Hebreos 8 - Zapoteco de Aloápam

Jesús anque bixxudi xeni gueri

¹ Nu xxenru gue delo iyá nu datu rixxiꞌatu-ni nna ancana: Benni anque bixxudi xeni gueri-na anque Benni doe iyyabaaha daca ladu derechu gue Tata Do Iyyabaaha Benni ra xxeni lee-na.

² Lee anque bixxudi runi sina lheꞌe cuinaga yotu do iyyabaaha, yotu nu bedo Tata Do Iyyabaaha, bittu nu bedo ca benni seꞌe yies lo yu-ni.

³ Cumu iyába ca bixxudi xeniha beseꞌecabi qui utecabi úna leni Tata Do Iyyabaaha, qui uttecabi bela gue ca nimala rutticabi lo becoa gue Ben-na lhe. Denuala nna raca duelha uteguaba Jesús Benni anque bixxudi xeni gueri-na úna.

⁴ Ttirca sna dobe yies lo yu-ni nna läga aca Benniha bixxudi, cumu sna seꞌeba bixxudi rutecabi úna attiba rába lo ca ley bocaꞌana Moisés.

⁵ Ca bixxudiha nna runcabi sina lheꞌe yotu do yies lo yu-ni benni anca lixxina anca atti anca cuinaga yotu do iyyabaa. Cumu atti chi dia Moisés unbi yotu uca len lariha nna Tata Do Iyyabaaha re biꞌiniha: “Begüia, beni yotu-na attittiga anca nu beleꞌetia lu lo lhilhi-na.”

⁶ Ttiaca nnanna sina bodhaꞌan Tata Do Iyyabaaha uni Jesús Benni anque bixxudi xeni gueri-na anca tseeru atti sina beni adí ca bixxudiha. Cumu Ben-na ribea loe gue ca tisa teru lidhacaque chi bocaꞌan tsitsi Tata Do Iyyabaaha len ca benni, atti ca tisa bodhaꞌane leni Moisés. Lee nna re utee ttu nu tseeru lenri.

⁷ Cumu ttirca ancaba idaꞌa ca tisa bodhaꞌan Tata Do Iyyabaaha len ca benni Israel primeroha nna lania nna lärga birua raca duelha odhaꞌan Ben-na tisa berupa-na.

⁸ Ttiaca Tata Do Iyyabaaha guaxxaque bittu run ca benni nu dica uncana. Denua nna rinne lo ca sitsi guee-na rá: Aní rá Benni bananie le-na: “Isía sá atti odhaꞌana attu tisa cubi len ca benni datía biꞌini lá Israel, len ca benni datía biꞌini lá Judá lhe.

⁹ Tisa cubi odhaꞌana len ca nua nna läga anque loesi tisa bodhaꞌana len ca benniola guecaniha la sá atti bedaxxua nácani qui bebeaya cana las ná ca nu Egiptoha. Ttiaca lacana läga bedocana tisa gue tisa bodhaꞌana len lacana, larcala bedhá iquia cana”, rá Benni bananie ri-na.

¹⁰ Unní tisa cubi odhaꞌana len ca benni Israel-na ca sá chi daba isía, rá Benni bananie ri-na: “Neti nna unia qui eyaꞌan ca ley quia-ni lheꞌe iquicani, odhaꞌana que lheꞌe lastoocani lhe. Neti nna aca Dios guecani, lacana nna acacana benni quia.

¹¹ Lania nna lärga birua raca duelha uleꞌeni ttu benni attu benni, niguaba benni lo yies gueniha lhe niguaba betsiniha lhe innena gána nua: Raca duelha unbialu Benni bananie ri-na, cumu iyába benni unbiacana neti, desdeba nu anca unto chicaꞌa axtaba benni chi anca benniola.

¹² Neti nna dhia elha xen lasi gue ca tulha guecani, tsa bitturu exxa lasia gue nu lä anca tsee bencana.”

¹³ Atti rinne Tata Do Iyyabaaha re odhaꞌane attu tisa cubi, lania rixxiꞌecuabe ca tisa bodhaꞌane primeroha de chi uxxuque. Cumu nu chi uxxuha nna chitteba deoba ttuana.