Hebreos 5 - Zapoteco de Aloápam

¹ Cumu iyába ca benni raca bixxudi xeni, lheꞌe ca benni seꞌe yies lo yu-niba ribe ca biꞌiniha qui realha ladibi. Labi nna rutsá dubi ca benni lo Tata Do Iyyabaaha, rutebi úna gue ca benni lo becoa gue Ben-na lhe ruttebi bela gue ca nimala rute benni lo becoa-na lhe aníaliba nna ridí Tata Do Iyyabaaha elha xen lasi gue ca tulha gue ca benni.

² Bixxudi rinnabia xeniha nna ancaguabi benni ruxunnina guebi unbi nu lä anca tsee. Denuala nna ancabi nu ratúa lebi ca benni requi runi nu bittu anca tsee, de ancacana nu bittu te elha rieni guecani.

³ Lo niꞌa gue unnuha nna labi nna daa lobi uttibi nimala qui utebi úna gue ca tulha guebi, attiguaba runbi gue ca tulha gue adí ca benni.

⁴ Tsa läganu benni tee aca guebi titúbabi ogalha ladibi acabi bixxudi xeni. Tata Do Iyyabaaha liba rucue nua rogalhe ladini, attiba benie len Aarón lalibe bodúe biꞌiniha qui ucabi bixxudi xeni.

⁵ Anáguaba Cristu, läga titú Benniha bedúe aque bixxudi xeni, sinuqui Tata Do Iyyabaahaba bodúe Ben-na, lee nna re Jesús: Lu ancalu Xiꞌinia, nasá rixxiꞌaya, neti anca tata guelu.

⁶ Ráguaba Tata Do Iyyabaaha Jesús attu re lo ca sitsi guee-na: Lu nna ttu dia liiba acalu bixxudi, loesi bixxudi uca Melquisedec.

⁷ Atti udo Cristu yies lo yu-ni itú ribesbe unnee itú iqui itú lee unnabe lo Tata Do Iyyabaaha re Ben-na: “Bodilá chi neti lo elhuttiha.” Cumu sunruba Tata Do Iyyabaaha anque Benni ra xxeni lee guaca guee unie nu rinnaba Benniha. Tata Do Iyyabaaha nna bienbanie gue Ben-na cumu anque Benni rudo tisa.

⁸ Masquiba anca Cristu xiꞌini Tata Do Iyyabaaha, labíaba guate biyúe elha disa. Aníaliba nna cuinaga lee uque benni biyúe gue gaxasná anca dho tisa,

⁹ dequide uluxani Jesús iyá nu anca unie, lania nna beꞌeyue uque benni utee elha nabani gatta ttu dia lii gue iyába ca benni rudo tisa guee,

¹⁰ cumu Tata Do Iyyabaaha bodúe Ben-na aque bixxudi xeni attiba Melquisedec.

Nu sate benni gansi udhanna tsia leni Jesús

¹¹ Gue nu rátu-ni nna ixeba nu te innátu, ttiaca tsitsiba anca quixxientu le-na, cumu de ancale nu bittu rudo nagani gue nu rátu.

¹² Delo toná chi anca ria lele Jesús, lebiꞌi nna benni ruleꞌe nu rá ca tisa gue Ben-naba rána chi ancale. Ttiaca lebiꞌi nna sna reasabinle quixxiꞌa dacabintu le attu libe gue gaxasná dhu lo benni tsia leni Tata Do Iyyabaaha. Attiba ttu unto chicaꞌa reasinna xisi, cumu bittu chi dica gona elha go.

¹³ Iyába ca nu anca attiba unto reasani xisi, bittu rite daaquinna gue gaxa tee nu anca tsee lhe nu bittu anca tsee lhe.

¹⁴ Ttiaca ca benni chi seꞌe tsitsi lo neda gue Tata Do Iyyabaaha nna elha goba chi ralhacabi gocabi, lacabi nna chi raca guecabi ritsatsa niꞌacabi, cumu chi anca biaquinbi ga te nu anca tsee lhe ga te nu bittu anca tsee lhe.