Hebreos 3 - Zapoteco de Aloápam

Jesús anque benni ra xxenru lee atti Moisés

¹ Larcala nna ca benni ria le Jesús chi seꞌe riesi anca gue Tata Do Iyyabaaha, ca benni sela len ca benni uxi Ben-na qui acacabi guee, gualorexxa tsee lele, Jesucristuha anque bixxudi xeni rinnabia, apóstol gue ca tisa ria leri-ni lhe.

² Jesús anque Benni rudo tisa gue Tata Do Iyyabaaha benni bodúe Ben-na qui rixuue lo sina guee, attiba Moisés ucabi benni bedo tisa lo sina gue Tata Do Iyyabaaha, labi nna biyúbi iyába ca benni gue Ben-na.

³ Ttiaca Jesús anque Benni ralharue cue xenie atti Moisés, attiba ttu benni runi ttu yoꞌo, ribequi xenru benni nu runi yoꞌoha attichula yoꞌoha.

⁴ Iyába ca yoꞌo-na seꞌeba nu benna cana, ttiaca Tata Do Iyyabaaha anque Benni beni iyáxeaba nu seꞌe.

⁵ Moisés ucabi benni bixuu lo sina gue Tata Do Iyyabaaha, labi nna tsitsiba bedobi tisa, biyúbi ca benni gue Ben-na, labi nna sunruba ucabi ttu benni bixuu qui utixxiꞌenbi ca benni gue nu inná Tata Do Iyyabaaha.

⁶ Ttiaca Cristuha nna anque Xiꞌini Tata Do Iyyabaaha, lee nna tsitsiba rape ca benni gue Ben-na. Riꞌi ancari ca benni gue Tata Do Iyyabaaha ladiba gansi guaseꞌeri ruxxen leri itú iqui itú leri guadíbari nu seꞌeri ribedariha, gansi guaseꞌeri redaca leri de dhíri nua lhe.

Tata Do Iyyabaaha chi begüee tisa etaꞌari atta edí leri

⁷ Denuala nna rá Espíritu gue Tata Do Iyyabaaha: Gansi nasá iyieninle tsiꞌi Tata Do Iyyabaaha innee,

⁸ bittu un diti lastoole aquinle lä tsiaba lele gue Ben-na, unle attiba ben ca benni datíale atti useꞌecana lo yu bisiha. Lacana nna beseꞌe disacana lo Ben-na.

⁹ Nía uluꞌubia ca benniola gueleha neti, masquiba biláquinna ca milagru benia delo chua (40) ida.

¹⁰ Larcala nna bisaꞌatia lencana, nianna ria: “Ca unní nna satíaba rulaba lecani gue attu nu subi, tsaba bittu raca lecani uncana nu raca lasia.”

¹¹ Denuala nna nuarca bisaꞌatia begüeea tisa ria: “Tsa bittu etaꞌacana atta chi gaꞌanatia tseꞌecana edí lecani.”

¹² Ca benni ria le Jesús gualdo cuidadu qui bittu aca ni ttule nu lä re latti leni, nu bittu ria leni Tata Do Iyyabaaha benni doe banie lhe cumu unná uni iriesle Ben-na.

¹³ Nu unlale nna ttu ttu sá gualuttipa le loesle, nasá laca sna seꞌe banrule qui bittu ixúyiele unle nu lä anca tsee, lania nna eyaca le nu anca lastooni diti bitturu tsia lele gue Tata Do Iyyabaaha.

¹⁴ Cumu gansi tseꞌe tsitsiri bittu udhanri uxxen leri Ben-na attiba xen lerie atti primerba güia lerie axta atti isía sá lhuxaha, lanialiba nna guancari benni sela edíbaa iyába nu anca gue Cristuha.

¹⁵ Gualorexxa lele nu rá lo ca sitsi gue Tata Do Iyyabaaha: Gansi nasá iyieninle tsiꞌi Tata Do Iyyabaaha innee ulise le, bittu un diti lastoole aquinle lä tsiaba lele gue Ben-na, unle attiba beni ca benni useꞌe atti nía, lacana nna beseꞌe disacana lo Ben-na.

¹⁶ ¿Nú benni nua, dequide bienquinna unne Tata Do Iyyabaaha, nianna bittu uca lecani udocana tisa guee? ¿Si läba ca unnuha nua ca benni bebea Moisés lo yu te láni Egiptoha?

¹⁷ ¿Nú leni nua bisaꞌani Tata Do Iyyabaaha chua (40) ida? ¿Si läba len ca nu beni nu lä anca tseeha nua bisaꞌanie? Ca unnuha nna níaba utticana lo yu bisiha.

¹⁸ ¿Nú len nua begüee Tata Do Iyyabaaha tisa bittu etaꞌacana lo yu atta chi gaꞌananie edí lecani? ¿Si läba ca nu lä bedo tisaha nua re anía?

¹⁹ Gualíba, läga betaꞌacana atta edí lecani cumu de bittu güia lecani gue Tata Do Iyyabaaha.