Hebreos 2 - Zapoteco de Aloápam

Ttu elha tsee xeni anca rodilá Tata Do Iyyabaaha ca benni

¹ Larcala nna raca duelha tsitsiru udo nagari gue nu chi bieninri gue ca tisa gue Xiꞌin Tata Do Iyyabaaha qui bittu iriesri lo neda gue Ben-na.

² Cumu ca tisa bodhaꞌan Tata Do Iyyabaaha udori tisa gueque, ca benni utixxiꞌa ca ingeli-na, ucaque tisa bixuu nu ráque. Larcala ca benni bittu bedo tisa gue nu rá ca tisaha nna uxíbacana elha disa ralhacana dhicana,

³ gansi anía uca, riꞌi nna tsa läga lhári lo elha disa ute Tata Do Iyyabaaha gansi bittuba etábinri gue elha tsee xeni chi rá Ben-na unie len riꞌi de odile ri lo ca tulha gueri. Gue unní nna cuinaba Jesús Benni bananie ri-na utixxiꞌe ca tisa-na, lenla nna utixxiꞌaquin ca benni bina nu rá Ben-na ri, rácabi ri: “Gualíba nu rá Benniha.”

⁴ Güeaniba benguaba Tata Do Iyyabaaha ixe loba ca milagru lhe ca nu runi ebanin benni lhe betee Espíritu guee-na lenri lhe qui iyába unní beleꞌe lo gualíba nu rá ca tisa guee-na.

Jesús uque benni attiba ancari

⁵ Tata Do Iyyabaaha nna läga bocaꞌane las ná ca ingeli-na qui innabiacabi yies lo yu cubi nu chi daba isía, gue yies lo yuha unní nu rinneri nnanna.

⁶ Tiaca lo ttu ca sitsi gue Tata Do Iyyabaaha rinne ttu benni rábi Ben-na: ¿Titialiga xeni ra le ca benni seꞌe yies lo yu-ni nuarca rexxa lelu cana? ¿Si daca lhabacana nuarca rexxattinlu cana balaꞌana?

⁷ Lu nna benlu uca ca benni nu ra güexxaru leni atti ca ingeli-na. Ttiaca luguaba benlu acacana nu ra xxeni leni, nu innabia iyáxeaba nu benlu lhe.

⁸ Iyába bocaꞌanlu las ná qui innabiacana. Larcala nna iyáxeaba chi bocaꞌan Tata Do Iyyabaaha las ná ca benni qui innabiacana, tsa lägabi bocaꞌane lä betebe lencana qui innabiacana. Ttiaca gualíba, axta nnanna lägabi chi rilenri udo iyáxea nu te tisa guecani.

⁹ Ttiaca nnanna rilenri Jesús benni ulhidagaa Tata Do Iyyabaaha lee a saroꞌotte güexxa atti ca ingeli-na, nnanna nna anque benni ra xxeni lee lhe Benni rapari respeto lhe de nu guate lo ya crusiha. Aníaba beni Tata Do Iyyabaaha cumu besiꞌinie ri, nuarca udhele Benniha qui uttie cuenta gue iyáxeari.

¹⁰ Iyába nu seꞌe Tata Do Iyyabaahaba benie qui seꞌe-na, guebe ancacana lhe. Larcala nna tseeba anca len Tata Do Iyyabaaha udhelhe Jesús yies lo yu-ni, Benniha nna guate biyúe elha disa. Cumu aníaliba nna belhuxe iyába nu chi gaꞌananie unie. Aníaba beni Tata Do Iyyabaaha qui bodilá Jesús ca benni anca xiꞌini Ben-na. Análiba nna ixeru benni edíbaacabi elha ra xxeni lee gue Tata Do Iyyabaaha.

¹¹ Cumu Jesús lenie ca benni chi seꞌe riesi anca gue Tata Do Iyyabaaha leni ca benni reonie nari, la ttuba xiꞌini Tata Do Iyyabaaha ancaque. Larcala läga rettuin Jesús atti re ancari betsie.

¹² Lo ca sitsi gue Tata Do Iyyabaaha-na rinne Jesús re Ben-na: Neti quixxiꞌatia ca betsia-na qui unacana gue nuxa anca cuinalu-na lagüi gue ca benni seꞌe ribequi xencana lu ulha guelu lhe.

¹³ Ráguabe: Neti nna uxxenba lasia Tata Do Iyyabaaha. Unneguabe attu libe re: Niba dua len ca xiꞌini Tata Do Iyyabaaha, ca benni chi bocaꞌane las náya.

¹⁴ Larcala nna de anca ca xiꞌini Tata Do Iyyabaaha seꞌe yies lo yu-ni benni anca leni reni lhe bela lhe anáguaba Jesús ucaguabe benni anca len bela lhe reni lhe qui uca uttie, cumu leni nu guate Benniha lo ya crusiha liba nna beduye nu rinnabiana elhutti-na, unnuha nua nu xxegüiha.

¹⁵ Sunruba aná uca bodile iyába ca benni seꞌe rasini lo elhuttiha, ca nu tu ttuba seꞌecana yies lo yu-ni ancacana attiba nu ttoꞌo lo sina gueni.

¹⁶ Cumu gua yubari läga ca ingeli-na bita Jesús betenie yuda, ca benni datía Abraham liba bita Ben-na betenie yuda.

¹⁷ Denuala nna labíaba uque Benni attiga ancari riꞌi ca benni raca betsie, aníaliba nna beꞌeyue uque lo Tata Do Iyyabaaha ttu bixxudi xeni rinnabia, bixxudi ratúa lee lhe bixxudi rudo tisa lo sina gue Tata Do Iyyabaaha lhe. Aníaliba nna qui utixe gue ca tulha gue ca benni de belalie reni guee lo ya crusiha.

¹⁸ De anáguaba Benniha cuinaga lee biyúe elha disa atti uxaca be xxegüiha dhiyiene unie nu lä anca tsee, larcala nna güedí güedenbe ca benni ruxunnina guecani ixúyiecana uncana nu lä anca tsee.