu benni láguaba Simón, nu rucusi ca yieti, do gaxxaba roꞌo indattooha.”

³³ Anía uca nna udhelhatteba ca benni betetilacan lu. Lu nna tseeba benlu dattebalu. Nnanna nna niba seꞌe iyátu lo Tata Do Iyyabaaha. Raca letu udo nagatu iyá nu chi rá Benniha lu quixxiꞌenlu riꞌitu.

³⁴ Laniala nna udulo Pedro unnebi rábi: —Nnanna liba chi radú lasia, Tata Do Iyyabaaha nna lägabi rugüia Benniha ttixa anca ttu ttu benni, ttulapaba racanie gue iyába benni.

³⁵ Benni seꞌe lheꞌe gaxaba yiesi, radi le Ben-na acacana benni guee, ladiba tsia lecani Ben-na lhe uncana nu dica ixuu lhe.

³⁶ Tata Do Iyyabaaha unnee len riꞌitu ca benni Israel, utixxiꞌenie riꞌitu ca tisa rixxiꞌa gue ttu nu tsee, delába iyába ca benni gansi tsia lecani Jesucristu Benni anque Benni banani iyárecha ri nna eyacatseecana leni Tata Do Iyyabaaha.

³⁷ Lebiꞌi nna gua yuxeabale gue nu uca itúba lo yu gue Judea udulona daca lo yu gue Galilea, dequide atti chi utixxiꞌani Juan ca benni dequi raca duelha gadicana inda.

³⁸ Anáguaba gua yubale, Tata Do Iyyabaaha betee Espíritu guee leni Jesús gue Nazaret, benie aca Benniha Benni ra xxeni leni lhe guayúguabale benniha nna güequie benie nu anca tsee, beonie ca nu ruyúcana elha disa de yuꞌu be xxegüi lheꞌe cuerpu guecani lhe. Iyá bunni benie cumu Tata Do Iyyabaahaba due len Benniha.

³⁹ Riꞌitu ancatu benni begüia lotu iyába nu beni Benniha atti güequie daca lo yu gue Judea, daca lheꞌe yiesi Jerusalén lhe. Dequide nua nna betticane betácane lo ttu ya crusi.

⁴⁰ Ttiaca Tata Do Iyyabaaha nna benie beaquin Benniha dequide beyonna ubisa. Nianna benguabe beleꞌen lo Benniha riꞌitu lhe.

⁴¹ Läga leni iyá benni beleꞌe lo Benniha, sunruba len riꞌitu, cumu riꞌitu ancatu benni becuee Tata Do Iyyabaaha boseꞌe qui ugüia lotu nu aca. Riꞌitu uto lentue lhe uꞌuyatu inda lenie lhe dequide beacanie.

⁴² Nnanna nna udhelhe riꞌitu qui tsequitu quixxiꞌentu ca benni lee nua bodú Tata Do Iyyabaaha aque xueda gue ca benni bani lhe gue ca benni yatti lhe.

⁴³ Iyába ca benni uca profeta chi utixxiꞌacabi gue Jesús rácabi leni nu sate Benniha lo ya crusiha nna iyába ca benni tsia lecani Benniha gatta elha xen lasi gue ca tulha chi bencana.

⁴⁴ Sna duba Pedro rinnebi nna attirba chi bisía Espíritu gue Tata Do Iyyabaaha uyuꞌe lheꞌe itúba cuerpu gue iyába ca benni seꞌe güedo naga ca tisa rinne biꞌiniha.

⁴⁵ Ca benni Israel ria le Jesús daa len Pedro nna rebanbaquinbi biláquinbi ruteguaba Tata Do Iyyabaaha Espíritu guee leni ca benni bittu anca benni Israel,

⁴⁶ cumu rienquinbi rinne ca biꞌiniha ca tisa subi rácabi: “¡Xxeni ra le Tata Do Iyyabaaha!”

⁴⁷ Laniala nna unne Pedro rábi: —¿Nútteba usunana gadi ca biꞌini inda? Nnanna chiba uxí ca biꞌini Espíritu gue Tata Do Iyyabaaha attiba chi uxíri Ben-na.

⁴⁸ Laniala nna beni Pedro mandadu gadi ca biꞌiniha inda, atti gadicabi inda nna etti lá Jesús Benni bananie ri. Dequide unnuha nna unnabacabi leni Pedro eyaꞌanbi attu chupa ubisa lencabi.