Hebreos 6 - Zapoteco de Aloápam

¹ Larcala nna chinca ocaꞌanri nu ruꞌuri rinneri gue ca tisa gue Cristu bidetiri primeroha, usiguilari tseꞌe tsitsiri lo neda gue Ben-na. Bitturu eyequiri ededulori edeguixxiꞌen loesri gue nu chi beleꞌequinna riha, delába gue gaxasná oduxiyyanri gue nu lä anca tsee benriha, gue gaxasná uxxen leri Tata Do Iyyabaaha lhe

² gue gaxasná dica gadiri inda lhe gue nu ruxxúa nári iqui ca benni ria le Jesús lhe gue eyacacani ca nu yatti-na lhe gue elha disa ute Tata Do Iyyabaaha ttu dia liiba gue ca nu te tulha guecani lhe.

³ Anába bittu usiguitu uleꞌentu le, gansi Tata Do Iyyabaaha aca lee.

⁴ Cumu ca benni chi rudani xieni gue Tata Do Iyyabaaha lheꞌe lastoocani, chi bedí baacana nu tsee bete Tata Do Iyyabaaha lencana lhe chi uxícana Espíritu gue Tata Do Iyyabaaha lhe

⁵ chi uxícana baneda ca tisa gue Tata Do Iyyabaaha lhe chi yucana gue gaxasná innabie leni elha ra xxeni le guee lheꞌe ca sá chi daba isía lhe

⁶ ca benni-ni nna gansi udhancana tsia lecani Cristuha, lärgaga aca eyequicana odaxxucana neda gue Ben-na attu libe, cumu attisiba cuinaba lacana rotácana xiꞌini Tata Do Iyyabaaha lo ya crusiha attu libe, runcana rettuni Benniha aní lo iyá benni lhe.

⁷ Cumu ca benni ria le Tata Do Iyyabaaha ancacana attiba lo yu nu riꞌa itúba inda gue iyya raca balhaxaba libe lo-ni. Lo yuha nna tseeba lena bani rutena gue ca nu ribeni sina loniha, guaridibacana elha tsee rute Tata Do Iyyabaaha.

⁸ Ttiaca gansi lo yuha nna suna yitsiba lhe bibuba lhe reꞌeyu loni, unnuha nna tsa lägabi ixuu nua. Chiba daa ribigana gue lo yuha dhona gui qui ttu tsaba itena.

⁹ Ttiaca lebiꞌi ca benni raquintu gueni, masquiba rinnetu rátu le aná, yuxeabatu lebiꞌi nna tseeba salíana le, godilába Tata Do Iyyabaaha le lhe.

¹⁰ Cumu Benniha nna anque Benni runi nu anca tsee. Läga ixulhin Ben-na gue nu tsee chi benle, niguaba gue nu runle yuda adí ca benni chi anca gue Ben-na lhe. Atti runle aná nna ruleꞌe lole raquinle gue Tata Do Iyyabaaha, anába diabale runle axta nnanna lhe.

¹¹ Riꞌitu nna tsitsiba nu runtu cua ttuttule itú iqui itú lele usiguile unle aná axta liba isía sá aca idaꞌa iyá. Anía liba nna dhíle iyáxea nu chi xen lele dhíle.

¹² Bittu raca letu acale nu lea, nu unlale nna gualunla atti beni ca benni bexxen lecabi Tata Do Iyyabaaha. Ca biꞌiniha nna läga bedilrecabi, uledabacabi dhicabi nu chi rá Tata Do Iyyabaaha utee lencabi.

Uxxen leri gue ca tisa bodhaꞌan tsitsi Tata Do Iyyabaaha

¹³ Tata Do Iyyabaaha nna atti bodhaꞌan tsitsie tisa guee leni Abraham, la labe bedetti lee cumu nutturu attu nu ra xxeni leni do atti lee,

¹⁴ nianna re: “Gualíbatia, neti nna aca tsitsia lania lu, unia tseꞌe ixe tsitsia ca benni datíalu lhe.”

¹⁵ Larcala nna uledaba Abraham, tsa läga guaxxaquinbi. Anía liba nna uxíbi nu chi rá Tata Do Iyyabaaha utee lenbi.

¹⁶ Gansi chi rugüe ca benni tisa uncana ttu bixa, lania nna rudetticana lá ttu benni ra xxeni ru leni atti lacana qui reꞌan tsitsi tisa chi begüeecanaha. Anía liba nna bittu teni benni bixarua innána.

¹⁷ Denua nna bedetti Tata Do Iyyabaaha lee atti bocaꞌan tsitsie tisa chi begüee, cumu uca lee ttedaani ca benni dhi nu utee len lacana, lee nna tsa läga otsie nu chi re, guadúbe unie nua.

¹⁸ Cumu Tata Do Iyyabaaha nna tsa läga run lee, runbe nu chi re unie. Denuala nna bocaꞌan tsitsi tisa guee atti bedetti lee qui begüee lidhaca nu chi re. Larcala nna chi tee ttu elha xen lasi xeni gueri, riꞌi ca benni chi seꞌe len Ben-na qui redí redenie ri. Anáguaba, tsaba chi xen leri guadíbari nu chi re utee lenri.

¹⁹ Nu xxen leri dhíri-na ancana nu runi seꞌe tsitsiri lo neda gue Tata Do Iyyabaaha, unná ancana attiba ttu iyya lána ancla do lo tuu gue ttu barco nu tsitsiba riadana lheꞌe indattoo qui bittu ita barcoha. Aníaguaba riꞌi nu xxen leri dhíri-na dia lenna ri lo Tata Do Iyyabaaha benni do cuꞌe lari daa lheꞌe yotu do iyyabaaha.

²⁰ Cuꞌe lariha nua utaꞌa Jesús qui udhalie neda gueri. Benniha nna beꞌeyue uque bixxudi xeni do ttu dia liiba, loesi bixxudi uca Melquisedec.